Itshi Yajiya Gutukuatesa ha Gukhala nu Gusuanguluga Ikhale Athu adi nu Umbalagaji nu Esue?

1. Ndaga itshi Yesu wazuelele? Mukunda natshi tuajiya gudihula mukunda nu mbimbi jiene?

YESU wazuelele mu diskur diakalegele muene holu dia mulundu egi: “Khalenu nu gusuanguluga gula athu adi n’enu umbalagaji.” (Luka 6:22) Yajiya gukhala egi athu akhalele gumutegelela adihudile muavula mukunda nu mbimbi jiene. Handaga gushigo nga nu muthu wana tshigina egi athu akhale n’enji umbalagaji. Na mukunda natshi Yesu wazuelele ngenyi? Udi muhu wabonga diago tudi naye gudihula handaga mangino nji alandudi a Yesu ana tagana nu usageshi wavula. Tuza muzuelela mukunda natshi athu ana khala nu umbalagaji nu esue, tuza nji mumona ndaga jiajiya gutukuatesa ha gukhala nu gusuanguluga ikhale tudi mutagana nu usageshi.

MUKUNDA NATSHI ATHU ANA KHALA NU UMBALAGAJI NU ESUE?

2-3. Mukunda natshi Aklisto a giamatshidia ana sagesewa? Gujiya ndaga eyi guajiya gututuma ha gutadila athu ana gutusagesa luholo lutshi? (Yone 16:2, 3)

² Athu ana khala nu umbalagaji nu esue handaga tuana kombelela Yehowa. Yesu wazuelele mukunda nu athu akhalele naye gusagesa alandudi enji nga guashiya egi: “Ene […] ashigo mujiya Tata nu ashigo gungujiya ame.” (Tanga Yone 16:2, 3.) Nanyi wana tuma athu ha gusagesa akombeledi a Nzambi? Idi Satana. Muene wakhala “nzambi wa ha mavu awa.” (2 Kol. 4:3, 4) Wana buisa athu ifofo hagula ajiyigo giamatshidia giatadila Yehowa nu wana guatuma ha gusagesa athu ana jiya Nzambi nu ana gumuzumba. (Yone 8:42-44) Luholo lutshi gujiya ndaga eyi gudi naye gututuma ha gutadila athu ana gutusagesa? Gujiya egi Satana wana guahuiga mbagutukuatesa ha gutuna guabambela umbalagaji mu mutshima.

³ Tutadilenu lumene lua phangi Pavel.a Midimo yetu yatunyishiwe mu gifutshi giawo. Amukuatele, amubetele mangololo, amumbile mu bologo dienji hakhenji mbeji jiavula handaga wakhalele mukombelela Yehowa nu gujinginyina guagasue. Udi muzuela egi: “Ngakotelesele gale egi tuana tagana nu usageshi handaga Satana nu bademo enji ana tshigina gutukanga njila ha gukombelela Yehowa. Idi yadiago egi athu avula ana tshita midimo mu bologo anago gukhala nu umbalagaji nu esue. Uvi ana gutusagesa nga gutumonesa lamba handaga wene mudimo wawo.” Mvuaji jia phangi mumoshi wa yala wa gu Croatie jiamusagesele muavula mukunda nu gutshigina guenji. Phangi muene udi muzuela egi: “Henyaha ngakotelesele gale egi Satana udi mbalagaji wami uvi ishigo mvuaji jiami.”​—Ef. 6:12.

