Tulandulenu Khadilo dia Yehowa dia Gudibulumuisa

1. Mukunda natshi khadilo dia gudibulumuisa dia Yehowa diana gututuma ha gudihula diago?

TANGUA wana tala mafumu avula mangino, wajiya guzuela egi akhala nu khadilo dia gudibulumuisa ba? Mu guzuela guabonga, avula mukatshi diawo akhalago nu khadilo diene. Uvi Yehowa Nzambi wa ngolo jiagasue wakhala nu gudibulumuisa. (Ngi. 113:5-8) Gushigo nga nu muthu wakhala nu gudibulumuisa gifua Yehowa; gakhalago nji nu lulendo nga hazonda. Mu longo edi, tuza mumona maluholo nguana Yehowa wana gutukalegela ndaga nu luholo makalegelo ene ana monesa diago egi wakhala nu gudibulumuisa. Tuza nji mumona luholo Yesu walanduile khadilo dia sh’enji dia gudibulumuisa. Tangua tuza muzuelela makalegelo ene agasue, tuza mumona luholo ajiya gutukuatesa ha gukuata ufuta wakola nu Yehowa nu gulandula khadilo dienji dia gudibulumuisa.

YAKHALA YALEBA HA GUTA MAGA NU YEHOWA

2. Ngimbo 62:8 yana gutuwambela itshi mukunda nu Yehowa? (Tala nji holu dia gizula.)

² Matangua avula, yakhala lamba ha guta maga nu athu akhala nu lulendo. Luholo ana tangiza egi abalega athu ako, luana tshita egi athu avula avue woma wa gusuena hehi nawo nga ha guta nawo maga. Uvi Yehowa gakhalago ngenyi! Khadilo dia gudibulumuisa dia sh’etu wa mu dilu diana gumutuma ha gututoga ha gusuena hehi n’enji nu ha gumuwambela ndaga jiagasue jidi gutusagesa. (Tanga Ngimbo 62:8.) Gifua luholo tata wana zumba an’enji wana tegelela muabonga milonga yawo, Yehowa nji wana tegelela muabonga isambu ya akombeledi enji. Hene, wasonegesele isambu yavula ya akombeledi enji mu Biblia. Ndaga jiene jiagasue jiana monesa egi Yehowa wana tshigina diago egi tusuene hehi n’enji. (Yosh. 10:12-14; 1 Sam. 1:10-18) Uvi itshi tuajiya gutshita gula matangua ako tudi mutangiza egi tushigo tuatagana ha gusuena hehi nu Yehowa?

3. Itshi idi gugutshiginyisa egi Yehowa wana tshigina egi ukhale gumukombelela tangua diagasue?

³ Tudi naye gukombelela Yehowa ikhale tudi mutangiza egi muene gajiyilego gutuzumba. Mukunda natshi tuazuela ngenyi? Mu gifezegeselo gia mona watotele, Yesu wafuanesele Yehowa nu tata wa mutshima wabonga munu mun’enji wakhalele mutangiza egi sh’enji gajiyilego luko gutshigina egi avutuge mu fami. Itshi yakalegele tata muene havutugile mun’enji gu inzo? Yesu wazuelele egi tangua tata muene wamonele mun’enji, “wayile phushi gumutagana, wamuyambele, wamuhanele beze nu gisemo giagasue.” (Luka 15:17-20) Yehowa udi gifua tata muene. Tangua diagasue diana guvua muene isambu ya athu adi gudisagesa mukunda nu gubola akalegele nga ya athu adi nu gikenene, khadilo dienji dia gudibulumuisa diana gumutuma ha guategelela nu guzumba guagasue. (Is. 3:19, 20) Yehowa wana guavuila khenda; gifua tata munu wayile muphushi ha guyamba mun’enji, Yehowa nji wana guahana gikhesa nu wana tshigina egi akotelese egi wana guazumba. (Yesh. 57:15) Mangino, luholo lutshi Yehowa wana gutukalegela ndaga gifua tata wayile muphushi ha guyamba mun’enji? Matangua avula, wana kalegela akulu, enya fami yetu nu aphangi a mu hungu ha gutukuatesa. (Yak. 5:14, 15) Wana tshita ngenyi handaga wana tshigina egi tukuate ufuta wakola n’enji.

