Mukunda Natshi Malongo a Biblia Akhala nu Ndando?

1-2. a) Tangua ditshi Biblia yasonegewe? b) Mukunda natshi Biblia yakhala nu ndando uu nu mangino?

BIBLIA idi mukanda wa mualeha. Sendese tangua asendesele guyisonega, ivo 3500 yabalega gale; ivo hehi nu 2000 yabalega gale nji sendese tangua amanesele guyisonega. Ikhale ngenyi, Biblia yakhala nu ndando yavula uu nu mangino. (Heb. 4:12; 2 Tim. 3:16, 17) Athu avula mangino ana zuela egi Biblia yana guakuatesa ha gukhala nu gusuanguluga nu ha guzula badesizio abonga.

² Na mukunda natshi mukanda owu wa mualeha wakhala nu ndando uu nu mangino? Idi mukunda nu ndaga eji mbadi: Ya thomo, Biblia idi mukanda wa “Nzambi wa monyo,” Mufugi wa ndunge jiagasue. (1 Tim. 4:10; Roma 16:26, 27) Ya mbadi, malongo a Nzambi adi mu Biblia anago gusombegesa gula tangua diabalega. Gishina giene, ana landula gukuatesa athu a indongo yagasue nu athu adi mutagana nu malamba a gudisha uu nu mangino.

3. Mihu itshi tuza muzuelela mu longo edi?

³ Mu longo edi, tuza muheta mvutu gu mihu eyi: Malongo a Biblia adi itshi? Mukunda natshi malongo ene adi nu ndando mukunda nu esue mangino? Itshi yajiya gutukuatesa ha gumona malongo ene tangua tudi mutanga Biblia? Tuza nji mumona luholo ndaga jialongesele Yesu jiana monesa ndando ya malongo a Biblia.

MALONGO A BIBLIA ADI ITSHI?

4. Malongo a Biblia adi itshi?

⁴ Malongo a Biblia adi ndaga jia giamatshidia jinyi jiakhala mu mikhuala ya Nzambi. Mu mafundo ako mu Biblia, tuajiya gusanga longo dimoshi mukatshi dia mukhuala. (Mat. 22:37) Uvi malongo a Biblia akhala nu ndando yavula gubalega mikhuala. Ha gufezegesa, ana kalegela mikhuala phamba mu ndaga yahanewa. Ajiya nji guyihana mukunda nu tangua dimoshi ngenyi nga mukunda nu mulonga umoshi. Uvi malongo a Biblia ana monesa diago matangi a Yehowa mu ndaga jiavula. Mu mbimbi jiko, tuajiya guzuela egi malongo a Biblia ene gishina Yehowa wana hanela mikhuala. Guana khala nu ndaga yana tuma Yehowa ha gutuhana mikhuala yagasue yakhala mu Mbimbi yenji. Uvi malongo a Biblia adi mu mikhuala yene anago gusombegesa gula tangua diabalega, tuajiya guakalegela mu ndaga jiavula nu mu matangua a gudisha. (Ngi. 119:111) Gishina giene, ikhale mukhuala wasombegesa nga ndo ha fundo dimoshi ngenyi Biblia ishigo diago muhana mukhuala, malongo a Biblia ajiya gutukuatesa ha gujiya matangi a Yehowa mu mulonga wene.​—Yesh. 40:8.

5. Hana gifezegeselo gidi mumonesa gudisha guakhala mukatshi dia mikhuala nu malongo. (Tala nji ifuanesa.)

⁵ Ha gujiya gudisha guakhala mukatshi dia mikhuala nu malongo a Biblia, tutadilenu gifezegeselo egi. Mama mumoshi wajiya guwambela mun’enji wa galenge egi: ‘Ukuatshigo mbabula ya tshuya.’ Mbimbi eji jidi mukhuala. Uvi longo didi mu mukhuala wene didi egi: Ukuatshigo gima gia tshuya handaga wajiya guhia. Longo edi dishigo musuga phamba gu mbabula ya tshuya. Wajiya nji gudikalegela mukunda nu kiamo gia milele (fer à repasser), nzungu ya tshuya nga gima giko giagasue giajiya guhisa muthu. Wajiya gukalegela longo diene gumbo diawo nga mu mafundo ako agasue. Ndaga ya giamatshidia idi egi, gula mona muene wakula, wajiya gukalegela mbabula. Uvi mbawuyikalegela nu gutema guagasue hagula imuhisago. Yadiago, mukhuala wasombegesa gawo, uvi longo diakhadi mu mukhuala wene diasombegeselego.

