Luholo Lutshi Lusugu lua Ulo Waye Luajiya Gutumbuisa Yehowa?

1-2. Luholo lutshi Yehowa wana tadila ulo?

UDI mutshigina gudizula mu ulo ba? Gula idi ngenyi, tudi gugushimana! Yajiya gukhala egi luholo udi gudilondega mukunda nu lusugu luene idi guguzula tangua diavula. Yehowa nji yowu musuanguluga nu ulo waye. Udi mutshigina egi ukhale nu gusuanguluga mu lusugu luenea nu mu masugu adi muza.​—Ish. 5:18; Lungi. 3:11.

² Mu lusugu lua ulo waye, udi naye gutshita ndaga jidi mutumbuisa Yehowa. Mukunda natshi tuazuela ngenyi? Itshi yajiya gugukuatesa ha gutshita ngenyi? Ikhale longo edi didi mutadila thomo athu adi gudilondega mukunda nu lusugu lua ulo wawo, uvi malongo tuza muzula aza mukuatesa muthu wagasue mukatshi dietu gula atutamega gu ulo umoshi nga ndo gula aphangi adi mutshigina gudizula mu ulo atutoga malongo.

MUKUNDA NATSHI MUDI NAYE GUTUMBUISA YEHOWA?

3. Ndaga itshi Aklisto adi mutshigina gudizula mu ulo adi naye gutshita? Mukunda natshi?

³ Aklisto adi mutshigina gudizula mu ulo adi naye gulondega ulo wawo mu gudivua nu malongo a Yehowa adi mu Biblia. Mukunda natshi? Handaga Yehowa walondele ulo. Muene wahanele Adama mukhetu. (Gis. 1:28; 2:24) Gishina giene, athu adi gudilondega mukunda nu ulo adi naye gukamba matangi a Yehowa mu ndaga yene nu gutshita ndaga jidi gumutumbuisa.

4. Ndaga itshi iko idi naye gutuma athu adi mutshigina gudizula mu ulo ha gutumbuisa Yehowa mu lusugu lua ulo wawo?

⁴ Gudi nu ndaga iko idi naye gugutuma ha gutumbuisa Yehowa mu lusugu lua ulo waye. Thomo, udi sh’aye wa mu dilu nu udi nji futa diaye. (Heb. 12:9) Idi yadiago egi wana tshigina gubamba ufuta waye n’enji. Hene, mbawushigo mubemba egi ndaga imoshi ikalegewe mu lusugu luene nga mu lusugu luko inyi yajiya gumusagesa. (Ngi. 25:14) Gula watangiza ndaga jiagukalegele gale Yehowa nu jinyi mbajigukalegela muene mu masugu adi muza, mbayigukuatesa ha gumutumbuisa mu lusugu lua ulo waye.​—Ngi. 116:12.

LUHOLO LUTSHI MUAJIYA GUTUMBUISA YEHOWA?

5. Luholo lutshi Biblia yajiya gukuatesa athu adi mutshigina gudizula mu ulo ha gulondega ulo wawo?

⁵ Biblia yana khalago nu liste ya ndaga jidi naye gukalegewa gu diskur dia ulo wa Aklisto nga gu wano wawo. Hene, Aklisto ajiya gulondega ulo wawo ha gutadila luholo ndaga jiana kalegewa mu dimbo diawo nu luholo luatshigina ene. Adi naye nji gunemesa mikhuala ya leta. (Mat. 22:21) Ikhale athu adi mutshigina gudizula mu ulo azula desizio ditshi mukunda nu ulo wawo, Yehowa mbawukhala nu gusuanguluga gula alandula malongo a Biblia. Na malongo atshi ajiya gugukuatesa?

