Kalegela Malongo a Biblia ha Gulongesa Mutshima Waye

1-2. a) Kado gatshi Yehowa wahanele Adama nu Eva? b) Luholo lutshi akhalele naye gumonesa egi adi musuanguluga nu kado gene?

SHITU jianago gutangiza gutuama dia gutshita ndaga. Jiana tshita ndaga jiene handaga jiafugiwe ha gutshita ngenyi. Gula tuana khala nu luholo lua gukalegela apareye jiavula muabonga idi handaga apareye jiene jiana londewa ha gukhala mutshita ngenyi. Uvi esue athu tuakhalago ngenyi. Yehowa watufugile mu luholo lua gushimana, watuhanele kado gamoshi tuana zula nu ndando yavula. Kado gene gadi luendu lua guditombela ndaga nu lua gudizudila badesizio mu monyo wetu. Biblia yana zuela egi Yehowa wafugile Adama mu gifuanesa gienji. (Gis. 1:26, 27) Yehowa wahanele Adama nu Eva luendu lua gudizudila badesizio.

² Yehowa gahanelego Adama nu Eva mikhuala yavula-vula ya gutumagela. Uvi waawambelele phamba egi abambe mavu, avuale ana, azalese mavu nu atumagele ndaga jiaawambelele muene ha gutshita. (Gis. 1:28; 2:16, 17) Luholo lutshi Adama nu Eva akhalele naye gumonesa egi adi musuanguluga nu kado gene? Ha gutadila ima yagasue yaahanele Yehowa, akhalele naye gutumagela mikhuala yenji handaga akhalele gumuzumba nu akhalele mutshigina gumusuanguluisa.​—Ish. 23:15.

3. Luholo lutshi Adama nu Eva akalegele luendu luawo lua guditombela ndaga?

³ Gifua luholo Biblia yana guyimonesa, Adama nu Eva akalegelego luendu luawo lua guditombela ndaga mu luholo luabonga. Atombele gawo ha gulumbugila Yehowa. Ndaga akalegele yamonesele egi akhalelego muzumba Yehowa nga gusuanguluga nu ima yaahanele muene. (Gis. 3:1-7) Desizio diabola azudile diana gutubatela malamba uu nu mangino.​—Roma 5:12.

4. a) Ha gutadila Galatiya 6:5, ndaga itshi muthu wagasue mukatshi dietu udi naye gutshita? b) Kado gatshi gako gatuhanele Nzambi tuza muzuelela mu longo edi?

⁴ Lujingu ha mavu awa abola ludi diago lamba mangino. Lusugu nu lusugu, tudi naye guzula badesizio avula. (Tanga Galatiya 6:5.) Badesizio ako akhala aleba ha guzula uvi ako akhala diago lamba. Itshi yajiya gutukuatesa ha guzula badesizio ajiya gusuanguluisa Yehowa? Thomo, tudi naye gujiya egi tuakhala nu funu ya ukuateshi wa Yehowa. (Ish. 16:3; Yel. 10:23) Yesu wakhalele muthu watagana, uvi wakhalele nu funu ya ukuateshi wa Nzambi. (Heb. 5:7) Hene luholo tushigo athu atagana, tuakhala nu funu ya utuameji wa Yehowa gubalega nu muene Yesu. Henyaha tuzuelelenu kado gako ga ndando gatuhanele Yehowa ganyi gajiya gutukuatesa ha guzula badesizio abonga. Kado gene gadi: Mutshima wetu.

MUTSHIMA WETU UDI ITSHI?

5. a) Mutshima wetu udi itshi? b) Luholo lutshi mutshima wetu wana gutukuatesa? (Roma 2:14, 15)

⁵ Mutshima wetu udi umuthu wetu wa mukatshi wana gutudijiga ndaga jiabonga nu jiabola. Nu ene athu anago gujiya mikhuala ya Nzambi akhala nu umuthu wene wa mukatshi. (2 Kol. 4:2) Mutshima wetu udi gifua nzuji mumoshi tuakhala n’enji mukatshi munu wana gutubingisa nga gutufuisa milonga mukunda nu matangi etu nga makalegelo etu. (Tanga Roma 2:14, 15.) Mutshima wetu wajiya gututemesa gula tudi mutshigina gutshita ndaga yabola. (1 Sam. 26:8-11) Wajiya nji gututuma ha gutshita ndaga yabonga. Gukhala nu luendu lua gudizudila badesizio gushigo mukotelesa egi desizio diagasue mbatuzula mbadisuanguluisa Yehowa. Gishina giene, mutshima wetu wajiya gutukuatesa ha gujiya gudisha gudi mukatshi dia badesizio abonga nu abola.

