Ekisodo

16 Padachoka ku Elimu, gulu yose ya Izirayeli idafika muchipululu cha Sini chomwe chiri pakati pa Elimu na Sinai. Adafika kumuko pantsiku ya 15 ya mwezi wachiwiri kuchokera pomwe adachoka mudziko ya Iguputo.

2 Muchipululu mumo gulu yose ya Aizirayeli idayamba kung’ung’uzikira Mose na Aroni. 3 Aizirayeli mwawo ambauza Mose na Aroni kuti: “Vidakakhala bwino djanja ya Yahova idakatiphera mudziko ya Iguputo, komwe timbadya nyama na nkate nkukhuta. Koma mwatibweresa muchipululu muno kuti muphese mpingo wose muyu na njala.”

4 Patsogolo pake Yahova adauza Mose kuti: “Nikugwesereni chakudya kuchokera kudzulu ninge nvula, ndipo aliyese ambalokote saizi yomukwanira pantsiku mwiyo. Nichite vimwevi kuti niwayese kuti niwone peno angatewedze chilamulo changu panango neye. 5 Koma pantsiku ya 6, ambalokote saizi mwiyo kubwerezera kawiri vomwe ambalokota ntsiku na ntsiku ndipo ambakonzeretu vomwe alokota ivo.”

6 Manje Mose na Aroni adauza Aizirayeli wose kuti: “Kumaulo kuno mudziwe kuti Yahova ndiye adakubulisani mudziko ya Iguputo. 7 Mangwana machibese mudzaone ulemerero wa Yahova ndawa wabva kung’ung’uzika kwanu kotsutsana na Yahova uyo. Isepano ndise mbanimbo kuti mumbating’ung’uzikire?” 8 Manje Mose adapitiriza kunena kuti: “Yahova akakupasani nyama yakuti mudye maulo yano na nkate wokwanira machibese, muwone kuti Yahova wabva kung’ung’uzika kwanu kotsutsana naye. Isepano ndise mbani? Kung’ung’uzika kwanu ni kotsutsanalini na isepano, koma ni kotsutsana na Yahova.”

9 Manje Mose adauza Aroni kuti: “Uza gulu yose ya Aizirayeli kuti: ‘Bwerani pamaso pa Yahova, ndawa wabva kung’ung’uzika kwanu.’” 10 Manje Aroni padandomaliza kuyankhula na gulu yose ya Aizirayeli, iwo adachungunuka nkunyang’ana kuchipululu. Ndipo patsogolo pake ulemerero wa Yahova udaonekera mu ntambo.

11 Yahova adauza pomwe Mose kuti: 12 “Nabva kung’ung’uzika kwa Aizirayeli. Ndipo uwauze kuti: ‘Maulo kuli bibibi* mudye nyama ndipo mangwana machibese mudzadye nkate nkukhuta. Pamwapo mudzadziwe kuti inepano ndine Yahova Mulungu wanu.’”

13 Manje maulo mwayo padabwera mbalani za chinziri* zomwe zidadzadza nsasa wose, ndipo mangwana yake machibese kudachita mame kuzungulira nsasa wose muyo. 14 Mame mwayo payadauma, muchipululu mumo pasi padagumanika tunthu tothasalala, tosalala ninge madzi youmbana pasi. 15 Aizirayeli padaona tunthu mutu adayamba kubvunzana kuti: “Ko ichi nchani?” Ndawa ambadziwalini kuti chenze chani. Mose adawauza kuti: “Ni chakudya chomwe Yahova wakupasani. 16 Yahova walamula kuti: ‘Aliyese alokote chakudya mwichi mobverana na momwe adyera. Munthu aliyese mumbamulokotere mpimo wa omeri* ibodzi mobverana na chiwerengero cha wanthu omwe ali mutenti yake.’” 17 Pamwapo Aizirayeli adayamba kulokota chakudya mwicho, anango adalokota chizinji koma anango adalokota ching’onong’ono. 18 Akapima chakudya mwicho pa mpimo wa omeri, munthu yemwe adalokota chizinji chimbakhaliralini ndipo yemwe adalokota ching’onong’ono chimbapereweralini. Aliyese adalokota mobverana na momwe ambadyera.

