Zula Malongo Gudi “Nzambi wa Ukuateshi Wagasue”

1. Mukunda natshi tudi naye gukuatesa athu ako?

MUKUT’ETU agasue tuana guvua “gikenene mukunda nu malamba avula” ana gutubuila, hene tuana khala nu funu ya muthu wajiya gutukuatesa nu gutuhana gikhesa. (1 Phet. 1:6) Tuana suanguluga muavula tangua athu ako ana gutukuatesa, esue nji tudi naye gukhala hehi ha gukuatesa athu adi mutagana nu malamba. (Mat. 7:12) Yehowa “Nzambi wa ukuateshi wagasue” wana gutukuatesa ha gujiya luholo “tuajiya gukuatesa athu adi mutagana nu malamba a luholo luagasue.” Tuajiya gulandula gifezegeselo gienji gula tudi ‘mulandula gudikolesa’ mukatshi dietu. (2 Kol. 1:3, 4; 1 Tes. 4:18) Tuanago gukuatesa aphangi’etu a mala nu akhetu handaga idi ginemo gietu, tuana guyitshita handaga tuana guazumba. Mu longo edi, tuza mumona 1) ndaga yana zuela Biblia mu ndaga yatadila gukuatesa athu ako, 2) luholo tuajiya gukuatesa athu ako nu 3) ndaga tuajiya gukalagala gula tudi nu funu ya ukuateshi.

NDAGA YANA ZUELA BIBLIA YATADILA GUKUATESA ATHU AKO

2. Mu Biblia, mbimbi “gukuatesa” muthu yajiya gukotelesa itshi?

² Mu Biblia, mbimbi ya Greke yabalumuiwa egi “gukuatesa” yajiya gukotelesa ndaga jiavula ha gutadila fundo ayikalegela. Ha gufezegesa, ajiya guyikalegela ha gumonesa mbimbi tuana kalegela ha gukuatesa athu ako ha gudivua muabonga nga ha guatuma ha gutshita ndaga imoshi. (Roma 12:8; tala note d’étude “encourage” mu Biblia ya français.) Hene, mbimbi yene ya Greke yana balumuiwa egi “gukuatesa” yajiya gukotelesa egi atamega muthu mumoshi ha guza mumagana gu khanda ya muthu muko ha gumukuatesa. Tangiza gale egi muthu mumoshi udi muza muphushi gudi futa dienji udi mutagana nu lamba ha gumukuatesa nu gima giagasue gidi nagio muene funu! Ikhale muthu muene wakuatesa futa dienji mu luholo lutshi, ndaga yabonga mbayitshita muene mbayikhala gumuhana gikhesa nu gumukuatesa ha gudivua muabonga.

3. Luholo lutshi Barnabase watushidile gifezegeselo giabonga mu ndaga yatadila gukuatesa athu ako? (Tala nji gifuanesa.)

³ Tutadilenu gifezegeselo gimoshi gidi mu Biblia. Muklisto mumoshi mu jina dia Yozefe wakhadile nu khadilo gukuatesa athu ako nu guahana gikhesa muavula, gishina giene apostolo amulugile egi Barnabase, yakotelesa egi “Muthu Wana Hana Athu ako Ngolo.” (Makal. 4:36) Jina diene diakhalele diamufuanyina diago muabonga, gishina giene mu Biblia ana gumutamega phamba egi Barnabase uvi Yozefe luko ndo. Mbala jiavula, Barnabase wamonesele diago egi wakhalele muthu wana hana athu ako ngolo luholo luakuatesele muene aphangi’enji Aklisto muavula. Ha gufezegesa, gungima dia gubua Muklisto, Saula wayile gu Yelusalema ha gutagana nu Aklisto ako. Uvi Aklisto ene akhalele gumuvuila woma handaga akhalele gumujiya egi wasagesele Aklisto muavula. Uvi Barnabase washidile Saula mutshima, wayile n’enji gudi apostolo.​—Makal. 9:26-28.

