Yehowa Wana Gungulongesa Sendese Ulenge Wami

Uvi gutuama dia gumanesa lumene luene, maganenu ngumitele gale luholo ndaga jiagasue jiasendesele. Ngavualewe mu dimbo dia Calgary gu Canada mu sungi ya Ita ya Mbadi ya ha Mavu Agasue. Lusugu lumoshi, muvuala mumoshi wa yala mu jina dia Donald Fraser wajile mukokola gumbo dietu, mama watshiginyile gulonguga n’enji Biblia. Ndaga yene yakalegewe ivo hehi nu 75 yabalega gale. Mama wasuangulugile muavula nu giamatshidia, uvi luholo luakhalele muene mukata mangololo, gakhalelego nu luholo lua guya muavula mu gudibungisa gua mu hungu. Ikhale ngenyi, walanduile gulonguga Biblia, gungima mu 1950, wabatijiwe. Uvi ndaga ya gikenene idi egi gungima dia ivo mbadi, mama wafuile genji. Tata gakhalelego Temue wa Yehowa mu tangua diene, uvi watshiginyile egi phangi mumoshi atshite diskur gu masaga a mama.

Masugu azonda gungima dia gufundjiwa gua mama, phangi mumoshi wa mukhetu wambiwe maji mu nyuma wangutamegele ha guya mu gudibungisa, jina dienji diakhalele Alice. Phangi muene wakhalele gungujiya handaga ngakhalele muya mu gudibungisa gua mu hungu gua mu suga ya phoso nu mama hakhalele muene muvua ndambu muabonga. Ngatogele tata gula ngajiya guya. Tata watshiginyile, wazuelele egi mbawuya gungutuala phamba mu “mbala yene” ha guhana phangi wakalegele diskur gu masaga a mama mersi. Gudibungisa guakhalele mukalegewa mu ngueze yene guakhalele École du ministère théocratique nu réunion de service. Tata wasuangulugile muavula nu gudibungisa guene handaga muene nji wazudile formasio gu khalasa yatadila guzuela muabonga ha meso a athu, hene wasuangulugile nu luholo aphangi akhalele mutshita badiskur. Gungima dienji tata wazudile desizio dia gukhala muya mu gudibungisa guene phoso nu phoso. Gungima dia masugu, wasendesele nji guya mu gudibungisa guko.

Mu tangua diene, phangi wakhalele mutuameza École du ministère théocratique wakhalele gula udi mutshigina gusendesa gudibungisa guene, wakhalele mutamega majina a aphangi agasue asonegesele majina gu khalasa diene. Muthu wagasue wakhalele mutaya egi: “Ame owu.” Lusugu lumoshi, ngatogele phangi muene egi mu gudibungisa gua mu phoso idi mulandula, ajiya nji gutanga jina diami. Phangi muene wangushimanele muavula, uvi ganguhudilego gula ngakhalele diago mukotelesa ndaga ngakhalele gumutoga.

Ngakhalele gami mutshigina egi atange jina diami mu gudibungisa, uvi ngakhalelego mujiya egi ngasonegesele jina ha gusendesa gutshita badiskur gu khalasa diene. Mu phoso yalanduile, atamegele jina diami, ngatayele nu gikhesa giagasue egi: “Ame owu.” Gungima dia gudibungisa, aphangi angushimanele muavula diago. Gungima dia phoso jiavula, anguhanele diskur ngazuelela mu gisendeselo.

Ngavuile woma wavula! Mu tangua diene, akhalele mutoga aphangi akhalele nu badevuare ha gutshita badiskur a minuta 6 nga 8. Badevuare gifua lutango lua Biblia akhalelego mu tangua diene. Tata wangukuatesele ha gulondega diskur diami, tuatshitshile n’enji répétition ya diskur diene iphungu 20 gutuama egi nguditshite mu gudibungisa. Gungima dia diskur diene, phangi wakhalele mutuameza wanguhanele malongo abonga diago. Mu ivo yagasue yabalega, Yehowa wanguhanele formasio mu njila ya tata, ya aphangi a mala nu a akhetu a gukula mu nyuma nu mu njila ya ulondegi wenji.

