Samueli wachiwiri
2 Patsogolo pake Davide adabvunza Yahova kuti: “Ko niyende muthaundi inango ya Yuda?” Yahova adamudawira kuti: “Yenda.” Davide adabvunza pomwe kuti: “Niyende kuponi?” Iye adamudawira kuti: “Ku Heburoni.” 2 Pamwapo Davide adayenda kumuko pabodzi na akazi wake awiri, Ahinowamu wa ku Yezereeli na Abigayeli yemwe wenze nkazi wa Nabala wa ku Karimeli. 3 Davide adayenda pomwe na amuna omwe ambafamba naye, aliyese na banja yake. Iwo ambakhala m’mathaundi yozungulira Heburoni. 4 Patsogolo pake amuna wa ku Yuda adabwera nkudzodza Davide kuti akhale mpfumu ya dzinza ya Yuda.
Iwo adauza Davide kuti: “Wanthu wa ku Yabesi-giliyadi ni omwe adaikha Sauli m’manda.” 5 Pamwapo Davide adatumiza mawu kwa amuna wa ku Yabesi-giliyadi yakuti: “Yahova akudaliseni, ndawa mudawonesa ambuya wanu Sauli chikondi chokhulupirika pa kumuikha m’manda. 6 Yahova akuwoneseni chikondi chokhulupirika komasoti kuthembeka kwake. Inembo nikuwoneseni kukoma ntima ndawa yakuti mwachita vimwivi. 7 Manje limbisani manja yanu ndipo mukhale amuna olimba ntima, ndawa ambuya wanu Sauli wamwalira ndipo Ayuda anidzodza kuti nikhale mpfumu yawo.”
8 Koma Abineri mwana wa Nera, yemwe wenze mtsogoleri wa masocha ya Sauli, adatenga Isi-boseti mwana wa Sauli nkuyenda naye ku Mahanaimu. 9 Kumuko adamuikha kukhala mpfumu kuti ambatonge Giliyadi, Aasere, Yezereeli, Efuraimu, Benjamim na Izirayeli wose. 10 Isi-boseti mwana wa Sauli wenze na magole 40 pomwe adakhala mpfumu ya Aizirayeli ndipo adatonga kwa magole yawiri. Koma Ayuda ambatewera Davide. 11 Nthawe yose yomwe Davide adakhala mpfumu ku Heburoni nkumbatonga dzinza ya Yuda, idakwana magole 7 na minyezi 6.
12 Paidapita nthawe, Abineri, mwana wa Nera na atumiki wa Isi-boseti mwana wa Sauli, adachoka ku Mahanaimu nkuyenda ku Gibiyoni. 13 Nayembo Yowabu mwana wa Zeruya na atumiki wa Davide, adayenda ku thawale ya Gibiyoni ndipo magulu yawiri mwayo yadagumana kumuko. Gulu inango idakhala pasi kumbali ya thawale mwiyo ndipo gulu inango idakhalambo kumbali inango. 14 Patsogolo pake Abineri adauza Yowabu kuti: “Tani alumbwana wathu awa amenyane* tione?” Yowabu adadawira kuti: “Viri bwino, amenyanedi.” 15 Pamwapo iwo adanyamuka. Ku mbali ya Benjamim na Isi-boseti mwana wa Sauli, adasankhula alumbwana 12 ndipo kwa atumiki wa Davide adasankhula pomwe alumbwana 12. 16 Mulumbwana aliyese adaphata munzake munsolo ndipo aliyese adalasa munzake na chibemba m’mimba mwakuti wose mwawo adafa. Malo mwayo yomwe yali ku Gibiyoni, adayapasa dzina yakuti Helikati-hazurimu.
17 Pavidateno, padayambika nkhondo ndipo nkhondo mwiyo idakula maninge. Abineri na amuna wa Chiizirayeli, adawiniwa na atumiki wa Davide. 18 Wana amuna atatu wa Zeruya, omwe ni Yowabu, Abisai na Asaheli, enzembo pamwapo. Asaheli wenze na luwiro maninge ninge bawala. 19 Asaheli adayamba kuthamangisa Abineri. Iye alibe kuchungunukira kumakulu panango kumadzere pomwe ambathamangisa Abineri. 20 Abineri padayang’ana m’mambuyo, adabvunza kuti: “Ko ndiwe Asaheli?” Asaheli adadawira kuti: “Inde ndinepano.” 21 Patsogolo pake Abineri adamuuza kuti: “Khonera kumakulu panango kumadzere, uphate m’bodzi pa alumbwana mwawo ndipo utenge vomwe ungamuvule.” Koma Asaheli adapitiriza kumuthamangisa. 22 Patsogolo pake Abineri adauza pomwe Asaheli kuti: “Leka kunithamangisa. Nikuphetu iwepo! Manje nikakupha nidzaonane tani na m’bale wako Yowabu?” 23 Koma Asaheli alibe kuleka kumuthamangisa. Pamwapo Abineri adamulasa pamimba na chophatira cha nkondo ndipo nkondo muyo udabulikira kunsana mwakuti adagwa pasi nkufera pamwapo. Aliyese akafika pamalo yomwe Asaheli adafera, ambayamba waima.
24 Pavidateno, Yowabu na Abisai adayamba kuthamangisa Abineri. Pomwe dzuwa imbachoma, enze adafika paphiri ya Ama, yomwe iri pafupi na Giya panjira yoyenda ku chipululu cha Gibiyoni. 25 Wanthu wa dzinza ya Benjamim adasonkhana kumbali ya gulu ya Abineri nkuima padzulu paphiri inango. 26 Patsogolo pake Abineri adakuwirira Yowabu kuti: “Ko tipitirize kuphana na chibemba mpakana lini? Ko unkudziwalini kuti vimwivi vibwerese mabvuto yakulu? Ko ni lini pomwe uwauze wanthu awa kuti aleke kuthamangisa abale wawo?” 27 Yowabu adadawira kuti: “Ninkulumbira mudzina ya Mulungu chaiye, sembe ulibe kuyankhula, wanthu mwawa adakapitiriza kuthamangisa abale wawo mpakana mangwana.” 28 Pamwapo Yowabu adaliza lupenga ya nyanga ya nkhosa ndipo wanthu wake adasiya kuthamangisa Aizirayeli mwakuti nkhondo idamalira pamwapo.
29 Abineri na wanthu wake adafamba usiku wose kupitira ku Araba mpakana kuyambuka Yorodano. Iwo adafamba mu chigwa* chose mpakana kukafika ku Mahanaimu. 30 Yowabu padasiya kuthamangisa Abineri, adaunganidza wanthu wose. Pa gulu ya atumiki wa Davide padasowa Asaheli na amuna anango 19. 31 Koma atumiki wa Davide mwawo, adawina wanthu wa dzinza ya Benjamim na amuna wa Abineri mwakuti wanthu okwana 360 adafa. 32 Iwo adanyamula thupi ya Asaheli nkukaiikha m’manda ya ababa wake ku Betelehemu. Patsogolo pake Yowabu na amuna omwe enze naye adafamba usiku wose ndipo adafika ku Heburoni kunkuchena.