Mukanda wa Yobo Wajiya Gugukuatesa Tangua Udi Muhana Athu Ako Malongo

1-2. Ndaga itshi Elihu nu mafuta a Yobo thathu asangele hayile ene mutala Yobo?

TANGUA Yobo watotesele ima yenji yagasue, athu avula a gu khanda yene avuile lumene lua ndaga yamubuidile. Mafuta a Yobo thathu Elifaze, Biledade nu Zofale avuile nji lumene luene, hene ayile gumutala ha gumuhana gikhesa. Tangua amonele ndaga jiabuidile Yobo, yaasagesele muavula.

² Tangiza gale ndaga eyi. Yobo watotesa ima yenji yagasue. Ngombe jienji nu imeme yenji nu shamo jienji jiakuyiwa, jiko jiashiyiwa. Enya mudimo wenji avula afua. An’enji agasue afua tangua inzo yakhadi ene yaabuila. Gungima Yobo wakata misongo yakola diago, muila wenji wazala pha nu ijimbo. Tangua diaheta mafuta enji thathu, amusanga wagukhala hashi mu fuphi nu gikenene giavula. Itshi akalegele? Abalegesele n’enji masugu 7 uvi azuelelego nga gima ikhale Yobo wakhalele mu lamba diakola. (Yobo 2:12, 13) Muvuala mumoshi mu jina dia Elihu wajile nji mutala Yobo, wakhalele hehi nawo. Gungima Yobo wasendesele guta lusugu luavualewe muene mukumbu nu guzuela egi nga gavualewego genji. (Yobo 3:1-3, 11) Yobo wakhalele nu funu ya ukuateshi! Mafuta enji akhalele naye gumuhana gikhesa nu gudisagesa mukunda nu muene ha gumonesa egi adi mafuta abonga. Tutadilenu ndaga yakalegele ene.

3. Itshi tuza mutadila mu longo edi?

³ Yehowa wakuatesele Moize ha gusonega ndaga jiazuelele nu jiakalegele mafuta a Yobo thathu nu Elihu. Tuajiya diago guzuela egi demo diatumile Elifaze ha guzuela ndaga jiko. Uvi ndaga jiazuelele Elihu jiakatugile gudi Yehowa. (Yobo 4:12-16; 33:24, 25) Gishina giene mu mukanda wa Yobo tuajiya gusanga malongo abonga nu abola amuhanewe. Mu longo edi, tuza mumona luholo mukanda wa Yobo wajiya gutukuatesa tangua tudi mutshigina guhana athu ako malongo. Tuza muzuelela thomo gifezegeselo giabola gia mafuta a Yobo thathu. Gungima tuza muzuelela gifezegeselo giabonga gia Elihu. Mu gitshinyi giagasue, tuza mumona luholo enya Isalele akhalele naye guheta gubonga mu mukanda wa Yobo nu malongo esue nji tuajiya guzula mangino.

LUHOLO MAFUTA A YOBO THATHU AMUHANELE MALONGO

4. Mukunda natshi mafuta a Yobo thathu amuhanelego gikhesa? (Tala nji gifuanesa.)

⁴ Biblia yana zuela egi mafuta a Yobo ayile ha gumuhana ‘gikhesa nu gumuwalagana’ mukunda nu ndaga jiagasue jiamubuidile. (Yobo 2:11) Uvi amuhanelego gikhesa giene. Mukunda natshi? Idi mukunda nu ndaga eji thathu jialandula. Thomo, azudilego tangua dia gutegelela Yobo nu gukamba gukotelesa muabonga mulonga wenji. Ha gufezegesa, amuwambelele egi malamba enji adi ndola yamuhanyi Nzambi mukunda nu gubola guakalegele muene.a (Yobo 4:7; 11:14) Ya mbadi, ndaga jiavula azuelele jiakhalelego mukuatesa Yobo, uvi jiakhalele gumusagesa nu akhalelego nji gumuhana malongo ene nu gisemo. Mala ene azuelele ndaga jiakhalele mumonega gifua jidi jiabonga uvi jiakhalele jia mambo. (Yobo 13:12) Ha gufezegesa, Biledade wawambelele Yobo mbala jiyadi egi wakhalele muzuela muavula. (Yobo 8:2; 18:2) Zofale nji watamegele Yobo egi “muthu waheya.” (Yobo 11:12) Ya thathu, ikhale akhalelego muzuela mu dijui diakola tangua akhalele muta maga nu Yobo uvi mbimbi jiawo jiatumile Yobo ha gutangiza egi malamba enji adi mukunda nu gubola guakalegele muene nu ha gudivua egi ashigo nu ndando. (Yobo 15:7-11) Mala ene atshitshile yagasue ha gutshiginyisa Yobo egi wakalegele gubola uvi akalegelego nga ndaga imoshi ha gumuhana gikhesa nga gukolesa gutshigina guenji.