4. Malongo atshi tuajiya guzula mu gifezegeselo gia Yesu nu gia Etiene? (Tala nji gifuanesa.)

⁴ Tuanago gukhala nu umbalagaji mukunda nu athu ana gutusagesa. Matangua ako, tuana kombelela nji mukunda nu ene. (Mat. 5:44) Gifezegeselo gia Yesu nu gia mulandudi Etiene giajiya diago gutukuatesa. Tangua masuta a gu Roma amukhokhele ha mutshi wa lamba, Yesu wakombelele Nzambi egi: “Tata, atotesele.” (Luka 23:34) Yesu wakhalele mutoga Yehowa ha gutotesela masuta atumiwe ha gumushiya. Yajiya gukhala egi wakhalele nji gumutoga ha gutotesela athu akhalele mukaluga nu gutoga egi ashiyiwe anyi atumiwe gudi mbalagaji jienji. Yesu wakhalele mujiya egi athu ene akhalelego diago mujiya ndaga akhalele mukalagala. Mulandudi Etiene nji watogele Nzambi ha gutotesela athu akhalele gumusonona maseso ha gumushiya. (Makal. 7:58-60) Yehowa wavuile gisambu gia Yesu nu gia Etiene ba? Ayi. Athu avula atshiginyile egi Yesu ashiyiwe ajile mubalumuna mutshima gungima, ashile gutshigina gudi muene nu abatijiwe. (Makal. 2:36-41) Mukatshi dia athu atshiginyile egi Etiene ashiyiwe, guakhalele nji nu Saula wa gu Talese; wajile mubua Muklisto gungima nu wadibelele muavula mukunda nu ndaga jiakalegele muene.​—1 Tim. 1:13.

5. Longo ditshi wazula mu lumene lua phangi César?

⁵ Uu nu mangino Yehowa wana hana mvutu gu isambu tuana tshita mukunda nu athu ana gutusagesa. Tutadilenu lumene lua phangi César wa gu Venezuela. Tata wawo gakhalelego mutshigina giamatshidia nga hazonda. César udi muzuela egi: “Mama wetu wakhalele mukhetu wabonga, wakhalele nji gutuzumba muavula. Wakhalele musha ndaga jia mu nyuma ha fundo dia thomo, uvi wakhalele nji mukuatesa tata muavula. Wakhalele gutuwambela nu aphangi’ami ha gunemesa tata. Watuwambelele nji ha gutumagela tata mu ndaga jiagasue uvi mu ndaga jidi mushiya mikhuala ya Nzambi ndo.” Gungima dia ivo, tata wa phangi César wasendesele gusombegesa matangi enji. Phangi César udi muzuela egi: “Lusugu lumoshi ngatshitshile gisambu nu mutshima wami wagasue, gungima ngatogele tata gula ngajiya gusendesa gulonguga n’enji Biblia. Tangua tata watshiginyile egi “ayi,” ngasuangulugile muavula.” Gungima dienji, tata wa phangi César wabatijiwe. Athu agasue ana gutusagesa anago gusombegesa gifua tata wa phangi owu, uvi ako ana sombegesa matangi awo mukunda nu esue tangua ana mona makalegelo etu abonga nu luholo tuana guahana mvutu nu ginemua giagasue. Tuana khala nu gusuanguluga tangua athu ene ana tshita ngenyi! Tudi munengena ha gumona luholo Yehowa ‘Nzuji wa khenda wa athu agasue a ha mavu’ mbawulandula gunana athu a luholo elu mu ulondegi wenji.​—Gis. 18:25.

6. Ha gutadila Mako 13:13, ndaga itshi iko yana tuma athu ha gukhala nu umbalagaji nu esue?

⁶ Athu ana khala nu umbalagaji nu esue handaga tuana nemesa Yesu. Yesu wazuelele egi athu mbaakhala nu umbalagaji nu Aklisto a giamatshidia “mukunda nu jina [dienji].” (Tanga Mako 13:13.) Na “jina” dia Yesu diana monesa itshi? Diana monesa lukuma luenji nu ufumu wakhala nawo muene gifua fumu wa Ufumu wa Nzambi. Athu ana khala nu umbalagaji mukunda nu esue adi athu ana shila mafumu a ha mavu awa mutshima uvi anago gushila fumu Yesu Klisto watombewe gudi Yehowa ha guhinyina mavu nu dilu. Yesu wana hinyina gifua fumu wa Ufumu wa Nzambi sendese mu 1914. Gualeha ndo, muene mbawukatula mafumu agasue ana tuna ufumu wenji.

7-8. Ndaga itshi iko yana tuma athu ha gukhala nu umbalagaji nu akombeledi a Yehowa ako? (Yone 15:18-20) (Tala nji ifuanesa.)

