Ko Mungachite Tani Kuti Mukhale Shamwali Wa Mulungu?

1, 2. Ko nimbani womwe enze azishamwali wa Yahova?

KO NI mbani yemwe mungafune kuti akhale shamwali wanu? Imwepo mungakonde munthu yemwe vochita vake muchakondwera navo. Mungasalule yemwe anamakhalidwe yabwino yomwe imwepo muchayasirira.

² Yahova Mulungu adasalula wanthu anango kuti akhale azishamwali wake. Mwakulinganiza, Abulahamu wenze m’bodzi wa azishamwali wa Yahova. (Yesaya 41:8; Yakobo 2:23) Yahova angakonda soti Davide, ndipo iye adanena kuti Davide wenze ‘munthu wapamoyo pake.’ (Machitidwe 13:22) Ndipo mneneri Danieli wenze ‘munthu wakukondewa maninge’ na Yahova.​—Danieli 9:23.

3. Ndawa chani Abulahamu, Davide na Danieli adakhala azishamwali wa Yahova?

³ Ko nchani chidathandiza Abulahamu, Davide na Danieli kuti akhale azishamwali wa Yahova? Yahova adawuza Abulahamu kuti: ‘Iwepo wabvera mawu yangu.’ (Genesis 22:18) Yahova adakhala azishamwali kwa wale womwe mwakudzichepesa angamubvera. Khaindi iliyose ya wanthu ingakhale azishamwali wake. Yahova adafotokozera khaindi ya Aizirayeli kuti: ‘Mukabvera mawu yangu, inepano nidzakhale Mulungu wanu, ndipo imwepo mudzakhale wanthu wangu.’ (Yeremiya 7:23) Peno imwepo muchada kukhalambo shamwali wa Yahova, muchadikana kumbamubvera.

YAHOVA ACHATETEZA AZISHAMWALI WAKE

4, 5. Ko Yahova achateteza tani azishamwali wake?

⁴ Baibolo ichalewa kuti Yahova achafaga-faga njira zakuti ‘awonese mphanvu zake kwa wanthu womwe moyo wawo niwakudzipereka kwa iye.’ (2 Mbiri 16:9) Pa Salimo 32:8, Yahova adapolomisa azishamwali wake kuti: ‘Nidzakupaseni nzeru na kukuwuzani njira yakudikana kuti mufambemo. Nidzakupaseni malangizo na kukunyang’anirani.’

⁵ N’zondi wathu yemwe ni wamphanvu maninge achada kutilekesa kukhala pawushamwali na Mulungu. Koma Yahova achada kutiteteza. (Lewengani Salimo 55:22.) Pakuti ndise azishamwali wa Yahova, tichamutumikira na moyo wathu wose. Tichakhala wakukhulupirika kwa iye olo pamabvuto. Ndipo ise tinachitsimikiziro ninge chomwe wamasalimo wenze nacho. Iye adanemba kuti: ‘Pakuti ali kudjanja yangu yamakulu, nidzagunduzikelini.’ (Salimo 16:8; 63:8) Ko Satani achachita chani pakuda kuti Mulungu aleke kukhala shamwali wathu?

VOMWE SATANA ADALEWA

6. Ko Satana achawanamizira chani wanthu?

⁶ Mu msolo 11 tidapfunzira kuti Satana adaderera ulamuliro wa Yahova ndipo adanena soti kuti Yahova ni wabodza nakuti alibe chilungamo. Iye adalewa kuti vidakakhala bwino maninge Yahova adakawapasa Adamu na Hava mwayi wakuti ambasalule wokha vinthu vomwe ankuwona kuti nivabwino panango ni voyipa. Bukhu ya Yobu ichatipfunzisa momwe Satana achanamizirira wanthu womwe achada kukhala azishamwali wa Mulungu. Satana achalewa kuti iwo achatumikira Mulungu ndawa ya vinthu vomwe iwo achapasiwa na iye, osati ndawa ya kumukonda. Satana achalewa soti kuti angakwanise kulekesa aliyese kukhala shamwali wa Mulungu. Naboni tiwone vomwe tingapfunzire kuchokera kwa Yobu na momwe Yahova adamutetezera.

7, 8. (a) Ko Yahova angamuwona tani Yobu? (b) Ko Satana adalewa kuti Yobu angatumikira Mulungu ndawa ya chani?

