Khala Mutadila Malamba Aye mu Luholo Luabonga

1-2. Itshi yajiya gutukuatesa ha gukolesela tangua tudi mutagana nu malamba? (Tala nji gifuanesa.)

MASUGU awa udi mutagana nu malamba gifua usageshi wa enya fami yaye handaga udi Temue wa Yehowa ba? Udi mukata nga ndo wabua muthu wa gukola ba? Wafuisa muthu wakhalele muzumba ba? Gula idi ngenyi, jiya egi monyo waye nji wajiya ‘guzala pha nu malamba nu gikenene’ gifua muana tagana nawo akombeledi a Yehowa a ha mavu agasue.​—Ngi. 90:10.

² Gula tudi mutadila malamba etu mu luholo luabonga, yajiya gutukuatesa ha gukolesela. Mukunda natshi idi nu ndando ha gutshita ngenyi? Handaga gula tushigo mutadila malamba etu luholo Yehowa wana guatadila, mbayikhala lamba gudi esue ha gujiya ndaga tuajiya gutshita ha gukolesela. Tuzulenu gifezegeselo gia muthu udi muwendesa gamiyo. Gula vitre ya gutuama idi nu mvindu, yajiya gukhala lamba gudi muthu udi muwendesa gamiyo ha gumona ingonza idi gutuama. Uvi gula idi yaphelegeta, mbayimukuatesa ha gumona muabonga njila idi muya muene. Mu longo edi, tuza mumona 1) luholo luabonga tudi naye gutadila malamba, 2) ndaga jiajiya gutubuila gula tushigo mutadila malamba etu mu luholo luabonga nu 3) ndaga tuajiya gutshita gula malamba atubuila.

LUHOLO LUABONGA TUDI NAYE GUTADILA MALAMBA

3. Mukunda natshi tuana tagana nu malamba ha mavu awa?

³ Mukut’etu agasue tuana tagana nu malamba ha mavu awa. Tuana tagana nu malamba handaga Satana wana tuameza mavu awa, ako nji ana gutubuila handaga tushigo athu atagana. Luholo gisugishilo gia mavu awa giasuena hehi, mbatutagana nu malamba avula gifua lamba dia mu gisagumuisa nga ndo athu ajiya gutukalegela ndaga jiabola jiajiya gutubatela malamba. (Mat. 24:8; 2 Tim. 3:13) Gula Yehowa wamanesela malamba ene agasue mangino, mbayikhala gifua udi mukuatesa Satana ha gutuameza mavu muabonga. Hene, tudi naye gujiya egi luholo tudi ha mavu awa abola, mbatulandula gutagana nu malamba.​—Mulo. 9:12.

4. Malamba atshi ako Aklisto ana tagana nawo?

⁴ Tuana tagana nji nu malamba handaga tudi alandudi a Yesu. Yesu wawambelele alandudi enji mbala jiavula egi mbaasagesewa mukunda nu gutshigina guawo. (Mat. 24:9; Yone 16:2) Gujiya ndaga eyi guana gutukuatesa ha gutuna guleba muila nu gusala agujinginyina gudi Yehowa. (1 Tes. 3:3, 4) Gula tudi mutagana nu usageshi mukunda nu gutshigina guetu guakola, ndaga yene yana monesa egi esue getu mulandula guwenda mu njila idi mubata gu monyo wa ivo nu ivo. Yana gutukuatesa nji ha gumonesa ha meso a athu gula tudi gu khanda ya Yehowa nga ya Satana. Satana wana zuela egi athu anago gukombelela Nzambi handaga ana gumuzumba uvi handaga Nzambi wana guahana ima yabonga. Gishina giene, wana sagesa muavula akombeledi a Yehowa handaga wana tangiza egi mbaashigo musala agujinginyina gula atagana nu lamba diakola. (Yobo 1:9-11) Hene, Yehowa wana suanguluga muavula gula tudi mukolesela mu malamba handaga tuana gumuzumba.​—Ish. 27:11.

