Samueli wachiwiri

3 Nkhondo ya wanthu wa Sauli na wa Davide idapitiriza. Davide adapitiriza kukhala na mphanvu, koma wanthu wa Sauli mphanvu zimbawamalira.

2 Panthawe mwiyi, Davide adabereka wana amuna ku Heburoni. Mwana wake woyamba wenze Aminoni ndipo amayi wake enze Ahinowamu wa ku Yezereeli. 3 Ndipo mwana wake wachiwiri wenze Kileyabu ndipo amayi wake enze Abigayeli yemwe wenze nkazi wa Nabala wa ku Karimeli. Wachitatu wenze Abisalomu ndipo amayi wake enze Maaka, mwana wa Talimai mpfumu ya ku Gesuri. 4 Wachinayi wenze Adoniya ndipo amayi wake enze Hagiti. Wachishanu wenze Sefatiya yemwe amayi wake enze Abitali. 5 Wachi 6 wenze Itireamu ndipo amayi wake enze Egila, nkazi wa Davide. Amwawa ni wana omwe Davide adabereka ali ku Heburoni.

6 Pomwe nkhondo ya wanthu wa Sauli na wanthu wa Davide imbapitiriza, Abineri adawonesesa kuti ankupitiriza kukhala na mphanvu pa wanthu wa Sauli. 7 Sauli wenze na nkazi mng’ono dzina yake Rizipa, mwana wa Aya. Paidapita nthawe, Isi-boseti adabvunza Abineri kuti: “Ndawa chani udagona na nkazi mng’ono wa ababa wangu?” 8 Abineri padabva mawu ya Isi-boseti mwaya, adakalipa maninge ndipo adanena kuti: “Ko ndine mbwaya yachabechabe ya Yuda? Inepano nakhala ninkuwonesa chikondi chokhulupirika kwa wanthu wa m’banja ya Sauli ababa wako, azibale wake komasoti anzake ndipo niribe kukupereka kwa Davide. Koma iwepo unkuninena kuti nachita vinthu voipa na nkazi. 9 Mulungu anilange maninge peno nidzachitirelini Davide mobverana na vomwe Yahova adalumbira kwa iye, 10 kufulusa ufumu, kuuchosa kwa Sauli nkukhazikisa mpando wachifumu wa Davide mu Izirayeli na mu Yuda. Kuchokera ku Dani mpakana ku Beere-seba.” 11 Isi-boseti alibe kudawira chirichose pa vomwe Abineri adanena ndawa ambamugopa.

12 Nthawe mwiyoletu, Abineri adatumiza wanthu kwa Davide nkukamuuza kuti: “Ko dziko iyi ni ya mbani?” Adanena pomwe kuti: “Chitani nane pangano, ndipo inepano nidzayesese kuti Aizirayeli wose akhale kumbali yanu.” 13 Davide adadawira kuti: “Viri bwino! Nichitedi nawe pangano. Koma ninkukukumbira chinthu chibodzi. Ayi kudzabwera kuno kudzawonana nane pokhapokha udzabwere na Mikala mwana nkazi wa Sauli.” 14 Patsogolo pake Davide adatumiza mawu kwa Isi-boseti mwana wa Sauli yakuti: “Nipase nkazi wangu Mikala yemwe nidamuperekera malowolo ya makhanda yokwana 100 ya Afilisiti yomwe achosa pochita mdulidwe.” 15 Pamwapo Isi-boseti adatuma wanthu kuti akatenge Mikala kwa mwamuna wake Palitiyeli* mwana wa Laisi. 16 Koma mwamuna wake ambamulondola uku ankulira mpakana kukafika ku Bahurimu. Patsogolo pake Abineri adamuuza kuti: “Bwerera!” Padateno adabwerera.

17 Panthawe mwiyi, Abineri adatumiza mawu kwa akulu wa Izirayeli yakuti: “Pale mwakhala munkufuna kuti Davide akhale mpfumu yanu. 18 Manje dziwani vati muchite ndawa Yahova adauza Davide kuti: ‘Nidzapulumuse wanthu wangu Aizirayeli kwa Afilisiti komasoti kwa azondi wawo wose pophatisa basa djanja ya Davide ntumiki wangu.’” 19 Patsogolo pake Abineri adayankhula na wanthu wa dzinza ya Benjamim. Adayenda pomwe kukayankhula na Davide ali awiriwiri ku Heburoni ndipo adamuuza vomwe Aizirayeli komasoti wanthu wa dzinza ya Benjamim adapangana.