⁷ Ko Yobu wenze mbani? Yobu wenze mwamuna wabwino moyo yemwe adakhalako magole 3.600 kumbuyo. Yahova adalewa kuti panthawe mwiyo penze palibe mwamuna wakulingana na iye padziko yapasi. Yobu angalemekeza Mulungu, ndipo angaipidwa na vinthu voyipa. (Yobu 1:8) Shuwadi, Yobu wenze pawushamwali wakulimba na Yahova.

⁸ Satana adanena kuti Yobu angatumikira Mulungu ndawa ya dyera. Satana adawuza Yahova kuti: ‘Ko imwepo mulibe kumupasa vinthu vabwino? Mwadzadza nyumba yake na vinthu vabwino, mwamupasa chilichose chomwe achada pamoyo wake. Mwadalisa soti basa yake, mwaviwandisa vipfuwo vake padziko yapasi. Manje imwepo pfuthulani djanja yanu na kudzonga vose vomwe anavo, ndipo muwone, akutukwaneni m’maso muli gwa!’​—Yobu 1:10, 11.

9. Ko Yahova adabvumiza Satana kuchita chani?

⁹ Pamwapa Satana angathandawuza kuti Yobu angatumikira Yahova ndawa ya vinthu vabwino vomwe adapasiwa. Satana adalewa soti kuti angakwanise kumulekesa Yobu kutumikira Yahova. Koma Yahova adatsutsa vimwevi, ndipo adabvuma kuti Satana amuyese Yobu na chakulinga chakuti vidziwike kuti Yobu angatumikira Yahova ndawa yakumukonda panango neye.

MOMWE SATANA ADADZUDZIRA YOBU

10. Ko Satana adamuyesa tani Yobu, ndipo Yobu adachita chani?

¹⁰ Chakuyamba, Satana adachitisa kuti vipfuwo va Yobu vibewe ndipo vomwe vidasalira vidaphewa. Patsogolo pake Satana adapha anyabasa azinji wa Yobu ndipo vimwevi vidachitisa kuti Yobu akhale alibe chilichose. Pakumalizira Satana adapha wana wa Yobu wakukwana 10 na chimphempo chikulu. Olo kuti adagumana na mabvuto mwaya Yobu adakhala wokhulupirika kwa Yahova. Baibolo ichanena kuti: ‘Pa vose vomwe vidachitika Yobu alibe kuchimwa panango kunena kuti Mulungu alibe kumuchitira vinthu vabwino.’​—Yobu 1:12-19, 22.

11. (a) Ko Satana adamuchitira soti chani Yobu? (b) Ko Yobu adanena chani?

¹¹ Satana alibe kusiyila pamwapo. Iye adawuza Mulungu kuti: ‘Manje imwepo pfuthulani djanja yanu na kudzonga vose vomwe anavo, ndipo muwone, akutukwaneni m’maso muli gwa!’ Pamwapo Satana adachitisa Yesu adwale matenda yakuwawa maninge. (Yobu 2:5, 7) Koma Yobu adapitiriza kukhala wakukhulupirika kwa Yahova iye adati: ‘Mpakana kufa kwangu, nidzasiyelini kukhala wokhulupirika kwa iye.’​—Yobu 27:5.

12. Ko Yobu adawonesa tani kuti Satana ni wabodza?

¹² Yobu angadziwalini kuti Satana angamulewa, nakuti ndiye angachitisa kuti agumane na mabvuto yazinji. Iye ambaganiza kuti Mulungu ndiye ambachitisa kuti agumane na mabvuto. (Yobu 6:4; 16:11-14) Koma iye adapitiriza kutumikira Mulungu mwakukhulupirika. Pamwapa vidawoneseratu kuti vomwe Satana adanena kuti Yobu angatumikira Mulungu ndawa ya dyera ni vabodza. Vidawonesa kuti Yobu angatumikira Yahova ndawa ya kumukonda.

13. Ko kukhulupirika kwa Yobu kudachitisa kuti Yahova amuchitire chani?

¹³ Olo kuti Yobu angadziwalini vomwe vingachitika kudzulu, iye adapitiriza kukhala wokhulupirika kwa Mulungu. Ndipo vidakhala vodziwikiratu kuti Satana ni wakuyipa maninge. Yahova adamudalisa Yobu ndawa ya kukhulupirika kwake.​—Yobu 42:12-17.