19 Pamwapo Mose adawauza kuti aliyese osati asunge chakudya mpakana mangwana machibese.” 20 Koma iwo alibe kumubvera Mose. Wanthu anango padasiya chakudya mwicho mpakana machibese, chidachoka nkhonye nkuyamba kununkha, mwakuti Mose adawakalipira maninge. 21 Machibese yaliyose iwo ambalokota chakudya mwicho, aliyese mobverana na momwe ambadyera. Dzuwa ikapsa, chakudya mwicho chimbasungunuka.

22 Pantsiku ya 6, wanthu mwawo adalokota saizi yobwerezera kawiri, munthu aliyese maomeri yawiriyawiri. Pamwapo atsogoleri wose wa gulu ya Aizirayeli adabwera kudzanena kwa Mose. 23 Ndipo iye adawadawira kuti: “Ndivo vomwe Yahova wanena. Mangwana ni ntsiku yopumula,* ni satade yopatulika ya Yahova. Vomwe mungafune kuphika, phikani, ndipo vomwe mungafune kubwabwasa, bwabwasani. Vomwe vikhalire muviikhe pambali nkuvisunga mpakana machibese.” 24 Manje adasungadi chakudya mwicho mpakana machibese mobverana na vomwe Mose adawalamula, ndipo chiribe kununkha panango kuchita nkhonye. 25 Manje Mose adawauza kuti: “Dyani chakudya mwichi lero, ndawa lero ni satade ya Yahova ndipo mukachigumanelini kunja kwa nsasa. 26 Mumbalokote chakudya mwichi kwa ntsiku 6, koma ntsiku yachi 7 ni Satade. Pantsiku mwiyi chimbagumanikelini kunja kwa nsasa.” 27 Koma pantsiku ya 7 wanthu anango adayenda kuti akalokote chakudya mwicho, koma alibe kuchigumana.

28 Pamwapo Yahova adauza Mose kuti: “Ko wanthu imwe mupitirize kulamba kubvera malamulo na malangizo yangu mpakana lini? 29 Dziwani kuti Yahova wakupasani Satade. Ndipomwapa pantsiku ya 6 akukupasani chakudya cha ntsiku ziwiri. Pantsiku ya 7 aliyese ambakhale pamalo yake. Munthu osati ambachoke pa malo yake.” 30 Pamwapo wanthu mwawo adasunga satade* ntsiku yachi 7.

31 Nyumba ya Izirayeli idapasa chakudya mwicho dzina yakuti “mana.”* Chenze chichena ninge mapira,* ndipo kukoma kwake chimbabveka ninge makeke* yothasalala yoikhiwa uchi. 32 Patsogolo pake Mose adati: “Yahova walamula kuti: ‘Dzadzani mpimo ubodzi wa omeri na mana kuti usungiriwe mibadwo yanu yose, na cholinga chakuti iwo adzaone chakudya chomwe nidakupasani muchipululu panidakuchosani mudziko ya Iguputo.’” 33 Manje Mose adauza Aroni kuti: “Tenga mtsuko ndipo uyikhemo mana yokwana mpimo ubodzi wa omeri nkuuyikha pamaso pa Yahova kuti usungiwe m’mibadwo yanu yose.” 34 Aroni adaikhadi mtsuko muyo patsogolo pa Umboni* kuti mana mwayo yasungiwe mobverana na vomwe Yahova adalamula Mose. 35 Aizirayeli adadya mana kwa magole 40 mpakana pomwe adangena mudziko yomwe mumbakhala wanthu. Iwo ambadya mana mpakana pomwe adafika m’malire ya dziko ya Kanani. 36 Mipimo 10 ya omeri yambakwana mpimo ubodzi wa efa.*