Oweruza

6 Koma Aizirayeli adayamba pomwe kuchita vinthu voipa pamaso pa Yahova. Pamwapo Yahova adawapereka m’manja mwa Amidiyani kwa magole 7. 2 Amidiyani mwawo adayamba kuboneresa Aizirayeli. Ndawa ya vimwevi, Aizirayeli adakonza malo yakuti ambabishalireko* m’mapiri, mu mphako na malo yanango yoshupa kufikako. 3 Aizirayeli akalima maminda yawo, Amidiyani, Aamaleki na wanthu wa Kumachibese ambabwera kudzamenyana nawo. 4 Ambabwera kudzawadzongera vokolola vawo vose mpakana kukafika ku Gaza. Ambawasiyiralini chakudya chirichose olo nkhosa, ng’ombe panango bulu. 5 Iwo ambabwera na vipfuwo vawo na matenti yawo. Iwo ambabwera azinji maninge ninge dzombe,* ndipo iwo na ngamila zawo enze azinji maninge mwakuti ambawerengekalini. Ambabwera mu dziko mwiyo kudzaidzonga. 6 Pamwapo Aizirayeli ambabonera maninge ndawa ya Amidiyani, ndipo iwo adayamba kulirira Yahova kuti awathandize.

7 Pomwe Aizirayeli adalilira Yahova kuti awathandize ndawa ya Amidiyani, 8 Yahova adawatumizira mneneri yemwe adawauza kuti: “Yahova Mulungu wa Izirayeli wanena kuti: ‘Nidakubulisani ku Iguputo m’nyumba ya ukapolo. 9 Pamwapo nidakupulumusani kwa Aiguputo komasoti kwa wanthu wose omwe ambakuboneresani, ndipo nidawathamangisa pamaso panu nkukupasani dziko yawo. 10 Ndipo nidakuuzani kuti: “Ine ndine Yahova Mulungu wanu. Ayi kuti mumbatumikire* milungu ya Aamori omwe munkukhala mudziko yawo.” Koma imwepo mulibe kubvera mawu yangu.’”

11 Patsogolo pake kudabwera mngelo wa Yahova nkukhala m’nyantsi mwa muti ukulu ku Ofira. Muti muyo wenze wa Yowasi wa dzinza ya Abi-ezeri. Pa nthawe mwiyi Gidiyoni mwana wa Yowasi, ambapula tirigu moponderamo uva kuti Amidiyani aleke kuwona. 12 Mngelo wa Yahova adafika pomwe iye wenze ndipo adamuuza kuti: “Yahova ali nawe, iwepo msocha wamphanvu.” 13 Koma Gidiyoni adadawira kuti: “Pepani ambuya wangu, peno Yahova ali nase, ndawa chani tinkubonera tene? Ndipo basa zake zodabwisa zomwe azibereki wathu adatisimbira zire ziri kuponi? Iwo adatisimbira kuti Yahova ndiye adatibulisa ku Iguputo.’ Koma manje Yahova watisiya, ndipo watipereka kwa Amidiyani.” 14 Padateno, Yahova adamunyang’ana nkumuuza kuti: “Yenda na mphanvu zomwe unazo izi, ndipo udzapulumuse Izirayeli kwa Amidiyani. Ko ndinepanolini nakutuma?” 15 Gidiyoni adadawira kuti: “Pepani Yahova. Ko nidzamupulumuse tani Izirayeli? Munkudziwa kuti banja yathu ni ing’ono maninge mu dzinza ya Manase, ndipo pa wana wa ababa wangu inepano ndine mng’ono maninge.” 16 Koma Yahova adamuuza kuti: “Ndawa yakuti inepano nidzakhale nawe, udzaphe Amidiyani ninge kuti unkupha munthu m’bodzi.”

17 Pamwapo iye adati: “Peno mwanikomera ntima, niwoneseni chizindikiro kuti nitsimikize kuti ndimwedi yemwe munkuyankhula nane. 18 Pulizi ayi kuchoka, mpakana nibwere nkukupasani mphaso.” Pamwapo iye adati: “Nibakakhale pampano mpakana ubwere pomwe.” 19 Pamwapo Gidiyoni adangena m’nyumba nkumuphera kamwana ka mbuzi. Adatenga pomwe ufa wokwana mpimo m’bodzi wa efa* nkukonza mikate yalibe vofufumisa. Padateno adatenga nyama ire nkuiikha mu sesto ndipo muto* adauikha mu mphika. Patsogolo pake adatenga vinthu vire nkukamupasa mngelo ule m’nyantsi mwa muti nkulu ule.

20 Mngelo wa Mulungu chaiye adamuuza kuti: “Tenga nyama mwiyi na mikate mwaya ukaviikhe pa mwala ukulu uyo, ndipo ukhuthulire muto* uyo.” Gidiyoni adachitadi vimwevo. 21 Patsogolo pake mngelo wa Yahova adagumirira nyama na mikate na ntsonga ya mpsyimbo yomwe wenze nayo m’manja mwake. Padateno, moto udagaka pa mwala muyo ndipo udanyekeseratu nyama na nkate. Pavidateno mngelo wa Yahova ule adanyangalika.* 22 Pamwapo Gidiyoni adazindikira kuti wenze mngelo wa Yahova.