VOMWE SATANA ACHAKULEWANI

14, 15. Ko Satana adalewa vinthu viponi vomwe vinkuphatanidza wanthu wose?

¹⁴ Nkhani ya Yabu ingakupfunziseni vinthu vizinji. Ntsiku zino Satana achanena kuti tichatumikira Mulungu na chakulinga chakuti atipase vinthu. Pa Yobu 2:4, Satana adanena kuti: ‘Munthu angabvume kupereka chilichose chomwe anacho kuti apulumuse moyo wake.’ Mawu mwaya yankuwonesa kuti Satana achanena kuti sikuti ni Yobu yekha yemwe ni wadyera koma wanthu wose. Padapinda magole yazinji Yobu wafa kale, koma Satana adapitiriza kunyoza Yahova na atumiki wake. Mwakulinganiza, pa Miyambo 27:11 tichalewenga kuti: ‘Mwana wangu khala wanzeru na kukondweresa moyo wangu kuti nimudawire yemwe ankuninyoza.’

¹⁵ Munawufulu wakusalula kubvera Yahova vomwe vingathandize kuti mukhale anzake na kuwonesa kuti Satana ni wabodza. Olo pangakhale vinthu vizinji vomwe muchadikana kuchita kuti Mulungu ayambe kukuwonani ninge mwanzake, dziwani kuti vimwevi nivakudikana maninge. Kusalula kukhala mwanzake wa Mulungu ni nkhani ikulu maninge. Satana achanena kuti imwepo muchigumana na mabvuto, mungakhalelini wakukhulupirika kwa Mulungu. Iye achayesesa kutipusisa kuti tileke kumbachita vomwe Mulungu achada. Ko achachita tani vimwevi?

16. (a) Ko Satana achaphatisa basa njira ziponi kuti akangise wanthu kutumikira Yahova? (b) Ko munkukumbuka kuti Satana angaphatise basa njira ziponi kuti akukangiseni imwepo kutumikira Yahova?

¹⁶ Satana achaphatisira basa njira zosiyana-siyana pakuda kudzonga ushamwali wathu na Mulungu. Iye achakwanisa kutigundumula ‘ninge mphondolo yokalipa yomwe ichada kumeza chinthu.’ (1 Petulo 5:8) Ndipomwapa, lekani kumbadabwa peno anzanu, azibale wanu panango wanthu anango womwe angakuwuzeni kuti musiye kupfunzira Baibolo na kuti musiye pomwe kuchita vinthu vakudikana. Vimwevi vingakuchitiseni kuwona kuti munkudzudzika.a (Yohane 15:19, 20) Nthawe zinango Satana achadzichinja kuti awoneke ninge ‘mngelo wa kugaka.’ Iye angatipusise kuti tileke kubvera Yahova pakuphatisira basa njira mweyi. (2 Akorinto 11:14) Njira inango yomwe Satana achaiphatisa basa kuti tileke kutumikira Yahova ni kutichitisa kuti timbawone kuti tilibe basa, moti tingakhalelini atumiki wa Mulungu.​—Miyambo 24:10.

MUMBABVERE MALAMULO YA YAHOVA

17. Ko ndawa chani tichabvera Yahova?

¹⁷ Tikambabvera Yahova tichawonesa kuti Satana ni wabodza. Ko nchani chingatithandize kukhala obvera? Baibolo ichanena kuti: ‘Umbakonde Yahova Mulungu wako na mtima wako wose, na moyo wako wose na mphanvu zako zose.’ (Deuteronomo 6:5) Tichabvera Yahova ndawa yakuti tichamukonda. Chikondi chimwichi chikambakula, tidzakwanise kuchita chilichose chomwe iye achada. Mtumi Yohane adanemba kuti: ‘Kukonda Mulungu kuchathandawuza kusunga malamulo yake, ndipo malamulo yake niyakunetesalini.’​—1 Yohane 5:3.

18, 19. (a) Ko vinthu vinango pavinthu vomwe Yahova achaviwona kuti nivakuyipa ni viponi? (b) Ko tinkudziwa tani kuti Yahova achatiwuzalini kuchita vinthu vomwe tingavikwaniselini?

