Ekisodo

36 “Bezaleli adzaphate basa pabodzi na Oholiabu komasoti mwamuna aliyese waluso* yemwe Yahova wamupasa nzeru na kuzindikira kuti adziwe momwe angaphatire basa zose zopatulika mobverana na vomwe Yahova walamula.”

2 Patsogolo pake Mose adachemera Bezaleli, Oholiabu na mwamuna aliyese waluso yemwe Yahova adaikha nzeru muntima mwake. Adachemera aliyese yemwe adadzipereka mofunisisa kuphata basa mwiyo. 3 Ndipo iwo adatenga kwa Mose vopereka vose vomwe Aizirayeli adavibweresa kuti akaviphatise basa pa utumiki wopatulika. Koma Aizirayeli mwawo adapitiriza kubweresa kwa Mose ntsembe za ufulu machibese yaliyose.

4 Manje basa yopatulika paidayambika, wanthu wose waluso adayamba kubwera m’bodzim’bodzi. 5 Iwo ambauza Mose kuti: “Wanthu ankubweresa vinthu vizinji kuposha vomwe vinkufunika pa basa yomwe Yahova walamula kuti ichitike.” 6 Pamwapo Mose adalamula kuti alalikire mu nsasa wose muyo, kuti: “Azimuna na azikazi, ayi kubweresa pomwe vinthu vinango kuti chikhale chopereka chopatulika.” Wanthu mwawo padabva mawu mwaya adaleka kubweresa vinthu. 7 Vinthu mwivo venze vokwana pa basa yose yomwe ambafuna kuti ichitike ndipo venze vizinji kuposha vomwe vimbafunikira.

8 Manje wanthu wose waluso adakonza chihema. Adachikonza na nguwo 10 zokonzera tenti zokonzewa na usalu woposa wabwino maninge, usalu wagirini, ukuse wa nkhosa wapsupsupsu na usalu ufuwira maninge. Iye* adaluka akerubi pa nguwo zimwizo. 9 Nguwo iriyose yenze na mametro 13* ntalintali mwake ndipo mfupimfupi mwake yenze na mametro yawiri. Nguwo zose zenze na saizi yolingana. 10 Patsogolo pake adalumatidza nguwo 5 pabodzi ndipo adalumatidza pomwe nguwo zinango 5 zire pabodzi. 11 Padateno adakonza vingwe voposa vagirini nkuvikoloweka pa ngoloweko m’mphepete mwa nguwo ibodzi pamalo pomwe padzalumatidzirane nguwo ziwiri mwizo. Adachita pomwe chibodzibodzi m’mphepete mwa nguwo ya kumapeto chaiko, pamalo pomwe nguwo zimwizo zidzalumatidzirane. 12 Adaikha vingwe voposa vokwana 50 vokolowekamo ngoloweko panguwo ibodzi, ndipo adaikha pomwe vingwe voposa vokwana 50 vokolowekamo ngoloweko m’mphepete mwa nguwo inango kuti vikhale monyang’anana pamalo yolumatidzirana. 13 Pomalizira adakonza nguwo 50 zagolide nkuzilumatidza na nguwo za tenti na ngoloweko mwizo mwakuti nguwo mwizo zidakhala chinguwo chibodzi chokonzera chihema.

14 Manje adakonza nguwo za ukuse wa mbuzi zoyanzika pachihema. Adakonza nguwo 11. 15 Nguwo iriyose yenze na mametro 13 ntalintali mwake ndipo mfupimfupi yenze na mametro yawiri. Nguwo zose mwizo 11 zenze saizi ibodzi. 16 Patsogolo pake adalumatidza pabodzi nguwo 5 komasoti adalumatidza nguwo zinango 6 pabodzi. 17 Padateno adaikha vingwe voposa vokwana 50 vokolowekamo ngoloweko m’mphepete mwa nguwo yakumapeto chaiko, polumatidzirana nguwo ziwiri mwizi. Adaikha pomwe vingwe voposa vokwana 50 vokolowekamo ngoloweko m’mphepete mwa nguwo inango iyo, pamalo pomwe nguwo ziwiri mwizi zimbalumatidzirana. 18 Padateno adakonza ngoloweko 50 za kobre zolumatidzira nguwo zimwizo kuti zikhale chinguwo chibodzi.

