Yelemiya

29 Eji mbimbi jiakhalele mu mukanda wasonegele profete Yelemiya gu Yelusalema ha gutumila akulu ako asalele mukatshi dia athu ayile mu uhiga, nu nganga-nzambi nu baprofete nu athu agasue, anyi Nebukadenezale wazudile gu Yelusalema ha guya nawo gu Babilona; 2 wawutumile tangua fumu Yekoniya nu gin’enji, nu athu akhalele mutshita mudimo mu inzo ya fumu nu manene a gu Yuda nu a gu Yelusalema, nu mbembo nu athu ana tshita mudimo nu utadi nu kuivre, akhalele akatuga gale gu Yelusalema. 3 Watumile mukanda wene ha mago a Elasa mun’a Shafane nu Gemaliya mun’a Hilikiya, anyi fumu Sedesiase wa gu Yuda watumile gu Babilona gudi fumu Nebukadenezale. Mukanda wene wakhalele muzuela egi:

4 “Eji ndaga jiazuela Yehowa Nzambi wa masuta, Nzambi wa Isalele gudi athu agasue ayile mu uhiga, athu akatudile muene gu Yelusalema ha guatuma gu Babilona, 5 ‘tungenu jinzo mukhale muene, kunenu mitshi ya mabundu mudie mabundu enji. 6 ‘Hagenu akhetu, vualenu ana a mala nu a akhetu; zulenu akhetu mukunda nu an’enu a mala, an’enu a akhetu aye nji mu ulo, hagula ene nji ajiya guvuala ana a mala nu a akhetu. Divudisenu guene, muzondjigo. 7 Kambenu guhuima mu dimbo ngamitumi mu uhiga, kombelelenu Yehowa mukunda nu dimbo diene, handaga gula didi mu guhuima, enue nji mbamukhala mu guhuima. 8 Handaga Yehowa Nzambi wa masuta, Nzambi wa Isalele, wazuela egi: “Mubembigo egi baprofete enu nu nganga-ngombo jienu jidi mukatshi dienu jimihuige, mulandulago nzoji jidi ene mulota. 9 Handaga ‘adi gumiwambela profesi jia mambo mu jina diami. Ngaatumilego,’ Yehowa wazuela.”’”

10 Handaga Yehowa wazuela egi, ‘tangua ivo 70 mbayitagana gu Babilona, mbangumiwunguluga luko, mbangutagenesa ndaga ngamilayele, mbangumivutula ha fundo edi.’

11 Yehowa wazuela egi: “‘Handaga ngudi mujiya muabonga ndaga ngudi mutangiza mukunda nu enue, ngudi mutshigina mukhale mu guhuima, ngushigo mutshigina mumone lamba; ngudi mutshigina gumihana gusuanguluga mu masugu adi muza nu felela.’ 12 Enue mbamungutamega, mbamuza, mbamungukombelela, ame mbangumitegelela.’

13 “‘Mbamungukamba, mbamunguheta, handaga mbamungukamba nu mitshima yenu yagasue. 14 Mbangutshita egi munguhete,’ Yehowa wazuela. ‘Mbangubungisa athu enu agasue ayile mu uhiga, mbangumizula mu ifutshi yagasue nu mu mafundo agasue ngamimuangele, Yehowa wazuela. ‘Mbangumivutula mu gifutshi gienu, fundo muakhalele.’

15 “Uvi muazuelele egi, ‘Yehowa watuhanele baprofete gu Babilona.’

16 “Handaga eyi ndaga Yehowa udi muzuela mukunda nu fumu udi muhinyina ha nguasa ya ufumu ya Davidi nu athu agasue adi mu dimbo, aphangi’enu anyi ayilego n’enu mu uhiga. 17 ‘Yehowa Nzambi wa masuta wazuela egi: “Ngudi guatumila phogo ya khusa, nu nzala, nu misongo ya gisambugila,* mbanguabuisa gifua mabundu a figi abola, mabundu abola diago anyi athu ajiyilego gudia.”’