LUHOLO WAJIYA GUKUATESA ATHU AKO

4. Luholo lutshi wajiya gukuatesa athu ako? (Roma 1:11, 12)

⁴ Nda guatala gula luholo ludi guene. Yehowa wana kalegela akombeledi enji ha guhana athu ako gikhesa. Ha gufezegesa, tangua profete Eliya wakhalele nu gikenene, Yehowa watumile muanjelo wenji ha gumukuatesa. (1 Maf. 19:4-7) Mupostolo Phaula wakhalele nji mujiya egi guya mutala aphangi’enji ha guahana gikhesa guakhalele nu ndando yavula. (Tanga Roma 1:11, 12.) Gula waya mutala muthu ha gumukuatesa, balegesa n’enji tangua diavula, utshitshigo ndaga phushi-phushi. (1 Kol. 16:7) Gula ushigo nu luholo lua guya gumutala, ujimbilago egi gula wamutamega gu telefone, wamutumila mesaje nga mukanda ha gumuhana gikhesa, mbawumukuatesa diago muavula. Gula wakalagala ngenyi, mbawuhana Yehowa njila ya gugukalegela ha gukuatesa athu ako.

5. Mukunda natshi matangua ako yajiya gukhala lamba ha gukuatesa aphangi’etu?

⁵ Luholo gisugishilo gia mavu awa giasuena hehi, tudi naye gujiya egi matangua ako mbayikhala lamba ha guya mutala aphangi’etu ha guakuatesa. Ha gufezegesa, tangua Phaula wakhalele mu bologo gu Roma, Onesifolo wakatugile gu Efeso, wayile uu nu gu Roma ha gumukamba. Gutshita ngenyi guakhalele diago gingonza mukunda nu muene handaga wakhalele naye nji gumbiwa mu bologo nga gushiyiwa. (2 Tim. 1:16-18) Matemue a Yehowa a gu Russie ana monesa nji gikhesa gia luholo elu tangua aphangi’awo ana sagesewa mukunda nu gutshigina guawo. Gula abata phangi mumoshi gu tribinale ha gumusophesa, aphangi’enji a mala nu a akhetu ana guya guene ha gumukuatesa, ikhale ana jiya egi ene nji ajiya gukuatewa gula atshita ngenyi. Aye nji wajiya gulandula gifezegeselo giawo gula udi muzula tangua dia gulonguga luholo akombeledi a Nzambi a mu tangua dietu nu a mu tangua dikulu adikuatesele nu gusuanguluga guagasue ikhale akhalele mutagana nu usageshi.

6. Luholo lutshi tuajiya gulandula gifezegeselo gia Yehowa tangua tudi mukuatesa athu ako? (Tala nji gifuanesa.)

⁶ Khala guategelela. Tangua profete Eliya wakotelesele egi monyo wenji wakhalele mu gingonza, wakombelele Yehowa, wamuwambelele ndaga jiagasue jiakhalele mu mutshima wenji. Yehowa wakhalele mujiya mulonga wa Eliya muabonga, wakhalele nji mujiya gishina giavuidile muene gikenene. Ikhale ngenyi, Nzambi wetu wa guzumba wazudile tangua dia gutegelela profete wenji muabonga. Wamutegelele nu guhuiminyina guagasue, gamukokelego nji mbimbi tangua diakhalele muene muvutugila ndaga jiene jimoshi! (1 Maf. 19:9, 10, 14) Yehowa watshitshile nji ngenyi nu profete Habakuka, wamubembelele tangua dia guzuela ndaga jiagasue jiakhalele gumusagesa ikhale wajizuelele mu luholo luakhalele mumonega gifua gakhalelego munemesa ufumu wenji. (Hab. 1:2, 3) Yehowa wana tshita nji ngenyi nu esue mangino. Ikhale wana dianga gujiya ndaga jiagasue tudi najio funu, uvi wana zula tangua dia gutegelela isambu yetu muabonga diago. Esue nji tuajiya gulandula gifezegeselo gia Yehowa gula tudi mutegelela aphangi’etu muabonga nu ginemua giagasue tangua adi gutuwambela milonga yawo. Tangua didi ene muzuela, tudi naye “gukhala hehi ha gutegelela,” tushigo naye guakoka mbimbi nga guvua khabu gula adi muzuela ndaga jiabola nga ndo adi muvutugila ndaga jiene jimoshi.​—Yak. 1:19; Mulo. 7:9.

