Aphangi Agukola—Muakhala nu Ndando Yavula mu Hungu
“Tangua ngana wunguluga ndaga jiagasue ngakalegele gale mu monyo wami, ngana suanguluga muavula. Uvi henyaha ngushigo luko nu ngolo jiagukalagala ndaga jiavula.”—Phangi Connie, udi nu ivo 83.
Yajiya gukhala egi aye nji ushigo luko nu ngolo jia gutshita ndaga jiavula handaga wabui gale muthu wa gukola. Ikhale wabalegesa gale ivo yavula mu mudimo wa Yehowa, yajiya gukhala egi udi muleba muila handaga ushigo luko nu ngolo jia gutshita ndaga jiavula gifua luholo wakhalele mutshita tangua wakhalele muvuala. Ha gufezegesa, wajiya gusendesa gufuanesa ndaga udi mukalagala mangino nu jinyi wakhalele mukalagala mu masugu abalega. Gula idi ngenyi, itshi yajiya gugukuatesa ha gubamba gusuanguluga guaye?
NDAGA YEHOWA WANA TSHIGINA EGI MUTSHITE
Dihule egi: ‘Yehowa wana tshigina egi ngutshite itshi?’ Mbimbi jidi mu mukanda wa Mikhuala 6:5 jiajiya guguhana gikhesa; verse yene idi muzuela egi: “Udi naye guzumba Yehowa Nzambi waye nu mutshima waye wagasue nu monyo waye wagasue nu ngolo jiaye jiagasue.”
Ha gutadila verse eyi, Yehowa wana tshigina egi umukalegele nu mutshima waye wagasue nu monyo waye wagasue nu ngolo jiaye jiagasue. Gujiya ndaga eyi guajiya gugukuatesa ha gutuna gudifuanesa nu athu ako nga gufuanesa ndaga udi mukalagala mangino nu jinyi wakhalele mutshita mu masugu abalega.
Tadila gale ndaga eyi: Tangua wakhalele muvuala, luholo lutshi wakhalele mukalegela Yehowa? Akombeledi avula a Yehowa ajiya guzuela egi amukalegele nu mutshima wawo wagasue nu ngolo jiawo jiagasue. Aye nji yene ndaga wakalegele tangua wakhalele muvuala. Na itshi wajiya gukalagala mu mudimo wa Yehowa mangino? Yajiya gukhala egi aye gaye mulandula gudihana mu mudimo wa Yehowa ha gutadila ngolo udi najio mangino. Gula udi mutadila ndaga mu luholo elu, mbayigukuatesa ha gukotelesa egi aye gaye mulandula gudihana mu mudimo wa Yehowa gifua tangua wakhalele muvuala. Wakhalele gudihana muavula mu masugu abalega, mangino nji udi mulandula gudihana muavula mu mudimo wa Yehowa.
Wadihanele muavula mu mudimo wa Yehowa tangua wakhalele muvuala, mangino nji udi mulandula gudihana muavula mu mudimo wene tangua wabua muthu wa gukola
GIFEZEGESELO GIENU GIAJIYA GUKUATESA ATHU AKO
Tala ndaga iko yajiya gugukuatesa ha gukhala nu gusuanguluga: Ha fundo dia gutangiza egi ushigo nu ndaga wajiya gutshita handaga wabua muthu wa gukola, kamba maluholo wajiya gukuatesa athu ako. Yadiago, gudi nu ndaga jiko wajiya gutshita mangino jinyi wakhalelego naye gutshita tangua wakhalele muvuala. Ha gufezegesa, ndaga wajiya gutshita yenyeyi:
Tela athu ako eskperianse yaye. Tangiza ndaga Biblia yana zuela mu verse eji jialandula:
Fumu Davidi: ‘Ngakhalele muvuala, henyaha ngabua muthu wa gukola, uvi khendji ngamonele muthu wabonga mubembewa nga an’enji muya nu gutoga dipha.’—Ngi. 37:25.
Yoshua: “Tegelelenu! Ngudi mutshigina gufua. Mudi mujiya muabonga nu mutshima wenu wagasue nu monyo wenu wagasue egi ndaga jiagasue jiabonga jiamilayele Yehowa Nzambi wenu jiatagenesewe. Gushigo nga mbimbi imoshi yadile gutagenesewa ndo. Ndaga jiagasue jiatagenesewe mukunda nu enue.”—Yosh. 23:14.
Yajiya gukhala egi aye nji wazuelele ndaga jia luholo elu tangua wakhalele muvuala ha gukuatesa athu ako. Uvi Davidi nu Yoshua azuelele ndaga jiene handaga ajimonele mu monyo wawo.
Gula wana kombelela gale Yehowa sendese mualeha, wajiya guwambela athu ako luholo wamonele koko dia Yehowa mu monyo waye nga mu mionyo ya athu ako. Udi muwunguluga tangua dimoshi ngenyi wamonele Yehowa mukuatesa akombeledi enji mu luholo lua gushimana ba? Gula idi ngenyi, wambela nji athu ako ndaga yene! Yajiya nji guakuatesa muavula diago. Gula udi muwambela athu ako luholo Yehowa wagukuatesele mu monyo waye, wajiya guahana gikhesa nu guakolesa diago.—Roma 1:11, 12.