18 “‘Mbanguasagesa nu phogo ya khusa, nu nzala nu misongo ya gisambugila, mbanguabuisa gifua gima gidi muvuisa ma ufumu agasue a ha mavu woma, gifua gima gia gutewa mukumbu, gifua gima gidi mutuma athu ha gudihula, gifua gima gia gusegulula;* athu a mu ifutshi yagasue mbanguamuanga, mbaavila khabu, 19 handaga ategelelego mbimbi yami inyi ngaatumidile mbala jiavula* mu njila ya enya mudimo ami baprofete,’ Yehowa wazuela.’

“‘Uvi muategelelego,’ Yehowa wazuela.

20 “Enue athu agasue muayile mu uhiga, athu ngakatudile gu Yelusalema ha gutuma gu Babilona, tegelelenu mbimbi ame Yehowa ngudi muzuela. 21 Eyi ndaga yazuela Yehowa Nzambi wa masuta, Nzambi wa Isalele mukunda nu Ahaba mun’a Kolaya, nu mukunda nu Sedesiase mun’a Maseya, anyi adi gumiwambela profesi jia mambo mu jina diami: ‘Ngudi guahana ha mago a Nebukadenezale* fumu wa gu Babilona, muene mbawaashiya ha meso enu. 22 Enya gu Yuda agasue anyi ayile mu uhiga gu Babilona, mbaazuela ndaga mbajiaabuila tangua mbaakhala muta mikumbu, mbaakhala muzuela egi: “Yehowa agubuise gifua Sedesiase nu Ahaba, anyi fumu wa gu Babilona wawotshiele ha tshuya!” 23 Handaga akalagala diago ndaga ya musonyi gu Isalele, ene akalagala uthambi nu akaji’a athu ana khala nawo hehi, azuedi nji mbimbi jia mambo mu jina diami jinyi ngaawambelelego ha guzuela.

“‘“Ame hakhami ngudi mujiya ndaga yene, ame ngudi temue wa ndaga yene,” Yehowa wazuela.’”

24 “Mbawuwambela Shemaya nu Nehelama egi, 25 Yehowa Nzambi wa masuta, Nzambi wa Isalele wazuela egi: “Luholo watuma mikanda mu jina diaye gudi athu agasue ana khala gu Yelusalema, nu gudi nganga-nzambi Sefanya mun’a Maseya nu gudi nganga-nzambi jiagasue ha guzuela egi, 26 ‘Yehowa wagubuisa nganga-nzambi ha fundo dia nganga-nzambi Yoyada ha gutuameza inzo ya Yehowa, hagula utalele muenya malui wagasue udi mutshita ndaga gifua profete, nu hagula umumbe mu milulu;* 27 uvi, mukunda natshi wabalelego* Yelemiya wa gu Anatota udi mutshita ndaga gifua profete mukatshi dienu? 28 Handaga muene watutumi gu Babilona, wazuedi egi: “Mbamukhala ivo yavula guene! Tungenu jinzo mukhale muene, kunenu mitshi ya mabundu mudie mabundu enji.”’”’”

29 Tangua nganga-nzambi Sefanya watangele mukanda wene ha meso a profete Yelemiya, 30 Yehowa wawambelele Yelemiya egi: 31 “Tumila athu agasue ayile mu uhiga mbimbi egi, ‘Yehowa wazuela mukunda nu Shemaya wa gu Nehelama egi: “Shemaya wamiwambela profesi ikhale ame ngamutumilego, wakambi nji gumitshiginyisa ndaga jia mambo. 32 Gishina giene Yehowa wazuela egi: ‘Henyaha ngudi muhana Shemaya wa gu Nehelama nu ajigulu enji ndola. Gushigo nga nu muthu mumoshi wa mu fami yenji mbawuhuluga mukatshi dia athu awa, muene mbagashigo mumona ndaga jiabonga mbangukalegela athu ami, handaga watumi athu ha gulumbugila Yehowa.’ Yehowa wazuela’”’”