5. Luholo lutshi Yobo wadivile mukunda nu malongo amuhanele mafuta enji?

⁵ Tangua mafuta a Yobo amanesele guzuela, yakhalele gifua amba luko phone mavu. Mbimbi jiawo jiasagesele Yobo muavula. (Yobo 19:2) Gishina giene Yobo wakhalele muluila lukuma luenji. Mbimbi jiawo jiamubuishile tunga-tunga nu wasendesele guzuela izuele-zuele. (Yobo 6:3, 26) Ndaga jiazuelele mafuta a Yobo jiakhalelego gudivua nu matangi a Yehowa, amuvidilego nji khenda. Gishina giene Satana waakalegele ha gulebesa Yobo. (Yobo 2:4, 6) Malongo atshi enya Isalele akhalele naye guzula mu lumene lua Yobo? Luholo lutshi lumene luene luajiya gutukuatesa mangino?

6. Malongo atshi akulu a gu Isalele akhalele naye guzula mu gifezegeselo giabola gia mafuta a Yobo?

⁶ Malongo enya Isalele akhalele naye guzula. Tangua Yehowa wahanele enya Isalele mikhuala, watombele akulu ha gusophesa akombeledi enji nu guakuatesa ha gutumagela mikhuala yenji. (Mikh. 1:15-18; 27:1) Akulu ene akhalele naye gutegelela muabonga gutuama dia guhana malongo nga dia gusophesa athu. (2 Gudi. 19:6) Ha fundo dia gutangiza egi adi mujiya ndaga jiagasue, akhalele naye guhula mihu ha gukotelesa milonga muabonga. (Mikh. 19:18) Akhalele naye nji guzuela ndaga nu gisemo gudi athu akhalele muza guatoga ukuateshi. Mukunda natshi? Handaga gula akulu ene atuna guzuela nu gisemo, yakhalele naye gutuma muthu ha gutuna guzuela ndaga jiagasue jidi mu mutshima wenji. (Guz. 22:22-24) Malongo awa adi mukatshi dia malongo ako akulu a gu Isalelele akhalele naye guzula mu lumene lua Yobo.

7. Phamba akulu akhalele nu ginemo gia guhana athu ako malongo gu Isalele ba? Luholo lutshi lumene lua Yobo luakhalele naye gukuatesa enya Isalele? (Ishima 27:9)

⁷ Idi yadiago egi ishigo phamba akulu akhalele nu ginemo gia guhana athu ako malongo gu Isalele. Uvi muthu wagasue gu Isalele, muvuala nga muthu wagukola, yala nga mukhetu wakhalele nu ginemo giagukuatesa athu ako ha gukolesa ufuta wawo nu Yehowa. (Ngi. 141:5) Mafuta abonga ana gudikuatesa mu luholo elu. (Tanga Ishima 27:9.) Gifezegeselo giabola gia mafuta a Yobo giakhalele naye gukuatesa enya Isalele ha gujiya ndaga akhalelego naye guzuela nu jinyi akhalelego naye gutshita tangua akhalele muhana athu ako malongo.

8. Ndaga jitshi tushigo naye gutshita tangua tudi muhana athu ako malongo? (Tala nji ifuanesa.)

⁸ Malongo tuajiya guzula. Esue Aklisto tuana tshigina gukuatesa aphangi etu a mala nu a akhetu adi mutagana nu malamba. Uvi ha guakuatesa, tudi naye gutuna gukalagala ndaga gifua mafuta thathu a Yobo. Thomo, tushigo naye guzuela muphushi uvi tudi naye gukamba gujiya ndaga jiagasue gutuama dia guahana malongo. Ya mbadi, tudi naye guhana malongo adi mukatuga mu Biblia uvi tushigo naye guhana malongo ha gutadila ujiyi wetu gifua muakalegele Elifaze. (Yobo 4:8; 5:3, 27) Ya thathu, tushigo naye guzuela ndaga jiajiya gusagesa athu ako. Tujimbilago egi Elifaze nu mafuta enji azuelele ndaga jiko jia giamatshidia jinyi mupostolo Phaula watangele mu mukanda wasonegele muene. (Fuanesa Yobo 5:13 nu 1 Kolinto 3:19.) Uvi ndaga jiavula jiazuelele ene mukunda nu Yehowa jiakhalele jia mambo, jiasagesele nji Yobo; hene Yehowa wazuelele egi ndaga jiene jiakhalelego jia giamatshidia. (Yobo 42:7, 8) Tangua tudi muhana athu ako malongo, tudi naye gutshita yagasue hagula malongo ene azodigo Yehowa gifua udi Nzambi wabola nga gutuma akombeledi enji ha gutangiza egi Yehowa ganago guazumba. Henyaha tutadilenu malongo tuajiya guzula mu gifezegeselo gia Elihu.

