Yelemiya
28 Mu givo giene gimoshi, mu mbeji ya thano ya givo gia nguana, mu gisendeselo gia uhinyinyi wa Sedesiase fumu wa gu Yuda, profete Hananiya mun’a Azule wa gu Gibeona wanguwambelele gutuama dia inzo ya Yehowa, ha meso a nganga-nzambi nu a athu agasue egi: 2 “Yehowa Nzambi wa masuta, Nzambi wa Isalele wazuela egi: ‘Mbangubogola muhitu wa fumu wa gu Babilona. 3 Ivo iyadi ishigo muhua, mbanguvutula ikadigilo yagasue ya mu inzo ya Yehowa ha fundo edi, inyi fumu Nebukadenezale wa gu Babilona wazudile ha fundo edi ha guya nayo gu Babilona.’” 4 “‘Mbanguvutula Yekoniya mun’a Yoyakime fumu wa gu Yuda ha fundo edi nu enya Yuda agasue anyi ayile mu uhiga gu Babilona, handaga mbangubogola muhitu wa fumu wa gu Babilona.’ Yehowa wazuela.”
5 Gungima profete Yelemiya watele maga nu profete Hananiya ha meso a nganga-nzambi nu a athu agasue akhalele agumagana mu inzo ya Yehowa. 6 Profete Yelemiya wazuelele egi: “Amen!* Yehowa atshite ngenyi! Yehowa atagenese profesi yaye, avutule ikadigilo yagasue ya mu inzo ya Yehowa ha fundo edi nu athu agasue ayile mu uhiga gu Babilona! 7 Uvi ngabuba, tegelela ndaga eji ngudi muzuela ha meso aye nu ha meso a athu agasue. 8 Sendese mualeha, baprofete anyi adiangele gukhala gutuama diami nu aye akhalele muzuela profesi mukunda nu ifutshi yavula nu ma ufumu akoma nu mukunda nu ita nu malamba nu misongo ya gisambugila.* 9 Gula profete wazuela profesi yatadila guhuima, gungima mbimbi yenji yatagenesewa, ngenyi mbaajiya egi Yehowa watumi diago profete muene.”
10 Hene profete Hananiya wazudile muhitu wakhalele ha shingo ya profete Yelemiya, wawuboguele. 11 Gungima Hananiya wazuelele ha meso athu agasue egi: “Yehowa wazuela egi, ‘ivo mbadi ishigo muhua, mbangubogola muhitu wa fumu Nebukadenezale wa gu Babilona udi ha shingo ya ifutshi yagasue, gifua luholo muhitu owu wabogoga.’” Gungima Yelemiya wayile genji.
12 Tangua profete Hananiya waboguele muhitu wakhalele ha shingo ya Yelemiya, Yehowa wawambelele Yelemiya egi: 13 “Nda uwambele Hananiya egi, ‘Yehowa wazuela egi: “Aye wabogola mihitu ya mitshi, uvi mihitu ya utadi mbayilondewa ha fundo diayo.” 14 Handaga Yehowa Nzambi wa masuta, Nzambi wa Isalele wazuela egi: “Mbanguhaga muhitu wa utadi ha shingo ya ifutshi eyi yagasue, hagula ikalegele fumu Nebukadenezale wa gu Babilona, adi naye gumukalegela mudimo. Mbangumuhana nu jiene shitu jiabala jia mu foto.”’”
15 Gungima profete Yelemiya wawambelele profete Hananiya egi: “Oo Hananiya, ngabuba, tegelela! Yehowa gagutumilego, uvi aye watumi athu awa ha gutshigina ndaga jia mambo. 16 Gishina giene Yehowa wazuela egi: ‘Tala! Ngudi gugukatula ha mavu. Mbawufua mu givo egi, handaga watumi athu ha gulumbugila Yehowa.’”
17 Hene profete Hananiya wafuile mu givo giene, mu mbeji ya 7.