Samueli woyamba
28 Mu ntsiku mwizo Afilisiti adasonkhanisa masocha yawo kuti akamenyane na Aizirayeli. Mwapo Akisi adauza Davide kuti: “Ukudziwa kuti iwepo na wanthu wako mukufunika kuti tiyende pabodzi ku nkhondo.” 2 Davide adauza Akisi kuti: “Imwembo munkudziwa vomwe ntumiki wanu angachite.” Padateno Akisi adauza Davide kuti. “Ndipomwapa nidzakuikhe kukhala nsocha woniteteza nthawe zose.”
3 Pa nthawe mweyi nkuti Samueli wamwalira kale ndipo Aizirayeli enze adalira maliro yake nkumuikha manda mu thaundi ya kwawo ya Rama. Komasoti Sauli wenze adachosa mudziko mwiyo wanthu oyankhula na mizimu komasoti oneneratu vakutsogolo.
4 Afilisiti adasonkhana nkukamanga nsasa ku Sunemu. Nayembo Sauli adasonkhanisa Aizirayeli wose nkukamanga nsasa ku Giliboa. 5 Sauli padawona nsasa wa Afilisiti adachita mantha ndipo ntima wake udayamba kumenya maninge.* 6 Sauli ambabvunza kwa Yahova koma Yahova ambamudawiralini, peno kupitira m’maloto, Urimu panango pakuphatisira basa aneneri. 7 Patsogolo pake Sauli adauza atumiki wake kuti: “Nifagireni mzimayi yemwe ayankhula na mizimu kuti nikayankhule naye.” Atumiki wake mwawo adamuuza kuti: “Ku Eni-dori kuli mzimayi yemwe ayankhula na mizimu.”
8 Pamwapo Sauli adadzichinja nkuvala vovala vinango. Padateno, iye na wanthu awiri adayenda kwa mzimayi muyo usiku. Manje Sauli muyo adati. “Niuze vakutsogolo pakuyankhula na mizimu komasoti pakunimusira munthu yemwe nikuuze.” 9 Koma nkazi muyo adauza Sauli kuti: “Iwepo unkudziwa vomwe Sauli adachita. Pale adachosa mu dziko mweyi wanthu oyankhula na mizimu komasoti oneneratu vakutsogolo. Manje ndawa chani unkufuna kuniphesa? 10 Sauli adamulumbirira mu dzina ya Yahova kuti: “Shuwa mu dzina ya Yahova Mulungu wa moyo, ukhale ulibe mulandu pa nkhani mweyi!” 11 Manje mzimayi muyo adati: “Unkufuna nikumusire mbani? Sauli adadawira kuti: “Unimusire Samueli.” 12 Mzimayi muyo padawona “Samueli”* adayamba kulira mokuwa maninge. Patsogolo pake adauza Sauli kuti: “Ndawa chani mwaninamiza? Ko imwepo ndimwelini a Sauli.” 13 Koma mpfumu idamuuza kuti: Ayi kuchita mantha. “Waona chani?” Mzimayi muyo adauza Sauli kuti: “Naona munthu wooneka ninge mulungu ankubula pasi.” 14 Nthawe mwiyoletu Sauli adabvunza mzimayi muyo kuti: “Ankuwoneka tani?” Mzimayi muyo adadawira kuti: “Ankuwoneka kuti ni mwamuna wokalamba ndipo wavala nkhanjo wogwata manja.” Sauli padabva vimwevi adazindikira kuti ni “Samueli” ndipo Sauli muyo adagwada nkumujolimira mpakana nkhope yake kufika pasi.
15 Patsogolo pake “Samueli” adabvunza Sauli kuti: “Ndawa chani wanisokoneza pakunimusa?” Sauli adadawira kuti: “Vinthu vanishupa maninge. Afilisiti ankumenyana nane koma Mulungu wanisiya ndipo ankunidawiralini pomwe pakuphatisira basa aneneri panango m’maloto. Ndipomwapa nabwera kwa imwepo kuti muniuze vochita.”
16 Pamwapo “Samueli” adati: “Manje ndawa chani ukudzabvunza inepano, koma ukudziwa kuti Yahova wakusiya ndipo wakhala nzondi wako? 17 Yahova achite vomwe adanena pakuphatisa basa inepano ndipo Yahova ang’ambe ufumu nkuuchosa m’manja mwako nkuupereka m’manja mwa munthu munango, yemwe ni Davide. 18 Achite vimwevi ndawa ulibe kubvera mawu ya Yahova komasoti ndawa ulibe kuwonesa ukali wake pomwe adakalipa maninge na Aamaleki. Ndipomwapa Yahova ankukuchitira vimwevi lero. 19 Komasoti Yahova apereke Aizirayeli na iwepo m’manja mwa Afilisiti, ndipo mangwana iwepo na wana wako mukhale na inepano. Yahova apereke pomwe masocha ya Izirayeli m’manja mwa Afilisiti.
20 Nthawe mwiyoletu, Sauli adagwa ndipo adagona pasi thapsya, ndawa adachita mantha maninge na vomwe “Samueli” adanena. Komasoti adatipwa maninge ndawa alibe kudya usiku wose na masikati yose. 21 Mzimayi ule padayenda pomwe penze Sauli nkuwona kuti wasokonezeka maninge, adamuuza kuti: “Inepano ntumiki wanu nabvera mawu yanu ndipo naikha moyo wangu pangozi nkuchita vomwe mudaniuza. 22 Manje pulizi nibvereni inepano ntumiki wanu. Nikufuna nikupaseni nkate kuti mudye na cholinga chakuti mugumane pomwe mphanvu pa ulendo wanu.” 23 Koma iye adalamba ndipo adati: “Nidyelini.” Koma atumiki wake na mzimayi ule adamukakamiza kuti adye. Patsogolo pake adawabvera ndipo adamuka pomwe adagona apo nkukakhala pa m’bedi. 24 Mzimayi muyo wenze na mwana wa ng’ombe wonenepa pamuyi pake ndipo adamupha mwakankulumize. Patsogolo pake adatenga ufa nkuukanyakanya ndipo adaphika nkate ulibe vofufumisa. 25 Padateno, adapereka chakudya mwicho kwa Sauli na atumiki wake ndipo iwo adadya. Padamaliza adanyamuka nkumbayenda usiku muyo.