Samueli woyamba
27 Koma Davide adaganiza kuti: “Ntsiku inango, shuwadi Sauli adzaniphe. Nzeru yabwino yomwe ningachite ni kuthawira kudziko ya Afilisiti. Manje Sauli adzaleke kunifagafaga mu dziko yose ya Izirayeli ndipo adzaniphelini.” 2 Pamwapo Davide pabodzi na amuna 600 omwe ambafamba naye adayenda kwa Akisi mpfumu ya ku Gati, mwana wa Maoki. 3 Davide ambakhala na Akisi ku Gati pabodzi na amuna omwe ambafamba naye, ndipo aliyese wenze na banja yake. Davide wenze na akazi awiri, Ahinowamu wa ku Yezereeli na Abigayeli wa ku Karimeli, yemwe wenze nkazi wa Nabala. 4 Sauli padabva kuti Davide wathawira ku Gati, adaleka kumufagafaga.
5 Patsogolo pake Davide adauza Akisi kuti: “Peno mungawone kuti viri bwino, ninkukumbira kuti munipaseko malo mu thaundi ibodzi yakutali kuti nikakhale kumuko. Palibe chifukwa chakuti inepano ntumiki wanu nimbakhale namwe pabodzi mu thaundi yachifumu.” 6 Manje pa ntsiku mweyi, Akisi adapasa Davide thaundi ya Zikilaga. Ndipomwapa thaundi ya Zikilaga ni ya mafumu ya Yuda mpakana lero.
7 Nthawe* yose yomwe Davide adakhala mu thaundi yakutali ya Afilisiti yenze gole ibodzi na minyezi 4. 8 Davide na amuna omwe ambafamba naye ambayenda kukamenyana na Agesuri, Agirezi na Aamaleki. Wanthu mwawa ambakhala mu dera yoyambira ku Telami kukafika ku Shura, mpakana ku dziko ya Iguputo. 9 Davide akayenda kunkhondo, ambasiyalini mwamuna panango nkazi aliyese wamoyo. Iye ambatenga nkhosa, ng’ombe, abulu, ngamila na vovala ndipo akateno ambabwerera kwa Akisi. 10 Akisi akabvunza kuti: “Ko lero mwenze mwakamenyera kuponi nkhondo?” Davide ambadawira kuti: “Ku sul* kwa dziko* ya Yuda” panango “ku sul kwa dziko ya Ayerameeli” panango “ku sul kwa dziko ya Akeni.” 11 Davide ambasiyalini mwamuna panango nkazi aliyese wamoyo nkubwerera naye ku Gati, ndawa ambaganiza kuti: “Angayambe kukatinenera kuti Davide wachita vakutivakuti.” (Vimwivi ndivo vomwe iye ambachita pa nthawe yose yomwe ambakhala muthaundi ya kutali ya Afilisiti.) 12 Akisi ambamuthemba Davide ndipo muntima mwake ambati: ‘Shuwadi, Davide wakhala ninge pfungo yoipa kwa Aizirayeli anzake ndipo apitirize kukhala ntumiki wangu.’