6. Ndaga itshi yajiya gubuila mutshima wetu?

⁶ Uvi ndaga ya gikenene idi egi matangua ako mutshima wetu wanago gutshita muabonga. Gifua luholo tutshigo athu atagana, wene nji wana khalago watagana. Ndaga jiko gifua mafundo tuakudile, kutime jietu nga nzala jietu jiabola yajiya gubolesa mutshima wetu. Biblia yana zuela egi mutshima wetu wajiya ‘guleba,’ gubua “usala,” wajiya nji gukhala gifua ‘wakondewe nu utadi wa tshuya,’ nga ndo wajiya nji gukhala “wabola.” (1 Kol. 8:12; Tito 1:15; 1 Tim. 4:2; Heb. 3:12) Mutshima wa luholo elu wajiyilego gututuameza mu luholo luabonga. Wajiya gukhala gifua gifuwa giabogoga ginyi gidi mutoga egi agivutule muabonga ha fundo dienji. Tudi naye gutshita yagasue ha gulongesa mutshima wetu. (1 Phet. 3:16) Luholo lutshi tuajiya guyitshita?

LUHOLO TUAJIYA GULONGESA MUTSHIMA WETU

7-8. a) Itshi yajiya gutukuatesa ha gulongesa mutshima wetu? b) Luholo lutshi malongo a Biblia ajiya gututuameza? Hana gifezegeselo. (Tala nji gifuanesa.)

⁷ Luholo lutshi tuajiya gulongesa mutshima wetu? Tudi naye gutanga Biblia lusugu nu lusugu nu gukamba gujiya ndaga Yehowa wana zuela egi jidi jiabonga nga jiabola. Gulonguga mikhuala ya Yehowa mbagutukuatesa ha gujiya matangi enji mu ndaga imoshi ngenyi. Uvi gifua luholo tuayimonele mu longo diabalega, mikhuala yakhala nu ndando phamba mukunda nu ndaga yahanewa. Gishina giene tudi naye gukamba malongo a Biblia handaga ene ana gutukuatesa ha gujiya matangi a Yehowa nu luholo luana gudivua muene mu ndaga jiavula.​—Yesh. 55:9.

⁸ Tuajiya gufuanesa monyo wetu nu muthu udi muwenda mu mavu a luselenga. Tangiza gale egi udi muwenda mu mavu a luselenga mushigo nu njila nga nganyo jia athu nga panneaux de signalisation. Tangua nu themua jiajiya gugukuatesa ha gujiya khanda yaguyila ha guheta ha fundo udi muya. Uvi gula udi nu karte gadi gugudijiga ndaga jiko gifua milundu nu mita idi mu mavu ene a luselenga, gajiya diago gugukuatesa muavula gubalega. Karte gene mbagagukuatesa ha gujiya egi udi diago muya gu khanda yabonga nga gugudijiga egi wabembi gale njila yabonga. Idi nji luholo lumoshi nu monyo wetu. Felela dietu diakhala dia gusuanguluisa Yehowa. Hene, Biblia idi gifua karte gana gumonesa njila yabonga tudi naye guyila. Malongo a Biblia adi gifua milundu nga mita idi mu njila yene yajiya gutukuatesa ha gujiya egi tudi muya gu khanda yabonga. Gutumagela malongo ene mbagutukuatesa ha gutagenesa felela dietu dia gusuanguluisa Yehowa.

9. Ndaga itshi idi mu Roma 9:1, 2 yajiya gutukuatesa ha gulongesa mutshima wetu?

⁹ Nyuma ya Nzambi yajiya nji gutukuatesa ha gulongesa mutshima wetu muabonga. (Tanga Roma 9:1, 2.) Nyuma ya Nzambi yajiya gutukuatesa ha gujiya matangi enji mu mulonga umoshi ngenyi. Yajiya nji gutuhana ngolo nu nzala ya gutshita ndaga jidi gudivua nu gutshigina gua Yehowa. (Fili. 2:13) Luholo lutshi tuajiya guheta nyuma ya Nzambi?