MUKUNDA NATSHI MALONGO A BIBLIA AKHALA NU NDANDO?

6. a) Ndaga itshi Yehowa wana gutuhana mu Mbimbi yenji? b) Luholo lutshi Yehowa wana monesa egi wana gutuzula nu ndando?

⁶ Yehowa wana gutuhana mikhuala handaga wana gutuzumba nu wana tshigina egi tubuigo mu ndaga jiajiya gututshita gubola. (Yak. 2:11) Wana gutukuatesa nji ha gujiya malongo (yakotelesa egi gishina giatuhanela muene mikhuala yene) nu matangi enji. Gula mu fundo dimoshi ngenyi Biblia ishigo diago muhana mukhuala, Yehowa wana kalegela Mbimbi yenji ha gututuameza nu gutuhana malongo ha gujiya ndaga ya gutshita. Malongo a Biblia ana gutukuatesa ha guzula badesizio abonga nu ha gutshita ndaga jiabonga. Luholo Yehowa watuhanele malongo luana monesa egi wana gutuzula nu ndando nu watubembele ginemo gia gudizudila badesizio adi mumonesa egi tuana gumuzumba nu tuana zumba nji mikhuala yenji.​—Gal. 5:13.

7. Hana gifezegeselo gidi mumonesa luholo malongo a Biblia ajiya gutukuatesa ha guzula badesizio abonga? (Tala nji gifuanesa.)

⁷ Ha gujiya luholo malongo a Biblia ajiya gutukuatesa, tuzulenu gifezegeselo gia panneaux de signalisation jiakhala mu njila mu ifutshi iko. Panneaux jiene jiana kuatesa muthu wagasue udi muwendesa ha gujiya mikhuala idi naye gutumagela muene. Ha gufezegesa, jiajiya gumonesa guvula gua vitesse muthu udi muwendesa wajiya gumba nga gumudijiga tangua diajiya muene gumagenesa gamiyo genji. Gula muthu muene gatumagelego mikhuala yene, ajiya gumukuata. Uvi panneaux jiko jiana kuatesa muthu udi muwendesa ha gujiya ingonza idi mu njila. Ha gufezegesa, jiajiya gumutemesa egi njila idi ya diadiumuga (ya selumuka) nga ndo shitu jiana balega muavula ha fundo diene. Muwendeshi wabonga gula wamona panneaux jiene, ganago gutshita gifua gajimonelego, uvi wana tangiza luholo luabonga luajiya muene guwendesa ha gutemena ingonza yene. Ha gufezegesa, gula mvula idi munoga nga ndo gula guma gudi nu mbundu-mbundu, muwendeshi wabonga wana sombegesa luholo luenji lua guwendesa. Luholo lumoshi nji, Aklisto ana tuna nu mutshima umoshi ndaga yagasue Mbimbi ya Nzambi yana tunyisa; uvi ana tuna nji matangi nu makalegelo agasue ajiya guatuma ha gushiya mikhuala ya Nzambi. Hene, gula adi mutshigina guzula badesizio abonga, adi naye thomo gukamba gujiya matangi a Yehowa.