YEHOWA WALANDUILE GUNGUHANA FORMASIO

Phangi Alice ngazuelela gu thunda wangukuatesele muavula mu mudimo wa gulongesa tangua ngasendesele gulongesa. Mu tangua diene, akhalele gutuwambela ha gutangela muthu tuasangi gumbo dienji verse thathu, gungima tumuhanyi giwa mukanda. Gula tuaheta ha mufulo ngakhalele naye gulongesa, phangi Alice wakhalele musendesa maga, wakhalele mumenega muthu muene, gungima anguwambela ha gumutangela verse ya thomo. Gungima dienji, ame ngakhalele mulandula guta maga nu muthu muene, ngumutangela verse ya mbadi nu ya thathu, gungima ngumuhanyi mukanda. Gungima dia masugu, ngajiyile luholo lua gusendesa guta maga nu athu hakhami. Gungima dienji, tata walanduile gungukuatesa mu mudimo wa gulongesa gungima dia gubatijiwa guenji mu 1954. Tata wasalele gungusasa hakhenji, watshitshile yagasue ha gungulongesa giamatshidia. Guya mu gudibungisa nu mu mudimo wa gulongesa guakhalele nu ndando yavula mu monyo wenji. Ngakhalele mujiya ndaga tuakhalele naye gutshita mu ngueze ya lusugu lua guya mu gudibungisa nu jinyi tuakhalele naye gutshita mu gimenegena gia lusugu luagasue lua samano nga lua lubingo.

Ndaga ngalongugile mu ivo 12 ngabalegesele mu khalasa jiana gungukuatesa muavula mu monyo wami. Ha gufezegesa, ngalongugile ndaga jiavula jia mathématique nu jia grammaire ya zuelelo dia anglais. Malongo a zuelelo dia anglais ngazudile nu malongo a gujiya luholo lua gusonega mene ana gungukuatesa muavula mu mudimo ngana tshita gu service de la rédaction.

Matangua avula, athu ana gunguhula gishina ngana tshiginyila miziki muavula. Ndaga ya giamatshidia idi egi mvuaji jiami jiakhalele musuanguluga nu miziki muavula. Tangua ngakhalele nu ivo 7, ngasendesele gulonguga gushiga piano; uvi mulongeshi wami gakhalelego musuanguluga nu luholo ngakhalele mushiga. Wawambelele tata egi ngudi naye gubemba gulonguga piano. Ngajiya diago gukotelesa gishina giawambelele muene tata ngenyi handaga mu tangua diene ngakhalelego diago gudihana ha gulonguga.

Gungima dia mbeji jiazonda, tata wangukambele mulongeshi muko. Ngalogugile luholo lua gushiga piano nu guyimba muabonga, ndaga jiakhalele nji muyila muabonga. Ngakhalele nu dijui diabonga diago diana tamegewa egi soprano, ngabingile nji compétition jiavula. Tangua ngakhalele mulonguga miziki, felela diami diakhalele dia gubua mulongeshi wa miziki nu guheta makuta ajiya gungukuatesa mu mudimo wa tangua diagasue. Uvi tangua ngahetele hehi nu guzula diplome, ngakotelesele egi hagula egi ngutshite éxamen, ngakhalele naye gubalegesa tangua diavula ha gukamba gujiya luholo miziki yasendesele, luholo lua guyisonega nu ndaga jiko. Hene, ngabembele gami gulonguga muziki, ngabuile muvundji wa njila wa tangua diagasue. Yakhalele mu 1963.

