29 JUIN–5 JUILLET 2026
LUNGIMBO 131 “Nzambi Waabungisa Hamoshi”
Landula Gukolesa Ufuta Waye nu Mulumi’aye nga Mukaji’aye
“Gudi nu mafuta ana gudizumba muavula gubalega aphangi.”—ISH. 18:24.
MU GUHIHIA
Hagula egi yala nu mukaji’enji akhale nu gusuanguluga mu ulo wawo, adi naye guzumba Yehowa nu gukhala mafuta akola.
1. Mukunda natshi mafuta abonga akhala kado gana gutuhana Yehowa?
MAFUTA abonga akhala kado gana gutuhana Yehowa. (Yak. 1:17) Ana zumba Nzambi, ana gutuzumba nji. Ana khala nu gusuanguluga gula tudi nu gusuanguluga, ana gutukuatesa gula tudi nu malamba, ana gutuhana nji malongo abonga gula tudi nawo funu. Ana khala hene mukunda nu esue tangua diagasue, tuajiya diago guashila mutshima. Mafuta a luholo elu ana “suanguluisa mutshima”!—Ish. 27:9.
2. Mukunda natshi yala nu mukaji’enji adi naye gulandula gukolesa ufuta wawo? (Matayo 19:6)
2 Yala nu mukaji’enji adi naye gukhala nu ufuta wabonga diago. Ashigo naye gubuita mutshima egi adi naye gulandula gutshita ngolo ha gukolesa ufuta wawo. Gula ashigo mutshita ngolo ha gukolesa ufuta wawo, muthu wagasue mukatshi diawo wajiya gusendesa gudivua hakhenji, guvua gisegedia nga gulaba guvua khabu. Uvi gula alandula gutshita ngolo, mbaakhala nu ufuta wakola gubalega mafuta awo agasue. (Tanga Matayo 19:6.) Mu longo edi, tuza mumona luholo athu adizudile gale mu ulo ajiya gulandula gukolesa ufuta wawo. Uvi thomo, tutadilenu gale luholo Aklisto adi undumbu ajiya gutomba muthu wabonga wagudizula n’enji mu ulo munu mbawukhala futa diabonga.
LUHOLO WAJIYA GUTOMBA MUTHU MBAWULANDULA GUKHALA FUTA DIAYE
3-4. Itshi yajiya gukuatesa muthu ha guheta yala nga mukhetu wabonga? (Ishima 18:22)
3 Gutuama dia guzula desizio diakoma, tuana zula tangua dia gutangiza malamba tuajiya gutagana nawo nu gubonga mbatuheta. Ndaga yagasue tudi mutshigina gutshita, yajiya gusombegesa monyo wetu mu luholo luabonga nga luabola. Hene, tudi naye gutangigiza muabonga gutuama dia guzula badesizio.
4 Gutomba muthu mbawukhala futa diaye tangua diagasue, yakotelesa egi muthu udi mutshigina gudizula n’enji mu ulo, gudi desizio dia ndando wajiya guzula mu monyo waye. Yehowa walondele ulo, muene nji udi watagana ha guguhana malongo gula udi mukamba muthu wagudizula n’enji mu ulo. Wana tshigina egi yala ahete mukhetu wabonga, mukhetu nji ahete yala wabonga. Muene nji wana jiya ndaga idi yabonga mukunda nu esue. (Tanga Ishima 18:22; Yesh. 48:17, 18) Malongo adi mu Mbimbi yenji ajiya gukuatesa Muklisto ha gutomba yala nga mukhetu wabonga mukunda nu muene.
5. Mukunda natshi idi nu ndando ha gudizula mu ulo nu Muklisto wabatijiwe gale?
5 Tangua tuana batijiwa, tuana gubua mafuta a Nzambi. (Ngi. 25:14) Hene, gula udi mutshigina gudizula mu ulo, udi naye gutomba muthu mukatshi dia mafuta a Yehowa. (1 Kol. 7:39) Gula watshita ngenyi, mbawumonesa egi wana zula mikhuala ya Yehowa nu ndando nu mbawukhala muzula mulumi’aye nga mukaji’aye gifua kado ga ndando gaguhanele muene. (Ish. 19:14) Mbawushigo nji mutagana nu malamba ana buila athu ana gudizula mu ulo nu “athu ashigo alandudi a Yesu.” (2 Kol. 6:14) Ikhale udi mutangiza egi mukatshi dia Matemue a Yehowa gushigo nu muthu wajiya gudizula n’enji mu ulo, uzudigo desizio diabola dia gudizula mu ulo nu muthu gashigo Temue wa Yehowa. Utangizago nji egi gula wadizula n’enji mu ulo, mbawumubuisa Temue wa Yehowa.