6. Mukunda natshi yala nu mukhetu adi mutshigina gudizula mu ulo adi naye gutumagela mafumu a leta?

⁶ Tumagela mikhuala ya leta. (Roma 13:1, 2) Mu ifutshi yavula, mafumu a leta ahagele mikhuala inyi athu adi mutshigina gudizula mu ulo adi naye gutumagela. Yala nu mukhetu adi mutshigina gudizula mu ulo adi naye gujiya mikhuala ya gifutshi giawo. Gula udi mutshigina gujiya ndaga jiavula jiatadila mikhuala yene, wajiya gutoga ukuateshi gudi akulu.b

7. Ndaga jitshi athu adi mutshigina gudizula mu ulo adi naye gutshita ha gumonesa egi adi munemesa lusugu lua ulo wawo?

⁷ Tshita yagagsue hagula ndaga jibalege muabonga. (1 Kol. 10:31, 32) Tshita ngolo ha gumonesa makalegelo a nyuma ya Nzambi ha fundo dia gulandula makalegelo a enya ha mavu awa. (Gal. 5:19-26) Biblia yana zuela egi yala udi fumu wa fami, hene phangi wa yala udi naye gutshita yagasue hagula wano wa ulo wawo ubalege muabonga nu lusugu luene luabatele gusuanguluga. Itshi yajiya guakuatesa? Idi diskur diana zuelela malongo a Biblia mukunda nu ulo. Gula phangi watombewa wakalagala diskur diene nu guzumba nu ginemua giagasue, yana kuatesa athu agasue adi mutegelela ha gukotelesa egi ulo udi gima gia ndando. Gishina giene aphangi avula ana tshigina egi diskur diawo dia ulo dikalegewe mu Inzo ya Ufumu gula luholo ludi guene. Gula udi mutshigina gukalegela Inzo ya Ufumu mukunda nu diskur dia ulo waye, udi naye gusonegela akulu gutuama.

8. Itshi wajiya gutshita hagula wano waye utumbuise Yehowa? (Roma 13:13)

⁸ Tanga Roma 13:13. Gula watamega athu ha guza gu wano wa ulo waye, itshi yajiya gugukuatesa ha gutuna gutshita ndaga gifua enya ha mavu awa? Mbimbi ya Greke yabalumuiwe egi “mawano anyi athu ana gutshita ndaga jiabola,” idi mumonesa mafundo athu ana gunua matombe avula nu ana gusha miziki uu nu mukatshi dia phipha. (Tala ukoteleshi wa mbimbi “fêtes débridées” mu note d’étude idi mu Roma 13:13 mu Biblia ya français.) Gula udi mutshigina guhana athu matombe akola, tshita yagasue hagula nga muthu mumoshi anuigo matombe avula.c Gula wamba miziki, tshita nji yagasue hagula volime ya miziki muambi ihane athu watamega njila ha guta maga muabonga. Tomba nji ngimbo nu gutema guagasue hagula jikhakhuisago athu ako.

9. Ndaga jitshi athu adi mutshigina gudizula mu ulo adi naye gujiya mukunda nu ndaga mbajikalegewa mu lusugu lua ulo wawo?

⁹ Mu mafundo ako, enya fami nu mafuta a yala nu mukhetu adi mutshigina gudizula mu ulo ana zuga ha guzuela ndaga jiazonda mukunda nu ene gu wano wawo. Uvi athu ako ana talesa video nga foto jia yala nu mukhetu adi mutshigina gudizula mu ulo nga gutshita ndaga jiko. Ndaga eji jiana londega diago wano muabonga. Uvi mudi naye gutshita yagasue hagula ndaga muza mutshita jikhakhuisago athu ako. (Fili. 4:8) Dihule egi: Ndaga jiene mbajihana athu ako ginemua ba? Mbajimonesa egi ngudi muzula ulo nu ndando ba? Uvi muhu wabalega ndando udi naye gudihula udi egi: ‘Ndaga jiene mbajitumbuisa diago Yehowa ba?’ Ishigo ndaga yabola gula muthu mumoshi wazuela ndaga jidi mulelesa, uvi gashigo naye guzuela ndaga jiajiya gutuma athu ako ha gutangiza ndaga jiatadila gubungisa muila. (Ef. 5:3) Gula enya fami yaye nga mafuta aye adi mutshigina guzuela gu wano wene, tshita yagasue hagula azuedigo ndaga jishigo gugusuanguluisa.