NGAHETELE GUSUANGULUGA GUAVULA MU MUDIMO WA TANGUA DIAGASUE

Gungima dia gutshita mudimo wa muvundji wa njila givo gimoshi, angutumile gifua pionye spesiale gu Kapuskasing mu provense ya Ontario. Ngakhalele mukalagala mudimo wene hamoshi nu phangi Daniel Skinner, wakhalele mbuta wami gualeha. Wangulongesele ndaga jiavula jiatadila luholo ndaga jiana kalegewa mu hungu. Tangua ngabuile nu ivo 20, angutombele ha gusendesa gutshita mudimo gu comité de service ya mu hungu dietu; ngakhalele diago nu ndaga jiavula jia gulonguga. Ngudi nu gusuanguluga ha gumona luholo ulondegi wetu udi gudihana luko ha guhana mavuala formasio. Gula mavuala ene adihana diago, ajiya guheta inemo yavula mu mudimo wa Yehowa!

Matangua ako yakhalele lamba ha gujinga gu Kapuskasing. Mu sungi ya guhuma, matangua ako guma guakhalele diago muhuma (guakhalele muheta uu nu mu -44°C), uvi matangua ako nji gamuanya gakhalele muzoga gazonda diago (température yakhalele muheta uu nu mu -33°C). Ame nu phangi Dan tualongesele mu mafundo avula diago. Ngahetele gusuanguluga guavula mu mudimo wami mu dimbo diene; guene nji ngatagenele nu phangi wa mukhetu Linda Cole, munu wajile mubua gungima phangi Linda Splane.

Linda wakhalele mulongesa nu gikhesa giagasue, wakhalele nji nu athu avula a guvutugila. Wakhadile nu khadilo dia guhana nu mutshima wabonga, wakhalele nji muzumba gubalegesa tangua nu athu ako. Mama wawo Goldie wakhalele muzumba Yehowa muavula. Uvi tata wawo Allen gakhalelego musuanguluga nu Matemue a Yehowa. Ikhale ngenyi, mama wawo wakhalele mubata Linda nu aphangi’enji a mala John nu Gordon mu gudibungisa nu mu mudimo wa gulongesa. Gungima dienji, mukut’awo agasue nguana abuile avundji a njila. Gungima dia ivo, tata wawo nji wabuile Temue wa Yehowa nu wakhalele gudihana muavula mu midimo ya mu hungu.

Mu 1965, angutamegele ha guya mungina gu École du ministère du Royaume gu Betele ya gu Canada; formasio yene yakhalele ya mbeji imoshi. Tangua ngakhalele gu khalasa diene, angutogele ha guzalesa formilere ha gungina gu Khalasa dia Gileade. Ngakhalelego diago nu nzala ya gubua misionere, ngakhalelego nji mutangiza egi ngudi ngatagana ha gungina mu khalasa diene; ikhale ngenyi ngazalesele formilere yene. Angutamegele gu Khalasa dia 42 dia Gileade. Gu khalasa diene, alongeshi etu akhalele gutuhana ba résultat a luholo tuakhalele gudihana tangua diagasue. Mu résultat ya thomo ngahetele, anguwambelele ha gulonguga ndaga jiavula jiatadila ulondegi wetu tangua ngakhalele gu khalasa diene. Ngakhalele nu ivo 21 mu tangua diene, longo diene diakhalele diatagana diago mukunda nu ame.

Mukatshi dia ndaga atulongesele gu Gileade, atulongesele nji luholo lua gutshita mudimo nu baradio, televizio nu ba journaliste. Ngasuangulugile muavula nu malongo ene. Uvi ngakhalelego mujiya egi malongo ene mbaangukuatesa diago mu masugu adi muza gifua luholo nguza gumitela nayo.

MUDIMO WA GIMISIONERE GU SÉNÉGAL

Masugu azonda gungima dia guzula badiplome, ame nu phangi Michael Höhle tuayile mu gifutshi gia Sénégal gu Afrique; guene tuakhalele naye gukalagala mudimo wetu wa gimisionere. Mu tangua diene, alongeshi a lukuma luabonga akhalele phamba 100 mu gifutshi giene.

