Obadia: Khala Muvuila Nzambi Woma

Obadia wakhalele mutuameza midimo mu inzo ya fumu wabola Ahaba munu watshiginyile egi athu avula a mu gifutshi akombelele Bale. Uvi Obadia wakhalele muvuila Yehowa woma “sendese ulenge” wenji. (1 Maf. 18:1-13) Tangua Yezabele mukaji’a fumu Ahaba wahanele njila ha gushiya baprofete agasue a Yehowa, Obadia wakotelesele egi wakhalele naye gutshita ndaga nu gikhesa giagasue hagula ndaga yabola ya luholo lunu ikalegewago. Gusuega nga profete mumoshi guakhalele gingonza diago; uvi Obadia wasuegele baprofete 100, wakhalele nji guabatela ima ya gudia tangua nzala yakola yanginyile mu gifutshi! Obadia wakhalele naye gutshita ndaga nu gutema guagasue hagula baprofete avula a mambo akhalele mukalegela fumu nu mukaji’enji mudimo amumonyigo!​—1 Maf. 18:19.

Malongo atshi tuajiya guzula mu lumene luenji? Obadia wakhalele muvuila Ahaba woma, uvi wakhalele muvuila Nzambi woma wavula gubalega. Ndaga yene yamuhanele gikhesa ha gubamba akombeledi a Yehowa. Esue nji tuajiya gukudisa khadilo diakhalele nadio Obadia dia guvuila Nzambi woma wavula gila ha fundo tudi mafumu a leta atunyisa midimo yetu. Gutshita ngenyi mbagutuhana gikhesa ha gukuatesa aphangi’etu hadi ene mutagana nu malamba.