7. Itshi yajiya gutukuatesa ha gujiya ndaga tuajiya gukalagala ha gukuatesa muthu udi mu lamba?

⁷ Kamba gujiya ndaga wajiya gukalagala ha guakuatesa. Tuajiyilego gujiya ndaga jidi mu mutshima wa muthu gifua Yehowa. Hene, gula tudi mutshigina gumukuatesa, tudi naye gumutegelela muabonga diago. Utangizago egi udi mujiya ndaga idi nayo muene funu. Mukut’etu agasue tuakhalago luholo lumoshi. Ukuateshi muthu muene wajiya gukhala nawo funu wajiya gukhala wagudisha nu luholo wajiya gudifelela egi athu agukuatese gula udi mu lamba. Hene, zula tangua dia gumutegelela muabonga, muhule nji mihu yabonga yajiya gugukuatesa ha gujiya ndaga wajiya gutshita ha gumukuatesa.​—Ish. 20:5.

8. Luholo lutshi Yesu wakuatesele Mata nu Madiya hafuile Lazalo? (Tala nji ifuanesa.)

⁸ Tala luholo Yesu wakuatesele Mata nu Madiya hafuile phangi’awo Lazalo. Akhetu awa mbadi akhalele nu gikenene handaga phangi’awo wafuile, uvi Yesu wakalegele bametode a gudisha ha guakuatesa. Hatele muene maga nu Mata, Yesu wamuwambelele ndaga yatadila gufuzumuga nu wamukuatesele ha gukolesa gutshigina guenji mu felela diene dia ndando. Uvi hajile Madiya nu gudila, yajiya gukhala egi Yesu gamuwambelelego ndaga yatadila gufuzumuga. Wadidile n’enji nu wamuhudile fundo afundjile Lazalo. (Yone 11:20-35) Longo ditshi tuajiya guzula? Gula tudi mutshigina gukuatesa athu adi mu lamba, tushigo naye gukalegela metode ene amoshi gudi muthu wagasue, uvi tudi naye gukamba gujiya ndaga tuajiya gutshita ha gukuatesa muthu wagasue mu luholo luenji.

9. Luholo lutshi tuajiya gukalegela Biblia ha gukuatesa athu ako? (Roma 15:4, 5)

⁹ Khala mukalegela Biblia. Gula watangela muthu udi mu lamba verse ya Biblia ha gumukuatesa, wajiya gumuhana gikhesa nu gumukuatesa ha gukolesa gutshigina guenji mu ndaga jiana gutulaya Yehowa. (Tanga Roma 15:4, 5.) Gula muthu wabua nu gutshigina guakola, yajiya gumukuatesa ha gusha mutshima egi Yehowa wana gumuzumba nu mbawumukuatesa. (Yesh. 40:31) Luholo lutshi wajiya guheta verse ya Biblia yajiya gugukuatesa ha guhana muthu gikhesa? Aphangi ako akhala nu liste ya verse ajiya gukalegela tangua diagasue ha gukuatesa athu ako. Wajiya nji guheta verse jiko mu mukanda Mbimbi ya Nzambi Yajiya Gugukuatesa mu gitshinyi “Gikhesa.” Toga Yehowa ha gugukuatesa ha gujiya luholo luabonga wajiya gukalegela Mbimbi yenji ha guhana athu ako gikhesa. Nyuma yenji nji yajiya gugukuatesa ha guwunguluga verse jiabonga wajiya gukalegela.​—Yone 14:26.

