Deuteronomo
2 “Manje tidachungunuka nkuyenda kudera yachipululu kupita na njira ya ku Nyanja Ifuwira, mobverana na vomwe Yahova adaniuza. Ndipo tidafamba ntsiku zizinji mudera yapafupi na phiri ya Seiri. 2 Patsogolo pake Yahova adaniuza kuti: 3 ‘Mwafamba kwa nthawe itali mudera yapafupi na phiri mwiyi. Manje muyendere cha ku norte.* 4 Uwauze wanthu mwawo kuti: “Mupite na m’malire ya dziko ya abale wanu, mbadwa za Esau, omwe ankukhala ku Seiri. Iwo adzachite namwe mantha, ndipomwapa mufunika kukhala nawo tcheru maninge. 5 Ayi kulimbana nawo,* ndawa nidzakupasenilini mbali iriyose ya dziko yawo, olo kachigawo kokwana phazi yokha, ndawa nidapereka phiri ya Seiri kwa Esau kuti ikhale malo yake. 6 Mudzawapase kobiri pa chakudya chomwe mudzadye, ndipo mudzawapase kobiri pa madzi yomwe mudzamwe. 7 Ndawa Yahova Mulungu wanu wakudalisani pa chirichose chomwe munkuchita. Iye ankudziwa kuti munkufamba muchipululu chikulu mwichi. Yahova Mulungu wanu wakhala namwe kwa magole 40 mwaya, ndipo mulibe kusowa chirichose.”’ 8 Pamwapo tidapita pafupi na abale wathu, mbadwa za Esau, omwe ankukhala ku Seiri, ndipo tiribe kupita na njira ya Araba, Elati na Ezioni-geberi.
Patsogolo pake tidachungunuka nkupita na njira ya muchipululu cha Mowabu. 9 Manje Yahova adaniuza kuti: ‘Ayi kulimbana na Amowabu panango kuchita nawo nkhondo, ndawa nidzakupaselini mbali iriyose ya dziko yawo kuti ikhale yako. Nidapereka Ari kwa mbadwa za Loti kuti yakhale malo yawo. 10 (Kalekale mudziko mwiyi mumbakhala Aemi, wanthu azinji na wamphanvu maninge. Iwo enze ataliatali ninge Aanaki. 11 Nawombo Arefai ambaoneka ninge Aanaki, ndipo Amowabu ambawachemera kuti Aemi. 12 Pakuyamba, Ahori ambakhala ku Seiri, koma mbadwa za Esau zidawatengera dziko nkuwapha ndipo iwo adayamba kukhala mudziko mwiyo, ninge momwe Aizirayeli adzachitire na dziko yomwe Yahova adzawapase.) 13 Manje nyamukani muyambuke chigwa cha Zeredi.’ Pamwapo tidayambuka chigwa cha Zeredi. 14 Padapita magole 38 kuti tifambe kuchokera ku Kadesi-barinea nkuyambuka chigwa cha Zeredi, mpakana m’badwo wose wa amuna oyenda kunkhondo udamala pakati pathu, mobverana na vomwe Yahova adalumbira kwa iwo. 15 Pophatisira basa djanja yake, Yahova adawachosa pakati panu mpakana wose adamala.