4. Mukunda natshi yakhalele yaleba gudi athu ha guta maga nu Yesu?

⁴ Yesu walanduile gifezegeselo gia sh’enji. Yesu wakhala nu gudibulumuisa gifua sh’enji. Ndaga yene yatshitshile egi hakhalele muene ha mavu, yakhalele yaleba gudi athu ha gusuena hehi n’enji. Yakhalele nji yaleba gudi ene ha gumuhula mihu. (Mako 4:10, 11) Tangua Yesu wakhalele guahula matangi awo mu ndaga imoshi, akhalele diago gumuwambela ndaga jiagasue akhalele mutangiza. (Mat. 16:13-16) Tangua akhalele mutshita ndaga jiabola, akhalelego muvua woma handaga akhalele mujiya egi Yesu wakhala nu gisemo nu khenda nu wakhala wahuiminyina. (Mat. 17:24-27) Luholo Yesu walanduile muabonga makalegelo a sh’enji luakuatesele alandudi enji ha gujiya Yehowa muabonga. (Yone 14:9) Akotelesele egi Yehowa gakhalago gifua mafumu a ikombelelo a mu tangua diawo anyi akhalele nu lulendo nu akhalelego muzumba athu. Uvi wakhala Nzambi wa gudibulumuisa nu wana tshigina egi athu asuene hehi n’enji.

5. Luholo lutshi khadilo dia gudibulumuisa diajiya gukuatesa athu ako ha gusuena hehi nu esue?

⁵ Luholo lutshi tuajiya gulandula gifezegeselo gia Yehowa? Gula tudi nu khadilo dia gudibulumuisa, mbayikhala yaleba gudi athu ako ha gusuena hehi nu esue. Mbatushigo nji mukhala nu makalegelo abola gifua ginjiongo, lulendo nga gutuna gutotesela athu ako handaga makalegelo a luholo elu ana gulengesa athu ako. Uvi mbatukhala nu gisemo nu guhuiminyina nu mbatutotesela athu ako gubola guawo; ngenyi mbayikhala yaleba gudi ene ha gusuena hehi nu esue. (Kol. 3:12-14) Akulu adi naye gutshita ngolo hagula ikhadigo lamba gudi aphangi a mu hungu ha gusuena hehi nawo nga ha guta nawo maga. Mbayikhala yaleba ha gutshita ngenyi gula adi mubalegesa tangua nu aphangi. Hene, gula luholo ludi guene, akulu adi naye guya mu gudibungisa gu Inzo ya Ufumu ha fundo dia gulandula mu vidéoconférence. Adi naye nji gulongesa nu aphangi inzo nu inzo. Gula aphangi ajiya akulu muabonga, mbayikhala yaleba gudi ene ha guatoga ukuateshi tangua diagasue.

YEHOWA GAKHALAGO NU NDAGA JIAKOLA-KOLA

6-7. Hana ifezegeselo idi mumonesa luholo Yehowa wategelele isambu ya akombeledi enji.

⁶ Matangua avula, athu akhala nu lulendo ana tangiza egi ana jiya ndaga jiagasue nu ana tshiginago gusombegesa matangi awo. Uvi Yehowa gakhalago ngenyi; ikhale wana jiya ndaga jiagasue nu wabalega athu agasue, uvi wakhala hehi ha gutegelela matangi a athu ako, matangua ako wana sombegesa nji badesizio enji. Tutadilenu luholo luakalegele muene Miriame ndaga. Yehowa watombele Moize ha gukhala mumoneshi wenji, uvi Miriame nu Alona asendesele guzuela ndaga jiabola mukunda nu Moize. Mu guzuela guko, Miriame gakhalelego munemesa Yehowa. Ndaga yene yahanele Yehowa khabu, hene wakatesele Miriame misongo ya hute. Uvi tangua Alona nu Moize abubidile Yehowa ha gusaga phangi’awo wa mukhetu, itshi Yehowa wakalegele? Nga Yehowa wakhalele muenya lulendo, nga watunyile gusombegesa matangi enji. Uvi luholo luakhala muene Nzambi wa gudibulumuisa, wasagele Miriame.​—Lutang. 12:1-15.

⁷ Yehowa wamonesele nji khadilo dienji dia gudibulumuisa hategelele muene fumu Ezekiase. Yehowa wamuwambelele mu njila ya profete wenji egi mbawufua. Ezekiase wadidile, wabubidile Yehowa ha gumusaga. Yehowa wamuvuidile khenda, wamuwambelele egi mbawukhala luko nu monyo ivo 15. (2 Maf. 20:1, 5, 6) Yadiago, khadilo dia gudibulumuisa dia Yehowa diana gumutuma ha guvuila athu ako khenda nu guategelela.