6-7. Mihu itshi wajiya gudihula tangua mudi guditadila nu muthu ha gudizula n’enji mu ulo?
6 Ishigo Muklisto wagasue wabatijiwe gale wajiya gukhala yala nga mukhetu wabonga mukunda nu aye. Gula udi mutshigina gudizula mu ulo nu muthu, dihule egi:a ‘Luholo lutshi muthu muene wana kalegela enya fami yenji ndaga? Wana gudisagesa mukunda nu athu ako ba? Wana guanemesa nji ba? Mafuta enji adi athu a luholo lutshi? Itshi yana tshita muene gula udi nu mulonga nu muthu muko? Gula gushigo nu verse ya Biblia idi muzuelela ndaga imoshi ngenyi, wana khala jigi-jigi mu matangi enji nga ndo wana tegelela nji matangi a athu ako? Luholo lutshi luana tadila muene makuta?’
7 Wajiya nji gudihula mihu iko gifua: ‘Muthu ngudi mutshigina gudizula n’enji mu ulo wana zumba diago Yehowa ba? Wana landula gusudiga “umuthu uhe-uhe” ba? Mbawungukuatesa ha gulandula gukombelela Yehowa nu gujinginyina guagasue ba? Mafelela etu a mu nyuma adi luholo lumoshi ba? Ame nu muene mbatukhala diago mafuta akola ba?’ (Kol. 3:9, 10) Gula udi phangi wa mukhetu, yala udi mutshigina gudizula n’enji mu ulo mbawukhala futa diabonga mukunda nu aye ba? Mbawukhala nji fumu wa fami wabonga ba? (1 Kol. 11:3) Gula udi phangi wa yala, mukhetu udi mutshigina guzula mu ulo mbawukhala hehi ha gunemesa ufumu waye mu fami ikhale matangua ako udi mujimbila ba? Idi yadiago egi yajiya guguzula tangua diavula ha gutangiza gutuama dia guhana mvutu gu mihu eyi. Hene, kamba gujiya muthu udi mutshigina gudizula n’enji mu ulo muabonga gutuama dia ulo wenu.
8-9. Itshi yajiya gukuatesa muthu udi mutshigina gudizula mu ulo ha guzula desizio diabonga? (Tala nji gifuanesa.)
8 Tangua mudi guditadila ha gujiya gula muajiya gudizula mu ulo, udi naye gukamba gujiya muthu muene muabonga. Gutshita ngenyi guajiya gugukuatesa ha guzula desizio diabonga. Hene, kamba gujiya luholo athu ako ana gumutadila. Wajiya gukamba gujiya ndaga athu ako ana zuela mukunda nu muene nga makalegelo enji. Ha gufezegesa, kamba gujiya gula muthu muene wakhala nu khadilo dia gudibulumuisa, wakhala nu gisemo nu ganago gukhala ndaga jiakola-kola. Phangi Sarah wa gu Guyane française wadizudile mu ulo nu phangi Daniel. Udi muzuela egi: “Tangua ngakhalele mutshigina gujiya mulumi’ami muabonga, ngahudile phangi akhalele n’enji inzo imoshi, ngahudile nji akulu a mu hungu diawo, mafuta etu akhalele gutujiya muabonga mukuta nu aphangi ako a akhetu a mu hungu diene.” Udi naye guhula muthu udi mutshigina gudizula n’enji mu ulo nu gisemo giagasue gula gudi nu ndaga yamubuidile mu masugu abalega nga ndaga idi mutagana nawo muene mangino inyi udi naye gujiya. Handaga gudi nu ndaga jiko jiajiya gumibatela malamba mu ulo mu masugu adi muza.
9 Gula udi nu badute mukunda nu ndaga imoshi, utshitshigo gifua gushigo nu mulonga. Gula aphangi ako a gukula mu nyuma aguwambela nga khadilo dimoshi diabola dia muthu muene, tshigina matangi awo, walelulago. Gula watshita ndaga eji jiagasue, mbayigukuatesa ha gujiya gula wajiya gudizula nu muthu muene mu ulo nga ndo.b Henyaha tuzuelelenu giwa athu anyi adizudile gale mu ulo.
Tangua mudi guditadila ha gujiya gula muajiya gudizula mu ulo, kamba gujiya muthu muene muabonga (Tala paragrafe 8-9)
KHALENU MUBALEGESA TANGUA HAMOSHI HA GUKOLESA UFUTA WENU
10. Mukunda natshi yala nu mukaji’enji adi naye gubalegesa tangua hamoshi?
10 Yala nu mukaji’enji ajiya gukolesa ufuta wawo nu ulo wawo gula adi mubalegesa tangua hamoshi ikhale adi nu ndaga jiavula jia gukalagala. Gutshita ngenyi guana guahana luendu lua gudiwambela ndaga atagana najio mu lusugu, ha guzuelela matangi awo nu luholo adi gudivua, ha gudimonesela guzumba nu ha gubalegesa tangua diabonga hamoshi.