8. Ha gutadila Roma 12:1, 2, gubonga gutshi mbatuheta gula tudi nu khadilo dia gukamba malongo a Biblia?

⁸ Gudi nji nu gubonga guko tuajiya guheta gula tudi mukamba malongo a Biblia nu tudi mutshita ndaga mu gudivua nu malongo ene. Ha gufezegesa, gutshita ngenyi guana gutukuatesa ha gujiya matangi a Yehowa mu milonga yetu. Gula tudi mutanga lumene lumoshi mu Biblia, tudi naye gukamba malongo tuajiya guzula mu lumene luene. Tudi naye nji gudihula gishina Yehowa wasonegesele malongo ene nu gubonga tuajiya guheta. Gula tuatshita ngenyi, mbatujiya luholo lua gukalegela ‘matangi etu’ ha gukombelela Yehowa. Mbatujiya nji “gula gutshigina gua Nzambi gudi itshi. Handaga gutshigina guenji gudi guabonga, guatagana nu guana gumusuanguluisa.”​—Tanga Roma 12:1, 2.a

9. Gubonga gutshi guko mbatuheta gula tudi mukalegela malongo a Biblia? (Hebelu 5:13, 14)

⁹ Gukalegela malongo a Biblia guana gutukuatesa ha gubua Aklisto a gukula mu nyuma. Gutshita ngenyi guana gutukuatesa nji ha gukolesa ufuta wetu nu Yehowa. (Tanga Hebelu 5:13, 14.) Ana azonda ajiya gukhala nu funu ya liste ya mikhuala ha gujiya ndaga ajiya gutshita mu ndaga jia gudisha. Ajiya nji gutumagela mikhuala yene handaga ashigo mutshigina guhanewa ndola. Uvi Yehowa ganago gutukalegela ndaga gifua ana azonda, uvi wana gutukalegela najio gifua athu a gukula. Wana gutushila mutshima egi mbatuzula badesizio abonga adi gudivua nu gutshigina guenji. Gutshita ngenyi guana gumusuanguluisa muavula.​—Ngi. 147:11; Ish. 23:15, 26; 27:11.

ITSHI YAJIYA GUTUKUATESA HA GUMONA MALONGO TANGUA TUDI MUTANGA BIBLIA?

10. Itshi yajiya gutukuatesa ha gumona malongo a Biblia?

¹⁰ Tangua tudi mutanga Biblia, idi nu ndando ha gukamba malongo ajiya gutukuatesa ha gukotelesa matangi a Yehowa mu mulonga umoshi ngenyi. Tuajiya nji gukamba gujiya gishina Yehowa wahanele mikhuala imoshi ngenyi. Gula tuakamba gukotelesa muabonga malongo ene, mbayitukuatesa nji ha gukotelesa Yehowa muabonga. Uvi gula tudi mutshigina gujiya matangi a Yehowa, tudi naye gumutoga mu gisambu ha gutukuatesa, tudi naye nji gutangigiza muabonga ndaga tudi mulonguga. (Ish. 2:10-12) Tuajiya nji gudihula mihu eyi: ‘Mukunda natshi Nzambi wahanele mukhuala owu? Gula Yehowa ganago gutshigina khadilo edi, wana tangiza itshi mukunda nu khadilo diko dia luholo lumoshi? Longo ditshi ngazula mu lumene elu? Luholo lutshi ngajiya gudikalegela mu monyo wami?’ Gula tuakotelesa gishina Yehowa wahanele mikhuala iko nu malongo tuajiya guzula, mbayitukuatesa ha guzula badesizio abonga adi gudivua nu gutshigina guenji.

11. Mu luholo lutshi Yesu watumonesele ndaga yajiya gutukuatesa ha gumona malongo a Biblia? (Tala nji ifuanesa.)

¹¹ Mu diskur dia holu dia mulundu, Yesu wamonesele ndaga tuajiya gukalagala ha gumona malongo mu Biblia. Tutadilenu ifezegeselo thathu yahanele muene. Mu gifezegeselo giagasue, Yesu wakhalele musendesa thomo nu mukhuala. Gungima wakhalele mumonesa malongo adi mu mukhuala wene. Gula tuazula tangua dia gutangigiza malongo alongesele Yesu, mbayitukuatesa ha guzula badesizio abonga mu monyo wetu mangino.