16 Amuna wose woyenda kunkhondo pakati pa wanthu mwawo adamala kufa, 17 Yahova adayankhula pomwe na inepano kuti: 18 ‘Lero mupite na m’malire ya dziko ya Mowabu, panango kuti Ari. 19 Mukafika pafupi na Aamoni, ayi kuwashupisa panango kushupana nawo, ndawa nidzakupasenilini mbali iriyose ya dziko ya Aamoni kuti ikhale yanu. Dziko mwiyi nidayipereka kwa mbadwa za Loti kuti ikhale yawo. 20 Dziko mwiyi imbadziwika pomwe kuti ni ya Arefai. (Kalekale mudziko mwiyi mumbakhala Arefai ndipo Aamoni ambawachemera kuti Azamuzumi. 21 Wanthu mwawa enze azinji na wamphanvu maninge ndipo enze ataliatali ninge Aanaki. Koma Yahova adawawina pamaso pa Aamoni, ndipo Aamoni mwawo adawathamangisa mwakuti adatenga dziko mwiyo nkumbakhalamo. 22 Mulungu adachita pomwe vimwivi kwa mbadwa za Esau zomwe zinkukhala ku Seiri. Iye adawina Ahori pamaso pawo kuti mbadwa za Esau mwizo zitenge dziko mwiyo nkumbakhalamo mpakana lero. 23 Koma Aavi ambakhala m’miyi mpakana kukafika ku Gaza. Iwo ambakhala m’miyi mwaya mpakana pomwe Akafitorimu ochokera ku Kafitori,* adawadzonga nkuyamba kukhala m’miyi yawo mwayo.)
24 Nyamukani ndipo muyambuke chigwa cha Arinoni. Onani, napereka m’manja mwanu Sihoni yemwe ni munthu wa Chiamori, mpfumu ya Hesiboni. Ndipomwapa yambani kutenga dziko yake ndipo mumenyane naye. 25 Lero nichitise kuti wanthu wose okhala padziko yapasi, omwe ati abve va imwepo, achite namwe mantha maninge nkuyamba kukugopani. Iwo adzasokonezeke maganizo ndipo adzanjenjemere* ndawa ya imwepo.’
26 Patsogolo pake nidatumiza mitumi kuchokera muchipululu cha Kademoti nkuyenda kwa Mpfumu Sihoni ya ku Hesiboni, kuti yakanene ntontholo wa ntendere kuti: 27 ‘Nibvumizeko kupita na mudziko yako. Nindodzapita na munsewu ndipo nidzapatukirelini kumakulu panango kumadzere. 28 Nidzadye chakudya na kumwa madzi yomwe udzanigulisire. Undonibvumiza kuti nipiteko na mudziko yako 29 mpakana kukayambuka Yorodano nkungena mudziko yomwe Yahova Mulungu wathu adatipasa. Vimwivi ndivo vomwe mbadwa za Esau zomwe zinkukhala ku Seiri na Amowabu omwe ankukhala ku Ari adanichitira.’ 30 Koma Mpfumu Sihoni ya ku Hesiboni iribe kutibvumiza kuti tipiteko na mudziko yake, ndawa Yahova Mulungu wanu adabvuma kuti akhale wanthota nakuti aumise ntima wake, na cholinga chakuti amupereke m’manja mwanu ninge momwe viriri lero.
31 Patsogolo pake Yahova adaniuza kuti: ‘Ona, nayamba kale kupereka Sihoni na dziko yake kwa iwepo. Yamba kutenga dziko yake.’ 32 Sihoni padabula na wanthu wake wose kudzamenyana nase ku Yahazi, 33 Yahova Mulungu wathu adamupereka kwa isepano ndipo tidamuwina pabodzi na wana wake komasoti wanthu wake wose. 34 Panthawe mwiyo, tidatenga mathaundi yake yose na kudzonga thaundi iriyose. Tidapha amuna, akazi na wana ndipo tiribe kusiya munthu aliyese na moyo. 35 Tidatengako vipfuwo vokha pabodzi na vinthu vomwe tidatenga m’mathaundi yomwe tidawatengera. 36 Kuchokera ku Aroweli, thaundi yomwe iri m’mbalim’mbali mwa chigwa cha Arinoni, (kuphatanidzapo thaundi yomwe iri muchigwa mwicho), mpakana kukafika ku Giliyadi, penze palibe thaundi yomwe tiribe kuiwina. Yahova Mulungu wathu adapereka wose mwawo kwa isepano. 37 Koma mulibe kufenderera dziko ya Aamoni, dera yose ya m’mbalim’mbali mwa chigwa cha Yaboki, panango mathaundi ya mudera yamapiri, panango pomwe malo yaliyose yomwe Yahova Mulungu wathu adatilambiza.”