Pa nthawe mweyo Gidiyoni adati: “Mayo ine Yahova, Ambuya Nkulu Maninge! Nawonana na mngelo wa Yahova maso na maso.” 23 Koma Yahova adamuuza kuti: “Ntendere ukhale nawe. Ayi kuchita mantha. Ufelini.” 24 Pamwapo Gidiyoni adamangira Yahova guwa yantsembe pa malo mwayo ndipo ichemerewa Yahova-salomu* mpakana manjeuno. Guwa mweyi iri ku Ofira, muthaundi ya Aabi-ezeri, mpakana manjeuno.

25 Usiku muyo Yahova adauza Gidiyoni kuti: “Tenga ng’ombe ing’ono imuna ya ababa wako, ng’ombe yachiwiri yamagole 7 ire. Patsogolo pake ugwese guwa yantsembe ya Baala ya ababa wako ndipo ugwate chipilala chopatulika* chomwe chiri pafupi na guwa mweyo. 26 Umangire Yahova Mulungu wako guwa yantsembe pakulonga minyala padzulu pa malo mwayo yotetezeka. Ukachita teno, utenge ng’ombe ing’ono imuna yachiwiri ire nkuipereka ninge ntsembe yoshoka pa nkhuni za chipilala chopatulika* chomwe uchigwate.” 27 Pamwapo Gidiyoni adatenga amuna 10 pa atumiki wake na kuchita vose vomwe Yahova adamuuza. Koma ndawa yakuti ambagopa maninge azibale wake na wanthu wa muthaundi mwiyo, adachita vimwevi usiku osati masikati.

28 Amuna wa muthaundi mwiyo padamuka machibese, adawona kuti guwa yantsembe ya Baala yagwesewa ndipo chipilala chopatulika* chomwe chenze pambali pake chagwatiwa. Adawona pomwe kuti paguwa yantsembe yomwe yamangiwa ire, penze padaperekewa ntsembe ng’ombe ing’ono imuna yachiwiri ire. 29 Manje adayamba kubvunzana kuti: “Ni mbani wachita vimwevi?” Padafagafaga adanena kuti: “Wachita vimwevi ni Gidiyoni, mwana wa Yowasi.” 30 Pavidateno amuna wa muthaundi mwiyo adauza Yowasi kuti: “Bweresa mwana wako timuphe, ndawa wagwesa guwa yantsembe ya Baala nkugwata chipilala chopatulika* chomwe chenze pambali pake.” 31 Koma Yowasi adauza wose omwe ambafuna kumuphera mwana wale kuti: “Ko imwepo munkufunika kuteteza Baala? Ko munkufunika kumupulumusa? Aliyese yemwe ankufuna kumuteteza afunika kuphewa machibese yano. Peno Baala uyo ni mulungu, adziteteze yekha ndawa munthu munango wamugwesera guwa yake yantsembe.” 32 Pantsiku mwiyo Yowasi adapasa Gidiyoni dzina yakuti Yerubaala* nkunena kuti: “Baala adziteteze yekha ndawa munthu munango wamugwesera guwa yake yantsembe.”

33 Amidiyani na Aamaleki wose pabodzi na wanthu wose wa Kumachibese adasonkhanisa masocha yawo ndipo adayambuka kamadzi nkukamanga msasa mu chigwa cha Yezereeli. 34 Pavidateno, Gidiyoni adadzadziwa na mzimu wa Yahova, mwakuti adaliza lupenga ya nyanga ya nkhosa ndipo Aabi-ezeri adasonkhana pabodzi nkuyamba kumutewera. 35 Iye adatumiza mawu kwa wanthu wa mudera yose ya dzinza ya Manase ndipo nawombo adasonkhana pabodzi nkuyamba kumutewera. Adatumiza pomwe mawu m’madera yose ya madzinza ya Aseri, Zebuloni na Nafitali ndipo nawombo adabwera kudzagumana naye.

36 Patsogolo pake Gidiyoni adauza Mulungu chaiye kuti: “Kuti nidziwe kuti mudzaniphatisedi basa populumusa Izirayeli, ninge momwe mwapolomisira, 37 niikhe ukuse wa nkhosa pasi, pamalo yopulira mbewu. Peno mame yangagwe pa ukuse wokha uyu, koma dothi yose nkukhala iri youma, nidzadziwe kuti mudzapulumusedi Izirayeli pakuphatisira basa inepano ninge momwe mwapolomisira.” 38 Ndipo vidachitikadi teno. Padamuka mangwana yake machibese nkupsinya ukuse wa nkhosa ule, ukuse muyo udabula madzi yakuti yangadzale mbale ikulu yonoka. 39 Olo nteno, Gidiyoni adauza Mulungu chaiye kuti: “Pulizi ayi kukalipa nane, bvumani kuti nikukumbireni pomwe kabodzi kokha. Pulizi nibvumizeni kuti nikuyeseni pomwe kabodzi kokha na ukuse moyu. Ukuse wokha uyu ukhale wouma, koma dothi yose itote na mame.” 40 Pamwapo Mulungu adachitadi vimwevo usiku muyo. Ukuse wokha wenze wouma koma dothi yose idatota na mame.