Ekisodo

11 Pamwapo Yahova adauza Mose kuti: “Pakhala muliri ubodzi wokha womwe nigwesere Farao na Aiguputo. Patsogolo pake adzakubvumizeni kuchoka mudziko ino. Pakukuuzani kuti muchoke adzachite kukuthamangisani. 2 Manje uza wanthu kuti mwamuna aliyese na nkazi aliyese akumbire kwa munthu yemwe akhala naye pafupi vinthu vasiliva na vagolide.” 3 Pamwapo Yahova adachitisa kuti, Aiguputo akomere ntima Aizirayeli. Komasoti Mose ambalemekezewa maninge mu dziko ya Iguputo pamaso pa atumiki wa Farao na pamaso pa Aiguputo wose.

4 Manje Mose adati: “Yahova wanena kuti: ‘Pakati pa usiku ningene mu Iguputo, 5 ndipo mwana Aliyese woyamba kubadwa mudziko ya Iguputo adzafe. Kuyambira mwana woyamba wa Farao yemwe alikhale pa mpando wachifumu, mpakana mwana woyamba wa kapolo nkazi yemwe ankuphata basa pamwala wa mphero* komasoti mwana woyamba kubadwa wa nyama iriyose. 6 Mudziko yose ya Iguputo mudzakhale kulira kukulu komwe kukalibe kwachitikako komasoti komwe kudzachitikelini pomwe. 7 Olo mbwaya idzauwirelini aliyese wa Aizirayeli, idzauwirelini wanthu panango vipfuwo vawo, kuti mudziwe kuti Yahova angachitire Aizirayeli vinthu vosiyana na vomwe angachitire Aiguputo.’ 8 Ndipo atumiki wanu wose mwawa adzabwere kwa inepano nkunigwadira komasoti kunijolimira. Iwo adzanene kuti: ‘Yenda, iwepo na wanthu wose omwe akulondola.’ Akadzateno nidzayendedi.” Padanena mawu mwaya adachoka kwa Farao ali wokalipa.

9 Patsogolo pake Yahova adauza Mose kuti: “Farao adzakubverenilini imwepo. Viriteno kuti nichite vodabwisa vizinji mudziko ya Iguputo.” 10 Mose na Aroni adachita vodabwisa vose vimwevi pamaso pa Farao. Koma Yahova adabvuma Farao kuumisa ntima wake, mwakuti alibe kubvuma kuti Aizirayeli achoke mudziko yake.