Ekisodo
17 Gulu yose ya Aizirayeli idachoka ku chipululu cha Sini. Ulendo muyo adaugawa mu vigawo, mobverana na momwe Yahova adawauzira, ndipo adamanga nsasa ku Refidimu. Koma kumuko kwenze kulibe madzi yakumwa.
2 Manje wanthu adayamba kukangana na Mose kuti: “Tipase madzi timwe.” Koma Mose adawabvunza kuti: “Ko ndawa chani mukukangana na inepano? Ndawa chani mukupitiriza kuyesa Yahova?” 3 Koma wanthu mwawo enze na nyota maninge ndipo adapitiriza kung’ung’uzika motsutsana na Mose kuti: “Ndawa chani udatibulisa ku Iguputo kuti udzatiphe pabodzi na wana wathu na vipfuwo vathu?” 4 Pamwapo Mose adadandaulira Yahova kuti: “Nichite nawo tani wanthu mwawa? Andokhala pang’ono kuniphwanya na minyala!”
5 Patsogolo pake Yahova adauza Mose kuti: “Tsogola ndipo utenge anango mwa akulu wa Izirayeli na mpsimbo yako yomwe udamenya nayo kamadzi ka Nilo. Uitakule m’manja mwako ndipo umbayende. 6 Bvesera! Inepano nidzatsogole nkukaimirira pamwala ku Horebe. Kumuko ukamenye mwala muyo ndipo padzabule madzi yomwe wanthu adzamwe.” Mose adachitadi vimwivo pamaso pa akulu wa Izirayeli. 7 Pamwapo iye adapasa malo mwayo madzina yakuti Masa* na Meriba,* ndawa Aizirayeli adakangana na Mose komasoti ndawa yakuti adayesa Yahova kuti: “Ko pakati pathu pano, Yahova alipo panango neye?”
8 Manje Aamaleki adabwera kudzamenyana na Izirayeli ku Refidimu. 9 Pavidateno Mose adauza Yoswa kuti: “Tisankhulire amuna ndipo uyende nawo kukamenyana na Aamaleki. Mangwana nikaimirire padzulu pa phiri niri phatirire mpsimbo ya Mulungu chaiye m’manja mwangu.” 10 Yoswa adachitadi vomwe Mose adamuuza, ndipo adamenyana na Aamaleki. Mose, Aroni na Hura adayenda padzulu pa phiri.
11 Manje Mose akakwiza manja yake m’dzulu, Aizirayeli ambawina pankhondo mwiyo, koma akandogwesa manja yake, Aamaleki ndiwo ambawina. 12 Mose padaneta kuimisa manja, adamuikhira mwala, ndipo adakhalapo. Aroni na Hura adaphata manja yake, munango djanja iyi munango djanja inango, mwakuti manja yake yadapitiriza kukhala yoimisa mpakana dzuwa kuchoma. 13 Pamwapo Yoswa adawina Aamaleki na wanthu omwe enze ku mbali yawo pakuphatisa basa chibemba.
14 Patsogolo pake Yahova adauza Mose kuti: “Nemba vimwevi mu bukhu kuti wanthu ambadzakumbukire ndipo umuuze Yoswa kuti: ‘Nidzapfudziretu Aamaleki padziko yapasi ndipo adzakumbukiriwelini ne pang’ono.’” 15 Pamwapo Mose adamanga guwa ya ntsembe nkuipasa dzina yakuti Yahova-nisi,* 16 ndipo adati: “Yahova adzamenye nkhondo na Aamaleki ku mibadwomibadwo ndawa djanja yawo yalimbana na mpando wachifumu wa Yahova.”*