10. Mukunda natshi tudi naye guzuela nu gisemo giagasue gula tudi mutshigina guhana muthu gikhesa?

¹⁰ Khala muzuela nu gisemo. Matangua ako, yajiya gutoga egi tukuatesa muthu udi mu lamba ha gusombegesa luholo lua gutadila mulonga wenji. Gula udi mutshigna guzuela, tangiza muabonga gutuama hagula mbimbi jiaye jimuhana gikhesa ha fundo dia gumunamenesa. (Ish. 12:18) Tuajiya gulandula gifezegeselo giabonga gia Yehowa hatele muene maga nu Eliya. Eliya wakhalele mutangiza egi gu Isalele yagasue phamba muene wasalele mukombelela Yehowa, wakhalele nji mutangiza egi gatageneselego muabonga ginemo gienji gia profete. Yehowa gawambelelego Eliya egi matangi enji akhalele abola, uvi wamukuatesele nu gisemo giagasue ha gusombegesa luholo luenji lua gutadila ndaga. (1 Maf. 19:15-18) Aye nji wajiya gukuatesa phangi’aye gula udi nu gisemo nu udi mutangiza gutuama dia guzuela. Gula udi mukalagala diskur mu gudibungisa nga ndo udi muhana komantere, tshita yagasue ha gukhala muzuela ndaga jiabonga nu gisemo giagasue hagula jiajiya guhana aphangi gikhesa nu ngolo.

11. Gula aphangi’etu adi mu lamba, matangua avula ana khala nu funu ya itshi? (1 Yone 3:18)

¹¹ Akuatese nu ima adi nayo funu. Gula aphangi’etu adi mutagana nu malamba, tushigo naye phamba guawambela mbimbi jidi muhana gikhesa, tudi naye nji guahana ima adi nayo funu. (Tanga 1 Yone 3:18.) Barnabase watushidile diago gifezegeselo giabonga, wasumbishile ima yenji iko ha gukuatesa alandudi ahe-ahe anyi akhalele mu lamba. (Makal. 4:36, 37) Aphangi avula mangino ana landula nji gifezegeselo gienji luholo ana kuatesa aphangi ako adi mu lamba. Tutadilenu ndaga yabuidile phangi Gabriela wa gu Pologne. Wavuile gikenene giavula tangua mvula yakola yazalesele inzo yenji nu meya nu yabolesela ima yenji yavula. Udi muzuela egi: “Ame nu mvuaji jiami tuavuile woma wavula, tuadisagesele nji muavula. Ngakhalelego mujiya luholo tuakhalele naye gulondega inzo yetu. Uvi aphangi a mu mahungu a hehi ajile, alondegele ima yavula mu inzo yetu mu lusugu lumoshi phamba. Ndaga yene yakolesele diago gutshigina guami egi Yehowa wana tuameza akombeledi enji ha gukuatesa athu adi mutagana nu malamba.”

12. Gubonga gutshi Aklisto ako ajiya guheta gula udi mukolesela mu malamba?

¹² Khala mukolesela mu malamba. Phaula wawambelele Aklisto a gu Tesalonike egi tangua diavuile muene egi akhalele mukolesela mu malamba nu gujinginyina guagasue, wahetele gikhesa nu ngolo. Wakhalele mujiya egi mudimo wawo wakhalelego wa githuhu. (1 Tes. 3:5-8) Phaula wajiyile egi gula wasala ya gujinginyina gudi Yehowa mu tangua dia lamba, mbayikuatesa nji Aklisto ako ha gusala ya gujinginyina. (Kol. 2:1, 2) Luholo lumoshi nji, tangua aphangi’etu Aklisto ana mona luholo Yehowa wana gutukuatesa ha gukolesela mu malamba, yana guahana nji gikhesa.