5. Malongo atshi tuajiya guzula mu Mulongeshi 7:13, 14? (Tala nji ifuanesa.)

⁵ Yehowa wana bemba egi tutagane nu malamba. Yehowa ganago gukalagala ndaga mu luholo luabola, ganago nji gutulola nu ndaga jiabola. (Yak. 1:13) Uvi fumu Salomo wasonegele egi “lusugu lua lamba” ludi “midimo ya Nzambi wa giamatshidia.” (Tanga Mulongeshi 7:13, 14.) Salomo gakhalelego mutshigina guzuela egi Nzambi wana kalagala ndaga jiabola, uvi wakhalele mutshigina guzuela egi Nzambi ganago gujikanga njila ha gutubuila. Malongo atshi tuajiya guzula mu mbimbi jia Salomo jidi mu verse eji? Longo dia thomo, tudi naye gujiya egi ha mavu awa a Satana, mbatukhala nu masugu abonga nu abola. Gula tudi nu gusuanguluga, tudi naye guhana Nzambi mersi handaga ima yagasue yabonga yana katuga gudi muene. Dia mbadi, Salomo wamonesele egi tuajiyilego ‘gukotelesa nga hazonda ndaga mbajibua mu masugu adi muza,’ yakotelesa egi tushigo mujiya gula mbatukhala nu gusuanguluga nga ndo mbatutagana nu malamba. Malamba ajiya gubuila muthu wagasue mu gisagumuisa, ikhale muthu wabonga nga muthu wabola.

6. Mukunda natshi Yehowa wana bemba egi tutagane nu malamba? (Hebelu 12:7, 11)

⁶ Gula tudi mutadila malamba etu mu luholo luabonga, mbayitukuatesa ha gukotelesa egi Yehowa wajiya gukalegela malamba ene ha gutulongesa egi tudi naye gumushila mutshima ha fundo dia gudishila mutshima. Yehowa wana mona malamba etu agasue, wana gudisagesa nji mukunda nu esue. Ikhale matangua ako wajiya gubemba egi ‘tuwende mu baba diabuita bui,’ uvi wana landula gututuameza, gutuzumba nu gutuhana ngolo jia gukolesela. (Ngi. 23:4) Malamba tudi mutagana nawo ajiya nji gutukuatesa ha gukotelesa makalegelo tudi naye gukudisa, Yehowa wajiya nji gutukuatesa ha gutshita ngenyi. (Tanga Hebelu 12:7, 11.) Ha gufezegesa, Yobo nji wakhalele naye gukudisa khadilo dia gudibulumuisa. Ishigo Yehowa wamonesele Yobo malamba, gaakangelego nji njila ha gumubuila; uvi waakalegele ha gumukuatesa ha guzula malongo a ndando. (Yobo 42:1-6) Hene, ikhale tuatagana nu lamba dia luholo lutshi, tudi naye gujiya egi Yehowa mbawutukuatesa ha gusala agujinginyina gudi muene nu mbawutushimbiga diago.​—Roma 8:35-39.

7. Mukunda natshi wajiya gukhala nu gusuanguluga tangua udi mutagana nu usageshi mukunda nu gutshigina guaye?

⁷ Tuajiya gukhala nu gusuanguluga tangua tudi mutagana nu usageshi. Gula udi mutagana nu usageshi mukunda nu gutshigina guaye, utangizago egi Yehowa gashigo luko musuanguluga nu aye. Uvi jiya egi usageshi wene wana monesa diago egi Yehowa yowu gugutshigina. (Mat. 5:10-12) Gula udi mutadila malamba aye mu luholo luabonga, wajiya gukhala nu gusuanguluga gifua muakhalele apostolo. (Makal. 5:40-42) Gutshita ngenyi guajiya nji gugukuatesa ha gukuatesa athu ashigo Matemue a Yehowa ha gulonguga giamatshidia nu ha ‘gutumbuisa Nzambi.’ (1 Phet. 2:12) Yehowa wajiya gugukuatesa mu malamba aye gifua muakuatesele muene Yozefe. Yozefe wakhalele yowu genji mu bologo, uvi Yehowa wamushimbigile muavula. Wajiya nji gutshita ngenyi mukunda nu aye ikhale aye gaye mukatshi dia lamba.​—Gis. 39:3, 23.

