Amose
1 Aya ni mawu ya Amose* yemwe wenzembo wobusa nkhosa ku Tekowa. Adauziwa mawu mwaya m’masomphenya yonena va Izirayeli, muntsiku za Uziya mpfumu ya Yuda na muntsiku za Yerobowamu mwana wa Yowasi, mpfumu ya Izirayeli, pakudandosala magole yawiri kuti chivomezi chichitike. 2 Iye adati:
“Yahova adzabangule ku Ziyoni,
Ndipo adzakuwe ku Yerusalemu.
Malo yomwe anyakabusa adyeserako vipfuwo yadzalire,
Ndipo pantsonga ya phiri ya Karimeli padzaume.”
3 “Yahova wanena kuti,
‘“Pakuti Damasiko adanisatukira maulendo yazinji, nidzamuchinjirelini chigamulo changu.
Ndawa yakuti adapumphuntha Giliyadi na vopulira vasimbi.
4 Nidzatumize moto panyumba ya Hazaeli,
Ndipo udzashokeretu ntsanja zolimba za Beni-hadadi.
5 Nidzathyole vopiringishira misuwo ya Damasiko.
Nidzaphe wanthu wa ku Bikati-aveni,
Na olamulira* ku Beti-edeni.
Ndipo wanthu wa ku Siriya adzayende ku ukapolo ku Kiri,” wanena teno Yahova.’
6 Yahova wanena kuti,
‘“Ndawa yakuti Gaza wanisatukira maulendo yazinji, nidzamuchinjirelini chigamulo changu.
Ndawa adatenga wanthu wose omwe enze ku ukapolo nkuwapereka ku Edomu.
7 Nidzatumize moto pampanda wa Gaza,
Ndipo udzashokeretu ntsanja zake zolimba.
8 Nidzaphe wanthu wa ku Asidodi,
Na wolamulira* wa ku Asikeloni.
Nidzalange Ekironi,
Ndipo nidzapfudze Afilisiti omwe adakalipo,” wanena teno Yahova, Ambuya Nkulu Maninge.’
9 Yahova wanena kuti,
‘Pakuti Turo adanisatukira maulendo yazinji, nidzamuchinjirelini chigamulo changu.
Ndawa adapereka ku Edomu gulu yose ya wanthu omwe enze akapolo,
Komasoti ndawa yakuti alibe kukumbukira pangano yapachibale.
10 Ndipomwapa nidzatumize moto pampanda wa Turo,
Ndipo udzashokeretu ntsanja zake zolimba.’
11 Yahova wanena kuti,
‘Ndawa yakuti Edomu wanisatukira maulendo yazinji, nidzamuchinjirelini chigamulo changu.
Ndawa adathamangisa m’bale wake na chibemba,
Ndipo adalamba kumuchitira chifundo.
Adapitiriza kuwatematema,
Ndipo adapitiriza kuwakalipira maninge.
12 Ndipomwapa nidzatumize moto ku Temani,
Ndipo udzashokeretu ntsanja zolimba za ku Bozira.’
13 Yahova wanena kuti,
‘“Ndawa yakuti Aamoni anisatukira maulendo yazinji, nidzawachinjirelini chigamulo changu.
Ndawa adatumbula akazi wamimba ku Giliyadi kuti akulise malo yawo yokhala.
14 Nidzagase mpanda wa Raba,
Ndipo moto muyo udzashokeretu ntsanja zake zolimba.
Padzakhale zungo ya nkhondo pantsiku ya nkhondo.
Komasoti mphepo ya nkuntho pantsiku ya chinvula champhanvu.
15 Ndipo mpfumu yawo pabodzi na wanthu woithandizira adzayende ku ukapolo,” wanena teno Yahova.’”