Yelemiya
25 Mu givo gia nguana gia uhinyinyi wa Yoyakime mun’a Yoziase fumu wa gu Yuda, Nzambi wawambelele Yelemiya ndaga jiatadila athu agasue a gu Yuda. Givo giene giakhalele givo gia thomo gia uhinyinyi wa fumu Nebukadenezale* wa gu Babilona. 2 Eji ndaga jiazuelele profete Yelemiya mukunda nu* athu agasue a gu Yuda nu mukunda nu athu agasue ana jinga gu Yelusalema, waawambelele egi:
3 “Sendese mu givo gia 13 gia uhinyinyi wa Yoziase mun’a Amona fumu wa gu Yuda uu nu mangino, ivo 23 yabalega gale, Yehowa wana zuela nu ame, ngana landula* gumiwambela ndaga yene, uvi enue muanago guvua. 4 Yehowa wamitumidile enya mudimo enji baprofete; walanduile guatuma,* uvi enue muategelelego, muahagelego matshui enu ha guvua. 5 Ene akhalele muzuela egi: ‘Tuamibubila, muthu wagasue mukatshi dienu abembe makalegelo enji abola nu ndaga jienji jiabola. Ngenyi mbamukhala ivo yavula mu gifutshi giahanele Yehowa gudi enue nu akhakh’enu sendese mualeha. 6 Mulandulago nzambi jiko, mujikombelelago, mujifugamelago nji. Munguhanyigo khabu nu ima mualondele nu mago enu, gula ndo mbangumibatela malamba.’
7 “‘Uvi enue muangutegelelego, muanguhanele khabu nu ima mualondele nu mago enu, muadikambele malamba.’ Yehowa wazuela.
8 “Gishina giene Yehowa Nzambi wa masuta wazuela egi: ‘“Luholo muatunyile gutumagela mbimbi jiami, 9 ngudi mutamega fami jiagasue jia gu khanda ya nord, nu fumu Nebukadenezale wa gu Babilona muenya mudimo wami. Ngudi guatamega ha guza muluisa gifutshi egi nu athu agasue a mu gifutshi giene nu ifutshi yagasue idi hehi. Mbanguhana athu ene nu ifutshi yene ha mago awo hagula ishiyiwe, ene mbaabua gifua gima gidi mukuatesa woma nu gifua gima gia gusegulula,* ifutshi yene mbayibua makhulu mayilago.” Yehowa wazuela. 10 “Mbangusugisa milolo ya gusuanguluga nu gusuanguluga mukatshi diawo; dijui dia yala udi muzula mukhetu mu ulo nu dia mukhetu udi muzudiwa mu ulo mbadishigo muvuiwa luko. Matululu a muthu udi mukhukha mbuto mbaashigo muvuiwa luko, muenda nji mbawujima. 11 Gifutshi egi giagasue mbagibua makhulu, mbagibua gifua gima gidi mukuatesa woma. Ifutshi yagasue idi hehi mbayikalegela fumu wa gu Babilona ivo 70.”’
12 “‘Uvi tangua ivo 70 mbayitagana, mbanguhana fumu wa gu Babilona nu gifutshi gienji ndola mukunda nu gubola guawo,’ Yehowa wazuela. ‘Mbangubemba gifutshi gia enya Kaldea gia githuhu mayilago. 13 Mbangutagenesa mbimbi jiami jiagasue ngazuelele mukunda nu gifutshi giene nu profesi jiagasue jiazuelele Yelemiya mukunda nu ifutshi yagasue jidi jia gusonega mu mukanda owu. 14 Enya Babilona mbaabua ahiga a ifutshi yavula nu a mafumu akoma. Mbanguahana ndola mukunda nu makalegelo awo abola nu mukunda nu midimo ya mago awo.’”
15 Yehowa Nzambi wa Isalele wanguwambelele egi: “Zula khopho edi dia matombe a khabu didi ha koko diami, dinuise ifutshi yagasue mbangugutuma. 16 Ene mbaanua, mbaaya nu gukhakhuga nu gutshita ndaga gifua enya malui, handaga ngudi mutuma phogo ya khusa mukatshi diawo.”