20 Abineri padafika kwa Davide ku Heburoni pabodzi na amuna 20, Davide adawakonzera phwando. 21 Patsogolo pake Abineri adauza Davide kuti: “Inepano nimbati ninyamuke nikaunganidze Aizirayeli wose kuti akhale kumbali yanu imwepo mpfumu, kuti achite namwe mbverano ndipo mudzakhale mpfumu ya wanthu wose omwe mufuna kuwatonga.” Pamwapo Davide adabvuma kuti Abineri ayende mwantendere.

22 Pakalibe kupita nthawe, Yowabu na atumiki wa Davide adafika kuchokera kunkhondo ali na vinthu vizinji. Panthawe mwiyi, Abineri wenzelini pabodzi na Davide ku Heburoni ndawa wenze adamubvumiza kuyenda mwantendere. 23 Yowabu padafika pabodzi na gulu yose yankhondo yomwe wenze nayo, wanthu adamuuza kuti: “Abineri mwana wa Nera wenze wabwera kwa mpfumu ndipo mpfumu yamubvumiza kuyenda mwantendere.” 24 Pavidateno Yowabu adayenda kwa mpfumu nkunena kuti: “Ko mwachita chani? Abineri wenze wabwera kwa imwepo. Manje shuwa imwepo mungamusiye kuti ayende mwantendere? 25 Ko Abineri mwana wa Nera mumudziwalini imwepo? Iye wenze wabwera kuno kuti adzakunamizeni* kuti adziwe vose polewa va imwepo komasoti chirichose chomwe munkuchita.”

26 Pamwapo Yowabu adachoka nkumusiya Davide ndipo adatuma wanthu kuti akamubweze Abineri. Wanthu mwawo adamugumana Abineri pa nchera wa Sira, koma Davide alibe kudziwa chirichose. 27 Abineri padabwerera ku Heburoni, Yowabu adamutenga nkuyenda naye pa mbali pa nsuwo wa mpanda kuti ayankhule naye ali awiri. Koma kumuko adamulasa pamimba mwakuti adafa. Adamupha ndawa yakuti adapha Asaheli m’bale wake wa Yowabu. 28 Davide padabva vimwivi, adanena kuti: “Yahova ankudziwa kuti inepano na ufumu wangu tiribe mulandu mpakana kalekale ndawa ya kuphewa kwa Abineri mwana wa Nera. 29 Mulandu muyu, ubwerere pansolo pa Yowabu na wanthu wose wa m’banja ya ababa wake. M’banja ya Yowabu, mudzasowelini mwamuna wa matenda yochoka magazi ku vidzo voberekera, wakhate, wophata basa yokonza nguwo,* wophewa na chibemba panango wosowa chakudya!” 30 Yowabu na m’bale wake Abisai, adapha Abineri ndawa yakuti iye adapha Asaheli m’bale wawo ku nkhondo ku Gibiyoni.

31 Patsogolo pake Davide adauza Yowabu na wanthu wose omwe enze naye kuti: “Ng’ambani vovala vanu nkuvala masakha ndipo mumulire Abineri.” Mpfumu Davide ambafamba pambuyo pa chitanda cha Abineri. 32 Abineri adaikhiwa m’manda ku Heburoni. Kumanda muko, mpfumu idayamba kulira mokuwa ndipo wanthu wose adayambambo kulira. 33 Mpfumu mwiyo idayamba kuimba nyimbo yolira Abineri kuti:

“Shuwadi Abineri afe ninge munthu alibe nzeru?

Wafa ninge waphewa na vigananga.”*

Pavidateno wanthu wose adalira pomwe.

35 Patsogolo pake wanthu wose adabwera kwa Davide ntsiku mwiyo masikati kudzamupasa chakudya kuti amunyamalise. Koma Davide adalumbira kuti: “Mulungu anilange maninge peno ningadye chakudya chirichose dzuwa ikalibe yachoma.” 36 Wanthu wose adaona vomwe mpfumu imbachita ndipo adaona kuti viri bwino. Ambawona kuti viri bwino molingana na vinthu vinango vose vomwe mpfumu mwiyo imbachita. 37 Wanthu wose komasoti Aizirayeli wose adadziwa ntsiku mwiyo kuti mpfumu yenze iribe mulandu pa impfa ya Abineri mwana wa Nera. 38 Patsogolo pake mpfumu idauza atumiki wake kuti: “Ko munkudziwalini kuti yemwe wafa lero uyu ni nkulu komasoti munthu wamphanvu mu Izirayeli? 39 Inepano lero nafoka olo kuti nidadzodzewa nkukhala mpfumu. Ninkuwona kuti amuna awa wana wa Zeruya achita nkhanza maninge. Yahova abwezere munthu aliyese wochita voipa mobverana na kuipa kwake.”