10. Mukunda natshi athu adi mutshigina gudizula mu ulo adi naye gukhala nu khadilo dia gudibulumuisa tangua adi mulondega ulo wawo? (1 Yone 2:15-17)

¹⁰ Khala nu gudibulumuisa. (Tanga 1 Yone 2:15-17.) Yehowa wana suanguluga muavula tangua akombeledi enji ana gumutumbuisa ha fundo dia gukamba lutumbu luawo. Hene, Aklisto adi nu khadilo dia gudibulumuisa ana kamba ndo gukalagala dépense jiavula-vula ha ‘gudijiga ima adi nayo nu lulendo luagasue.’ Gubonga gutshi mbawuheta gula watshitshilego dépense jiavula-vula? Tutadilenu gifezegeselo gia phangi Mike wa gu Norvège. Udi muzuela egi: “Tuasalelego nu mikudi, ndaga yene yatukuatesele ha gulandula gukhala avundji a njila. Tuakalegelego dépense jiavula-vula gu ulo wetu uvi ndaga jiabalegele muabonga nu jiana gutusuanguluisa nji uu nu mangino.” Phangi Tabitha wa gu Inde udi muzuela egi: “Tuatunyile ndaga jiagasue jiajiya gulaba gutukatesa muto. Luholo tuakalegelego dépense jiavula-vula gu ulo wetu, tuakhalelego nu ndaga jiavula jia gulondega.”

11. Luholo lutshi athu adi mutshigina gudizula mu ulo ajiya gumonesa khadilo dia gudibulumuisa mu luholo luawo lua gusudiga? (Tala nji ifuanesa.)

¹¹ Watangiza gale milele mbawusudiga gu ulo waye ba? Idi yadiago egi udi mutshigina gusudiga muabonga. Mu tangua dikulu nji, yala nu mukhetu akhalele mutshigina gudizula mu ulo akhalele musudiga muabonga mu lusugu lua ulo wawo. (Yesh. 61:10) Yadiago, luholo mbawusudiga mu lusugu lua ulo waye mbalukhala lua gudisha nu luholo wana sudiga mu masugu ako, uvi gusudiga guaye gudi naye gumonesa egi wakhala nu khadilo dia gudibulumuisa. (1 Tim. 2:9) Ubembigo egi gusudiga guaye gubue ndaga yabalega ndando mu lusugu lua ulo waye.​—1 Phet. 3:3, 4.

12. Mukunda natshi athu adi mutshigina gudizula mu ulo adi naye gutuna kutime jiagasue jia mu dimbo diawo jishigo gudivua nu malongo a Biblia?

¹² Tuna kutime jishigo gudivua nu malongo a Biblia. (Gumo. 18:4) Mangino athu avula ana kalagala ndaga jidi gudivua nu kutime jia ikombelelo ya mambo, ndaga jia wanga nga ndaga jiko jia mambo mu ma wano a ulo. Yehowa wana gututemesa ha gutuna gudinginyisa mu ndaga eji jia usala. (2 Kol. 6:14-17) Gula fundo mudi guana khala nu kutime udi mutangiza egi jishigo gudivua nu mikhuala ya Yehowa, kamba gujiya ndaga jiavula jiatadila kutime jiene nu malongo a Biblia ajiya gugukuatesa ha guzula desizio diabonga mukunda nu ndaga mbamutshita mu lusugu lua ulo wenu.

13. Luholo lutshi yala nu mukhetu ajiya gulandula gifezegeselo gia Yehowa tangua athu adi guahana bakado?

¹³ Mu dimbo dienu athu atamegewa gu wano wa ulo ana guza nu bakado ba? Muthu wagasue wajiya guhana ha gutadila guvula gua makuta adi nawo muene. Yadiago, Aklisto ana khala nu khadilo dia guhana; gutshita ngenyi guana guakuatesa ha gukhala nu gusuanguluga. (Ish. 11:25; Makal. 20:35) Uvi tushigo naye gushinjiga athu aji gu wano wetu ha gutuhana bakado nga guatuma ha gutangiza egi tushigo musuanguluga nu bakado azonda. Tuana landula gifezegeselo gia Yehowa tangua tuana suanguluga nu bakado ana gutuhana athu ako nu mutshima umoshi.​—2 Kol. 9:7.