¹⁸ Ko vinthu vinango pa vinthu vomwe Yahova achatiwuza kuti nivoyipa, ni viponi? Vitsanzo vinango vili mu bokosi yakuti, ‘mumbazonde vomwe Yahova achavizonda.’ Pakuyamba mungawone ninge vinthu vinango nivoyipalini maninge. Koma mukalewenga mavesi ya m’Baibolo nkumbayakumbukira maninge, mudzawone kuti ni vanzeru kutewedzera malamulo ya Yahova. Muchadikana soti kuwona kuti panamakhalidwe yanango yomwe muchadikana kuchinja. Olo kuti kuchita vimwevi ni koshupa nthawe zinango, kuchinja makhalidwe yanu kungakuthandizeni kuti mumbakhale wakukondwa na kuti mumbakhale na ntendere wa m’moyo, vomwe vichakwanisika ndawa yakukhala pawushamwali na Mulungu. (Yesaya 48:17, 18) Ko tinkudziwa tani kuti vingakwanisike kuchinja makhalidwe yathu?

¹⁹ Yahova achatiwuzalini kuti tichite vinthu vomwe tingavikwaniselini. (Deuteronomo 30:11-14) Mtumi Paulo adanena mpfundo yakulimbikisa yakuti: ‘Mulungu ni wakukhulupirika ndipo adzabvumelini kuti muyesewe mpakana kufika pakukangiwa kupirira, koma pomwe munkugumana na mayesero mwayo iye adzapereke njira yopulumukira kuti mukwanise kuyapirira.’ (1 Akorinto 10:13) Timbakhulupirire kuti nthawe zose Yahova adzatipase mphanvu zakudikana kuti tichite vinthu vabwino. Adzakupaseni ‘mphanvu yoposha yobadwa nayo’ kuti ikuthandizeni kupirira mabvuto yanu. (2 Akorinto 4:7) Paulo padathandiziwa na Yahova pa mabvuto yakusiyana-siyana, adalewa kuti: ‘Pa vinthu vose, nichagumana mphanvu kuchokera kwa iye yemwe achanipasa mphanvu.’​—Afilipi 4:13.

MUMBAKONDE VOMWE MULUNGU ACHAKONDA

20. Ko ni makhalidwe yati ya Mulungu yomwe muchadikana kutewedzera, ndipo ndawa chani?

²⁰ Peno tichada kuti Yahova akhale mwanzathu, tichadekana kusiya vinthu vomwe achatiwuza kuti ni voyipa. Koma panavinango vomwe tichadikana kuchita. (Aroma 12:9) Wanthu womwe ni anzake wa Mulungu achakonda vinthu vomwe Mulungu achakonda. Wanthu mwawa achafotokozewa pa lemba ya Salimo 15:1-5. (Lewengani.) Anzake wa Yahova achayesesa kutewedzera makhalidwe yake ndipo achawonesa ‘chikondi, chimwemwe, kuleza moyo, kukoma moyo, ubwino, chikhulupiriro, kupfatsa na kudzilesa.’​—Agalatiya 5:22, 23.

21. Ko mungachite tani kuti mumbawonese makhalidwe yomwe Mulungu achayakonda?

²¹ Ko mungachite tani kuti mumbawonese makhalidwe yabwino maninge ninge mwaya pakuchita vinthu? Muchadikana kumbawerenga na kupfunzira Baibolo nthawe zose na chakulinga chakuti mudziwe vinthu vomwe Yahova achakonda. (Yesaya 30:20, 21) Mukambachita vimwevi, mudzayambe kukonda maninge Yahova ndipo vidzakuchitiseni kuti mumbamubvere.

22. Ko chingachitike ni chani mukambachita vinthu vomwe Yahova achakondwa navo?

²² Kuchinja komwe mungachite kuti mukhale na makhalidwe yabwino tingakulinganize na kuvula vovala vakale nkuvala vinyowani. Baibolo ichanena kuti muchadikana ‘kuvula umunthu wakale-kale’ nkuvala ‘umunthu unyowani.’ (Akolose 3:9, 10) Olo kuti kuchita vimwevi nkoshupa, tikayesesa kuchinja makhalidwe yathu nkumbabvera Yahova, iye ankutipolomisa kutipasa ‘mphoto ikulu.’ (Salimo 19:11) Mukambabvera na kutewedza vomwe Yahova achanena, mudzawonese kuti vomwe Satana adalewa ni vabodza. Mumbamutumikire Yahova ndawa ya kumukonda, osati ndawa ya vinthu vomwe watipolomisa kuti adzatichitire kutsogolo. Mukachita vimwevi, mudzakhale shamwali chaiye wa Mulungu.