19 Adakonza chofunikizira chihema mwichi cha vikumba va nkhosa voloweka mu tinta ifuwira na chofunikizira chinango pomwe cha padzulu pake cha vikumba va akatumbu.

20 Patsogolo pake adakonza maferemu yoimisa ya chihema ya matabwa ya akasiya. 21 Feremu iriyose yenze na mametro 4 ntalintali mwake ndipo mfupimfupi mwake yenze na masentimetro 70. 22 Feremu iriyose yenze na volumatidzira viwiri vomwe venze pafupi na pafupi. Maferemu yose ya chihema adayakonza teneretu. 23 Iwo adakonza maferemu 20 ku mbali yaku sul* kwa chihema mwicho. 24 Patsogolo pake adakonza visimbi 40 vasiliva voikhamo maferemu 20 yale. Visimbi viwiri adaviikha pasi pa feremu iriyose ndipo mudangena volumatidzira viwiri. 25 Mbali inango ya chihema mwicho, mbali yaku norte* adaikhako maferemu 20, 26 na visimbi vake 40 vasiliva vokhazikapo maferemu mwayo. Visimbi viwiri venze pasi pa feremu iriyose.

27 Adakonza maferemu 6 nkuyaikha kumbuyo kwa chihema mwicho, mbali yakumaulo. 28 Adakonza maferemu yawiri kuti yakhale yodjirikirira m’makhona yawiri yakumbuyo kwa chihema mwicho. 29 Maferemu mwayo yenze na matabwa yawiri yophatanidza kuyambira pasi mpakana padzulu, pomwe penze chizerenga choyamba. Vimwevi ni vomwe adachita na maferemu yose yodjirikirira m’makhona. 30 Pamwapo adakonza maferemu 8 na visimbi 16 vasiliva vokhazikapo maferemu mwayo. Visimbi viwiri venze pasi pa feremu iriyose.

31 Manje adakonza tumiti twa muti wa akasiya, tumiti 5 twa maferemu ya mbali ibodzi ya chihema, 32 na tumiti 5 twa maferemu twa mbali inango ya chihema. Adakonza pomwe tumiti 5 twa maferemu yakumbuyo kwa chihema, mbali yakumaulo. 33 Patsogolo pake adakonza tumiti topita pakati pa maferemu yose kuchokera koyambirira mpakana kumapeto. 34 Manje adapalangira maferemu mwayo na golide ndipo adakonza vizerenga vake vagolide vongenesamo tumiti. Tumiti muto adatupalangira golide.

35 Patsogolo pake adakonza nguwo yogwatisira ya usalu wagirini, ya ukuse wa nkhosa wapsupsupsu, usalu ufuwira maninge na usalu woposa wabwino maninge. Panguwo yogwatisira mwiyo adalukapo akerubi. 36 Manje nguwo yogwatisira mwiyo adaikonzera vipilala 4 va muti wa akasiya ndipo adavipalangira golide. Adakonza pomwe tusimbi twagolide tokolowekapo nguwo yogwatisira komasoti visimbi 4 vasiliva vokhazikapo vipilala mwivo. 37 Patsogolo pake adakonza nguwo yofungira pansuwo pa chihema. Nguwo mwiyo yenze ya usalu wagirini, ya ukuse wa nkhosa wapsupsupsu, usalu ufuwira maninge na usalu woposa wabwino maninge. 38 Adakonza pomwe vipilala vake 5 na tusimbi twake tokolowekapo nguwo mwiyo yogwatisira. Padzulu pa vipilala vimwivo adapalangirapo golide ndipo tusimbi twake tolumatidzira adatupalangirambo golide. Koma visimbi vake 5 vokhazikapo vipilala mwivo venze vakobre.