13. Khadilo ditshi tudi naye gukhala nadio tangua tudi mukuatesa athu ako?

¹³ Khala nu khadilo dia guhuiminyina. Tuajiya gutshita yagasue ha gukuatesa phangi mumoshi walebi muila, uvi matangua ako phangi muene gajiyilego gudivua muabonga mbala imoshi. Uvi Biblia yana gututoga ha ‘gukhala gudihana gikhesa.’ Mbimbi “khalenu gudihana gikhesa” jiana monesa gulandula gutshita ndaga imoshi ngenyi. (1 Tes. 5:11) Hene, khala nu khadilo dia guhuimunyina tangua udi mukuatesa athu ako. (1 Tes. 5:14) Matangua ako, aye nji wajiya gukhala nu funu ya ukuateshi wa athu ako. Na itshi wajiya gutshita gula udi nu funu ya ukuateshi?

GULA UDI NU FUNU YA UKUATESHI

14-15. Itshi tudi naye gutshita tangua tudi nu gikenene?

¹⁴ Kombelela Yehowa. Toga Yehowa ha gugukuatesa gula udi nu gikenene. (Ngi. 94:19) Muwambele ndaga udi mutshigina egi agukalegele, muwambele nji luholo udi gudivua. (Ngi. 62:8) Idi yadiago egi Yehowa wana jiya ndaga tuana khala najio funu gutuama egi tumutoge najio. Uvi gula wamuwambela luholo udi gudivua, mbawumonesa egi wana gumushila mutshima egi muene wana guguzumba nu wana tegelela isambu yaye. Yehowa wana hana mvutu gu isambu ya akombeledi enji a gujinginyina tangua diagasue. (Mako 11:24) Filiphi 4:6, 7 yana zuela egi: “Muwambelenu nji milonga yenu yagasue. Ngenyi, Nzambi mbawumihana guhuima guabalega ndaga jiagasue athu ajiya gukotelesa. Guhuima guene mbagubamba mitshima yenu nu matangi’enu.”

¹⁵ Toga athu ako ha gugukuatesa. Wambela phangi mumoshi wa gukula mu nyuma nga mukulu mumoshi wana shila mutshima ndaga idi gugusagesa. Idi yadiago egi aphangi’aye Aklisto ajiya gugukuatesa, uvi ajiyilego gujiya luholo udi gudivua nga ndaga udi nayo funu gula waawambelelego. (Ish. 14:10) Wajiya guatoga ha gugutegelela muabonga nga guguwambela verse imoshi nga longo dimoshi diaakuatesele.

16. Ndaga itshi aphangi ako ajiya gutshita tangua adi mutshigina gugukuatesa? Itshi ushigo naye gujimbila?

¹⁶ Khala nu guhuiminyina, khala nji mutotesela athu ako. Aphangi’aye Aklisto ajiya guzuela nga gutshita ndaga imoshi yajiya gugusagesa tangua adi mutshigina gugukuatesa. Gula ndaga ya luholo elu yagubuila, khala nu khadilo dia guhuiminyina. (1 Kol. 13:4, 7) Yakoba 3:2 yana zuela egi: “Gula muthu gashigo mujimbila mu mbimbi, udi muthu watagana.” Hene, ujimbilago egi aphangi’aye adi mutshigina gugukuatesa. Ubuitshigo nji mutshima egi aphangi’aye ashigo athu atagana gifua aye, matangua ako ajiya guzuela nga gutshita ndaga yabola ikhale akhadi diago mutshigina gutshita ndaga yabonga.​—Mat. 26:41.

17. Itshi tudi naye gulandula gutshita?

¹⁷ Mukut’etu agasue tuakhala nu funu ya muthu wajiya gutukuatesa nu gutuhana gikhesa. Mbatukhala nji nu funu ya ukuateshi muavula mu masugu adi muza tangua mbalagaji jia Nzambi mbajitusagesa muavula gubalega. Hene, tulandulenu gutshita yagasue ha gudikuatesa!