Mika
1 Yahova adayankhula na Mika* wa ku Morese muntsiku za Yotamu, Ahazi na Hezekiya, mafumu ya Yuda. Adayankhula naye m’masomphenya ndipo adamuuza va Samariya na Yerusalemu kuti:
2 “Bveserani wanthu imwe mose!
Bvesera mwatcheru iwe dziko yapasi na vose viri mumo.
Yahova, Ambuya Nkulu Maninge akhale mboni yokutsutsani,
Yahova akutsutseni ali m’kachisi wake wochena.
3 Bveserani! Yahova ankuchoka pamalo yake,
Ndipo ankubuluka nkupondaponda malo yokwizika ya padziko yapasi.
4 Mapiri yadzasungunuke kumapazi kwake,
Ndipo vigwa vidzagawanike,
Ninge phula yosungunuka na moto.
Ndipo vidzayerere ninge madzi yothiriwa pamalo yopolika.
5 Vose vimwevi vidzachitike ndawa yakuti Yakobo wanipandukira.
Komasoti ndawa ya machimo ya nyumba ya Izirayeli.
Ko wachitisa kuti Yakobo anipandukire ni mbani?
Ko ni wanthulini wa ku Samariya?
Ko ni mbani wachitisa kuti Yuda akhale na malo yokwizika?
Ko ni wanthulini wa ku Yerusalemu?
6 Samariya nidzamusanduse matongwe,
Malo yabwino kubzalapo uva.
Minyala yake nidzayaponye* muchigwa.
Fundasau yake nidzaifukule nkuisiya pamtunthu.
7 Vifaniziro vake vogoba vidzaphwanyiwe nkukhala viduntswaviduntswa.
Ndipo mphaso zose zomwe ambatambira ninge malipiro zidzashokewe pamoto.
Mafano yake yose nidzayadzonge.
Ndawa adayagumana pakuphatisa basa kobiri zomwe ambatambira pakuchita uhule.
Ndipo manje vinthu vimwevi vidzatengewe kuti vikhale malipiro ya mahule kunango.”
8 Ndawa ya vimwevi nidzalire na kukuwa.
Nidzafambe niribe ntsapato komasoti niri wosavala.
Nidzalire ninge mphumphi,
Komasoti ninge nthiwatiwa.
9 Chilonda chake chipolalini,
Ndipo chafika mpakana ku Yuda.
Muliri moyu wafalikira mpakana kukafika pansuwo wa mpanda wa wanthu wa ntundu wangu ku Yerusalemu.
10 “Osanena vimwevi ku Gati.
Ndipo ayi kulira olo pang’ono.
Kunkhulikani papfumbi ku Beti-afira.*
11 Imwepo wanthu wa ku Safiri, bulani mudziko yanu muli pezi komasoti mukuchitisa manyazi.
Wanthu wa ku Zaanana alibe kuchoka mudziko yawo.
Ku Beti-ezeli kumbandodzabveka kulira kokhakokha ndipo wathu wake adzasiye kukuthandizani.
12 Wanthu wa ku Maroti ambadikhirira vinthu vabwino,
Koma voipa vochokera kwa Yahova vafika pa nsuwo wa mpanda wa ku Yerusalemu.
13 Imwepo wanthu wa ku Lakisi, mangirirani ngolo ku gulu ya makavalo.
Ndimwepo mudayambisa chimo ya mwana nkazi wa Ziyoni,
Pakuti kupanduka kwa Izirayeli kwagumanika kwa imwepo.
14 Manje mudzapereke mphaso zolairirana kwa Moreseti-gati.
Wanthu wa ku Akizibu adapusisa mafumu ya Izirayeli.
15 Imwepo wanthu wa ku Maresha nidzakubweresereni munthu wokuwinani,
Ulemerero wa Aizirayeli udzafike mpakana ku Adulamu.
16 Muchose tsitsi yose ndipo mugere mpala ndawa ya wana wanu omwe muwakonda.
Gerani mpala ninge wa mphungu,
Ndawa yakuti wana wanu mwawo atengewa nkuyendesewa ku dziko inango.”