Ndaga iko wajiya gutshita ha gukuatesa athu ako idi guya mu gudibungisa gua mu hungu. Gutshita ngenyi guajiya gugukuatesa ha gukhala nu gikhesa nu ha guhana athu ako gikhesa. Phangi Connie tuazuelela gu thunda udi muzuela egi: “Guya mu gudibungisa gua mu hungu guana gungukuatesa ha gutuna guleba muila. Ngajiyilego gukhala nu gikenene handaga aphangi ana gunguzumba muavula gu Inzo ya Ufumu. Ngana hana athu ako bakado azonda-zonda ha guahana mersi. Ngana landula nji gudihana muavula mu ndaga jia mu nyuma hamoshi nu aphangi’ami a mala nu a akhetu.”
YEHOWA WANA SUANGULUGA MUAVULA NU MUDIMO MUANA GUMUKALEGELA
Biblia yakhala nu ifezegeselo yavula ya athu anyi akhalele mutangiza egi ashigo nu ndaga jiavula jia gutshita mu mudimo wa Yehowa, uvi Yehowa wakhalele guazumba. Tutadilenu gifezegeselo gia Simeone. Wakhalele muenya Isalele, wakhalele nji muthu wa gukola tangua diavuadiwe Yesu. Tangua diakhalele muene muya gu tempelo, yajiya gukhala egi wakhalele mumona luholo mavuala akhalele mutshita midimo yavula guene. Yajiya nji gukhala egi wakhalele mutangiza egi gashigo luko nu ndando gu meso a Yehowa handaga gashigo nu ngolo jia gutshita muavula gifua mavuala ene. Uvi Yehowa gakhalelego gumutadila ngenyi. Gu meso enji, Simeone wakhalele “muthu wabonga, wakhalele muvuila Nzambi woma.” Gishina giene, wamuhanele luendu lua gumona Yesu hakhalele muene bebe. Wamutumile nji ha guzuela profesi imoshi egi Yesu mbawubua Masiya! (Luka 2:25-35) Yadiago, Yehowa gakhalelego mutadila Simeone egi wakhalele muthu wa gukola, uvi gifua muthu wakhalele nu gutshigina guakola nu wakhalele nu “nyuma ya Nzambi.”
Yehowa wahanele Simeone luendu lua gumona Yesu hakhalele muene bebe; wamutumile nji ha guzuela profesi imoshi egi Yesu mbawubua Masiya
Aye nji wajiya gusha mutshima egi Yehowa wana mona gujinginyina guaye gudi muene ikhale ushigo luko nu ngolo jia gutshita ndaga jiavula mu mudimo wenji. Gu meso enji, mulambu wakhala nu ndando gula ‘muthu wawuhana ha gutadila ima idi nayo muene, uvi yinyi gashigo nayo ndo.’—2 Kol. 8:12.
Hene, khala mutadila phamba ndaga jinyi wajiya gutshita. Ha gufezegesa, tangiza maluholo wajiya gulongesa nga mukunda nu tangua diazonda. Wajiya nji guhana aphangi’aye a mala nu a akhetu gikhesa gula waatamega gu telefone nga ndo waasonegela mukanda. Ndaga jiazonda-zonda wajiya gukalagala ha gumonesa egi wana guazumba, jiajiya gukuatesa muvuala diago handaga adi mujiya egi jiakatuga gudi muthu wana kombelela gale Yehowa sendese mualeha.
Ikhale ushigo luko nu ngolo jia gutshita ndaga jiavula, uvi wajiya gulandula gudihana mu mudimo wa Yehowa nu gukhala nu gusuanguluga mu mudimo wa gulongesa. Tala eskperianse ya phangi mumoshi wa mukhetu wa mu gifutshi gimoshi gia gu khanda ya mazogelo a kumbi ya Afrique mu galuanda “Wakalegele Biblia ha Guhuluisa Monyo wa Muthu.”
Khala mujiya egi luholo wana kombelela gale Yehowa nu gujinginyina guagasue ivo yavula, yajiya guhana athu ako gikhesa. Udi diago gifezegeselo giabonga mu ndaga yatadila gukolesela. Wajiya gusha mutshima egi ‘Nzambi gashigo muthu wabola ha gujimbila mudimo wakalegele nu guzumba wamonesele mukunda nu jina dienji, luholo wakalegele athu a gijila mudimo nu udi mulandula guakalegela.’—Heb. 6:10.
LANDULA GUKUATESA ATHU AKO
Enya ndunge ana monesa egi athu agukola anyi ana kuatesa athu ako, ana khala nu sante yabonga nu matangi abonga nu ana khala nji nu monyo ivo yavula.
Idi yadiago egi gukalegela athu ako ndaga jiabonga mbagushigo gugukanga njila ha gutagana nu malamba ana khala nawo athu agukola. Phamba Ufumu wa Nzambi mbawutukuatesa ha gukhala athu atagana nu mbawutukula mu uhiga wa gubola nu gufua.—Roma 5:12.
Ndaga jiagasue udi mutshita mu mudimo wa Yehowa gifua gukuatesa athu ako ha gumujiya, jiajiya gugukuatesa ha gukolesa felela diaye nu ha gukhala nu sante yabonga. Aphangi agukola, jiyenu egi Yehowa wana suanguluga nu ndaga jiagasue muana gumukalegela, aphangi’enu a mu hungu nji ana gumizula nu ndando yavula mukunda nu gujinginyina guenu.