11. Itshi yajiya gutshita egi yala nu mukaji’enji akhadigo luko nu ufuta wakola?
11 Yala nu mukaji’enji ana khala nu ufuta wakola, ana tshigina gubalegesa tangua hamoshi ha fundo dia gudikalegela ndaga owu gu khanda yenji, muko gu khanda yenji. Idi yadiago egi, ajiyilego gukhala hamoshi tangua diagasue. Uvi gula adi mubalegesa tangua diavula gualeha, yajiya guabatela malamba mu ulo wawo. Ha gufezegesa, athu ako atshiginyile gale midimo mu ifutshi iko, ndaga yene yana tshita egi akhale gualeha nu enya fami yawo masugu avula. Ajiya gawo guheta makuta avula gu midimo yene, uvi gula yala nu mukaji’enji ashigo mubalegesa tangua diavula hamoshi, yajiya gukhala gingonza mukunda nu ulo wawo.
12-13. a) Ndaga jitshi aphangi ako adizudile gale mu ulo akalegele ha gukhala mubalegesa tangua hamoshi? (Tala nji gifuanesa.) b) Mukunda natshi ulo waye udi naye gukhala nu ndando yavula mu monyo waye? (Tala galuanda “Fundo dia Mulumi’aye nga Mukaji’aye mu Monyo Waye.”)
12 Tala ndaga yana tshita aphangi ako adizudile gale mu ulo ha gukhala mubalegesa tangua hamoshi muavula. Phangi Leah wa gu Guam udi muzuela egi: “Ame nu mulumi’ami tuana tshita ndaga jiavula hamoshi. Tuana tshita nji yagasue ha gutuna gudiyila gu mawano nga gu ndaga jiko muthu nu muthu gu khanda yenji.” Phangi Roxanne wa gu États-Unis udi muzuela egi: “Luholo tuana khala nu ndaga jiavula jia gukalagala, tuamonele egi tudi naye gulonda programe ya gubalegesa tangua hamoshi gifua luholo tuana londa programe mukunda nu ndaga jiko jia ndando tuana kalagala.” (Fuanesa nu Amosa 3:3.) Phangi Damien wa gu France udi nji muzuela egi: “Tuakalegele yagasue ha gujidila nu gusuanguluga nu ndaga muthu wagasue mukatshi dietu wana tshigina gutshita.” (Mat. 7:12) Phangi Katie wa gu États-Unis udi nji muzuela egi: “Matangua ako tuana kanga telefone jietu hagula jituwunganesago matangi nu hagula tuajiya gubalegesa tangua diabonga hamoshi.”
13 Ndaga yabalega ndando muajiya gutshita ha gubalegesa tangua idi gutshita ndaga jia mu nyuma. Phangi Myriam wa gu France udi muzuela egi: “Tuana sendesa lusugu luagasue nu lutango lua Biblia, tudiwambela ndaga tuasuanguluga najio nu luholo tuajiya gujikalegela mu monyo wetu. Ngana suanguluga muavula nu matangua a luholo elu.” Udi muzuela luko egi: “Ngana suanguluga nji tangua tuana kombelela hamoshi. Ngana tshigina guvua isambu ya mulumi’ami handaga yana monesa guzumba guenji gudi Yehowa.” Phangi Katie tuazuelela gu thunda udi muzuela egi: “Tuana suanguluga muavula gubalegesa tangua hamoshi mu mudimo wa gulongesa. Tuana suanguluga guvua luholo muthu wagasue mukatshi dietu wana zuelela gutshigina guenji, yana gutukuatesa nji ha guzula malongo gudi muthu wagasue mukatshi dietu.”—Ish. 27:17.
Khalenu mubalegesa tangua hamoshi ha gukolesa ufuta wenu nu ulo wenu (Tala paragrafe 12-13)
SALENU BOBOBO IKHALE MUATAGANA NU MALAMBA
14-15. Mukunda natshi yala nu mukaji’enji adi naye gulondega milonga mu ulo wawo? Hana gifezegeselo.
14 Yala nu mukaji’enji mbaatagana nu malamba mu ulo wawo handaga ashigo athu atagana. Biblia yana monesa haphelo egi athu adi gudizula mu ulo “mbaatagana nu malamba.” (1 Kol. 7:28) Note d’étude ya verse yene mu Biblia ya français yana zuela egi “malamba” ene adi ‘mumonesa milonga nga ndaga jiana buila athu adizudile gale mu ulo.’ Gula milonga yene yazoga mu ulo wawo, mukunda natshi yala nu mukaji’enji adi naye gusala bobobo nu gutshita yagasue ha guyilondega?