Gungima dia mbeji jiavula mu mudimo wa gimisionere, angutamegele ha gusendesa gutshita mudimo gu Betele lusugu lumoshi mu phoso. “Betele” yakhalelego inzo yakoma, yakhalele phamba sugu imoshi mu inzo ya bamisionere. Ikhale Betele yene yakhalelego diago yakoma, uvi phangi Emmanuel Paterakis munu wakhalele mutuameji wa Betele yene, wakhalele gunguwunguluisa tangua diagasue egi Betele yakhalele mumonesa ulondegi wa Yehowa mu gifutshi giene. Lusugu lumoshi, phangi Paterakis wazuelele egi tudi naye gusonegele bamisionere mukanda ha guahana gikhesa. Mu tangua diene, guzola mikanda yavula mbala imoshi guakhalele lamba, guakhalele nji mutoga makuta avula, hene tuasonegele mikanda yene umoshi-umoshi nu machine à écrire. Yakhalele diago mudimo wakola handaga tuakhalelego naye gunginyisa nga fote imoshi!

Tangua ngakhalele mutshigina guvutuga gumbo diami mu ngueze ya lusugu luene, phangi Paterakis wanguhanele enveloppe imoshi. Wanguwambelele egi: “David, ulondegi wagusonegela mukanda.” Tangua ngajile mukangula enveloppe yene, ngamonele mukanda umoshi mukatshi dia mikanda ngasonegele! Ndaga yene yangulongesele egi ngudi naye gunemesa ulondegi wetu ikhale Betele ya mu gifutshi ngudi idi yazonda nga yakoma.

Ngakuatele ufuta nu aphangi avula mu hungu dietu, matangua avula ngakhalele mubalegesa nawo tangua mu ngueze ya lusugu lua samano. Tuakhalele diago mubalegesa matangua abonga! Ngana landula guta nawo maga uu nu mangino. Ngalongugile nji zuelelo dia français mu tangua diene; zuelelo diene diana gungukuatesa tangua ngana guya mutala Betele jia mafundo avula a ha mavu.

Mu 1968, ame nu Linda tuabuile ba fiancé. Ngabalegesele mbeji jiavula nu gukamba mudimo wa tangua diazonda unu wakhalele naye gutukuatesa nu Linda ha gulandula gukalagala mudimo wa tangua diagasue gu Sénégal, uvi mafumu a leta a mu gifutshi giene ahanele mukhuala egi ashigo naye guhana enya ifutshi iko midimo. Hene, ngavutugile gu Canada, tuadizudile mu ulo; atutogele ha gubua bapionye spesiale gu Edmundston mu gadimbo ga Nouveau-Brunswick gu mididilo ya provense ya Québec.

MUDIMO WA TANGUA DIAGASUE GU NOUVEAU-BRUNSWICK NU GU QUÉBEC

Guakhalelego nu alongeshi a lukuma luabonga mu dimbo diene, guakhalele phamba nu athu azonda akhalele mulonguga Biblia. Athu avula a gu khanda yene akhalele enya Katolike, akhalele nji gudihana muavula mu ndaga jia gikombelelo giene. Gu jinzo jiavula guakhalele guagusonega egi: “Matemue a Yehowa haha ndo.” Mu tangua diene, tuakhalelego diago gudisagesa mukunda nu isona ya luholo lunu, tuakhalele muya gulongesa gu jinzo jiagasue jikhale jiagusonega nga ndo. Phoso yagasue, église imoshi ya Katolike yakhalele musonega mu bazulunalu a mu dimbo diene egi: “Tuyenu mukamba Matemue a Yehowa, tuakaye.” Guakhalele phamba nu Matemue a Yehowa nguana mu dimbo diene, ame nu Linda nu phangi Victor Norberg nu mukaji’enji Velda; hene ngakhalele diago mujiya athu akhalele mukamba!