17 Gungima ngazudile khopho diene ha koko dia Yehowa, ngadinuishile ifutshi yagasue yangutumile Yehowa. 18 Ngasendesele thomo nu Yelusalema, gungima nu membo a gu Yuda nu mafumu enji nu manene enji, ha gubuisa membo ene makhulu, nu ha guabuisa gifua gima gidi mukuatesa woma, nu gima gia gusegulula nu gia guta mukumbu, gifua luholo idi mangino. 19 Gungima ngaanuishile Farao fumu wa gu Ejipitu nu enya mudimo enji, nu manene enji nu athu enji agasue, 20 nu athu ako agasue a ifutshi iko akhalele mukatshi diawo. Ngaanuishile nji mafumu agasue a mu gifutshi gia Uze, nu mafumu agasue a mu gifutshi gia enya Filistiya: Mafumu a gu Asekelone, nu a gu Gaza, nu a gu Ekrone nu mafumu a enya Asedode anyi asalele. 21 Ngaanuishile nji enya Edome nu enya Moaba nu enya Amona; 22 nu mafumu agasue a gu Tile, nu mafumu agasue a gu Sidona, nu mafumu agasue a gu hongo dia mu kianga; 23 nu enya Dedane nu enya Tema nu enya Buze nu athu agasue ana bunga sanga gu tempelo. 24 Ngaanuishile nji mafumu agasue a enya Alabe, nu mafumu a athu a maluholo agasue ana khala mu mavu a luselenga; 25 nu mafumu agasue a gu Zimiri nu mafumu agasue a gu Elama nu mafumu agasue a enya Mede; 26 nu mafumu agasue a gu khanda ya nord adi hehi nu anyi adi gualeha, mukut’awo agasue mbaanua matombe ene, nu ma ufumu ako agasue adi ha mavu. Fumu wa gu Sheshake* nji mbawunua matombe ene gungima diawo.
27 “Udi naye guawambela egi, Yehowa Nzambi wa masuta, Nzambi wa Isalele wazuela egi: “Nuenu matombe, amikuate, muluse, mubue hagula mukhadigo luko nu luholo lua guzuga mukunda nu phogo ya khusa ngudi mutuma mukatshi dienu.”’ 28 Gula atuna guzula khopho diene dia matombe didi ha mago aye ha gunua, awambele egi, ‘Yehowa Nzambi wa masuta wazuela egi: “Mudi naye guanua! 29 Handaga talenu! Ngudi musendesa gubata malamba mu dimbo diana tamegewa mu jina diami, na enue ngajiya gumibemba ngenyi gumihana ndola ndo ba?”’
“‘Ndo, ngajiyilego gumibemba ngenyi, handaga ngudi mutuma phogo ya khusa gudi athu agasue a ha mavu,’ Yehowa Nzambi wa masuta wazuela.
30 “Udi naye guawambela profesi eji jiagasue, awambele egi,
‘Yehowa mbawubala* mu dilu,
dijui dienji mbadivuiwa ha fundo dienji dia gijila diana khala muene.
Mbawubala mangololo ha fundo dienji dia gukhala dia ha mavu.
Mbawumba matululu a gusuanguluga gifua athu adi mukama vinyo mu gikamelo gia vinyo,
mbawuyimba nu gusuanguluga tangua mbadibinga muene athu agasue a ha mavu.’
31 ‘Matululu mbaavuiwa uu nu gu songi jia mavu,
handaga Yehowa udi nu mulonga nu ifutshi.
Muene hakhenji mbawusophesa athu agasue.
Muene mbawushiya athu abola nu phogo ya khusa.’ Yehowa wazuela.
32 Yehowa Nzambi wa masuta wazuela egi:
‘Tala! Lamba diakatuga mu gifutshi gimoshi didi muya nu gumuangana mu ifutshi iko.
Gikudi giakola mbagibunda, mbagikatuga mu mafundo a gualeha a ha mavu.
33 “‘Athu mbaashiyiwa gudi Yehowa mu lusugu luene, mbaakhala sendese gu songi imoshi ya mavu uu nu gu songi iko. Mbaashigo mudidiwa, mbaashigo nji mubungishiwa nga gufundjiwa. Mbaabua gifua tuji tua shitu mu mavu.’
34 Enue abambi a imeme, hagenu kioji, kalugugenu!
Enue afumi’a shitu, dilangumunenu mu mavu,
handaga tangua dienu dia gushiyiwa nu dia gumuangewa diatagana.
Mbamubua, mbamumuangana gifua bungu dia ndando.
35 Abambi a imeme ashigo nu fundo dia gulenga,
afumi’a shitu ajiyilego gudisuega.
36 Vuenu matululu a gudila gua abambi a imeme
nu kioji gidi muhaga afumi’a shitu,
handaga Yehowa udi mubolesa muangu wana dia shitu jiawo.
37 Mafundo akhalele mukhala athu mu guhuima asala a githuhu
mukunda nu khabu jiakola jia Yehowa.
38 Muene wabemba fundo dienji dia gudisuega gifua mutumba wa khoshi,
handaga gifutshi giawo giabua gifua gima gidi mukuatesa woma,
mukunda nu phogo ya khusa ya khuta,
nu mukunda nu khabu jienji jiakola.”