Mihu Yana Guhula Athu Ana Gutanga Mikanda Yetu

Tangua ditshi ifutshi mbayizuela egi “tudi mu guhuima nu mu ubambi!”?

“Mihu Yana Guhula Athu Ana Gutanga Mikanda Yetu” yazogele mu Inzo Yaleha ya Mutaledi ya Novembre 2025 yakhalele muzuela egi gualeha ndo, Yehowa uza gumba “matangi” enji mu mitshima ya “mbinga kumi” (yakotelesa egi baguvernema agasue a ha mavu) hagula ahane ufumu wawo gudi “shitu ya mu foto yabenga,” yakotelesa egi Organisation des Nations Unies. Shitu yene yana tamegewa nji egi “gifuanesa gia shitu ya mu foto.” (Gumo. 13:14, 15; 17:3, 16, 17) Gungima “mbinga kumi” nu shitu ya mu foto yakatuga guheta ufumu mbayishiya ikombelelo ya mambo ha mavu agasue. Tangua ifutshi mbayizuela egi “tudi mu guhuima nu mu ubambi,”a mbayikhala gutuama dia tangua Yehowa mbawumba “matangi” enji mu mitshima ya mbinga kumi nga ndo mbayikhala gungima?​—1 Tes. 5:3.

Mu guzuela guabonga, tushigo mujiya tangua ifutshi mbayizuela egi “tudi mu guhuima nu mu ubambi.” Nga tuana jiya muabonga tangua diene, nga tushigo mukhala nu funu ya gukhala gikolekole. Uvi tudi mujiya muabonga egi Yesu wawambelele alandudi enji mbala jiavula egi: “Khalenu gikolekole.” (Mat. 24:42; 25:13; 26:41) Henyaha tutadilenu muabonga profesi yazuelele mupostolo Phaula mu mukanda wasonegele muene gudi Aklisto a gu Tesalonike.

Phaula wasonegele egi: “Tangua mbadizuela ene egi: ‘Tudi mu guhuima nu mu ubambi!’ gufua mbaguajila mu gisagumuisa.” (1 Tes. 5:2, 3) Sendese mualeha, mikanda yetu yana zuela egi: Tangua ifutshi mbayizuela egi “tudi mu guhuima nu mu ubambi” mbadikhala gutuama egi lamba diakola disendese; lamba diene diakola mbadisendesa tangua mbadishiyiwa Babilona Yakoma, yakotelesa egi ikombelelo yagasue ya mambo ya ha mavu. Yana zuela nji egi tangua ifutshi mbayizuela ndaga yene, mbayikhala gijiyishilo gidi mumonesa egi lamba diakola didi mutshigina gusendesa.

Uvi gungima dia gutadila profesi yene muabonga, tuamonyi egi gudi nu luholo luko tuajiya gukotelesa profesi yene. Yajiya gukhala egi ifutshi mbayizuela egi “tudi mu guhuima nu mu ubambi” gungima dia gushiyiwa gua ikombelelo ya mambo.Mukunda natshi tuazuela ngenyi? Tukambenu thomo gujiya mvutu jia mihu eyi yalandula.

Luholo lutshi ikombelelo ya mambo yana hana mago gu ita yana kalegewa ha mavu? Biblia yana zuela egi: ‘Mahatshi a athu agasue ashiyiwe ha mavu amonewe mukatshi dienji [mukatshi dia “thambi yakoma ya mukhetu,” yakotelesa egi Babilona Yakoma].’ (Gumo. 17:1, 5; 18:24) Sendese mualeha, thambi yakoma ya mukhetu yana hana mago gu ita nu gu ndaga jia umbundudi. Yene yana gutuma athu ha gudiluisa uvi ishigo ha gukhala mu guhuima nu mu ubambi. Ndaga yene yatutuma ha gudihula muhu owu: Ifutshi mbayizuela egi “tudi mu guhuima nu mu ubambi” phamba gungima dia gushiyiwa gua Babilona Yakoma ba? Yajiya gukhala ngenyi, uvi tushigo mujiya ndaga yene muabonga.

Ndaga itshi mbayikalegewa gungima dia tangua ifutshi mbayizuela egi “tudi mu guhuima nu mu ubambi”? Phaula wazuelele egi: “Gufua mbaguajila mu gisagumuisa.” (1 Tes. 5:3) Gula ifutshi yazuela egi “tudi mu guhuima nu mu ubambi” gutuama dia gushiyiwa gua ikombelelo ya mambo, ngenyi ifutshi yene mbayikhala nu tangua diavula gutuama dia gushiyiwa guayo. Uvi Phaula wazuelele egi gushiyiwa gua ifutshi yene mbagukhala mu “gisagumuisa”. Hene, yajiya gukhala egi mafumu a politike a ha mavu mbaazuela egi “tudi mu guhuima nu mu ubambi” gungima dia gushiyiwa gua ikombelelo ya mambo, ngenyi gushiyiwa guawo nji mbaguza muphushi nu mu gisagumuisa.

Akombeledi a Yehowa mbaadihula tangua mbadimona ene gutagenesewa gua profesi yene ba? Phaula wazuelele egi: “Aphangi, enue mushigo mu phipha hagula lusugu luene lumisagumuise gifua luholo muanya wana zogela nzangi mu gisagumuisa.” (1 Tes. 5:4) Matangi a ndando enyawa: Gula ifutshi yazuela egi “tudi mu guhuima nu mu ubambi” gungima dia gushiyiwa gua ikombelelo ya mambo, akombeledi a Yehowa mbaakotelesa egi gushiyiwa gua ifutshi yene guasuena nji hehi. Uvi ifutshi mbayishigo mukotelesa ndaga yene, mukunda nu ene gushiyiwa guawo mbaguajila mu gisagumuisa gifua nzangi.

Na itshi tudi mujiya mukunda nu masugu adi muza? Tudi mujiya egi gualeha ndo, “mbinga kumi” nu shitu ya mu foto mbayiheta ufumu, mbaashiya ikombelelo ya mambo. Ndaga yene mbayikhala gisendeselo gia lamba diakola. Tudi nji mujiya egi gualeha ndo, ifutshi mbayizuela egi “tudi mu guhuima nu mu ubambi.” Ndaga yene mbayikalegewa tangua ditshi? Tuazuelela maluholo mbadi ndaga yene yajiya gukalegewa. Luholo lua thomo: Ifutshi mbayizuela ndaga yene matangua azonda gutuama nga gungima dia tangua Yehowa mbawumba matangi enji mu mitshima yawo hagula ihane ufumu wawo gudi shitu ya mu foto. Luholo lua mbadi: Ifutshi mbayizuela ndaga yene gungima dia gushiyiwa gua Babilona Yakoma. Tudi naye gunengena ha gumona luholo ndaga jiene mbajikalegewa. Matangua avula, tuana kotelesa profesi jia Biblia muabonga tangua jidi mutagenesewa nga gungima dia gutagenesewa guajio.​—Fuanesa nu Yone 12:16.

Ndaga idi nu ndando mukunda nu esue ishigo tangua ifutshi mbayizuela egi “tudi mu guhuima nu mu ubambi,” uvi idi gukhala a gujinginyina gudi Nzambi. Tudi naye gukhala “nu gikolekole nu matangi a ungambi,” hagula tukhale a gudilondega mukunda nu ndaga mbajikalegewa mu masugu adi muza.​—1 Tes. 5:6.