Ana adi “Khapho Diana Hana Yehowa”

ITSHI yana gugujila mu matangi gula wavua mbimbi “khapho”? Wajiya gutangiza makuta, luphango nga gima giko gia ndando giagubembelele muenya fami waye. Yadiago, khapho didi gima gimoshi gia ndando udi naye gubamba muabonga.

Biblia yana zuela egi ana adi “khapho diana hana Yehowa.” (Ngi. 127:3) Aklisto ana tadila nji an’awo gifua khapho dia ndando diaahanele sh’awo wa mu dilu nu ana tshita yagasue ha guakuatesa ha gukhala sante yabonga, ha gukhala nu suanguluga nu ha gukhala nu ufuta wabonga nu Yehowa.

Uvi ndaga ya gikenene idi egi mvuaji jiko mangino jianago gutadila an’awo gifua kado gaahanele Nzambi. (Yesh. 49:15; 2 Tim. 3:1-3) Mvuaji jiko nji jiana tshigina gusansa an’awo muabonga, uvi yana khala lamba mukunda nu ene ha gutshita ngenyi handaga adi nu ana avula. Ndaga jitshi jiana tuma mvuaji jiko ha guvuala ana avula? Ndaga jitshi Yehowa wana toga mvuaji ha gutshita mukunda nu an’awo? Itshi yajiya gukuatesa Aklisto ha gusansa an’awo muabonga?

NDAGA JIANA GUTUMA MVUAJI JIKO HA GUVUALA ANA AVULA

• Ndaga enya fami jiawo nga athu ako ana guatoga ha gutshita. Mu mafundo ako, athu ana nemesa muavula mvuaji jidi nu ana avula. Ndaga yene yana tshita egi enya fami nga athu ako ana jinga nawo hehi ashinjige yala nu mukaji’enji ha guvuala ana avula gubalega anyi akhalele mutangiza ha guvuala nga gusansa muabonga.

• Woma mukunda nu masugu adi muza. Mvuaji jiana khala mu mafundo anyi ana avula ana gufua gu nzala, misongo nga ndo handaga ashigo nu usagi wabonga, ana guvuala ana avula handaga ana tangiza egi gula ako afua, ako ajiya gukula. Mvuaji jiko jiana guvuala ana avula hagula gula abua athu a gukola, ana ene ajiya guakuatesa. Ndaga eyi yana kalegewa muavula mu ifutshi inyi mafumu a leta anago gukuatesa athu a gukola.

• Gukuatesa mukhetu ha gutuna gumita hehi-hehi. Mu mafundo ako, gushigo nu ihemba ya gudisha yajiya gukuatesa akhetu ha gutuna gumita hehi-hehi. Uvi mu mafundo ako, athu ajiya gawo guheta ihemba yene, uvi ana guvua woma egi yajiya guakatesa handaga ihemba yavula yakhala ya minyato. Athu ako nji ashigo nu luholo lua guheta ihemba yene handaga yakhala ndando yakola.a

NDAGA JITSHI YEHOWA WANA TOGA MVUAJI HA GUTSHITA MUKUNDA NU AN’AWO?

Gutagenesa nzala jia an’awo. Yehowa wahanele mvuaji ginemo gia gutagenesa nzala jia an’awo adi gale azonda. Wana guatoga nji ha gutshita mudimo wakola ha gudisa an’awo, guasumbila milele nu guahana fundo dia gubanda. Wana tshigina nji egi mvuaji jilongese an’awo. Hene, Aklisto ashigo naye gusuga phamba ha gutuma an’awo gu khalasa, uvi adi naye gujinga nu an’awo uu nu tangua mbadikula ene. Adi naye nji gualongesa ndaga jiko nga tumidimo tuko mbatuakuatesa mu monyo wawo. Gutshita ngenyi mbaguakuatesa ha gubalegesa tangua nu an’awo, ngenyi ana ene mbaadivua mu ubambi nu mbaadivua egi ana guazumba. Uvi ndaga iko tushigo naye gujimbila idi egi Yehowa gakhalago muenya ndaga jiakola-kola, ganago gutoga egi mvuaji jiagasue jikhale nu umonyi. Mvuaji jiatombele muene ha gubamba mun’enji Yesu jiakhalele phutu uvi jiakhalele mutshita mudimo wakola ha gudisa an’awo.​—Mat. 13:55, 56; Luka 2:24.

Matangi a Biblia: “Gula muthu gashigo mutagenesa nzala jia enya fami yenji nu jia athu adi monzo yenji, muene wabembele gale gusha gutshigina mu ndaga tuana tshigina. Gubola guenji guabalega gua muphagano.”​—1 Tim. 5:8.

Yehowa wana gujiya gamba gula mvuaji jiakola, jiana khala nu funu ya ukuateshi. Hene, ana ana gumonesa egi adi munemesa mvuaji jiawo gula adi guakuatesa habua ene athu a gukola. (Guz. 20:12; 1 Tim. 5:4) Uvi Yehowa wana khala nu gusuanguluga gula mvuaji jidi mukamba thomo luholo luajiya ene gukuatesa an’awo ha fundo dia gutangiza luholo an’awo mbaakuatesa mu masugu adi muza.​—2 Kol. 12:14.