⁷ Athu ana khala nu umbalagaji nu esue handaga tuanago gudinginyisa mu ndaga jia ha mavu awa. Yesu wazuelele egi athu mbaakhala nu umbalagaji nu alandudi enji handaga ene ashigo “athu a ha mavu awa.” (Tanga Yone 15:18-20.) Esue nji tuana khala gifua Aklisto a mu siekle ya thomo, tuana tuna ndaga jiagasue jiana nemesago Nzambi nu makalegelo abola nu mbimbi jiabola jia athu a ha mavu awa. Ndaga yene yana tshita egi aphangi’etu avula atagane nu usageshi gu mudimo nga gu khalasa. (1 Phet. 4:3, 4) Uvi tuana khala nu gusuanguluga guavula tangua athu ako mukatshi dia athu ana gutusagesa ana sombegesa matangi awo nu ana gutushimana nu gutunemesa mukunda nu makalegelo etu.

⁸ Tutadilenu lumene lua phangi Ignacio wa gu Amérique centrale. Mulongeshi wenji mumoshi gu khalasa wakhalele gumulela ivo yavula handaga wakhalele mutumagela mikhuala ya Nzambi. Uvi gutuama egi azule badiplome, mulongeshi muene wahudile phangi Ignacio ndaga yamukuatesele ha gulandula gutumagela malongo a Biblia ikhale athu akhalele gumulela. Phangi Ignacio wamuwambelele egi gutumagela mikhuala ya Nzambi guene guakhalele gumubamba. Gungima dienji watamegele mulongeshi wenji muene mu gudibungisa. Phangi Ignacio wasuangulugile muavula tangua diamonele muene mulongeshi wenji muene mu gudibungisa! Aphangi ayambele mulongeshi muene nu gusuanguluga guagasue, ndaga yene yamusuanguluishile nu yamutumile ha gulandula guya mu gudibungisa. Luholo mulongeshi muene walanduile gulonguga Biblia, muene nji watagenele nu usageshi. Uvi galebelego muila, walanduile gukula mu nyuma, gungima wabatijiwe.

9-10. a) Ndaga itshi iko yana tshita egi Aklisto akhale agudisha nu enya ha mavu awa a Satana? b) Malongo atshi tuajiya guzula mu gifezegeselo gia mupostolo Phaula?

⁹ Tuana khala nji agudisha nu athu a ha mavu awa a Satana handaga tuanago gudinginyisa mu ndaga jia politike nga jia ita. (Yone 18:36) Tuana landula longo didi mu Roma 13:1, tuana tumagela nji mikhuala ya leta. Uvi luholo tudi Aklisto, tuanago gudinginyisa mu ndaga jia politike. Gishina giene, tuanago gumba ba candidature ha gubua mafumu a politike, tuanago nji gu vote mafumu a politike. Mukunda natshi? Handaga esue tuana tumbuisa phamba Yehowa nu tuakhala agujinginyina gu Ufumu wenji wana tuamezewa gudi Klisto. Matemue a Yehowa avula ambiwe gale mu bologo mukunda nu gutshigina guawo. Ikhale ngenyi, aphangi ene ana landula gulongesa lukuma luabonga. Ana landula gifezegeselo gia mupostolo Phaula yago wabalegesele ivo yavula mu bologo nu mu jinzo akhalele gumubamba hakhenji. (Makal. 24:27; 28:16, 30) Walanduile gulongesa lukuma luabonga gudi athu agasue akhalele gumutegelela gifua abambi a bologo, manzuji, baguvernere nu mafumu, yajiya nji gukhala egi walongesele masuta a fumu Néron wa gu Roma.​—Makal. 9:15.

¹⁰ Luholo lumoshi nji, aphangi’etu adi mu bologo ana longesa athu agasue ana guategelela gifua manzuji, mafumu nu abambi a bologo. Phangi mumoshi wa yala wabalegesele ivo gubalega 6 mu bologo handaga watunyile gudinginyisa mu ndaga jia politike. Udi muzuela egi gakhalelego mutadila tangua diabalegesele muene mu bologo gifua ndola uvi gifua ginemo giamuhanele Yehowa gia gukamba athu a mitshima yabonga. Tuana khala nu gusuanguluga gula Yehowa watukuatesa ha gulongesa athu a luholo elu lukuma luabonga! (Kol. 4:3) Henyaha tutadilenu ndaga jiajiya gutukuatesa ha gukhala nu gusuanguluga ikhale athu adi nu umbalagaji nu esue.