8. Ifezegeselo itshi idi mumonesa egi Yesu gakhalago nu ndaga jiakola-kola? (Mako 3:1-6)

⁸ Yesu walanduile gifezegeselo gia sh’enji. Hakhalele muene ha mavu, wakhalele mukalegela athu ako ndaga jiabonga gula luholo ludi guene. Ha gufezegesa, wasagele athu mu Lusugu lua Guhuluguga ikhale mbalagaji jienji jiakhalelego musuanguluga nu ndaga yene. (Tanga Mako 3:1-6.) Luholo Yesu wana tuameza hungu dia Uklisto mangino luana monesa nji egi gakhalago nu ndaga jiakola-kola nu wana guvuila athu ako khenda. Ha gufezegesa, gula muthu mumoshi wa mu hungu wakalagala gubola guakoma, Yesu wana gumonesela khadilo dia guhuiminyina nu wana gumuhana luendu lua gusombegesa makalegelo enji.​—Gumo. 2:2-5.

9. Luholo lutshi tudi naye gumonesa egi tushigo enya ndaga jiakola-kola? (Tala nji ifuanesa.)

⁹ Luholo lutshi tuajiya gulandula gifezegeselo gia Yehowa? Tudi naye gutshita ngolo ha gulandula gifegezeselo gia Yehowa gia gudibulumuisa nu gutuna gukhala enya ndaga jiakola-kola mu luholo luetu lua gutangiza nu lua gutshita ndaga. (Yak. 3:17) Ha gufezegesa, mvuaji jiana landula gifezegeselo gia Yehowa jianago gutoga an’awo ha gutshita ndaga jinyi ajiyilego gutshita. Yakoba udi gifezegeselo giabonga mu ndaga eyi; lumene luenji ludi mu Gisendeselo 33:12-14 ludi mumonesa ndaga yene haphelo. Mvuaji jiakhala nu gudibulumuisa nu jiakhalago nu ndaga jiakola-kola, jianago gufuanesa an’awo nu ana ako. Akulu nji ashigo naye gukhala nu ndaga jiakola-kola. Ha gufezegesa, mukulu mumoshi gashigo naye gukhala jigi-jigi nu matangi enji; uvi udi naye gutshigina matangi nu badesizio a akulu ako gula ashigo mushiya mikhuala ya Yehowa. (1 Tim. 3:2, 3) Uvi mukut’etu agasue tudi naye gutshita ngolo ha gutshigina matangi a athu ako ikhale tudi mutadila ndaga mu luholo lua gudisha. (Roma 14:1) Yadiago, muthu wagasue mu hungu udi naye gutshita ngolo ha gumonesa ‘gudi athu agasue egi gashigo muenya ndaga jiakola-kola.’​—Fili. 4:5.

YEHOWA WAKHALA WAHUIMINYINA

10. Mu maluholo atshi Yehowa wamonesele khadilo dienji dia guhuiminyina?

¹⁰ Yajiya gukhala egi aye nji udi mujiya egi enya lulendo anago gunengena. Akhalago nji nu khadilo dia guhuiminyina. Uvi Yehowa gakhalago ngenyi; gushigo nji nga nu muthu wakhala wahuiminyina gifua muene! Ha gufezegesa, mu masugu a Nowa, Yehowa wazuelele egi mbawunengena ivo 120 gutuama dia gushiya athu abola. (Gis. 6:3) Ndaga yene yakuatesele Nowa ha gusansa an’enji nu ha gutunga masuwa hamoshi nu enya fami yenji. Ivo yavula gungima, Yehowa wategelele Abalahama nu guhuiminyina guagasue hakhalele muene gumuhula ndaga yatadila gushiyiwa gua dimbo dia Sodoma nu Gomola. Nga Yehowa wakhalele muenya lulendo, nga wamuvutudile egi: ‘Udi mutangiza egi ngushigo mujiya ndaga ngudi mutshita ba?’ Uvi luholo Yehowa wakhala Nzambi wa gudibulumuisa, wategelele Abalahama nu guhuiminyina guagasue.​—Gis. 18:20-33.