12. Longo ditshi didi mu mukhuala udi mu Matayo 5:21, 22? (Tala nji gifuanesa.)

¹² Tanga Matayo 5:21, 22. “Ushiyigo muthu.” Longo ditshi didi mu mukhuala owu? Yehowa ganago gutshigina egi tukhale nu umbalagaji nu athu ako ikhale mu ndaga tudi mutshita, mu mbimbi jietu nga mu matangi etu. Yesu wamonesele egi ikhale muthu gashiyilego muthu n’a muko, uvi gula udi n’enji nu umbalagaji mu mutshima, watunyi gutumagela longo didi mu mukhuala wene. Gula muthu “udi mulandula gubambela phangi’enji khabu” nga ndo udi gumuwambela mbimbi jiabola, “mbawusophesewa.” Handaga ndaga jia luholo elu jiene jiana tuma athu ha gushiya athu ako.​—1 Yone 3:15.

13. Luholo lutshi tuajiya gukalegela longo didi mu Matayo 5:21, 22 mu monyo wetu? (Tala nji ifuanesa.)

¹³ Luholo lutshi tuajiya gukalegela longo didi mu Matayo 5:21, 22 mangino? Tudi naye gutshita yagasue ha gutuna gubambela athu ako umbalagaji mu mutshima ikhale athu ene ashigo gututshigina. (Levi 19:18; Yobo 36:13) Mukunda natshi? Handaga khadilo dia gubambela athu ako ndaga mu mutshima diajiya gutuma muthu ha gutshita nga guzuela ndaga jiabola. (Ish. 10:12) Yajiya nji gutuma muthu ha gusendesa gufeta nga guzuela ndaga jia mambo mukunda nu athu ako; makalegelo awa abola ajiya gusagesa athu ene nga gubolesa lukuma luawo. (Ish. 20:19; 25:23) Tangua diahanele Yesu longo diatadila khadilo dia gubambela athu ako umbalagaji mu mutshima, ima gifua réseaux sociaux, internet, application jia gusonegela mesaje yakhalelego guene. Uvi longo diene diana kuatesa Aklisto a gukula mu nyuma mangino ha gutemena ingonza ajiya gutagana nayo tangua adi mukalegela ima yene. Hene, gifua luholo tushigo naye gushiya muthu, luholo lumoshi nji tushigo naye guzuela nga gusonega ndaga jiajiya gutuma athu ha gutuna gunemesa athu ako.

14. Longo ditshi didi mu mukhuala udi mu Matayo 5:27, 28? (Tala nji gifuanesa.)

¹⁴ Tanga Matayo 5:27, 28. “Ukalagalago uthambi.” Longo ditshi didi mu mukhuala owu? Yehowa wana tuna uthambi, wana tuna nji matangi agasue ajiya gutuma muthu ha gutshita uthambi. Yesu wazuelele egi gula yala udi mutala mukhetu (munu gashigo mukaji’enji) nu matangi a gubungisa n’enji muila, wakalagala gale gubola. Hene, tudi naye gutshita yagasue ha gukatula matangi agasue abola ikhale gutshita ngenyi gudi gututoga ngolo jiavula. (Mat. 5:29, 30) Nu ene Aklisto adi undumbu adi naye gukalegela longo edi.