NDAGA JIAJIYA GUTUKUATESA HA GUKHALA NU GUSUANGULUGA IKHALE TUDI MUTAGANA NU USAGESHI

11. Luholo lutshi gutagana nu usageshi guajiya gukolesa gutshigina guetu? Hana gifezegeselo.

¹¹ Gujiya egi luholo athu adi nu umbalagaji nu esue gudi mutagenesa profesi jia Biblia. Yehowa wamonesele mu profesi ya thomo yasonegewe mu Biblia egi Satana nu vungu dienji, yakotelesa egi athu akhala gu khanda yenji, mbaakhala nu umbalagaji nu athu ana zumba Yehowa nu ana gumukombelela. (Gis. 3:15) Yesu nji wamonesele egi athu mbaakhala nu umbalagaji mukunda nu athu agasue ana kombelela Yehowa. (Mat. 10:22; Mako 13:9-12; Luka 6:22, 23; Yone 15:20) Athu ako asonegele Biblia azuelele nji ndaga yene. (2 Tim. 3:12; Yak. 1:2; 1 Phet. 4:12-14; Yuda 3, 17-19) Hene, tuanago gudihula tangua tuana tagana nu usageshi. Uvi tuana khala nu gusuanguluga handaga tuana jiya egi profesi jia Biblia jidi mutagenesewa. Ndaga yene yana gututshiginyisa diago egi tuana kombelela Nzambi wa giamatshidia. Phangi mumoshi wa mukhetu wana khala mu gifutshi ginyi midimo yetu yatunyishiwe udi muzuela egi: “Tangua ngadihanele gudi Yehowa, ngakhalele mujiya egi mbangutagana nu usageshi. Hene, ngadihudilego tangua ngatagenele nu usageshi, ngavuilego nji woma.” Mulumi’enji wakhalele nji mukatshi dia athu amusagesele. Wamumonesele lamba, wakondele Biblia yenji nu mikanda yenji iko tshuya. Uvi ha fundo dia gumuvuisa woma, ndaga yene yakolesele gutshigina gua phangi muene. (Heb. 10:39) Udi muzuela egi: “Ngana jiya egi Biblia yana zuela egi alandudi a Yesu mbaatagana nu usageshi. Ngakhalele nji mujiya egi ndaga yene mbayingubuila. Hene, gutagana nu lamba diene guangutshiginyishile diago egi ngakhala mu gikombelelo gia giamatshidia.”

12. Itshi yakuatesele phangi mumoshi ha gukolesela?

¹² Tuana jiya getu egi tuajiya gutagana nu usageshi, uvi matangua ako gukolesela usageshi wene guajiya gukhala lamba. Phangi mumoshi wa yala wasonegele mukanda ha gumonesa luholo luakhalele gudivua muene mu bologo, wazuelele egi: “Matangua ako, ngakhalele muvua gikenene nu woma wavula, ngakhalele nji mudila.” Itshi yamukuatesele ha gukolesela? Wazuelele egi: “Ngakhalele mukombelela muavula. Ngakhalele musendesa lusugu luagasue nu gisambu. Tangua diagasue ngakhalele mutagana nu ndaga ya lamba mu lusugu, ngakhalele mukombelela. Gula muthu wangukalegela ndaga imoshi yanguhana khabu, ngakhalele gudikangela mu gikhoso (douche), ngukombelela muavula.” Phangi muene wazudile nji tangua dia gutangigiza ifezegeselo ya akombeledi a Nzambi a mangino nu a mu tangua dikulu anyi asalele agujinginyina gudi muene. Gutshita ngenyi guamukuatesele ha gukolesela nu gukhala mu guhuima gunu Yesu walayele alandudi enji.​—Yone 14:27; 16:33.

13. Itshi yajiya gutukuatesa ha gukolesela mu usageshi?

¹³ Guzumba guetu mukunda nu Yehowa nu aphangi’etu. Uu nu gu gufua guenji, Yesu wazumbile sh’enji nu mutshima wenji wagasue. Wazumbile nji mafuta enji. (Yone 13:1; 15:13) Gula esue nji tuakudisa guzumba gua luholo elu mukunda nu Yehowa nu mukunda nu aphangi’etu, yajiya gutukuatesa ha gukolesela mu usageshi. Luholo lutshi tuajiya gukudisa guzumba guene? Gifezegeselo gia mupostolo Phaula giza gutukuatesa ha guheta mvutu gu muhu owu.