Uu nu mangino, ngana wunguluga mbala ya thomo yajile gututala mutadi muwendji mu dimbo diene. Gungima dia gubalegesa n’enji phoso imoshi, watuwambelele egi: “Ndaga yabonga muajiya gukalagala mu dimbo edi idi gukuatesa athu ha gukatula matangi abola mukunda nu enue.” Yene ndaga tuakalegele, gungima ndaga jiasendesele nji guyila muabonga! Mage-mage, athu asendesele gumona gudisha guakhala mukatshi dia Matemue a Yehowa nu mafumu a enya Katolike; amonele egi Matemue a Yehowa akhala nu khadilo dia gudibulumuisa uvi mafumu a enya Katolike akhala diago nu lulendo. Mangino, mu dimbo diene muana khala gale nu hungu dietu dimoshi.

Gungima dia gubalegesa mbeji jiavula guene, atutamegele ha guya mukuatesa hungu dimoshi diakoma mu dimbo dia Québec. Aphangi a mu hungu diene akhalele diago nu khadilo dia guyamba, tuabalegesele nawo mbeji 6. Gungima atutamegele ha gutshita mudimo wa mutadi muwendji.

Tuakalegele mudimo wa mutadi muwendji ivo 14 mu provense ya Québec. Tuakhalele diago nu gusuanguluga! Athu avula diago a mu provense yene akhalele mutshigina lukuma luabonga. Mu mahungu avula tuakhalele muya nu gutala, tuakhalele musanga fami jiavula jiakhalele mulonguga Biblia hamoshi nu gukula mu nyuma ha gubatijiwa!

TUANA WUNGULUGA APHANGI AKHALA AGUJINGINYINA GUDI YEHOWA

Yana khala yaleba ha guzumba aphangi a gu Canada ana zuela zuelelo dia français. Aphangi ene akhala nu makalegelo abonga nu gusuangulaga nu gikhesa giavula. Uvi gulonguga giamatshidia guakhalelego ndaga yaleba mukunda nu ene; ako nji atagenele nu usageshi wakola mu fami jiawo. Mvuaji jia mavuala ako jiakhalele guawambela egi: “Gula walandula gulonguga Biblia nu Matemue a Yehowa, tudi gugukaya gumbo dietu!” Ikhale ngenyi, mavuala ako asalele agujinginyina gudi Yehowa. Yehowa wana khala diago nu gusuanguluga mukunda nu ene!

Ngajiyilego nji gujimbila avundji a njila a tangua diagasue nu bapionye spesiale akhalele gu Québec mu tangua tuakhalele guene. Avula mukatshi diawo akatugile mu membo ako a gu Canada. Akhalele naye gulonguga zuelelo dia français, akhalele naye nji gulongula luholo lua gutadila ndaga lua athu a mu dimbo diene nu ndaga jiko. Athu avula a mu dimbo diene akhalele gudihana muavula mu ndaga jia gikombelelo gia Katolike.

Matangua avula, akhalele mutuma bapionye spesiale mu mafundo a gualeha anyi akhalelego nu alongeshi a lukuma luabonga. Luholo athu a mu mafundo ene akhalelego musuanguluga nu Matemue a Yehowa, yakhalele lamba gudi aphangi ene ha guheta inzo nga mudimo wa tangua diazonda wa gutshita. Matangua avula, nu ene athu akatuga gudizula mu ulo akhalele mufutshila inzo imoshi nu aphangi ako 4, 6 nga 8 ha gumona luholo lua gufutshila inzo. Akhalele mutshita ngenyi handaga akhalelego nu makuta a gufutshila hakhawo. Aphangi ene akhalele gudihana muavula mu mudimo wa gulongesa. Gula asendesa gulonguga Biblia nu athu, akhalele mutshita yagasue ha gukuatesa athu ene. Mangino gu Québec guana khalago luko nu funu ya alongeshi a mu mafundo ako ha guza guakuatesa; hene, aphangi ene atumiwe mu mafundo ako adi nu funu yakola ya ukuateshi.

