Yelemiya
26 Eji ndaga jiazuelele Yehowa gu gisendeselo gia uhinyinyi wa Yoyakime mun’a Yoziase fumu wa gu Yuda: 2 “Yehowa wazuela egi, ‘magana mu gibanzala gia inzo ya Yehowa, uzuele ndaga jiatadila athu agasue a mu membo a gu Yuda, anyi anaza ha gukombelela mu inzo ya Yehowa. Awambele ndaga jiagasue ngaguwambela, ubembigo nga ndaga imoshi. 3 Ngenyi mukut’awo agasue ajiya gutegelela nu ajiya gubemba makalegelo awo abola, ngenyi mbangusombegesa matangi’ami mukunda nu malamba ngudi mutshigina guabatela mukunda nu makalegelo awo abola. 4 Awambele egi: “Yehowa wazuela egi, ‘gula muatuna gungutegelela, muatuna gunemesa mukhuala ngahagele gutuama dienu, 5 nu muatuna gutegelela mbimbi jia enya mudimo ami baprofete ngudi gumitumila mahugo avula, anyi muatunyile gutegelela, 6 ngenyi mbangubuisa inzo eyi gifua Shilo, mbangubuisa dimbo edi gifua gima gia gutela mikumbu gudi ifutshi yagasue ya ha mavu.’”’”
7 Nganga-nzambi nu baprofete nu athu agasue avile mbimbi eji jiazuelele Yelemiya mu inzo ya Yehowa. 8 Tangua Yelemiya wamanesele guzuela ndaga jiagasue jiamuwambelele Yehowa ha guwambela athu agasue, nganga-nzambi nu baprofete nu athu agasue amukuatele, azuelele egi: “Udi naye gufua. 9 Mukunda natshi wazuedi profesi mu jina dia Yehowa egi, ‘inzo eyi mbayibua gifua Shilo, nu dimbo edi mbadishiyiwa, mbagusadigo nga nu muthu’?” Athu agasue ajietele Yelemiya mu inzo ya Yehowa.
10 Tangua manene a gu Yuda avile mbimbi jiene, akatugile gu inzo ya fumu* ayile gu inzo ya Yehowa, akhalele hashi gutuama dia mufulo uhe-uhe wa Yehowa. 11 Nganga-nzambi nu baprofete awambelele manene nu athu agasue egi: “Muthu yowu udi naye gushiyiwa, handaga wazuedi ndaga jiabola mukunda nu dimbo edi, enue hakhenu muadivila ndaga yene.”
12 Yelemiya wawambelele manene agasue nu athu agasue egi: “Idi Yehowa wangutumi ha guzuela mbimbi jiagasue jia profesi muavi mukunda nu inzo eyi nu mukunda nu dimbo edi. 13 Henyaha sombegesenu njila jienu nu makalegelo enu, tumagelenu mbimbi ya Yehowa Nzambi wenu, ngenyi Yehowa mbawusombegesa matangi enji mukunda nu malamba azuedi muene mukunda nu enue. 14 Uvi ame ngudi ha mago enu, ngutshitenu yagasue mudi mumona egi idi yabonga nu yatagana gu meso enu. 15 Uvi jiyenu egi gula muangushiya, mahatshi a muthu gatshitshilego gubola mbaakhala holu dia mito yenu nu holu dia dimbo edi, nu holu dia athu a mu dimbo edi, handaga ngudi gumiwambela giamatshidia egi, Yehowa wangutumi ha guzuela mbimbi jiagasue muavi.”
16 Gungima manene nu athu agasue awambelele nganga-nzambi nu baprofete egi: “Muthu yowu gashigo naye gufua, handaga wazuedi mu jina dia Yehowa Nzambi wetu.”
17 Akulu ako a mu gifutshi azugile nji mu molu, asendesele guwambela athu agasue egi: 18 “Mika wa gu Moleshete wakhalele muzuela profesi mu masugu a fumu Ezekiase wa gu Yuda, wawambelele athu agasue a gu Yuda egi, ‘Yehowa Nzambi wa masuta wazuela egi:
“Siona mbayiphundjiwa gifua dihia,
Yelusalema mbayibua makhulu,
mulundu wa tempelo* mbawubua gifua tumilundu tua mu gishitu.”’*
19 “Fumu Ezekiase wa gu Yuda nu enya gu Yuda amushiyile ba? Ndo, muene wavidile Yehowa woma, wabubidile Yehowa ha gumuvila khenda, hene Yehowa wasombegesele matangi enji mukunda nu malamba akhalele muene mutshigina guabatela. Uvi henyaha tudi mutshigina gudibatela malamba akola esue hakhetu.
20 “Guakhalele nu yala mumoshi wazuelele profesi mu jina dia Yehowa, jina dienji Uriya mun’a Shemaya wakatugile gu Kiriyate-Yalima, wazuelele profesi mukunda nu dimbo edi nu gifutshi egi, mbimbi jienji jiakhalele gifua jia Yelemiya. 21 Fumu Yoyakime nu masuta enji agasue a ngolo nu manene enji agasue avile ndaga yene, hene fumu wakambele gumushiya. Tangua Uriya wavile ndaga yene, wavile woma, walengele gu Ejipitu. 22 Gungima fumu Yoyakime watumile Elenatana mun’a Akebole nu mala ako ha gumuhata gu Ejipitu. 23 Akuatele Uriya gu Ejipitu, ajile n’enji gudi fumu Yoyakime, muene wamushiyile nu phogo ya khusa, wabishidile kimbi gienji gu malumba ana funda athu agasue.”
24 Uvi Ahikama mun’a Shafane wabambele Yelemiya, hene amuhanelego ha mago a athu hagula ashiyiwe.