Yelemiya
2 Mbimbi ya Yehowa yajile gudi ame, wanguwambelele egi: 2 “Nda, uwambele athu a gu Yelusalema egi: ‘Yehowa wazuela egi:
“Ngudi muwunguluga muabonga guzumba* guaye guakola tangua wakhalele muvuala,
guzumba wamonesele tangua ngagutombele ha guguzula mu ulo,
nu luholo wangulanduile mu mavu a luselenga,
mavu anago gukunyiwa mbuto.
3 Isalele wakhalele wa gijila gu meso a Yehowa, mbuto jia thomo jiakatudile muene mu dihia.”’
‘Athu agasue akhalele gumusagesa, akhalele mubua mu gubola.
Malamba akhalele guabuila,’ Yehowa wazuela.”
4 Oo ajigulu a Yakoba, nu enue fami jiagasue jia enya Isalele,
tegelelenu mbimbi ya Yehowa.
5 Yehowa wazuela egi:
“Gubola gutshi akhakh’enu amonele gudi ame
hene awungaganele gualeha nu ame,
nu alanduile isongo ya githuhu ha gudibuisa athu a githuhu?
6 Ene ahudilego egi: ‘Yehowa udi gui,
muthu watuzolele mu gifutshi gia Ejipitu,
muthu watutuamezele mu mavu a luselenga,
mu mavu a gimigina nu a mawina,
mu mavu a gikalala nu a phipha yakola,
mu mavu anyi nga muthu ganago gubalega guene,
nu athu anago gujinga guene?’
7 Gungima ngamibatele mu gifutshi gidi nu mitshi ya mabundu,
ha gudia mabundu enji nu ima yenji yabonga.
Uvi enue muajile, muabolesele gifutshi giami;
muabuishile khapho diami gifua gima gia usala.
8 Nganga-nzambi jiahudilego egi: ‘Yehowa udi gui?’
Athu ana longesa mikhuala angujiyilego,
abambi a imeme angulumbugile,
baprofete azuelele profesi mu jina dia Bale,
alanduile athu anyi ajiyilego guakuatesa.
9 Yehowa wazuela egi: ‘Gishina giene mbanguzuelela luko ndaga jienu,
mbanguzuelela nji ndaga jia ajigulu enu.’
10 ‘Uvi zawugenu muye mu mavu a Kitime adi gu khulo ya muta,* mutale.
Ayi, tumenu athu gu Kedale, atale muabonga;
talenu gula ndaga ya luholo elu yabuile gale.
11 Gudi nu gifutshi giasombegesele gale nzambi jienji nu ima inyi ishigo nzambi ba?
Uvi athu ami asombegesa lutumbu luami nu ima ya githuhu.’
12 Yehowa wazuela egi: ‘Aye dilu, dihule diago muavula mukunda nu ndaga eyi;
digita nu woma wakola mukunda nu ndaga eyi ya usala,
13 handaga athu ami akalagala ndaga mbadi jiabola:
Angutunyi ame gito gia meya a monyo,
adihagela* mawina a meya,
mawina a meya adi a gubudiga mianji, anyi ajiyilego gubamba meya.’
14 ‘Isalele udi muenya mudimo nga muhiga wavualewe mu inzo ya fumi’enji ba?
Na, mukunda natshi muene wahanewe ha mago a nzangi?
15 Mitumba ya koshi ya mubalela;
yabala mu majui akola.
Yabuisa gifutshi gienji gifua gima gidi muhana woma.
Membo enji akondewe, gushigo nga nu muthu guene.
16 Enya gu Nofe* nu gu Taphanese adi mudia holu dia gibozobozo* gia muto wenji.
17 Ishigo aye hakhaye wadikambele ndaga eji
tangua watunyile Yehowa Nzambi waye,
hakhalele muene gugutuameza mu njila ba?
18 Henyaha mukunda natshi udi mukamba njila ya Ejipitu
ha gunua meya a Shihole?*
Mukunda natshi udi mukamba njila ya Asiliya
ha gunua meya a mu muta?*
19 Gubola guaye gugulongese,
gulumbuga guaye gugubalele.*
Ujiye nu ukotelese luholo gutuna
Yehowa guana khala diago guabola nu gualula.
