Oweruza

13 Aizirayeli adayamba pomwe kuchita vinthu voipa pamaso pa Yahova ndipo Yahova adawapereka m’manja mwa Afilisiti kwa magole 40.

2 Panthawe mweyi penze mwamuna munango wa ku Zora wa dzinza ya Dani, dzina yake Manowa. Nkazi wake ambaberekalini,* mwakuti wenze alibe mwana. 3 Manje ntsiku inango, mngelo wa Yahova adawonekera kwa nkazi muyo nkumuuza kuti: “Bvesera, iwepo uberekalini ndipo ulibe mwana. Koma udzakhale na mimba ndipo udzabereke mwana mwamuna. 4 Ndipomwapa uwonesese kuti osati umwe vinyu panango chakumwa chirichose choledzeresa ndipo ayi kudya chirichose chopsyipiziwa. 5 Udzakhale na mimba ndipo udzabereke mwana mwamuna. Munsolo mwake ayi kuti mudzapite leza ndawa mwana muyo adzakhale Mnaziri* wa Mulungu kuyambira ntsiku yomwe adzabadwe.* Iye adzatsogolere pakupulumusa Izirayeli m’manja mwa Afilisiti.”

6 Patsogolo pake nkazi muyo adayenda kukauza mwamuna wake kuti: “Munthu wa Mulungu chaiye, wenze wabwera kwa inepano ndipo ambawoneka ninge mngelo wa Mulungu chaiye ndipo ambawoneka mochitisa mantha maninge. Koma niribe kumubvunza komwe wachokera ndipo alibe kuniuza dzina yake. 7 Koma iye waniuza kuti: “Udzakhale na mimba ndipo udzabereke mwana mwamuna. Manje ayi kumwa vinyu panango chakumwa chirichose choledzeresa ndipo ayi kudya chirichose chopsyipiziwa, ndawa mwana muyo adzakhale Mnaziri wa Mulungu kuyambira ntsiku yomwe adzabadwe mpakana ntsiku yomwe adzafe.’”

8 Manowa adagwigwirira Yahova kuti: “Yahova, tinkukumbira kuti munthu wa Mulungu chaiye wamwatuma ule, abwere pomwe kuti adzatilangize vofunika kuchita na mwana muyo wati adzabadwe.” 9 Mulungu chaiye adabva vomwe Manowa adakumbira, mwakuti mngelo wa Mulungu chaiye ule adabwera pomwe kwa nkazi muyo ndipo adamugumana alikhale pasi panja. Panthawe mweyi wenzelini pabodzi na mwamuna wake Manowa. 10 Nthawe mweyoletu, nkazi muyo adathamanga nkukauza mwamuna wake kuti: “Munthu yemwe wenze adabwera kwa inepano ntsiku ire, wabwera pomwe.”

11 Padateno, Manowa adanyamuka nkuyendera pabodzi na nkazi wake kwa munthu muyo ndipo adamubvunza kuti: “Ko ndimwe yemwe mudayankhula na nkazi wangu uyu?” Iye adadawira kuti: “Inde ndinepano.” 12 Pamwapo Manowa adati: “Mawu yanu yakwanirisike. Koma ko mwana muyo adzakhale wotani, ndipo basa yake idzakhale yotani?” 13 Mngelo wa Yahova adauza Manowa kuti: “Nkazi wako moyu apewe kuchita vose vomwe namulambiza. 14 Osati adye chirichose chochokera ku uva, osati amwe vinyu panango chakumwa chirichose choledzeresa ndipo osati adye chirichose chopsyipiziwa. Atewedze vose vanamuuza.”

15 Manje Manowa adauza mngelo wa Yahova kuti: “Dikhirani pang’ono tikukonzereni kamwana ka mbuzi.” 16 Koma mngelo wa Yahova adauza Manowa kuti: “Olo nichiti nadikhira, ningadyelini chakudya chanu. Koma peno mungafune kupereka ntsembe yoshoka kwa Yahova, perekani.” Manowa alibe kudziwa kuti wenze mngelo wa Yahova. 17 Manje Manowa adabvunza mngelo wa Yahova kuti: “Dzina yanu ndimwe mbani? Tinkufuna kudzakulemekezani vamwanena ivi vikadzakwanirisika.” 18 Koma mngelo wa Yahova ule adamudawira kuti: “Ndawa chani unkufuna kudziwa dzina yangu? Dzina yangu ni yodabwisa.”

19 Patsogolo pake Manowa adatenga kamwana ka mbuzi na ntsembe ya mbewu nkuvipereka ntsembe kwa Yahova pamwala. Pambachita vimwevi, Mulungu ambachita vodabwisa Manowa na nkazi wake ankuwona. 20 Pomwe moto umbachita ngandanganda kukwira m’dzulu kuchokera paguwa yantsembe mwiyo, mngelo wa Yahova nayembo adakwira kudzulu m’moto muyo wangandanganda, Manowa na nkazi wake ankuwona. Nthawe mweyoletu adagwada nkujolika mpakana nkhope zawo pasi. 21 Pavidateno Manowa adadziwa kuti wenze mngelo wa Yahova. Mngelo wa Yahova muyo alibe kuwonekera pomwe kwa Manowa na nkazi wake. 22 Pamwapo Manowa adauza nkazi wake kuti: “Isepano tichite kufa basi, ndawa tawona Mulungu.” 23 Koma nkazi wake adati: “Adakati Yahova ankufuna kutipha, adakatambiralini ntsembe yathu yoshoka na ntsembe yathu yambewu. Ndipo adakatiwonesalini na kutiuza vinthu vose vimwevi.”

24 Paidapita nthawe, nkazi muyo adabereka mwana mwamuna ndipo adamupasa dzina yakuti Samisoni. Pomwe mulumbwana muyo ambakula, Yahova adapitiriza kumudalisa. 25 Patsogolo pake, mzimu wa Yahova udayamba kumupasa mphanvu ku Mahane-dani pakati pa Zora na Esitaoli.