8. Ndaga itshi iko yajiya gutukuatesa ha gukolesela mu malamba?

⁸ Malamba etu mbaahua. Lumene lua Yobo luana gutukuatesa ha gujiya egi gudi nu lusugu malamba etu nji mbaahua. Gifua luholo tudi guyijiya, “Yehowa washimbigile gitshinyi giasuga gia monyo wa Yobo muavula gubalega gu gisendeselo.” (Yobo 42:12) Esue nji Yehowa udi gutulaya egi mu mavu ahe-ahe, mbawutushimbiga mu luholo lua gushimana diago. Malamba tudi mutagana nawo mangino adi mukunda nu tangua diazonda, uvi gusuanguluga mbatukhala nago mu mavu ahe-ahe mbagukhala mayilago. Gujiya ndaga eyi guajiya gukuatesa muthu wagasue mukatshi dietu ha gukolesela uu nu gu gisugishilo!​—Mat. 24:13.

GUTADILA MALAMBA ETU MU LUHOLO LUABOLA GUAJIYA GUKHALA GINGONZA

9. Gula tudi mutadila malamba etu mu luholo luabola, itshi yajiya gutubuila?

⁹ Gula tudi mutadila malamba etu mu luholo luabola, tuajiya gusendesa gutangiza ndaga jishigo jia giamatshidia; gutshita ngenyi guajiya gukhala gingonza. Ha gufezegesa, tuajiya gusendesa gutangiza egi Yehowa udi gutubatela malamba ene. Yene ndaga yatangijile Yobo mu tangua dimoshi ngenyi, matangi ene amutumile ha gukamba “gumonesa egi udi muthu wabonga gubalega Nzambi.” (Yobo 32:2) Naomi nji mu tangua dimoshi ngenyi wazuelele egi Yehowa wamumonesele malamba. (Luta 1:13, 20, 21) Nga Yobo nu Naomi alanduile gutangiza ngenyi, nga abolesele ufuta wawo nu Yehowa. (Ish. 19:3) Uvi Yehowa waakuatesele ha gusombegesa matangi awo, waashimbigile nji mukunda nu gujinginyina guawo gudi muene.

10. Itshi tuajiya gusendesa gudihula gula tudi mutagana nu malamba?

¹⁰ Tudi mujiya egi ishigo Yehowa wana gutumonesa malamba, uvi matangua ako tuajiya gusendesa gudihula gula wana gudisagesa diago mukunda nu esue. Matangi a luholo elu ajiya gutulebesa muila. (Ish. 24:10) Fumu Davidi nu profete Habakuka ataganele nu malamba, mukut’awo agasue mbadi ahudile Yehowa gula wakhalele diago muvua isambu yawo. (Ngi. 10:1; Hab. 1:2) Ikhale ngenyi, alanduile gukombelela Yehowa. Yehowa wakuatesele akombeledi enji awa a gujinginyina, mbawutshita nji ngenyi mukunda nu esue.​—Ngi. 10:17.

