Samueli woyamba

31 Afilisiti adayamba kumenyana na Aizirayeli ndipo masocha ya Izirayeli yambathawa mwakuti azinji adaphewa m’phiri ya Giliboa. 2 Afilisiti adafenderera maninge Sauli na wana wake ndipo patsogolo pake adapha Yonatani, Abinadabu, na Malikisuwa wana amuna wa Sauli. 3 Nkhondo idamukulira maninge Sauli mwakuti othusa tumikondo na uta adamugumana ndipo adamupweteka maninge. 4 Patsogolo pake Sauli adauza womunyamulira vitsulo kuti: “Solola chibemba chako unilase kuti wanthu osachitiwa mdulidwe mwawa osati anigumane nkunipha mwankhanza.” Koma womunyamulira vitsulo muyu ambafunalini kumupha ndawa ambachita mantha maninge. Pamwapo Sauli adatenga chibemba chake nkuchigwera. 5 Womunyamulira vitsulo muyo padawona kuti Sauli wafa nayembo adagwera chibemba chake ndipo adafera pabodzi. 6 Manje Sauli, wana wake atatu, womunyamulira vitsulo komasoti masocha yake yose adafera pabodzi pantsiku mweyi. 7 Aizirayeli omwe ambakhala kuchigwa* komasoti mudera ya Yorodano padawona kuti masocha ya Izirayeli yathawa komasoti kuti Sauli na wana wake afa, adachoka mu thaundi yawo nkuthawa. Patsogolo pake Afilisiti adabwera kudzakhala m’mathaundi mwayo.

8 Mangwana yake Afilisiti padabwera kudzatenga vinthu va wanthu omwe adaphewa, adagumana Sauli na wana wake atatu afa paphiri ya Giliboa. 9 Iwo adagwata nsolo wa Sauli nkumuvula vitsulo vake. Patsogolo pake adauza wanthu m’dziko yose ya Afilisiti kuti afalise ntontholo moyu m’nyumba za* mafano yawo komasoti kwa wanthu wawo. 10 Patsogolo pake adaikha vitsulo vake mwivo mu nyumba za vifaniziro va Asitoreti ndipo adamanika thupi yake pa chipupa cha thaundi ya Beti-sani. 11 Wanthu wa ku Yabesi-giliyadi padabva vomwe Afilisiti adamuchitira Sauli, 12 masocha yose yadanyamuka nkufamba usiku wose ndipo yadakachosa thupi ya Sauli na mathupi ya wana wake pa chipupa cha thaundi ya Beti-sani. Patsogolo pake adabwerera ku Yabesi nkushoka mathupi mwayo kumuko. 13 Padateno adatenga mabonzo yawo nkuyaikha m’manda m’nyantsi mwa muti wa usika ku Yabesi ndipo adadzimana kudya kwa ntsiku 7.