Ekisodo
10 Patsogolo pake Yahova adauza Mose kuti: “Yenda kwa Farao ndawa nabvuma kuti iye na atumiki wake aumise mitima yawo, kuti nichite vizindikiro vangu pamaso pake. 2 Nachita vimwevi kuti mufotokozere wana wanu na azizukulu wanu momwe nakhaulisira Iguputo komasoti vizindikiro vomwe nachitira Iguputo. Ndipo mudzadziwe kuti ine ndine Yahova.”
3 Pamwapo Mose na Aroni adayenda kwa Farao nkukamuuza kuti: “Yahova Mulungu wa Aheberi wanena kuti: ‘Ko upitirize kulamba kunibvera mpakana lini? Bvumiza wanthu wangu kuti ayende kukanitumikira. 4 Ukapitiriza kulamba kuti wanthu wangu ayende, mangwana nikutumizire abombo wa dzombe mudziko yako. 5 Abombo wa dzombe mwawo adzabise pasi pose ndipo mudzakwaniselini kuwona pasi. Adzadye chirichose chomwe chidasiyiwa na matalala. Ndipo adzadye miti yanu yose yomwe yayamba kumera. 6 Abombo wa dzombe mwawo adzadzale m’nyumba zanu, m’nyumba zose za atumiki wanu na m’nyumba za mu Iguputo mose. Adzadzale m’nyumba mwezi mpakana kufika pakuti olo azibereki wanu ne azibereki wa azibereki wanu alibe kuwaonako chibadwiro.’” Padateno, Mose adachoka pamaso pa Farao.
7 Patsogolo pake atumiki wa Farao adamuuza kuti: “Ko munthu moyu apitirize kutidzudza* mpakana lini? Bvumizani kuti wanthu mwawa ayende kuti akatumikire Yahova Mulungu wawo. Ko mukalibe kuzindikira kuti Iguputo wadzongeka?” 8 Pamwapo Farao adachemeresa Mose na Aroni nkuwauza kuti: “Yendani, katumikireni Yahova Mulungu wanu. Koma ko ni mbani na mbani wati ayende?” 9 Pamwapo Mose adati: “Tiyende na alumbwana wathu, wachikulire wathu, wana wathu wachimuna na wachikazi pabodzi na nkhosa na ng’ombe zathu, ndawa tinkuyenda kukachitira Yahova chikondwerero.” 10 Farao adawauza kuti: “Peno ningabvume kuti imwepo pabodzi na wana wanu muyende, ndiye kuti Yahova alidi na imwepo. Ninkudziwa kuti pali choipa chomwe munkufuna kuchita. 11 Vikwanisikelini! Amuna okha ndiwo wati ayende kukatumikira Yahova ndawa ndivo vamudakumbira.” Padanena vimwevi, adawachosa pamaso pa Farao.
12 Pamwapo Yahova adauza Mose kuti: “Pfuthula djanja yako nkulata dziko ya Iguputo kuti abombo wa dzombe agwe mu dziko yose mwiyo nkudya vomera vose va mu dziko mumo, chirichose chomwe matalala yadasiya.” 13 Pavidateno Mose adalata dziko yose ya Iguputo na mpsimbo yake, ndipo Yahova adachitisa mphepo yochokera kumachibese kukuntha dziko yose mwiyo, masikati yose na usiku wose. Pakudachena machibese mphepo mwiyo idabweresa abombo wa dzombe. 14 Abombo wa dzombe mwawo adafika m’dziko yose ya Iguputo nkufalikira m’madera yose ya dziko mwiyo ndipo adadzonga maninge. Abombo wa dzombe azinji ninge mwawo enze akanati agwako kuchokera kalekale ndipo adzagwelini pomwe azinji ninge mwawo. 15 Abombo wa dzombe mwawo adabisa pasi pose mu dziko mwiyo ndipo dziko idachita mdima. Abombo wa dzombe mwawo adadya vomera vose va mudziko mwiyo na vipaso zose va m’miti vomwe viribe kudzongeka na matalala, mwakuti palibe kukhalako chopsyipirira chirichose m’miti panango m’maminda m’dziko yose ya Iguputo.
16 Manje Farao adachemeresa Mose na Aroni mwakankulumize nkuwauza kuti: “Nachimwira Yahova Mulungu wanu ndipo nachimwira pomwe imwepo. 17 Pulizi nikhululukireni chimo yangu ulendo uno wokha, ndipo mugwigwirireni Yahova Mulungu wanu kuti anichosere muliri wakupha muyu.” 18 Pamwapo iwo adachoka pamaso pa Farao ndipo adayenda kukagwigwirira Yahova. 19 Padateno Yahova adachitisa kuti mphepo yamphanvu mwiyo imbakunthe kuchokera kumaulo ndipo idatenga abombo wa dzombe mwawo nkuwaponya m’Nyanja Ifuwira. M’madera yose ya Iguputo mulibe kusalako dzombe ne ibodzi. 20 Olo nteno, Yahova adabvuma kuti Farao aumise ntima wake mwakuti alibe kubvumiza kuti Aizirayeli achoke.
21 Patsogolo pake Yahova adauza Mose kuti: “Pfuthula djanja yako na kulata kudzulu kuti mudziko yose ya Iguputo mugwe mdima wam’badaba.” 22 Nthawe mwiyoletu Mose adapfuthula djanja yake nkulata kudzulu ndipo mudziko yose ya Iguputo mwenze mdima wam’badaba kwa ntsiku zitatu. 23 Wanthu ambakwanisalini kuwonana ndipo palibe yemwe adachoka pamalo yomwe wenze kwa ntsiku zitatu. Koma komwe Aizirayeli ambakhala kumbagwerewera. 24 Pavidateno Farao adachemera Mose nkumuuza kuti: “Yendani, katumikireni Yahova, koma nkhosa na ng’ombe zanu ayi kuyenda nazo. Wana wanu pomwe mungayende nawo.” 25 Koma Mose adati: “Imwepo mutipase* nyama zokapereka ntsembe zoshoka na ntsembe zinango, kuti tikazipereke kwa Yahova Mulungu wathu. 26 Vipfuwo vathu tiyende navo, tisiyelini chipfuwo olo chibodzi, ndawa tikaphatisire basa vinango va vipfuwo vimwevi pakutumikira Yahova Mulungu wathu. Koma pakali pano tinkudziwalini kuti tikapereke chani pakutumikira Yahova mpakana tikafike kumuko.” 27 Pamwapo Yahova adabvuma kuti Farao aumise ntima wake ndipo alibe kubvuma kuti Aizirayeli achoke. 28 Patsogolo pake Farao adauza Mose kuti: “Choka pamaso pangu! Ayi kudzayesa kuwonekera pomwe pamaso pangu, ndawa ntsiku yomwe udzawonekere pomwe udzafe.” 29 Ndipo Mose adadawira kuti: “Nidzawonekerelini pomwe pamaso panu, ninge mwamwanenera.”