11. Ha gutadila 2 Phetelo 3:9, mukunda natshi Yehowa wana monesa khadilo dia guhuiminyina mangino?

¹¹ Mangino nji, Yehowa wana monesa khadilo dia guhuiminyina. Wana nengena tangua diahagele muene ha gushiya mavu awa. Wana tshita ngenyi mukunda natshi? “Handaga gana tshiginago egi nga muthu mumoshi afue, uvi wana tshigina egi athu agasue abalumune mutshima.” (Tanga 2 Phetelo 3:9) Yehowa wana laba genji gunengena ba? Ndo! Khadilo dienji dia guhuiminyina diakuatesele gale athu avula ha gumujiya nu ha gukuata ufuta wakola n’enji. Tudi nji gudifelela egi mu masugu adi muza, athu ako avula mbaajiya nji Yehowa. Uvi Yehowa mbagashigo mulandula gunengena mayilago. Wana zumba athu, uvi mbagashigo guabemba ha gulandula gukalagala ndaga yagasue atshigina. Gualeha ndo, mbawuza mushiya athu agasue abola.​—Hab. 2:3.

12. Luholo lutshi Yesu wana landula khadilo dia Yehowa dia guhuiminyina?

¹² Yesu walanduile gifezegeselo gia sh’enji. Yesu wana landula khadilo dia Yehowa dia guhuiminyina sendese mualeha. Wamonele luholo Satana wazuelele ndaga jia mambo mukunda nu Yehowa nu athu. (Gis. 3:4, 5; Yobo 1:11; Gumo. 12:10) Wamonele nji athu avula mumona malamba akola. Tangiza gale luholo luana gudivua muene hadi muene munengena lusugu mbaaza “ha gushiya midimo ya Diabulu”! (1 Yone 3:8) Itshi yana kuatesa Yesu ha gunengena nu guhuiminyina guagasue egi Yehowa amuhane njila ha gushiya midimo ya Diabulu mayilago? Idi khadilo dienji dia gudibulumuisa; diana gumukuatesa ha gubemba ndaga jiagasue ha mago a Yehowa.​—Makal. 1:7.

13. Luholo lutshi Yesu wakhalele wahuiminyina nu apostolo enji? Watshitshile ngenyi mukunda natshi?

¹³ Hakhalele muene ha mavu, Yesu wakhalele nji wahuiminyina nu apostolo enji. Ha gufezegesa, tangua apostolo enji akhalele mumana tangua diagasue ha gujiya gula nanyi udi muthu wakoma mukatshi diawo, Yesu gaavuidilego khabu nga gisegela. Uvi walanduile guakalegela ndaga nu guhuiminyina guagasue. (Luka 9:46; 22:24-27) Wakhalele musha mutshima egi mbaasombegesa. Aye nji gudi nu khadilo dimoshi diabola udi mulandula gulua nadio ba? Gula idi ngenyi, idi yadiago egi udi nu gusuanguluga ha gujiya egi wakhala nu fumu mumoshi wahuiminyina nu wa gudibulumuisa!

14. Itshi yajiya gutukuatesa ha gukhala nu khadilo dia guhuiminyina?

¹⁴ Luholo lutshi tuajiya gulandula gifezegeselo gia Yehowa? Gula tudi nu “matangi a Klisto,” mbayitukuatesa ha gutangiza nu gukalagala ndaga gifua Yehowa. (1 Kol. 2:16) Itshi yajiya gutukuatesa ha gukotelesa muabonga matangi a Klisto? Ndaga yajiya gutukuatesa idi gutanga ba Evanjile. Gungima tudi naye guzula tangua dia gutangigiza ndaga jiakalegele Yesu nu gishina giayikalegele muene. Tudi naye nji gutoga Yehowa ha gutukuatesa ha gukhala athu a gudibulumuisa nu ahuiminyina gifua Yesu. Gula tudi nu matangi gifua a Yesu, mbaatukuatesa ha gulandula gifezegeselo gia Yehowa nu ha gukhala ahuiminyina nu ha gumonesela aphangi ako khadilo diene.​—Mat. 18:26-30, 35.

