Oweruza
5 Ntsiku mwiyo, Debora pabodzi na Baraki mwana wa Abinowamu, adaimba nyimbo iyi:
2 “Posiya tsitsi italiitali iri yosamanga mu Izirayeli ninge lumbiro ya nkhondo,
Ndawa ya kudzipereka kwa wanthu,
Tamandani Yahova.
3 Bveserani mafumu imwe. Imwepo olamulira, tetekerani.
Inepano nidzaimbire Yahova.
Nidzaimbe nyimbo zotamanda Yahova, Mulungu wa Izirayeli.
4 Yahova, pomwe mudafamba kuchokera ku Seiri,
Pomwe mudafamba kuchokera kudera ya Edomu,
Dziko idagunduzika ndipo kudzulu kudagwesa madzi,
Mitambo yadagwesa madzi.
5 Mapiri yadasungunuka* pamaso pa Yahova,
Olo phiri ya Sinai idasungunukambo pamaso pa Yahova, Mulungu wa Izirayeli.
6 Muntsiku za Samagara mwana wa Anati,
Muntsiku za Yaeli, penze palibe yemwe ambafamba munjira,
Ndipo wanthu omwe ambafamba ambagwata na njira zolambalala.
7 Wanthu omwe ambakhala m’miyi ya Izirayeli adachoka,
Adachoka mpakana pomwe inepano Debora nidafika,
Mpakana pomwe inepano nidakhala ninge mayi mu Izirayeli.
8 Adasankhula milungu inyowani;
Padateno nkhondo idafika muthaundi.
Penze palibe chovikira panango nkondo ung’ono,
Pakati pa wanthu 40 000 mu Izirayeli.
9 Ntima wangu uli pa atsogoleri wa masocha ya Izirayeli,
Omwe adadzipereka kuti ayende na wanthu.
Tamandani Yahova.
10 Imwepo opakira pa abulu afuwira,
Imwepo omwe mukhala pa nguwo zabwino maninge zoyanza pasi,
Na imwepo ofamba mu nsewu,
Ganizirani ivi:
11 Mawu ya wanthu otapa madzi yadabveka ku malo yotapira madzi;
Kumuko ambafotokoza basa zolungama za Yahova,
Ambafotokoza basa zolungama za wanthu wake omwe ambakhala m’miyi ya Izirayeli.
Patsogolo pake wanthu wa Yahova adayenda ku mathaundi.
12 Muka, muka iwe Debora!
Muka, muka imba nyimbo!
Imirira iwe Baraki! Tsogolera wanthu omwe wawaphata, iwe mwana wa Abinowamu.
13 Pamwapo omwe adapulumuka adayenda kwa wanthu olemekezeka.
Wanthu wa Yahova adabwera kwa inepano, pakuyenda kukalimbana na wanthu wamphanvu.
14 Omwe enze muchigwa* adachokera mu dzinza ya Efuraimu,
Ankutewera iwepo Benjamim, pakati pa wanthu wa ntundu wako.
Atsogoleri wa masocha adachokera kwa Makiri,
Ndipo osunga vitsulo va onemba, adachokera mu dzinza ya Zebuloni.
15 Akuluakulu wa dzinza ya Isakara enze na Debora,
Momwe adachitira na Isakara, ni momwe adachitirambo na Baraki.
Adamutumiza kuchigwa* ankufamba na minyendo.
Pa magulu ya dzinza ya Rubeni, penze kuunguza mokwana va muntima.
16 Udakhaliranyi pasi pa machola yawiri ya vinthu,
Nkumbabvesera nyimbo za vinonje zoimbira nkhosa?
Pakuti pa magulu ya dzinza ya Rubeni penze kuunguza mokwana va muntima.
17 Wanthu wa ku Giliyadi adandokhala ku tsidya inango ya Yorodano.
Ndipo ndawa chani Dani adandokhala m’barko?
Aseri adandokhala zii m’mbalim’mbali mwa nyanja,
Ne kuchoka pa malo yake yotsamisira mabarko.
18 Wanthu wa dzinza ya Zebuloni adaikha moyo wawo pangozi.
Wanthu wa mu dzinza ya Nafitali adachitambo vibodzibodzi ku mapiri.
19 Mafumu yadabwera na kumenya nkhondo.
Patsogolo pake mafumu ya Kanani yadamenya nkhondo;
Yadamenya nkhondo ku Taanaki, pafupi na madzi ya ku Megido.
Iwo alibe kugumanapo siliva wakuti atenge.
20 Nyenyezi zidamenya nkhondo ziri kudzulu;
Zidamenyana na Sisera ziri mu njira zawo.
21 Kamadzi ka Kisoni kadawakokolola,
Kamadzi kakalekale, kamadzi ka Kisoni.
Moyo wangu iwe, udaboneresa wanthu wamphanvu omwe ambakuboneresa.
22 Patsogolo pake migigi ya makavalo yadabveka
Pomwe yambathamanga yali yokalipa.
23 Mngelo wa Yahova adati: ‘Tembererani Merozi,
Tembererani wanthu wake,
Ndawa alibe kuthandiza Yahova,
Alibe kubwera na wanthu wamphanvu kudzathandiza Yahova.’
24 Nkazi wodalisiwa maninge ni Yaeli
Nkazi wa Hiberi wa dzinza ya Akeni;
Ni wodalisiwa maninge pa akazi wose omwe akhala m’matenti.
25 Sisera adakumbira madzi, Yaeli adamupasa nkaka.
Adamupasa nkaka, m’mbale yonoka yabwino maninge.
26 Pamwapo adatenga nkhokho ya tenti.
Na djanja yake yamakulu adatenga sando yolemera.
Padateno adakhomerera Sisera nkuphwanya nsolo,
Adabowola na kuphwanya bonzo* ya pafupi na dzitu.
27 Sisera adagwa nkugona pakati pa minyendo ya Yaeli;
Pakati pa minyendo yake, adagwa nkugona;
Pomwe adagwera apo, adagona mwapo nkufa.
28 Munthu nkazi adanyang’ana pa janela,
Amayi wake wa Sisera adanyang’ana pa janela ndipo adati,
‘Ndawa chani ngolo yake ya nkhondo inkuchedwa kubwera?
Ndawa chani migigi ya makavalo na ngolo yake yankuchedwa kubveka?’
29 Akazi wanzeru pakati pa azimayi wake olemekezeka ambamudawira;
Iyembo ambazidawira mu ntima kuti,
30 ‘Panango ankugawa vinthu vomwe agumana,
Ankugawa mtsikana m’bodzi panango atsikana awiri kwa msocha aliyese,
Nguwo zokhuza za Sisera, shuwadi nguwo zokhuza,
Chovala choluka chokhuza, inde, vovala viwiri voluka,
Vovala vakuti amuna omwe atenga vinthu avale m’makhosi mwawo.’
31 Imwe Yahova, wanthu wose omwe akuzondani adzongewe,
Koma omwe akukondani agake ninge momwe dzuwa igakira ikambabula.”
Ndipo dziko mwiyo idakhala pa ntendere kwa magole 40.