10. Luholo lutshi tuajiya guheta nyuma ya Nzambi? (Luka 11:10, 13)

¹⁰ Toga Yehowa ha guguhana nyuma yenji. (Tanga Luka 11:10, 13.) Tuajiya diago gusha mutshima egi Yehowa wana hana nyuma yenji nu mutshima wagasue gudi muthu wagasue wamutoga nayo. (Yone 3:34) Wana guyihana gudi athu ana tumagela mikhuala yenji. (Ish. 1:23; Yak. 1:5) Ndaga itshi iko yajiya gutukuatesa ha gulongesa mutshima wetu?

11. a) Ndaga itshi tudi naye gusha ha fundo dia thomo mu monyo wetu? b) Mukunda natshi tudi naye gutshita yagasue ha gulongesa mutshima wetu?

¹¹ Khala mutshita yagasue ha gusuanguluisa Yehowa. (Ish. 8:34, 35) Gusuanguluisa Yehowa guene gudi naye gukhala ha fundo dia thomo mu monyo wetu. Gula tudi mujiya egi tudi naye gusuanguluisa Yehowa mu ndaga jiagasue, mbayitukuatesa ha gulongesa mutshima wetu. Gula tudi mukamba gujiya matangi a Yehowa tangua diagasue nu luholo luana gudivua muene, mbatujiya nji muabonga luholo lua gulongesa mutshima wetu. Mangino, ndaga jidi mulandula gubola mavu, gishina giene tudi naye gulongesa mutshima wetu hagula wajiya diago gutukuatesa. Matangua ako, tuana tagana nu ndaga jinyi Biblia yanago guzuelela haphelo. Ndaga jiene jiayiya gukhala saga jia gubalegesela tangua, mudimo wetu, makhalasa nga ufuta wetu nu athu ako. Itshi yajiya gutukuatesa ha gujiya gula Yehowa udi musuanguluga nu badesizio tudi muzula mu ndaga jia luholo elu?​—2 Kol. 1:12.

12. Itshi yajiya gutukuatesa ha gujiya gula mutshima wetu wana gutukuatesa ha guzula badesizio abonga? (Efeso 5:10)

¹² Khala mutangigiza ndaga udi mutanga mu Mbimbi ya Nzambi. (Ngi. 49:3) Tangua udi mutanga Biblia, kamba malongo ajiya gugukuatesa ha gujiya matangi a Yehowa. (Tanga Efeso 5:10.) Luholo tudi mutagana nu malamba avula ha mavu awa, tudi naye gukamba malongo a Biblia adi gutukuatesa ha gujiya gula mutshima wetu wana gututuameza mu luholo luabonga tangua tuana zula badesizio. (Ish. 2:4-9, 11-13) Malongo ene ajiya gutukuatesa ha gulongesa mutshima wetu nu gutshita ndaga jidi musuanguluisa Yehowa.​—Heb. 5:14.

13. Ndaga itshi tushigo naye gutshita? Hana gifezegeselo.

¹³ Udiangigo guzula desizio gungima ukambi giwa malongo adi gudivua nu ndaga yakhadi mu matangi aye. Tudi naye gutshita yagasue ha gutuna gubua gifua enya Isalele anyi asalele mu mavu a Yuda gungima dia gushiyiwa gua Yelusalema mu givo 607 G.G.Y. Awambelele Yelemiya egi: ‘Hula Yehowa Nzambi waye atuwambele njila tudi naye guwenda nu ndaga tudi naye gukalagala.’ (Yel. 42:3-6) Uvi akhalele azudi gale desizio dia ndaga akhalele naye gutshita. Hene, tangua Yehowa waawambelele ndaga yakhalelego gudivua nu matangi awo, atunyile guyitumagela, akalegele phamba ndaga akhalele mutangiza. Gutshita ngenyi guaabatele malamba. (Yel. 42:19-22; 43:1, 2, 4) Gutuama dia guzula nga desizio ditshi, tudi naye thomo gukamba malongo a Biblia ajiya gutukuatesa ha gujiya matangi a Yehowa mu mulonga wetu, gungima tudi naye guatumagela.