Tangua tuakhalele muya nu gutala mahungu, matangua avula tuakhalele mulongesa nu mavuala mu lusugu lua samano mu gimenegena. Gutshita ngenyi guakhalele gutukuatesa ha gujiya malamba akhalele mutagana nawo. Mangino, mavuala avula tualongesele nawo akhala nu inemo yavula mu ulondegi wetu, ako nji abuile gale bamisionere mu ifutshi iko.

Mu tangua diene, mahungu ako akhalelego nu luholo lua gutukuatesa nu ima ya gudia nga nu makuta a gufuta vuayaje, matangua ako tuakhalele gudisanga gu suga ya mbeji nga nu gima. Mu matangua a luholo elu, tuakhalele mushila Yehowa mutshima wetu wagasue handaga muene wakhalele mujiya ndaga jiagasue tuakhalele mutagana najio. Muene nji gatubembelego nga hazonda. Tuakhalele muheta luholo lua guya mutala mahungu ene agasue.

MALONGO NGAZUDILE GUDI APHANGI AKO

Gifua luholo ngayimonesa gu thunda, malongo atadila luholo luabonga lua guta maga nu athu ngalongugile gu Khalasa dia Gileade angukuatesele muavula. Mu tangua diene, tuahetele ba okazio avula a gulongesa lukuma luabonga gu baradio, gu televizio nu mu bazulunalu. Matangua avula, ngakhalele mutshita mudimo wene nu phangi Léonce Crépeault, muene nji wakhalele mutadi muwendji, wakhalele nji mujiya muabonga luholo lua gukalegela bametode ene. Tangua tuakhalele muya gudi ba journaliste, ha fundo dia guta nawo maga gifua ba journaliste n’ako, phangi Crépeault wakhalele guawambela egi: “Mala, ame nu futa diami tuakhala getu alongeshi a lukuma luabonga. Tushigo diago mujiya luholo luabonga lua guzuela gu radio nga gu televizio. Uvi ulondegi wetu watutumi haha ha gutamega athu avula ha guza gu asamble yakoma ya Matemue a Yehowa iza mukalegewa. Mbatusuanguluga muavula nu ndaga yagasue muajiya gutshita ha gutukuatesa.” Khadilo dia gudibulumuisa dia phangi Crépeault diatumile ba journaliste avula ha gutukuatesa.

Gungima, Betele yangutogele ha gukalagala mudimo nu phangi Glen How, wakhalele avocat wetu. Tuakhalele naye gutadila milonga yakola inyi gula tuatemelego ba journaliste akhalele naye nji guyizuelela. Ndaga ngalongugile gu Gileade nu malongo ngazudile gudi phangi Léonce yangukuatesele muavula. Ngasuangulugile nji muavula ha gutshita mudimo nu phangi How. Tangua diakhalele muene musopha milonga ya ulondegi wetu gutuama dia manzuji, gakhalelego muvua woma nga hazonda. Wakhalele muthu wa Nzambi diago, wakhalele nji muzumba Yehowa muavula.

Mu 1985, atutumile ha guya mutshita mudimo wa mutadi muwenji gu khanda ya mayilo a kumbi a gifutshi gia Canada. Inzo ya tata yakhalele nji gu khanda yene; hene, tuakhalele nu luholo lua gumukuatesa. Uvi mbeji thathu gungima dia guheta guetu, tata wafuile genji. Tualanduile gutshita mudimo wetu gu khanda yene ya Canada uu nu mu 1989 tangua tuahetele emvitasio ha guya gu Betele ya gu États-Unis. Tuakhalele naye gubemba mudimo wa mutadi muwendji tuakalegele ivo 19 ya mudidi. Mu ivo yene tuabalegesele mu mudimo wene, tuakhalele gu jinzo jiavula jia aphangi akhalele nu khadilo dia guyamba, tuadile nji ima yawo yavula. Tuana hana diago aphangi ene agasue mersi mukunda nu khadilo diawo dia guyamba nu dia guhana!