14. Itshi yakuatesele Phaula ha gukolesela ikhale wakhalele mujiya egi mbawushiyiwa?

¹⁴ Gutuama dia gushiyiwa guenji, Phaula wasonegele futa dienji Timote egi: “Nyuma yana gutuhana Nzambi yana gutubuisa ndo enya woma, uvi yana gutuhana ngolo, yana gutukuatesa ha gukhala nu guzumba.” (2 Tim. 1:7) Phaula wakhalele mutshigina guzuela itshi? Wakhalele mutshigina guzuela egi gula Muklisto udi muzumba Yehowa muavula, yajiya gumukuatesa ha gukolesela usageshi wakola. (2 Tim. 1:8) Guzumba guenji mukunda nu Yehowa guamukuatesele ha gusala wagujinginyina gudi Yehowa nu gikhesa giagasue, ikhale wakhalele mujiya egi mbawushiyiwa.​—Makal. 20:22-24.

15. Luholo lutshi aphangi ana gudimonesela guzumba gua giamatshidia mangino? (Tala nji gifuanesa.)

¹⁵ Tuana zumba muavula aphangi’etu ana kolesela usageshi nu gujinginyina guagasue gudi Yehowa. Aphangi avula mangino ana gumba mionyo yawo mu gingonza ha gukuatesa aphangi’awo a mala nu a akhetu gifua luholo Akila nu Prisile ambile mionyo yawo mu gingonza ha gukuatesa Phaula. (Roma 16:3, 4) Ha gufezegesa, gu Russie aphangi avula ana guya gu tribinale ha guhana aphangi’awo akuatewa gikhesa. Tangua phangi mumoshi wa mukhetu wamonele guvula gua aphangi ajile gu tribinale, ndaga yene yamusuanguluishile muavula, gamonelego nji gima gia guzuela. Guzumba gua aphangi guamuhanele diago gikhesa mu tangua diene. Yadiago, tuajiya gukhala nu gusuanguluga handaga guzumba tuana khala nago guana gutukuatesa ha gukolesela ikhale athu adi nu umbalagaji nu esue!

16. Mukunda natshi mupostolo Phetelo wazuelele egi athu adi musagesewa handaga ana kombelela Nzambi adi naye gukhala nu gusuanguluga? (1 Phetelo 4:14)

¹⁶ Gujiya egi gukolesela guetu guana tshita egi Nzambi atutshigine. (Tanga 1 Phetelo 4:14.) Mupostolo Phetelo wazuelele egi athu adi mukolesela mu usageshi handaga ana kombelela Nzambi adi naye gukhala nu gusuanguluga. Mukunda natshi? Handaga gusagesewa guana monesa egi nyuma ya Nzambi “idi nu [esue].” Phetelo wakotelesele muabonga luholo athu ana gudivua gula adi mukolesela mu usageshi nu gula Nzambi udi guatshigina. Masugu azonda gungima dia Pantekote ya givo 33 G.Y., maphulushi a gu tempelo ayile mukuata Phetelo nu apostolo ako handaga akhalele mulongesa lukuma luabonga. Uvi Phetelo wazuelele gutshigina guenji nu gikhesa giagasue. (Makal. 5:24-29) Nu guene gungima dia gubetewa guawo, Phetelo nu apostolo ako abembelego gulongesa lukuma luabonga. Uvi akhalele nu gusuanguluga handaga “Nzambi waamonele egi akhalele athu atagana luholo a aseguluile mukunda nu jina dia Yesu.” Esue nji tuajiya gukhala nu gusuanguluga gula tudi mutagana nu usageshi.​—Makal. 5:40-42.

17. Ndaga itshi Yesu wawambelele alandudi enji mu phipha ya gisugishilo gutuama dia gufua guenji?

¹⁷ Mu phipha ya gisugishilo gutuama dia gushiyiwa guenji, Yesu wawambelele alandudi enji egi: “Muthu udi gunguzumba ame, Tata wami mbawumuzumba, ame nji mbangumuzumba.” (Yone 14:21) Tudi munengena nu mitshima zagu-zagu tangua athu mbaakhala gutuzumba nu mbaashigo luko mukhala nu umbalagaji nu esue handaga tuana kombelela Yehowa! (2 Tes. 1:6-8) Uvi tangua tudi munengena ndaga yene, ndaga jiagasue tuamona mu longo edi jilandule gutukuatesa ha gukhala nu gusuanguluga ikhale athu adi nu umbalagaji nu esue.