14. Mukunda natshi tudi naye gutumagela malongo a Biblia tangua tudi muzula badesizio?

¹⁴ Khala muzula badesizio adi gudivua nu malongo a Biblia. (Mat. 7:24-29; Yak. 1:23-25) Gula tudi muzula badesizio adi gudivua nu malongo a Biblia, mbatumonesa egi tuana bemba egi nyuma ya Nzambi itutuameze. Ngenyi, Yehowa nji mbawulandula gutuhana nyuma yene. (Makal. 5:32) Uvi gula tushigo mutshigina utuameji wa nyuma ya Nzambi, tuajiya guhana nyuma yene “gikenene,” nga gusendesa gutshita ndaga jishigo gudivua nu nyuma yene. (Ef. 4:30; Yesh. 63:10; Makal. 7:51) Ndaga yene yajiya gutshita egi Yehowa atumine nyuma yenji. (Ngi. 51:11; 1 Tes. 5:19) Mbayikhala lamba gudi esue handaga tuana khala nu funu ya ngolo nu utuameji wa nyuma ya Nzambi.​—Ef. 3:16.

LUHOLO TUAJIYA GUHETA MALONGO A BIBLIA AJIYA GUTUKUATESA

15-16. a) Luholo lutshi tuajiya guheta malongo a Biblia ajiya gutukuatesa? b) Malongo atshi a Biblia ajiya gukuatesa muthu wana longesa Biblia ha guzula desizio dia gubemba gunua makaya?

¹⁵ Khala mukalegela ikadigilo yetu ya gulongugila Biblia. Gutuama dia gukalegela malongo a Biblia, tudi naye thomo guakamba nu guamona mu verse tudi mutanga. Ha gufezegesa, tangiza gale egi muthu wana longesa Biblia gashigo mutshigina gubemba gunua makaya. Wajiya guguwambela egi: ‘Biblia yanago guzuelela ndaga yatadila gunua makaya. Luholo lutshi tudi mujiya egi gutshita ngenyi gudi ndaga yabola?’ Luholo lutshi wajiya gumukuatesa ha guheta malongo abonga ajiya gumukuatesa ha gukotelesa egi gunua makaya gudi ndaga yabola? Wajiya gukalegela Guide de recherche pour les Témoins de Jéhovah. Mu gikadigilo giene, muajiya gutadila gitshinyi “Tabagisme.” Mu gitshinyi giene, muajiya gutadila longo “Le tabagisme : qu’en pense Dieu ?” (Tala Inzo Yaleha ya Mutaledi ya 1 Juin 2014 ya français.) Hadi muene mutanga, verse jitshi nu malongo atshi mbaamona muene mu longo diene?

¹⁶ Malongo awa thano adi mukatshi dia malongo mbaamona muene mu longo diene. Dia thomo: Tushigo naye gubua ahiga a ndaga yajiya gutubata gu gufua. (Roma 6:16) Dia mbadi: Tudi naye gutuna gima giagasue giajiya gubolesa muila wetu. (2 Kol. 7:1) Dia thathu: Yehowa wana tshigina egi tumukombelele nu monyo wetu wagasue. (Mat. 22:37) Dia nguana: Tushigo naye gubemba egi ndaga tudi mutshita jimonese athu ako malamba. (Mat. 22:39; 1 Kol. 10:24) Dia thano: Yehowa wajiya gutuhana ngolo jia gukalagala ndaga jiabonga. (Fili. 4:13) Ikhale Biblia yanago guzuelela haphelo ndaga yatadila gunua makaya, uvi malongo adi muene ajiya gukuatesa muthu wana longesa Biblia ha gujiya matangi a Yehowa mu ndaga yene.