LUHOLO ELIHU WAHANELE YOBO MALONGO

9. Mukunda natshi Yobo wakhalele nu funu ya ukuateshi gungima dia gumana nu mafuta enji? Luholo lutshi Yehowa wamukuatesele?

⁹ Yobo nu mafuta enji amanele muavula. Ndaga jiazuelele ene jidi jiagusonega mu mikhapho 28 ya Biblia. Ndaga jiene jiamonesele egi akhalele nu gisegela nu khabu. Gishina giene Yobo walanduile gudisagesa! Ikhale ngenyi, wakhalele nu funu ya muthu wajiya gumubela nu gumuhana gikhesa. Luholo lutshi Yehowa wamukuatesele? Yehowa watumile Elihu ha gumuhana malongo. Na mukunda natshi Elihu wanengenene egi mala ene amanesele gumana gutuama egi muene azuele? Wazuelele egi: ‘Ame ngudi muvuala, uvi enue mudi athu agukola. Gishina giene nganengena nu ginemua giagasue gutuama dia guzuela.’ (Yobo 32:6, 7) Elihu wakotelesele ndaga athu avula ana kotelesa giwa mangino egi: Matangua avula, athu agukola akhala nu ndunge handaga adi nu ivo yavula nu eksperianse yavula gubalega mavuala. Uvi gungima dia gutegelela Yobo nu mafuta enji, Elihu wamonele egi gakhalelego naye luko guhena tedie. Wazuelele egi: ‘Gukhala nu ivo yavula gushigo guene guana tshita egi muthu akhale nu ndunge; ishigo nji phamba athu agukola ana kotelesa ndaga jiabonga.’ (Yobo 32:9) Ndaga itshi iko yazuelele Elihu? Wayizuelele luholo lutshi?

10. Itshi yakalegele Elihu gutuama dia guhana Yobo malongo? (Yobo 33:6, 7)

¹⁰ Gutuama dia guhana Yobo malongo, Elihu wanengenene egi Yobo atuluise gale mutshima nu akhale hehi ha gutshigina malongo ene. Itshi yakalegele muene? Thomo, wadikandele. Tudi mujiya ndaga yene handaga Biblia yana monesa egi mu tangua dimoshi ngenyi, Elihu wavuile nji khabu. (Yobo 32:2-5) Ikhale ngenyi, watele maga nu Yobo nu gisemo giagasue. Ha gufezegesa, wamuwambelele egi: ‘Tala! Ame nji ngudi muthu gifua aye gutuama dia Nzambi wa giamatshidia.’ (Tanga Yobo 33:6, 7.) Elihu wazudile tangua dia gutegelela Yobo muabonga. Gutuama dia gumuhana malongo, wavutugile ndaga jiko jia ndando jiazuelele Yobo. (Yobo 32:11; 33:8-11) Watshitshile nji ngenyi mu mbala jiko jiahanele muene Yobo malongo.​—Yobo 34:5, 6, 9; 35:1-4.

11. Luholo lutshi Elihu wahanele Yobo malongo? (Yobo 33:1)

¹¹ Tangua Elihu wakhalele muhana Yobo malongo, gamutumilego ha gudivua gifua gashigo nu ndando, uvi wamuhanele nawo nu ginemua giagasue. Ha gufezegesa, wakhalele mutamega Yobo mu jina dienji, uvi idi mumonega egi mafuta thathu a Yobo akalegelego ngenyi. (Tanga Yobo 33:1.) Yajiya gukhala egi Elihu wawungulugile luholo luakhalele muene mutshigina guzuela tangua Yobo nu mafuta enji akhalele mumana. Gishina giene, wahanele Yobo luendu lua guzuela tangua diakhalele muene gumuhana malongo. (Yobo 32:4; 33:32) Elihu wakuatesele nji Yobo ha gujiya egi ndaga jiko jiakhalele muzuela muene nu gutshita jiakhalelego jiabonga; wamuwunguluishile makalegelo a Yehowa gifua ndunge jienji, ngolo jienji, luholo luana kalagala muene ndaga mu luholo luatagana nu guzumba guenji gua giamatshidia. (Yobo 36:18, 21-26; 37:23, 24) Yajiya gukhala egi malongo abonga a Elihu akuatesele Yobo ha gulondega matangi enji gu malongo akhalele naye gumuhana Yehowa. (Yobo 38:1-3) Luholo lutshi gifezegeselo gia Elihu giakhalele naye gukuatesa enya Isalele? Luholo lutshi gifezegeselo giene giajiya gutukuatesa mangino?

