Mika
2 Tsoka kwa wanthu omwe akonza chiwembu,
Omwe akagona pa m’bedi pawo aganizira kuti achite vinthu voipa.
Ndipo machibese kukachena avichitadi.
Ndawa anamphamvu zochitira vimwevo.
2 Iwo afunisisa minda ya wanthu anango ndipo ayatenga.
Afunisisa pomwe nyumba za wanthu anango nkuzitenga.
Atenga mosowa chilungamo nyumba ya munthu,
Ndipo atenga pomwe chuma cha banja cha munthu.
3 Manje Yahova wanena kuti:
‘Nikukonza vakuti nibwerese tsoka pa banja iyi, tsoka yomwe mudzakwaniselini kuithawa.*
Wanthu imwe mudzafambelini pomwe modzikwiza ndawa idzakhale nthawe ya tsoka.
4 Pantsiku mwiyo wanthu adzanene mwambi wonena va wanthu imwe.
Ndipo adzaimbe nyimbo yokulirirani.
Adzanene kuti: “Basi tamala ise!
Wachitisa kuti chuma cha banja cha wanthu wa ntundu wathu chiperekewe kwa wanthu wa ntundu unango. Tatengerewa chuma chathu cha banja.
Iye wapereka minda yathu kwa wanthu wosakhulupirika.”
5 Ndipomwapa mudzagumanikelini aliyese wopima malo na chingwe,
Yemwe ambadzagawe malo mu mpingo wa Yahova.
6 Anena kuti: “Lekani kulalikira!
Ayi kudzalalikira pomwe vinthu vimwivi.
Tidzachitisiwelini manyazi.”
7 Imwepo wa m’nyumba ya Yakobo, ko mukunena kuti:
“Ko mzimu wa Yahova waneta kupirira?
Ko vochita vake ni vimwivi?”
Ko mawu yangu yaphindulisalini wanthu wabwino ntima?
8 Manjemanje apa wanthu wangu chaiwo anipandukire ninge munthu yemwe nizondana naye.
Wanthu omwe ankufamba molimba ntima, ninge wanthu wobwera kuchokera kunkhondo,
Muwavula mkanjo wawo wokhuza maninge womwe auvala padzulu pa vovala vawo.
9 Imwepo mwathamangisa akazi wa ntundu wangu mu nyumba zawo zabwino maninge.
Mwatengera wana wawo vinthu vabwino vomwe nidawadalisa navo ndipo mudzavibwezerelini pomwe mpakana kalekale.
10 Nyamukani mumbayende, ndawa malo mwaya ni malolini yopumulirako.
Pakuti dziko iyi ni yopsyipiziwa idzongewe, ndipo idzongewe mochitisa mantha.
11 Munthu akatewera vinthu viribe basa na viribe chilungamo nkunena bodza yakuti:
“Nidzakulalikireni va vinyu na chakumwa choledzeresa,”
Andodzakhala mulaliki wa wanthu awa.
12 Shuwadi nidzasonkhanise mbadwa zose za Yakobo.
Nidzasonkhanise Aizirayeli osala.
Nidzawabwerese pamalo yabodzi ninge gulu ya nkhosa m’khola,
Komasoti ninge gulu ya vipfuwo pamalo ya nsipu.
Kumuko kudzakhale zungo ya wanthu.’
13 Wogumula mpanda adzawatsogolere.
Iwo adzakulise pogumuliwa mwapo nkugwata pansuwo wa mpanda.
Mpfumu yawo idzakhale patsogolo pawo,
Ndipo Yahova adzawatsogolere.”