Amose
2 “Yahova wanena kuti,
“Pakuti Mowabu adanisatukira maulendo yazinji, nidzamuchinjirelini chigamulo changu.
Ndawa adashoka mabonzo ya mpfumu ya Edomu kuti agumane tinta.
2 Ndipomwapa nidzatumize moto ku Mowabu,
Ndipo udzashokeretu ntsanja zolimba za Kerioti.
Mowabu adzafe pakati pa zungo,
Pakati pa zungo ya nkhondo na kulira kwa lupenga ya nyanga ya nkhosa.
3 Nidzachose wolamulira* pakati pake,
Ndipo nidzaphe iye pabodzi na wanthu omuthandiza kutonga,” wanena teno Yahova.’
4 Yahova wanena kuti,
‘Pakuti Yuda adanisatukira maulendo yazinji, nidzamuchinjirelini chigamulo changu.
Ndawa yakuti adalamba malamulo* ya Yahova,
Komasoti alibe kutewedza malangizo yake.
Koma adasokeresewa na mabodza yomwe azibereki wawo ambatewedza.
5 Ndipomwapa nidzatumize moto ku Yuda
Ndipo udzashokeretu ntsanja zolimba za Yerusalemu.’
6 Yahova wanena kuti,
‘Pakuti Izirayeli adanisatukira maulendo yazinji, nidzamuchinjirelini chigamulo changu.
Ndawa yakuti adagulisa munthu wolungama kuti agumane siliva,
Ndipo adagulisa pomwe munthu wosauka kuti agumane ntsapato.
7 Apondaponda misolo ya wanthu onyozeka papfumbi,
Ndipo atchingiriza njira ya wanthu opfatsa.
Baba na mwana wake mwamuna ankugona na mtsikana m’bodzi,
Ndipo ankuipisa dzina yangu yochena.
8 Vovala vomwe atengera wanthu anango ninge chiphato, aviyanza pafupi na guwa iriyose ya ntsembe nkugonapo.
Ndipo vinyu womwe ayenda kukamwera kunyumba za* milungu yawo, agula na kobiri zomwe alipirisa wanthu.’
9 ‘Koma ine ndine nidapha Aamori iwo ankuwona.
Aamori mwawo enze ataliatali ninge miti ya mkungudza na wamphanvu ninge miti yakuluyakulu.
Nidadzonga vipaso vawo mdzulu na miju yawo pasi.
10 Nidakubulisani mudziko ya Iguputo,
Ndipo nidakufambisani muchipululu kwa magole 40,
Kuti mukatenge dziko ya Aamori.
11 Nidachitisa wana wanu anango kukhala aneneri.
Ndipo alumbwana wanu anango nidawachitisa kukhala Anaziri.
Ko ntenolini, imwe Aizirayeli?’ wanena teno Yahova.
12 ‘Koma imwepo mumbapasa Anaziri vinyu kuti amwe,
Ndipo aneneri mumbawalamula kuti: “Mulekeretu kunena vakutsogolo.”
13 Ndipomwapa inepano nidzakupondeni pamalo yanu,
Ninge momwe ngolo yomwe yatakula mitolo ya tirigu ipondera vinthu.
14 Munthu waluwiro adzasowe kothawira,
Palibe munthu wamphanvu yemwe adzalimbe,
Ndipo palibe nsocha yemwe adzapulumuke.
15 Munthu wokhala na uta adzaimirirelini,
Munthu yemwe athamanga maninge adzakwaniselini kuthawa
Ndipo wopakira pa kavalo adzapulumukelini.
16 Olo nsocha wachikanga*
Adzathawe ali pezi pa ntsiku mwiyo,’ wanena teno Yahova.”