15. Luholo lutshi tuajiya gukalegela longo didi mu Matayo 5:27, 28 mangino? (Tala nji ifuanesa.)

¹⁵ Luholo lutshi tuajiya gukalegela longo didi mu Matayo 5:27, 28 mangino? Tudi naye gutuna gutangigiza ndaga jiabola nga jia musonyi. (2 Sam. 11:2-4; Yobo 31:1-3) Muklisto wa gukula mu nyuma udi naye gutuna pornografi mu maluholo enji agasue. Gashigo naye gutangiza egi gutala ndaga jia musonyi gushigo diago ndaga yabola gula muene hakhenji gashigo mutshita ndaga jiene. Gashigo naye nji gutangiza gifua athu a ha mavu awa egi gudi nu maluholo ako a pornografi ashigo diago abola. Hakhalele Yesu ha mavu, ima gifua telefone, filme nga bafotografe yakhalelego guene. Ikhale ngenyi, Yesu watuhanele longo diajiya gutukuatesa ha gujiya matangi a Yehowa tangua tudi mukalegela ima ya luholo elu. Longo diene diana gutukuatesa ha gujiya egi Yehowa gajiyilego gukhala nu gusuanguluga gula tudi guditumila foto nga video jiabola nga ndo tudi muta maga a ndaga jia musonyi gu telefone. Longo diene diana kuatesa nji athu adizudile gale mu ulo ha gusala bobobo gudi alumi’awo nga akaji’awo. (Mal. 2:15) Diana kuatesa nji Aklisto agasue ikhale ndumbu nga ndo adizudile gale mu ulo ha gutuna ndaga yagasue yajiya guatuma ha gutshita uthambi nga ndaga jiko jia musonyi.​—Ish. 5:3-14.

16. Longo ditshi didi mu mukhuala udi mu Matayo 5:43, 44? (Tala nji gifuanesa.)

¹⁶ Tanga Matayo 5:43, 44. “Udi naye guzumba muthu na muku’enu.” Longo ditshi didi mu mukhuala owu? Yehowa wana tshigina egi tuzule athu agasue gifua akuaku’etu nu tuazumbe nji. Ndaga ya lamba idi egi enya Yuda a mu tangua dia Yesu akhalele mutangiza egi mukhuala owu wakhalele mukotelesa egi adi naye guzumba phamba enya Yuda n’ako nu gutuna mbalagaji jiawo. Uvi Yesu wakhalele mujiya egi matangi a luholo elu akhalelego diago gudivua nu longo didi mu mukhuala wene. Wakhalele mujiya egi sh’etu wa guzumba wa mu dilu wana tshigina egi tuzumbe athu a maluholo agasue gifua akuaku’etu, ikhale adi enya mu gifutshi gitshi nga gilema gia gudisha nu esue.​—Mat. 5:45-48.

17. Gubonga gutshi mbatuheta gula tudi mukalegela longo didi mu Matayo 5:43, 44 mu monyo wetu? (Tala nji ifuanes.)

¹⁷ Luholo lutshi tuajiya gukalegela longo didi mu Matayo 5:43, 44 mangino? Gula tudi muzumba athu ako, mbayitukuatesa ha gutuna gudinginyisa mu ndaga jia ita nga jia khuta jidi mukalegewa ha mavu awa. (Yesh. 2:4; Mika 4:3) Mbayitukuatesa nji ha gukalegela athu agasue ndaga nu gisemo ikhale adi nu gilema gia gudisha nu esue, adi enya gifutshi giko nga gikombelelo giko. (Makal. 10:34, 35) Mbatukhala nji nu luholo lua gutotesela athu atukalegela gubola nga ndo akalegela athu tuana zumba gubola.​—Mat. 18:21, 22; Mako 11:25; Luka 17:3, 4.

LANDULA GUTUMAGELA MALONGO A BIBLIA

18. a) Ndaga itshi tudi naye gukalagala gula tudi mutshigina guzula desizio? b) Itshi tuza muzuelela mu longo dialandula?

¹⁸ Tudi nu gusuanguluga ha gujiya egi Yehowa ganago gutushila mikhuala yavula-vula ya gulandula gifua ana azonda, uvi wana gutukalegela ndaga gifua athu a gukula! Wana tshigina egi tukalegele malongo a Biblia ajiya gutukuatesa ha guzula badesizio abonga. (1 Kol. 14:20) Hene, gula tudi mutshigina guzula desizio, tudi naye thomo “gukamba ha gujiya gula gutshigina gua Yehowa gudi itshi.” (Ef. 5:17) Ngenyi mbatuzula badesizio adi gudivua nu gutshigina guenji handaga tuana gumuzumba uvi ishigo handaga tudi muvua woma egi muene mbawutuhana ndola. Uvi gudi nu gima giko giajiya gutukuatesa ha guzula badesizio abonga adi musuanguluisa Yehowa. Gima giene gidi mutshima wetu. Yene ndaga tuza muzuelela mu longo dialandula.