TUAYA GU ÉTATS-UNIS

Tangua tuahetele gu Betele yene gu Brooklyn, angutumile ha gutshita mudimo gu département pour le service. Ngana hana aphangi mersi mukunda nu formasio anguhanele guene. Mukatshi dia malongo ngazudile guene, longo dimoshi diakhalele egi ngushigo naye gutangiza egi ngudi mujiya ndaga imoshi gula khenji ngutadila galego ndaga jiagasue muabonga. Mu 1998, angutumile ha gutshita mudimo gu service de la rédaction, mudimo wene wana gungukuatesa ha gujiya luholo lua gusonega uu nu mangino. Ngahetele luendu lua gutshita mudimo nu phangi John Barr ivo yavula, ngakhalele gumukuatesa; muene wakhalele mutuameji wa Comité de rédaction. Wakhalele diago mulandula gifezegeselo gia Klisto. Ngana suanguluga muavula nu tangua ngabalegesele n’enji nu formasio yanguhanele muene.

Ngana khala nu gusuanguluga guavula ha gukalagala mudimo hamoshi nu aphangi a mala nu akhetu a gudibulumuisa a gu service de la rédaction. Aphangi ene ana toga Yehowa ha guakuatesa mu mudimo wawo nu ana jiya egi ndaga jiagasue ana tshita mu mudimo wa Yehowa ana gujikalagala mu ukuateshi wa nyuma yenji uvi ishigo mu ndunge jiawo nga gu ngolo jiawo hakhawo.

Ame nu Linda tuahetele gale luendu lua guya mu ifutshi 110 ha gutala aphangi a mala nu a akhetu agujinginyina gudi Yehowa. Tuamonele guzumba guana khalago bamisionere, aphangi a gu Komite jia Filiale nu aphangi ako adi mu mudimo wa tangua diagasue. Tuana khala nu gusuanguluga ha gumona luholo aphangi a mu ifutshi yene ana landula gukombelela Yehowa nu gikhesa nu gujinginyina guagasue ikhale adi mutagana nu ndaga jia lamba gifua ita, lamba dia makuta nu usageshi. Idi yadiago egi Yehowa wana guazumba muavula!

Mu ivo yagasue tuabalegesa gale hamoshi, Linda wana gungukuatesa muavula ha gutagenesa inemo yami. Linda wana zumba athu muavula, wana kamba tangua diagasue maluholo a guakuatesa. Wana jiya nji muabonga luholo lua gusendesa guta maga nu athu. Wakuatesele gale athu avula ha gujiya giamatshidia, wakuatesele gale nji aphangi ako anyi alebele mu nyuma ha guvutuga gudi Yehowa. Linda wakhala diago kado ga ndando ganguhanele Yehowa! Luholo tudi muya nu gukola, ame nu Linda tuana suanguluga muavula nu luholo aphangi a mala nu a akhetu adi mavuala anyi ana gutukuatesa tangua tuana guya mu vuayaje nu mu ndaga jiko; tuana guahana nji mvudi yavula.​—Mako 10:29, 30.

Ngana hana Yehowa mvudi yavula mukunda nu ivo yagasue 80 ya monyo wami. Ame nji ngana zuela gifua muazuelele muyimbi wa ngimbo egi: “Oo Nzambi, wangulongesele sendese ulenge wami, uu nu mangino ngudi mulandula guwambela athu midimo yaye ya gushimana.” (Ngi. 71:17) Ngudi mutshigina gulandula gutshita ngenyi masugu agasue a monyo wami.