Oweruza
15 Patsogolo pake, panthawe yokolola tirigu, Samisoni adayenda kukawona nkazi wake ule ndipo adatenga kamwana ka mbuzi. Padafika adati: “Ninkufuna ningene kuchipinda kwa nkazi wangu.” Koma ababa wa nkazi muyo adamulambiza kungena. 2 Iwo adati: “Inepano nimbaganiza kuti udazondana naye, ndipomwapa nidamupereka kwa m’bodzi mwa alumbwana omwe umbakhala nawo wale. Mng’ono wake uyu ni wokhuza kuposha iye. Tani utenge moyu?” 3 Koma Samisoni adati: “Ulendo uno nikhale niribe mulandu na Afilisiti nikawachitira vinthu voipa.”
4 Pamwapo Samisoni adanyamuka nkukaphata nkhandwe 300. Patsogolo pake adatenga nkhandwe mwezo ziwiriziwiri nkuzimanga michira. Padateno, adaikha nkhuni ibodzi pakati pa michira yawiri mwayo. 5 Patsogolo pake adagasa nkhuni mwizo na moto, nkubusira nkhandwe mwezo m’minda ya Afilisiti ya mbewu zosakolola. Pamwapo adashoka chirichose, kuyambira mitolo ya mbewu, mbewu zosakolola, minda ya uva komasoti minda ya maolivi.
6 Pavidateno, Afilisiti adabvunza kuti: “Mbani wachita vimwevi? Pamwapo adauziwa kuti: “Ni Samisoni, nkomweni wa munthu wa ku Timuna ule, ndawa munthu moyu adatenga nkazi wa Samisoni nkumupereka kwa m’bodzi mwa alumbwana omwe ambakhala na Samisoni ninge anzake wa mwamuna yemwe ankulowola.” Afilisiti padabva vimwevi, adayenda kukashoka mtsikana moyu pabodzi na ababa wake. 7 Koma Samisoni adawauza kuti: “Peno khalidwe yanu ni mweyi, nikusiyenilini mpakana nibwezere.” 8 Pamwapo adayamba kupha m’bodzi m’bodzi. Patsogolo pake adayenda kukakhala kumphako ya mwala wa Etami.
9 Paidapita nthawe, Afilisiti adabwera nkumanga nsasa ku Yuda ndipo ambafambafamba ku Lehi. 10 Manje wanthu wa ku Yuda adawabvunza kuti: “Ndawa chani mwabwera kudzamenyana nase?” Iwo adadawira kuti: “Tabwera kudzaphata* Samisoni kuti timuchite vomwe iye watichitira.” 11 Pavidateno amuna 3000 wa ku Yuda adayenda kumphako ya mwala wa Etami nkuuza Samisoni kuti: “Ko iwepo unkudziwalini kuti Afilisiti ndiwo ankutitonga? Manje ndawa chani watichitira vimwevi?” Iye adawadawira kuti: “Nawachitira vomwe iwo adanichitira.” 12 Koma iwo adamuuza kuti: “Tabwera kudzakuphata* kuti tikakupereke kwa Afilisiti.” Samisoni adadawira kuti: “Lumbirani kuti munichitirelini choipa chirichose.” 13 Iwo adamudawira kuti: “Neye, tikuphelini. Tindokumanga nkukakupereka kwa iwo.”
Pamwapo adamumanga na vingwe viwiri vinyowani nkumubulisa kumphako muko. 14 Padafika naye ku Lehi, pomwe Afilisiti adamuwona, adakuwa ndawa yokondwa. Manje mzimu wa Yahova udamupasa mphanvu ndipo vingwe vomwe adamumanga navo vire, vidagwatikagwatika ninge usalu wobvuka na moto nkugwa pasi. 15 Pavidateno, adagumana pfupa* iwisi ya ntsagwada za bulu mwamuna, ndipo adaitenga nkupha nayo amuna 1000. 16 Patsogolo pake Samisoni adati:
“Na pfupa ya ntsagwada za bulu, mahopomahopo!
Na pfupa ya ntsagwada za bulu napha wanthu 1000.”
17 Padamaliza kuyankhula vimwevi, adataya pfupa mweyo ndipo malo mwayo adayapasa dzina yakuti Ramati-lehi.* 18 Manje adabva nyota maninge, ndipo adalilira Yahova kuti: “Ndimwe yemwe mwanipulumusa ine ntumiki wanu. Manje ko nife na nyota, nkufera m’manja mwa wanthu omwe alibe kuchita m’dulidwe?” 19 Pamwapo Mulungu adang’amba pasi ku Lehi ndipo padayamba kubula madzi. Samisoni padamwa madzi mwayo, nyota yake idamala ndipo adagumana pomwe mphanvu. Ndipomwapa adapasa malo mwaya dzina yakuti Eni-hakore.* Malo mwaya yali ku Lehi mpakana lero.
20 Samisoni adaweruza Izirayeli kwa magole 20 pa nthawe ya Afilisiti.