11. Itshi yajiya gutubuila gula tushigo mutadila malamba etu mu luholo luabonga?

¹¹ Gula tushigo mutadila malamba etu mu luholo luabonga, tuajiya gudihula muavula gula atubuila, tuajiya nji gusendesa gutangiza egi malamba a luholo lunu akhalelego naye gutubuila. (1 Phet. 4:12) Mu tangua dimoshi ngenyi, alandudi a Yesu akhalele nji nu matangi a luholo elu, yakhalele lamba gudi ene ha gutshigina egi Yesu wajiya gutagana nu usageshi. (Luka 18:33, 34) Ha gufezegesa, Yesu wazudile tangua dia guawambela malamba akhalele naye gumubuila, uvi mupostolo Phetelo wakhalele mutangiza egi Yehowa gajiyilego gubemba egi Yesu amone malamba. Yesu wakhalele mujiya egi matangi a luholo elu akhalelego gudivua nu gutshigina gua Yehowa, hene wamubalelele. (Mako 8:31-33) Nu guene gungima dia gufua guenji, alandudi enji akoteleselego gishina ndaga jiene jiagasue jiamubuidile. Uvi Yesu walanduile guakuatesa. Hatele nawo muene maga gungima dia gufuzumuga guenji, wakalegele “muabonga Mukanda wa Nzambi” ha guakuatesa ha gukotelesa ndaga jiagasue jiamubuidile. (Luka 24:25-27, 32, 44-48) Gutangigiza ndaga jiaalongesele Yesu guakhalele naye guakuatesa ha gudilondega mukunda nu usageshi akhalele naye gutagana nawo. Esue nji gula tudi nu khadilo dia gutanga verse jia Biblia jiana zuelela malamba, yajiya gutukuatesa ha gudilondega mukunda nu malamba tuajiya gutagana nawo.

12. Luholo lutshi tuajiya gudivua gula tushigo mutadila mulonga wetu mu luholo luabonga?

¹² Gula tushigo mutadila lamba dietu mu luholo luabonga, tuajiya gutangiza egi mulonga wetu udi muyila muabola diago hoho ishigo ngenyi. Yesu wamonesele luholo ndaga yene yajiya gutubuila hahanele muene gifezegeselo gia athu akhalele mutshita mudimo mu dihia dia vinyo. Enya mudimo ako avuile khabu mukunda nu lufuto luawo handaga atangijile egi a afutshilego mu luholo luabonga; uvi fumi’a dihia diene wawambelele mumoshi mukatshi diawo egi: “Yala, ngagutshitshilego gubola.” (Mat. 20:10-13) Enya mudimo ene akhalelego muzuela ndaga jiabola handaga a akalegele ndaga mu luholo luabola, uvi yakhalele handaga akhalele gudifelela ndaga iko inyi yakhalelego naye gukalegewa ngenyi. Mangino, aphangi ako ana gulua nji nu matangi a luholo elu. Ajiya gutangiza egi adi guakalegela ndaga mu luholo luabola luholo ashigo muheta inemo adi gudifelela. Ndaga jitshi tuajiya gukalagala ha gukhala mutadila milonga yetu mu luholo luabonga?

NDAGA TUAJIYA GUTSHITA GULA MALAMBA ATUBUILA

13. Matangi a luholo lutshi tuajiya gukhala nawo gula malamba atubuila?

¹³ Idi yadiago egi wana jiya ndaga jiana zuela Biblia mukunda nu malamba. Mbala jiko nji wakalegele gale verse jiene ha gukuatesa athu akhalele mutagana nu malamba ha gukolesela. Uvi gula aye hakhaye malamba a gubuila, yajiya gukhala lamba ha guatadila mu luholo luabonga. Ha gufezegesa, wajiya gutangiza egi Yehowa udi guguhana ndola nga ndo gashigo luko mutegelela isambu yaye. Ndaga jitshi tuajiya gukalagala ha gukhala nu matangi abonga?

14. Itshi wajiya gutoga Yehowa gula malamba agubuila? (Filiphi 4:13)

¹⁴ Khala mutoga Yehowa ha gugukuatesa. Wambela Yehowa lamba diaye, muwambele nji luholo udi gudivua. Muwambele luholo udi mutshigina egi agukuatese. Mutoge nji nyuma yenji hagula yajiya gugukuatesa ha guheta ngolo nu ndunge jia gukolesela. Uvi ubuitshigo mutshima egi Yehowa wajiya guhana mvutu gu isambu yaye mu luholo lunu watangijilego. (Ef. 3:20) Wajiya nji gukalegela anjelo nu aphangi a mu hungu ha gugukuatesa. (Ngi. 34:7) Hene, tshigina ukuateshi wenji mu maluholo agasue adi mukalegela muene. Yehowa wana hana nyuma yenji nu mutshima wagasue gudi muthu wagasue wamutoga nayo; nyuma yene yajiya gugukuatesa ha gukolesela lamba diagasue udi mutagana nadio.​—Tanga Filiphi 4:13.

