Ekisodo

37 Patsogolo pake Bezaleli adakonza Likasa ya muti wa akasiya masentimetro 110* ntalintali, masentimetro 70 mfupimfupi na masentimetro 70 kuchoka pasi kuyenda m’dzulu. 2 Adaipalangira golide wosefeka bwino nkati na kunja kwake ndipo adakonza nkombero wagolide kuzungulira Likasa mwiyo. 3 Manje adaikonzera vizerenga vinayi vagolide voikha padzulu pa mendo yake yanayi. Vizerenga viwiri venze mbali ibodzi ndipo vinango viwiri venze pomwe mbali inango. 4 Adakonza pomwe tumiti tonyamulira twa muti wa akasiya ndipo adatupalangira golide. 5 Patsogolo pake adangenesa tumiti tonyamulira tule mu vizerenga va m’mbalim’mbali mwa Likasa vire kuti ambatakulire Likasa mwiyo.

6 Adakonza chobwinikirira cha golide wosefeka bwino masentimetro 110 ntalintali na masentimetro 70 mfupimfupi. 7 Adakonza pomwe akerubi awiri wagolide. Enze ochita kupfula ndipo adawaikha m’mapeto yose yawiri ya chobwinikirira mwicho. 8 Kerubi m’bodzi adamuikha mbali ibodzi ya chobwinikirira mwicho ndipo kerubi munango adamuikha mbali inango. Akerubi mwawo adawakonza kumapeto yose yawiri ya chobwinikirira mwicho. 9 Maphaphiro ya akerubi awiri mwawo adayakwiza mdzulu nkuyapfuthula ndipo adabisa chobwinikirira na maphaphiro yawo. Akerubi mwawo adakhala monyang’anana ndipo nkhope zawo zidajolimira pa chobwinikirira mwicho.

10 Manje adakonza meza ya muti wa akasiya masentimetro 90 ntalintali, masentimetro 45 mfupimfupi na masentimetro 70 kuchokera pasi mpakana m’dzulu. 11 Adaipalangira golide wosefeka bwino ndipo adakonza nkombero wagolide kuzungulira meza yose mwiyo. 12 Adaikonzera pomwe feremu kuzungulira meza yose, mpimo wake masentimetro 7* mfupimfupi mwake ndipo adakonza nkombero wagolide paferemu mwapo. 13 Kuingizira mwapa adaikonzera vizerenga vinayi vagolide nkuviikha m’makhona yake yanayi momwe mweze mendo yake yanayi. 14 Vizerenga mwivo venze pafupi na feremu ire kuti mumbangene tumiti tonyamulira meza mwiyo. 15 Patsogolo pake adakonza tumiti tonyamulira twa akasiya nkutupalangira golide. Tumiti tumuto twenze tonyamulira meza mwiyo. 16 Padateno adakonza vombo va pameza mwapo, mbale zake, makhapu, mitsuko na mbale zonoka zakuti ambakhuthulire ntsembe za chakumwa. Adazikonza na golide wosefeka bwino.

17 Patsogolo pake adakonza choikhapo kandyero cha golide wosefeka bwino ndipo chenze chochita kupfula. Choikhapo kandyero mwicho chenze chinthu chibodzi ndipo chenze na tsinde, mwendo, tumasamba twa m’nyantsi mwa mafololi, mpfundo na mafololi. 18 Choikhapo kandyero mwicho chenze na nthawi 6. Kumbali ibodzi kwenze nthawi zitatu ndipo kumbali inango kwenze pomwe nthawi zitatu. 19 Panthawi za mbali ibodzi, iriyose yenze na tumasamba tutatu twa m’nyantsi mwa fololi yokonzewa ninge mafololi ya muti wa amondi ndipo tumasamba muto tudalondozana na mpfundo na mafololi. Panthawi za mbali inango, iriyose yenze pomwe na tumasamba tutatu twa m’nyantsi mwa fololi tokonzewa ninge mafololi ya muti wa amondi, ndipo tumasamba muto tumbalondozana na mpfundo na mafololi. Nthawi 6 zobula m’mwendo wa choikhapo kandyero mwicho adazikonza teno. 20 Pamwendo wa choikhapo kandyero mwicho penze tumasamba tunayi twa m’nyantsi mwa fololi tokonzewa ninge mafololi ya muti wa amondi, ndipo tumasamba muto tumbalondozana na mpfundo na mafololi. 21 Mpfundo ibodzi yenze m’nyantsi mwa nthawi zake ziwiri zoyambirira. Mpfundo inango yenze pomwe m’nyantsi mwa nthawi zake ziwiri, ndipo mpfundo inango pomwe yenze m’nyantsi mwa nthawi zake zinango ziwiri. Venze teno na nthawi zake 6 zobula m’mwendo wa choikhapo kandyero. 22 Choikhapo kandyero chose mwicho kuphatanidzapo mpfundo na nthawi zake chenze chibodzi ndipo adachipfula na golide wosefeka bwino. 23 Patsogolo pake adachikonzera makandyero 7, vopanira vake vodzimwira makandyero na mambale yoikhamo dotha* ya vingwe va makandyero. Vose vimwevi venze vagolide wosefeka bwino. 24 Choikhapo kandyero mwicho pabodzi na vombo vake vose adavikonza pophatisa basa golide wosefeka bwino wolemera talente ibodzi.*

25 Patsogolo pake adakonza guwa yantsembe zofukiza ya matabwa ya akasiya. Ntalintali mwake yenze 45 sentimetro ndipo mfupimfupi mwake yenze pomwe na masentimetro 45. Mbali zake zose zinayi zenze zolingana, ndipo kutalimpha kwake kuchoka pasi mpakana mdzulu yenze masentimetro 90. Nyanga zake adazikonzera kubodzi na guwa mwiyo.* 26 Adaipalangira golide wosefeka bwino padzulu pake na m’mbalim’mbali mwake kuzungulira guwa mwiyo komasoti nyanga zake. Ndipo adakonza nkombero wagolide kuzungulira guwa yose mwiyo. 27 Adakonza vizerenga viwiri vagolide m’nyantsi mwa nkombero kumbali zake ziwiri zonyang’anizana kuti mumbangene tumiti tonyamulira guwa mwiyo. 28 Patsogolo pake adakonza tumiti tonyamulira twa muti wa akasiya ndipo adatupalangira golide. 29 Adakonza pomwe mafuta yophatisa basa pakudzoza kopatulika na mafuta yonunkhira yabwino maninge, yosanganisiwa mwaluso.*