Gulongesa an’awo ndaga jiatadila Yehowa. Aklisto akhala nu ginemo gia gulongesa an’awo ha guzumba Yehowa nu ha gumukombelela. Gu meso enji, gutshita ngenyi guene ndaga yabalega ndando.​—Mikh. 6:6, 7.

Matangi a Biblia: “Landulenu gusansa [an’enu] mu malongo nu mu mikhuala ya Yehowa.”​—Ef. 6:4.

YEHOWA WANA TSHIGINA GUMIKUATESA HA GUSANSA AN’ENU MUABONGA

Diangenu guzula desizio dia gujiya guvula gua ana mbamuvuala. Gula mudi mutshigina guvuala ana, zudienu tangua dia gutangiza gula mbamukhala nu luholo lua guasansa muabonga. Ha gufezegesa, mbamukhala nu luholo lua gudisa ana avula, guasumbila milele nu gualongesa ba? Gula muamona egi mushigo nu luholo, zuelelenu guvula gua ana mbamuvuala hagula mukhale nu luholo lua gutangenesa nzala jia mona wagasue gifua luholo Yehowa wana tshigina. Idi yadiago egi Yehowa udi mujiya egi ndaga jiagasue jianago guyila gifua luholo muadifelela. (Mulo. 9:11) Uvi mbawumikuatesa gula muatshita yagasue ha gukhala mvuaji jiabonga.

Matangi a Biblia: ‘Ndaga jidi mutshigina gutshita muthu wana kalagala mudimo wakola mbajibinga, uvi athu agasue ana tshita ndaga phushi-phushi mbaabua mu uphutu.’​—Ish. 21:5.

“Nanyi mukatshi dienu gula watshigina gutunga inzo yaleha, gashigo mudianga gukhala hashi ha gutangiza falanga inzo yene mbayitoga nu ha gumona gula muene udi nu falanga jiatagana ha guyimanesela?”​—Luka 14:28.

Hagenu Yehowa ha fundo dia thomo mu fami yenu. Tshitenu yagasue hagula gukombelela Yehowa gukhale ha fundo dia thomo mu fami yenu. Gula muavuadile gale ana, tshitenu yagasue ha gulongesa mona wagasue ha guzumba Yehowa. Akuatesenu ha gutegelela nu gulandula gudibungisa kiawaha. Khalenu nu programe yabonga ya gukombelela Yehowa mu fami yenu phoso nu phoso. Khalenu nji guya nawo mu mudimo wa gulongesa. Muhanyigo ginemo gia gukalagala ndaga eji jiagasue gudi an’enu akudile gale nga gudi muthu muko. Gukuatesa an’enu ha guzumba Yehowa guajiya gumizula tangua nu ngolo jiavula, uvi mbamukhala nu gusuanguluga guavula ha gumona luholo an’enu adi mukombelela Yehowa.

Matangi a Biblia: “Gushigo nu ndaga yajiya gungusuanguluisa muavula gubalega eyi: gula ngavua egi an’ami adi mulandula guwenda mu giamatshidia.”​—3 Yone 4.b

Shilenu Yehowa mutshima. Gula mudi mutshigina gusendesa guvuala nga ndo muavuadile gale ana, jiyenu egi mikhuala ya Yehowa idi nu ndando yavula gubalega malongo nga kutime jia mu dimbo dienu.

Gula muazula desizio dia gutuna guvula ana avula, shilenu Yehowa mutshima egi mbawumikuatesa gula muabua athu a gukola. Tshitenu yagasue ha gutuna gubua mu muheto wa guvuala ana avula hagula ajiya gumikuatesa gula muakola. Mutangizago nji egi mbamushigo mukhala nu muthu wagumikuatesa. Yehowa walayele egi mbawumikuatesa; ndaga jiagasue jiana laya muene, wana gujitagenesa.​—Yosh. 23:14.

Matangi a Biblia: ‘Sha mutshima waye wagasue gudi Yehowa, uhagigo mutshima mu ndunge jiaye hakhaye. Tangiza Nzambi mu ndaga jiagasue udi mutshita, ngenyi muene mbawulondega njila jiaye muabonga.’​—Ish. 3:5, 6.

“Ngakhalele muvuala, henyaha ngabua muthu wa gukola, uvi khenji ngamonele galego Nzambi mubemba muthu wabonga, nga an’enji mukamba ima ya gudia.”​—Ngi. 37:25.

“Hene, landulenu gukamba thomo Ufumu nu gubonga gua Nzambi, gungima muene mbawumilunda ima eyi yagasue.”​—Mat. 6:33.

Ana adi kado ga ndando Yehowa wahanele mvuaji. Yehowa wana khala nu gusuanguluga gula Aklisto adi mutshita yagasue ha gusansa an’awo mu luholo luana tshigina muene! Aklisto ana kuatesa an’awo nu guzumba guagasue ha gukhala nu sante yabonga, ha gukhala nu gusuanguluga nu ha gukhala nu ufuta wabonga nu Yehowa. Ana gudianga guzuelela guvula gua ana mbaavuala, ana gusha nji mikhuala ya Yehowa ha fundo dia thomo mu monyo wawo ha fundo dia gulandula malongo nu kutime jia mu dimbo diawo. Tangua Aklisto ana tshita ndaga eji jiagasue, ana monesa egi an’awo adi kado ga ndando, adi “khapho diana hana Yehowa.”