NDAGA MUDI NAYE GUTSHITA HAGULA ULO WENU UBALEGE MUABONGA

14. Malamba atshi athu adi mutshigina gudizula mu ulo ana tagana nawo?

¹⁴ Yajiya gukhala lamba ha gulondega wano wa ulo unu mbawutumbuisa Yehowa. Ha gufezegesa yajiya gukhala lamba ha gutuna dépense jiavula-vula. Phangi Charlie wana khala gu Hongo dia Salomon, udi muzuela egi: “Yakhalele lamba ha gujiya athu tuajiya gutamega gu wano wetu. Tuana khala nu mafuta avula; mu dimbo dietu, athu agasue ana gudifelela ha gutamegewa gu wano!” Phangi Tabitha tuazuelela gu thunda udi muzuela egi: “Mu dimbo dietu gula muthu udi nu wano, wana tamega athu avula. Hene yakhalele lamba gudi mvuaji jietu ha gutshigina desizio tuazudile ha gutamega athu hehi nu 100.” Phangi Sarah gu Inde, udi muzuela egi: “Athu avula ana gudisagesa muavula mukunda nu guvula gua makuta adi nawo nu ndaga athu ako mbaatangiza mukunda nu ene. Phangi’ami mumoshi wa mu fami gakhalelego Temue wa Yehowa, wazolele makuta avula ha gukalegesa wano wenji. Hene athu avula akhalele gudifelela egi ame nji mbangukalegesa wano wakoma gubalega.” Itshi yajiya gugukuatesa ha gubinga ndaga jia luholo elu nga ndaga jiko?

15. Mukunda natshi gisambu gidi nu ndando yavula tangua mudi mulondega ndaga jia ulo?

¹⁵ Khala mukombelela mukunda nu ndaga jia ulo waye. Wajiya guwambela Yehowa mu gisambu ndaga jiagasue udi mutagana najio nga luholo udi gudivua. (Fili. 4:6, 7) Wajiya gumutoga ha gugukuatesa ha guzula badesizio abonga, ha gukhala nu guhuima tangua udi muvua gikenene nu ha gumonesa gikhesa gula desizio wazudi didi dia gudisha nu ndaga jidi mutangiza athu ako. (1 Phet. 5:7) Tangua mbawumona luholo Yehowa udi gugukuatesa, mbayikolesa gutshigina guaye. Phangi Tabitha tuazuelela gu thunda udi muzuela egi: “Ame nu mulumi’ami tuakhalele gudihula muavula gula mbatudivua muabonga mu badesizio etu. Tuakhalele nji gudihula gula enya fami jietu mbaatshigina nji badesizio ene. Hene tangua diagasue tuakhalele muzuelela ndaga jia ulo wetu, tuakhalele musendesa nu gisambu. Yehowa wakhalele gutukuatesa nu tuakhalele gudivua diago muabonga mukut’etu agasue.”

16-17. Luholo lutshi guta maga muabonga guajiya gumikuatesa tangua mudi mulondega ulo wenu?

¹⁶ Tenu maga nu ginemua giagasue. (Ish. 15:22) Mbamukhala nu badesizio avula aguzula tangua mudi mulondega ulo wenu. Mbamukhala nu funu ya gutomba lusugu mbamutshita wano, guvula gua makuta mbamuzola, liste ya athu mbamutamega nu ndaga jiko jiavula. Gutuama dia guzula nga desizio ditshi, zuelelenu ndaga jiagasue mualondji, zuelelenu nji malongo a Biblia mbamukalegela nu malongo amihanyi Aklisto a gukula mu nyuma. Tangua udi muhana matangi aye, zuela nu gisemo giagasue, ukhadigo nu ndaga jiakola-kola, tshigina nji matangi a athu ako. Ha gufezegesa, gula mvuaji jienu jiamitoga ha gutshita ndaga imoshi ngenyi gu ulo wenu, muajiya gutshigina matangi awo gula ndaga yene ishigo yabola. Mujimbilago egi ene nji adi mutshigina gusuanguluga gu ulo wenu. Gula muamona egi mbamushigo mukalegela matangi amihanyi, akoteleselenu gishina muatunyila nu ginemua giagasue. (Kol. 4:6) Wambelenu nji enya fami yenu egi felela dienu didi dia gutshita wano wabonga unu mbawutumbuisa Yehowa.