15. Itshi mbayigukuatesa ha gukolesela mu malamba? (Tala nji gifuanesa.)

¹⁵ Landula gutshita ndaga jia mu nyuma. Gula mangino ushigo luko nu luholo lua gutshita ndaga jiagasue jia mu nyuma gifua luholo wakhalele guyitshita thomo, ulebigo muila. Landula gutshita yagasue ha gutangiza gifua Yehowa ikhale udi mutagana nu matangua a “gikenene nu malamba.” (Ngi. 119:143) Landula gutanga Biblia lusugu nu lusugu, khala nji guyilonguga nu gutangigiza ndaga udi mutanga. Khala muya mu mudimo wa gulongesa gula luholo ludi guene, khala nji muya mu gudibungisa nu guhana bakomantere. Khala mubalegesa tangua nu aphangi aye a mala nu a akhetu. Ukambigo nga hazonda ha gudikhalela hakhaye.​—Ish. 18:1.

16. Matangi atshi tuajiya gukhala nawo gula malamba atubuila? Luholo lutshi tuajiya guakatula? (2 Kolinto 10:4, 5)

¹⁶ Tshita yagasue ha gukatula badute. Gula malamba agubuila, wajiya gusendesa guditangijila nga gutangijila Yehowa ndaga jishigo jia giamatshidia. Na itshi yajiya gugukuatesa ha gukatula matangi abola a luholo elu? (Tanga 2 Kolinto 10:4, 5.) Gutanga Biblia nu mikanda yana gutuhana ulondegi wa Nzambi guajiya gugukuatesa ha gusombegesa luholo wana guditadila nu wana tadila Yehowa. Ha gufezegesa, udi gudihula gula Yehowa yowu mulandula gugutshigina ba? Gula idi ngenyi, longuga lumene lua mupostolo Phaula. Watagenele nu malamba avula mu mudimo wenji wa gulongesa; uvi ha fundo dia gumulebesa muila, malamba ene amukuatesele diago ha gutshigina egi Yehowa nu Yesu akhalele gumuzumba. (2 Kol. 11:23-27) Udi gudihula gula Yehowa wagutotesele gale gubola guaye ba? Gula idi ngenyi, tshita liste ya verse jia Biblia jiana monesa egi Yehowa wana gututotesela gubola guetu. (Yesh. 43:25) Gungima tanga verse jiene, zula nji tangua dia gujitangigiza. (Ngi. 119:97) Ndaga imoshi ya lamba yagubuila nga ndo yabuila muthu wana zumba nu yagutuma ha gudihula gula Yehowa wana bamba diago akombeledi enji ba? Gula idi ngenyi, kamba malongo mu mikanda yetu ana zuelela gishina Nzambi wana bemba egi tumone malamba nu luholo luana gutukuatesa muene ha gukhala nu ufuta wakola n’enji. (Ngi. 91:9-12) Tanga nji mene jia aphangi akolesele mu malamba nu gusuanguluga guagasue.a

17. Itshi tudi naye gukalagala gula malamba atubuila?

¹⁷ Gula mangino ushigo nga nu lamba dimoshi diakola mu monyo waye, hana Yehowa mersi, mutumbuise nji mukunda nu ndaga jiagasue jiabonga jiana gugukalegela muene. (Mulo. 7:14) Uvi gula malamba akola agubuila, tshita yagasue ha guatadila mu luholo luabonga nu ha gukolesa gutshigina guaye gudi Yehowa. Gula wakalagala ngenyi, Yehowa ‘mbawugukuatesa hagula wajiya gukolesela.’ (1 Kol. 10:13) Na itshi tuajiya guzuela mukunda nu aphangi’etu a mala nu a akhetu adi mutagana nu malamba? Luholo lutshi tuajiya guakuatesa? Mbatuzuelela ndaga yene mu longo dialandula.