17. Itshi yajiya gukuatesa Matemue a Yehowa adi mutshigina gudizula mu ulo ha guheta malongo a Biblia ajiya guakuatesa?

¹⁷ Itshi yajiya gukuatesa Matemue a Yehowa adi mutshigina gudizula mu ulo ha guheta malongo a Biblia ajiya guakuatesa ha guzula badesizio abonga mukunda lusugu lua ulo wawo? Ajiya gukalegela Guide de recherche pour les Témoins de Jéhovah. Mu gitshinyi “Cérémonie et fête de mariage,” muakhala nu malongo avula ajiya guakuatesa. Tutadilenu malongo samano mukatshi dia malongo ene. Dia thomo: Ndaga jiagasue tudi mukalagala jidi naye gutumbuisa Yehowa. (1 Kol. 10:31, 32) Dia mbadi: Tudi naye gusudiga mu luholo luabonga ludi mumonesa egi tuakhala nu khadilo dia gudibulumuisa. (1 Tim. 2:9; 1 Phet. 3:3, 4) Dia thathu: Tushigo naye gudisunzula mukunda nu ima tuakhala nayo gifua luholo luana tshita enya ha mavu awa a Satana gu mawano awo. (Yone 17:14; Yak. 1:27; 1 Yone 2:15, 16) Dia nguana: Ndaga jiagasue jidi naye gukalegewa mu luholo luabonga. (1 Kol. 14:40) Dia thano: Wano wene ushigo naye gukhala fundo athu adi munua matombe avula nga gukuatewa. (Gal. 5:21) Dia samano: Tudi naye gutomba muthu mbawutuameza ndaga jiagasue.​—Yone 2:8, 9.

18-19. a) Gikadigilo gitshi giko giajiya gutukuatesa? b) Luholo lutshi wajiya gukalegela gikadigilo giene ha guheta malongo ajiya gugukuatesa ha guzula desizio diabonga mu ndaga yatadila mawano? (Tala galuanda “Wajiya Gujiya Matangi a Yehowa mu Ndaga eji Ba?”)

¹⁸ Gikadigilo giko aphangi avula ana suanguluga nagio gidi mukanda Mbimbi ya Nzambi Yajiya Gugukuatesa. Mukanda wene wakhala nu malongo avula, mukatshi dia malongo ene muakhala nji nu verse jiavula jia Biblia. Gula watomba longo dimoshi, mukatshi dienji mbawumona mihu nu verse jiajiya gugukuatesa ha guheta malongo. Ha gufezegesa, gula phangi mumoshi udi gudihula gula udi naye guya gu wano umoshi ngenyi nga ndo, wajiya gutala mu mukanda wene mu longo didi nu muto wa lumene egi “Wano.” Mu longo diene, mbawumona gamuto ga lumene gadi muzuela egi “Mawano anyi Aklisto ashigo naye gutshita.”

¹⁹ Tutadilenu ndaga jiko adi muzuelela mu gitshinyi: “Mukunda natshi ishigo ndaga yabonga ha gutshita mawano anyi adi gudivua nu ndaga jia ikombelelo ya mambo? (1Kol 10:21; 2Kol 6:14-18; Ef 5:10, 11)” Mu gitshinyi giene mudi nu ifezegeselo ya mawano anyi anago gusuanguluisa Yehowa. Mu gamuto ga lumene “Mawano a ifutshi,” mudi nu verse jia Biblia jiajiya gukuatesa Muklisto ha guzula desizio diabonga gula amutoga ha guya gu mawano gifua mawano a ndaga jiakalegele gifutshi nga mafumu a leta, mawano a guwunguluga ita yaluile gifutshi, nga mawano adi muhana muthu lutumbu tudi naye guhana phamba gudi Yehowa. Tudi nu gusuanguluga luholo ulondegi wa Yehowa wana gutuhana ikadigilo ya luholo elu ha gutukuatesa ha gulongesa mutshima wetu!

KHALA MUTSHITA NDAGA JIDI MUMONESA EGI WALONGESELE GALE MUTSHIMA WAYE

20. Luholo lutshi tuajiya gumonesa egi tualongesele gale mutshima wetu muabonga?

²⁰ Tuana suanguluga muavula nu luendu luatuhanele Yehowa lua guditombela ndaga. Uvi tudi mujiya egi tudi naye gulongesa mutshima wetu hagula wajiya gutukuatesa ha gusuanguluisa Yehowa. Gula tualongesa mutshima wetu muabonga, mbawutukuatesa ha guzula badesizio adi mutumbuisa Yehowa nu adi gudivua nu gutshigina guenji. Hene, tudi naye gutoga Yehowa nyuma yenji hagula yajiya gutukuatesa ha gulongesa mutshima wetu. Tudi naye nji gutshita ndaga jidi mumonesa egi tudi mubemba egi nyuma yene itutuameze. Malongo a Biblia ajiya nji gutukuatesa ha gulongesa mutshima wetu. Tulandulenu gukalegela muabonga mutshima wetu nu luendu luatuhanele Yehowa lua guditombela ndaga, ngenyi mbatumona diago egi Mbimbi ya Nzambi idi nu ndando yavula mu monyo wetu.​—2 Tim. 3:16, 17; Heb. 4:12.