12. Luholo lutshi Yehowa wakhalele mukuatesa akombeledi enji mu njila ya baprofete? Luholo lutshi gifezegeselo giabonga gia Elihu giakhalele naye gukuatesa enya Isalele?

¹² Malongo enya Isalele akhalele naye guzula. Mbala jiavula Yehowa wakhalele mukalegela baprofete ha gulongesa enya Isalele nu guahana lubelo. Ha gufezegesa, mu tangua dia manzuji, Yehowa wakalegele profete Debora ha guhana enya Isalele malongo, wakalegele nji Samuele ha guhana akombeledi enji malongo ikhale wakhalele muvuala. (Manz. 4:4-7; 5:7; 1 Sam. 3:19, 20) Mu tangua dia mafumu, Yehowa wakhalele mukalegela baprofete ha gukuatesa enya Isalele ha gulandula gumukombelela mu luholo luabonga. Wakhalele nji guatuma ha guhana lubelo gudi athu akhalele mutuna gumutumagela. (2 Sam. 12:1-4; Makal. 3:24) Gifezegeselo gia Elihu gidi mu mukanda wa Yobo giakhalele naye gukuatesa mala nu akhetu agujinginyina gudi Nzambi ha gujiya ndaga jia guzuela nu luholo lua gujizuela tangua akhalele muhana malongo.

13. Luholo lutshi Aklisto ajiya guhana aphangi’awo gikhesa?

¹³ Malongo tuajiya guzula. Esue Aklisto tuana longesa athu Biblia ha guakuatesa ha gujiya Nzambi. Tuana zuela nji mbimbi jidi muhana aphangi’etu gikhesa. (1 Kol. 14:3) Akulu adi naye guwambela aphangi’awo a mala nu a akhetu “mbimbi jiabonga” tangua diagasue; adi naye gutshita ngenyi ikhale muthu adi mukuatesa udi nu khabu nga ndo udi muzuela “izuele-zuele.”​—1 Tes. 5:14; Yobo 6:3.

14-15. Hana gifezegeselo gidi mumonesa luholo mukulu wajiya gulandula gifezegeselo gia Elihu hadi muene muhana malongo.

¹⁴ Tangiza gale ndaga eyi. Mukulu mumoshi wavua egi phangi mumoshi wa mukhetu mu hungu diawo waleba muila. Mukulu muene waya nu phangi muko wa yala ha guhana phangi wa mukhetu muene gikhesa. Hadi ene muta maga, phangi muene wa mukhetu waawambela egi ikhale wana guya mu mudimo wa gulongesa nu mu gudibungisa gua mu hungu, ganago gukhala nu gusuanguluga. Itshi mukulu muene udi naye gutshita?

¹⁵ Thomo, mukulu muene udi naye gukamba gujiya ndaga idi mutuma phangi muene ha gudivua ngenyi. Udi naye gumuhula mihu nu gumutegelela muabonga. Yajiya gukhala egi phangi muene wa mukhetu udi mutangiza egi Nzambi ganago gumuzumba. Nga ndo udi gudisagesa mukunda nu luholo luajiya muene gutagenesa nzala jienji jia lusugu nu lusugu. (Luka 21:34) Ya mbadi, mukulu muene udi naye nji gushimana phangi muene. Ha gufezegesa, wajiya gumushimana mukunda nu luholo luana landula muene guya mu gudibungisa nu mu mudimo wa gulongesa ikhale matangua ako yakhala lamba gudi muene ha gutshita ngenyi. Ya thathu, gula mukulu muene wakotelesa muabonga ndaga idi musagesa phangi muene, udi naye gumutangela verse jia Biblia jiajiya gumukuatesa ha gusha mutshima egi Yehowa wana gumuzumba.​—Gal. 2:20.

LANDULA GUZULA MALONGO MU MUKANDA WA YOBO

16. Luholo lutshi mukanda wa Yobo wajiya gulandula gutukuatesa?

¹⁶ Tuaheta diago malongo abonga mu mukanda wa Yobo! Gifua luholo tuayimonyi mu longo diabalega, lumene lua Yobo luana gutukuatesa ha gujiya gishina Nzambi wana bemba egi tumone malamba nu luholo tuajiya gukolesela mu malamba ene. Longo edi diatukuatesa ha gulandula gifezegeselo giabonga gia Elihu tangua tudi muhana athu ako malongo ha fundo dia gulandula gifezegeselo gia mafuta a Yobo thathu. Hene mu masugu adi muza, wajiya gutadila luko malongo tualonguga mu mukanda wa Yobo gutuama dia guhana muthu malongo. Gula watangele gale mukanda wa Yobo mualeha, wajiya gudihagela felela dia guwutanga luko. Ngenyi mbawukotelesa egi mukanda wene udi nu ndando yavula mangino gifua luholo wakhalele tangua awusonegele.