YEHOWA WANA ZULA ATHU AGUDIBULUMUISA NU NDANDO

15. Hana ifezegeselo idi mumonesa egi Yehowa wana zumba athu agudibulumuisa. (Ngimbo 138:6)

¹⁵ Tanga Ngimbo 138:6. Athu akhala nu gudibulumuisa akhala nu luendu lua gujiyiwa gudi Yehowa! Biblia yana khala nu ifezegeselo ya athu avula a gudibulumuisa anyi athu akhalelego muzula nu ndando. Uvi Yehowa wakhalele guamona nu wakhalele guazula nu ndando. Athu ako mukatshi diawo ashigo mujiyiwa muabonga, uvi Biblia yana zuelela mene jiawo. Yehowa watumile Moize ha gusonega jina dia Debora. Debora wakhalele muenya mudimo wa fami ya Izake nu ya Yakoba ivo 125! Ikhale tushigo mujiya ndaga jiavula jiatadila mukhetu muene wagujinginyina, uvi Yehowa wasonegesele ndaga jidi mumonesa egi athu akhalele gumuzumba. (Gis. 24:59; 35:8) Ivo yavula gungima, Yehowa watombele mona wa yala mumoshi wakhalele mubambi wa imeme, jina dienji Davidi, ha gubua fumu wa Isalele. (2 Sam. 22:1, 36) Gungima dia guvualewa gua Yesu, Nzambi watumile anjelo gudi abambi a imeme ha guahana luendu lua gukhala athu a thomo a gujiya egi Masiya wavualewa gale gu Beteleheme. (Luka 2:8-11) Tangua Yozefe nu Madiya ayile nu Yesu gu tempelo, Yehowa wahanele Simeone nu Ana luendu lua gumona mun’enji. (Luka 2:25-30, 36-38) Yadiago, ‘ikhale Yehowa wana khala gosa gualeha, uvi wana mona athu agudibulumuisa’!

16. Luholo lutshi Yesu walanduile gifezegeselo gia sh’enji?

¹⁶ Yesu walanduile gifezegeselo gia sh’enji. Yesu wakhalele muzula athu a gudibulumuisa nu ndando gifua sh’enji. Walongesele athu ‘anginyilego khalasa nu athu a githuhu’ lukuma luabonga luatadila Ufumu wa Nzambi. (Makal. 4:13; Mat. 11:25) Wakhalele musaga athu mu luholo luabonga luakhalele guatuma ha gudivua egi wana guazumba nu wana guanemesa. (Luka 5:13) Mu phipha ya gisugishilo gutuama dia gufua guenji, Yesu wawevele malu a apostolo enji; mu tangua dikulu, gutshita ngenyi guakhalele mudimo wa enya mudimo. (Yone 13:5) Gutuama dia guya guenji mu dilu, Yesu wamonesele egi wana zula alandudi enji nu ndando haahanele muene mudimo wabalega ndando wa gulongesa athu ako hagula ajiya guheta monyo wa ivo nu ivo.​—Mat. 28:19, 20.

17. Luholo lutshi tuajiya gumonesa egi tuana zula athu ako nu ndando? (Tala nji gifuanesa.)

¹⁷ Luholo lutshi tuajiya gulandula gifezegeselo gia Yehowa? Tuana monesa egi tuana zula athu ako nu ndando tangua tuana gualongesa lukuma luabonga ikhale akatuga fundo ditshi, adi nu gilema gitshi, alongugile muavula nga ndo. Tuana monesa nji egi tuana zula aphangi’etu nu ndando tangua tuana guazula egi atubalega ikhale tudi nu inemo itshi mu hungu nga ndo tuana jiya gutshita ndaga jiko guabalega. (Fili. 2:3) Yehowa wana suanguluga muavula tangua diana mona muene egi tuakhala “athu a thomo” ha guzumba athu ako nu guanemesa mu luholo elu nu mu maluholo ako avula.​—Roma 12:10; Sef. 3:12.

18. Mukunda natshi tudi naye gulandula khadilo dia Yehowa dia gudibulumuisa?

¹⁸ Gula tudi mutshita yagasue ha gulandula khadilo dia gudibulumuisa dia tata wetu wa mu dilu, mbayikuatesa athu ako ha gusuena hehi nu esue, mbatushigo mukhala enya ndaga jiakola-kola nu mbatukhala tuahuiminyina diago. Mbatukhala nji muzula athu ako nu ndando gifua Yehowa. Tujimbilago egi gula tudi mutshita yagasue ha gulandula gifezegeselo gia Yehowa Nzambi wa gudibulumuisa, mbayitukuatesa ha gukhala luko nu ndando yavula gu meso enji!​—Yesh. 43:4.