Samueli woyamba

30 Davide na masocha yake padafika ku Zikilaga ntsiku yachitatu, adagumana kuti Aamaleki achita nkhondo na wanthu wa ku sul* na wa mu thaundi ya Zikilaga. Iwo adachita nkhondo thaundi mwiyo nkuishoka na moto. 2 Aamaleki mwawo adatenga akazi wa mu thaundi mwiyo komasoti wanthu anango wose kuyambira mwana mpakana nkulu, alibe kupha aliyese koma adandowatenga nkumbayenda nawo. 3 Davide na wanthu omwe enze naye padafika, adagumana kuti thaundi mwiyo yashokewa komasoti azikazi wawo, wana wawo amuna na akazi atengewa. 4 Davide na wanthu mwawo adayamba kulira mokuwa mpakana adatipwa osakwanisa pomwe kulira. 5 Nawombo akazi awiri wa Davide adatengewa, Ahinowamu wa ku Yezereeli na Abigayeli yemwe wenze nkazi wa Nabala wa ku Karimeli. 6 Davide wenze na nkhawa maninge ndawa wanthu ambapangana vakuti amuphe na minyala. Wanthu mwawa ambafuna kuchita vimwevi ndawa enze adakalipa maninge na kutengewa kwa wana wawo amuna na akazi. Koma Davide adathemba Yahova Mulungu wake ndipo adagumana mphanvu.

7 Patsogolo pake Davide adauza Abiyatara wantsembe, mwana wa Ahimeleki kuti: “Pulizi bweresa efodi.” Pamwapo Abiyatara adayendesa efodi kwa Davide. 8 Manje Davide adayamba kubvunza Yahova kuti: “Ko nithamangise gulu mweyi ya vigananga? Ko niwagumane?” Iye adamudawira kuti: “Inde athamangise ndawa shuwadi uwagumane ndipo ukapulumuse wanthu omwe atengewa.”

9 Nthawe mwiyoletu, Davide na amuna 600 omwe enze naye adanyamuka nkuyenda mpakana kukafika ku chigwa cha Besori, ndipo amuna anango adakhala pamwapo. 10 Davide na amuna 400 adapitiriza ulendo wawo koma amuna 200 omwe adaneta maninge mwakuti alibe kukwanisa kuyambuka chigwa cha Besori, adakhala pamwapo.

11 Manje adagumana munthu munango wa ku Iguputo pathengo. Adamutenga nkuyenda naye kwa Davide ndipo adamupasa chakudya na madzi yakumwa. 12 Adamupasa pomwe keke* ya nkhuyu zouma na makeke yawiri ya uva wouma. Padadya adakhala na mphamvu, ndawa adakhala wosadya chakudya panango kumwa madzi kwa ntsiku zitatu usiku na masikati. 13 Patsogolo pake Davide adamubvunza kuti: “Ko ndiwe kapolo wa mbani, ndipo kwanu nkuponi?” Munthu muyo adadawira kuti: “Ndine wa ku Iguputo, kapolo wa munthu wa dzinza ya Aamaleki, koma mbuya wangu adanisiya pano ntsiku zitatu zapita panidayamba kudwala. 14 Tidakamenya nkhondo ku sul* kwa dziko ya Akereti na dera ya Yuda komasoti ku sul* kwa dera ya Kalebe. Ndipo thaundi ya Zikilaga tidaishoka na moto.” 15 Manje Davide adabvunza kuti: “Ko unganiperekeze komwe kuli gulu ya vigananga mweyi?” Iye adadawira kuti: “Lumbirani pamaso pa Mulungu kuti muniphelini komasoti kuti muniperekelini m’manja mwa mbuya wangu. Mukachita teno nikuperekezeni komwe kuli gulu ya vigananga mweyi.”

16 Pamwapo munthu muyo adaperekeza Davide komwe kwenze vigananga mwivo, ndipo adavigumana viri balala mu dziko yose mwiyo, vinkudya, kumwa komasoti kukondwa ndawa yakuti venze vidatenga vinthu vizinji mu dziko ya Afilisiti na ya Yuda. 17 Pamwapo Davide adayamba kuvipha kuyambira m’madandakucha mpakana maulo. Palibe aliyese yemwe adapulumuka kuchosapo amuna 400 omwe adapakira ngamila nkuthawa. 18 Davide adatenga vose vomwe Aamaleki adatenga ndipo adapulumusa pomwe azikazi wake awiri wale. 19 Palibe chinthu chawo chirichose chidasowa, olo ching’ono. Adapulumusa wana wawo amuna na akazi komasoti vose vomwe adatenga. Davide adapulumusa vose vomwe iwo adatenga. 20 Pamwapo Davide adatenga nkhosa zose na ng’ombe zose za Aamaleki ndipo wanthu wake adayenda navo pabodzi na vipfuwo vawo. Iwo adati: “Vimwevi ndivo vomwe Davide watenga.”

21 Patsogolo pake Davide adafika kuchigwa cha Besori komwe kwenze amuna 200 omwe adawasiya wale, omwe alibe kukwanisa kuyenda naye ndawa enze adaneta maninge. Iwo adanyamuka nkukatambira Davide na wanthu omwe enze naye. Padagumana, Davide adamonisana nawo kuti adziwe kuti ali tani. 22 Koma wanthu anango oipa na wachabechabe omwe adalondola Davide adati: “Ndawa yakuti amwawa alibe kuyenda nase tiwapasekolini vinthu vatatenga ivi. Aliyese tindomupasa nkazi wake na wana wake patsogolo pake ambayende.” 23 Koma Davide adati: “Neye abale wangu ayi kuchita teno na vinthu vomwe Yahova watipasa. Iye watiteteza komasoti wapereka m’manja mwathu gulu ya vigananga yomwe idatitengera vinthu. 24 Ni mbani angabvume vimwevo? Vomwe atambire munthu yemwe wayenda ku nkhondo, vikhale volingana na vomwe atambire munthu yemwe ambadikhirira vinthu. Aliyese atambireko kanthu.” 25 Ndipo kuyambira ntsiku mweyo, iye adawonesesa kuti imweyi ikhale lamulo yakuti Aizirayeli ambaitewedze mpakana lero.

26 Davide padafika ku Zikilaga adatumiza vinango mwa vinthu vomwe adatenga ivo kwa akulu wa ku Yuda omwe enze anzake nkunena kuti: “Tambirani mphaso* iyi kuchokera pa vinthu vomwe tatenga kwa azondi wa Yahova.” 27 Adatumiza vimwevi kwa akulu wa ku Beteli, wa ku Ramoti wa ku Negebu,* wa ku Yatiri, 28 wa ku Aroweli, wa ku Sifimoti, wa ku Esitemowa, 29 wa ku Rakala komasoti kwa okhala m’mathaundi ya Ayerameeli na m’mathaundi ya Akeni. 30 Adatumiza pomwe kwa akulu wa ku Horima, wa ku Borasani, wa ku Ataki, 31 wa ku Heburoni komasoti kumadera yose komwe Davide na wanthu wake ambafikako kawirikawiri.