15 Tutadilenu gifezegeselo gimoshi. Gula inzo imoshi ya ndando nu yajiyiwa muavula yabola, enya nayo ajiya guzula desizio dia guyilondega luko. Ajiya guzola makuta avula nu ima iko yavula ha guyilondega; midimo yene yajiya nji guzula ivo yavula ha guhua. Mukunda natshi athu ene mbaatshita depanse jiene jiavula-vula? Handaga inzo yene yakhala nu ndando yavula mukunda nu ene. Ulo nji wakhala nu ndando yavula. Nu muene yala nu mukaji’enji anyi ana gudizumba diago, mbaatagana nu malamba mu ulo wawo. Uvi gifua luholo inzo yabodi yajiya gulondegewa luko, yala nu mukaji’enji adi mutagana nu milonga mu ulo wawo ajiya luko guvutugila ufuta wawo. Gulondega milonga yene guajiya guzula tangua nu ngolo jiavula, uvi Yehowa mbawukhala nu gusuanguluga gula yala nu mukaji’enji atshita yagasue ha gukolesa ulo wawo nu ha gusala bobobo. (Mal. 2:16) Gula atshita ngenyi, mbaamonesa egi ana gudizumba nu gudinemesa nu ana nemesa nji Yehowa yago wafugile ulo.
16. Ha gutadila 1 Kolinto 13:4-8a, itshi yajiya gukuatesa yala nu mukaji’enji adi mutagana nu malamba mu ulo wawo? (Tala gifuanesa; tala nji galuanda “Ikadigilo Yajiya Gumikuatesa ha Gukolesa Ufuta Wenu.”)
16 Gula milonga yazoga mu ulo waye, utangizago muphushi egi mudi naye gudikhapha. (1 Kol. 7:10, 11) Uvi dihule egi: ‘Gudi nu ndaga ngajiya gutshita ha gukolesa ufuta wami nu mulumi’ami nga mukaji’ami ba?’ Zula tangua dia gutadila ndaga jiana zuela Biblia jiatadila gudimonesela guzumba, gungima kamba gujiya luholo wajiya gumonesa guzumba guene mu maluholo adi muzuelela mu 1 Kolinto 13:4-8a. (Tanga.) Ha fundo dia gukamba luholo lua gudikhapha, kambenu luholo muajiya gukolesa luko guzumba guenu. Kambenu gujiya ndaga muajiya gukalagala ha guvutugila luko ufuta wenu. Togenu Yehowa ha gumituameza. Kambenu nji ukuateshi mu mikanda yetu nu video jietu nu gudi akulu nu Aklisto a gukula mu nyuma. Biblia yana fuanesa ulo nu lungonji lualondewe nu shinga thathu. Hene, gula muashila Yehowa mutshima yago udi shinga ya thathu nu yabalega ndando mu ulo wenu, ulo wenu ‘mbawubatugago muphushi.’—Mulo. 4:12.
Khalenu bobobo ikhale muatagana nu malamba mu ulo wenu (Tala paragrafe 16)
17. Itshi yajiya gukuatesa athu adi mutshigina gudizula mu ulo nu athu adizudile gale mu ulo ha gukhala nu gusuanguluga?
17 Yehowa wana tshigina egi akombeledi enji agasue anyi adi undumbu nu anyi adizudile gale mu ulo akhale nu gusuanguluga. Gula udi ndumbu nu udi mukamba muthu wagudizula n’enji mu ulo, tomba muthu wabonga munu mbawukhala futa diaye nu gutema guagasue. Gula wadizudile gale mu ulo, landula gukolesa ufuta waye nu mulumi’aye nga mukaji’aye. Tshitenu yagasue ha gulondega milonga yajiya guzoga mu ulo wenu, togenu nji Yehowa ha gumikuatesa. Gula muakalagala ndaga eji jiagasue, mbamukhala nu gusuanguluga ‘mu masugu agasue a monyo wenu’ hamoshi!—Mulo. 9:9.
LUNGIMBO 132 Désormais, nous ne faisons qu’un
a Mihu eyi idi mutadila nu mala nu akhetu.
b Ha gujiya ndaga jiavula jiatadila luholo lua gudijiya muabonga, tala longo “Ndaga Jiajiya Gumikuatesa ha Gubinga Tangua Mudi mu Sungi ya Guditala ha Gujiya Gula Muajiya Gudizula mu Ulo” mu Inzo Yaleha ya Mutaledi ya Mai 2024, ha gamuto ga lumene “Kamba Gujiya Muabonga Muthu udi Mutshigina Gudizula N’enji mu Ulo.”