¹⁷ Gula mvuaji jienu jishigo Matemue a Yehowa, yajiya gukhala lamba ha guakotelesela badesizio ako muazudi mukunda nu ulo wenu; uvi muajiya guakuatesa ha gukotelesa matangi enu nu gisemo giagasue. Phangi Santhosh wa gu Inde udi muzuela egi: “Enya fami yetu akhalele mutshigina egi tunginyise cérémonie jiko jia enya Hindu gu ulo wetu. Ame nu mukaji’ami tuazudile tangua diavula ha guakotelesela badesizio etu. Uvi tuasombegesele ndaga jiko mu mafundo anyi tuakhalele mumona egi mbaashigo mushiya mikhuala ya Yehowa. Ha gufezegesa, tuasombegesele ima iko ya gudia inyi yakhalele guasuanguluisa ha fundo dia inyi tuakhalele musuanguluga nayo; tuazudile nji desizio dia gutuna guyimba nga gukina gu ulo wetu handaga enya fami yetu ajidilego nu ndaga jia luholo elu.”

18. Itshi yajiya gumikuatesa hagula wano wa ulo wenu ubalege muabonga? (1 Kolinto 14:40) (Tala nji gifuanesa.)

¹⁸ Londegenu ndaga nu gutema guagasue. Gula muadilondega muabonga, mbamushigo gulaba gudikatesa muto mu lusugu lua ulo wenu. (Tanga 1 Kolinto 14:40.) Phangi Wayne wa gu Taïwan udi muzuela egi: “Masugu azonda gutuama dia ulo wetu, tuatele maga nu aphangi agasue atshiginyile ha gutukuatesa gu wano wetu. Tuazuelele ndaga tualondele mukunda nu lusugu luene, tuakalegele nji répétition jiavula jia itshinyi iko ya wano wetu ha gujiya gula ndaga jiagasue mbajiyila muabonga.” Gula udi mutshigina gunemesa athu watamega, tshita yagasue ha gunemesa tangua.

19. Itshi yajiya gumikuatesa hagula ulo wenu utumbuise Yehowa?

¹⁹ Gula muadilondega gutuama, mbayimikuatesa ha gujiya ndaga jiko jiajiya gubua nu ndaga mbamutshita gila jiamibuila. (Ish. 22:3) Ha gufezegesa, gula mu dimbo dienu matangua ako athu ana guza gu mawano ikhale a atemegelego, diangenu gujiya ndaga mbamutshita hagula ndaga ya luholo imibuilago. Wambelenu nji enya fami jienu anyi ashigo Matemue a Yehowa ndaga mbaasanga gu ulo wenu, akoteleselenu nji matangi enu mukunda nu ndaga jiko jiana kalegewa gu mawano a ulo. Muajiya nji guahana nga guatangela longo “Comment se passe un mariage chez les Témoins de Jéhovah ?” didi mu jw.org. Hagula egi ndaga jiyile muabonga gu ulo wenu, muajiya gutoga phangi mumoshi wa gukula mu nyuma ha gukhala “mutuameji wa wano.” (Yone 2:8) Gula muamuwambela ndaga jiagasue mualondji mukunda nu ulo wenu, muene mbawumikuatesa hagula wano wa ulo wenu utumbuise Yehowa nu ndaga jibalege gifua luholo muadifelela.

20. Ndaga jitshi athu adi mutshigina gudizula mu ulo adi naye gujiya?

²⁰ Gulondega ndaga jiagasue jia ulo guajiya guguhuidisa. Uvi jiya egi wano wene wana kalegewa mu lusugu lumoshi. Lusugu luene ludi lusugu lua ndando yavula handaga luene mbamusendesa gukalegela Yehowa hamoshi. Tshita yagasue hagula mulabigo gutshita dépense jiavula-vula nu hagula ulo wenu utumbuise Yehowa. Mushilenu nji mutshima. Muene mbawumikuatesa ha gulondega ulo wenu muabonga; ngenyi ndaga mbajibalega muabonga, mbamukhala nu gusuanguluga nu mbamudibedigo nga hazonda.​—Ngi. 37:3, 4.