Aye wanguvidilego woma,’ Yehowa Nzambi wa masuta, Fumu Wabalega Gukoma wazuela.
20 ‘Sendese mualeha, ngaboguele muhitu waye,
ngabatuile nji malenge aye.
Uvi aye wazuelele egi: “Ngushigo gugukombelela.”
Wakhalele mubanda khata, ha gutshita uthambi
holu dia tumilundu tuagasue nu ha mushin’a mutshi wagasue wakoma udi nu mayiji avula.
21 Ngagukunyile gifua mutshi wa vinyo yabenga wabalega gubonga, mbuto jienji jiagasue jiakhalele jiabonga.
Luholo lutshi wasombegesa gutuama diami ha gubua thango jiabola jia mutshi wa vinyo unu ngakunyilego?’
22 ‘Ikhale wazua meya nu mukele wa mukuku* nu wadikula savo yavula,
Gubola guaye mbagushigo muhua gutuama diami.’ Yehowa Fumu Wabalega Gukoma wazuela.
23 Luholo lutshi wajiya guzuela egi: ‘Ngadibuishilego usala,
ngalanduilego Bale?
Tala njila wawendele mu baba.
Tangiza ndaga watshitshile.
Udi gifua mutumba wa shamo ya mukaji yabala phushi,
unu ushigo nu fundo dia guya, udi muya phushi gugu nu gugu,
24 gifua phunda ya mukaji yajidila gale mu mavu a luselenga,
idi munana muhehe mu mazulu tangua idi nu nzala yakola ya gubungisa muila.
Nanyi wajiya guyitunyisa tangua idi mu sungi ya gumita?
Phunda jia milume mbajishigo muhuila ha guyikamba,
handaga mbajiyiheta mu sungi* yenji ya gumita.
25 Bamba malu aye hagula asadigo a githuhu,
bamba nji muminyo waye hagula umiginago nu luhungu.
Uvi aye wazuelele egi: ‘Udi mulaba gaye gudihudisa!
Ngazumbi gale gami ngenji,*
jiene mbangulandula.’
26 Enya Isalele nu mafumu awo nu manene awo,
nu nganga-nzambi jiawo nu baprofete awo,
avuishiwa musonyi,
gifua luholo nzangi yana vua musonyi gula ayikuata.
27 Ene adimuwambela mutshi egi: ‘Aye udi sh’ami,’
adi muwambela seso egi: ‘Aye wanguvualele.’
Adi gunguwasa dikunda, ashigo gungutala.
Uvi mutangua dia lamba ene mbazuela egi,
‘zuga utuhuluise!’
28 Henyaha nzambi jiaye walondele jidi gui?
Jizuge gula jiajiya guguhuluisa mu tangua dia lamba,
handaga nzambi jiaye jiabua jiavula gifua mudi guvula gua membo aye, Oo Yuda.
29 ‘Mukunda natshi mudi gunguluisa?
Mukunda natshi mukut’enu agasue mudi mulandula gungulumbugila?’ Yehowa wazuela.
30 Ngalabele gami gubeta an’enu,
uvi ene atshiginyilego ndola.
phogo jienu jia khusa jiashiyile baprofete enu,
gifua khoshi idi mukamba gushiya shitu ha gudia.
31 Oo gindongo egi, tangingizenu enue hakhenu mbimbi ya Yehowa.
Ngabua gifua mavu a luselenga gudi Isalele ba?
Nga, gifua gifutshi gia phipha yakola idi musagesa ba?
Mukunda natshi athu awa, athu ami, azuedi egi: ‘Tudi muwenda getu gifua luholo tuatshigina.
Mbatushigo luko muza gudi aye’?
32 Mukhetu wa gandongo wajiya gujimbila ima yenji ya gudisembegela ba?
Mukhetu wazudiwa mu ulo wajiya gujimbila mukaba wenji wa ha thulo* ba?
Uvi athu ami angujimbidile gale sendese mualeha diago.
33 Oo mukhetu, udi diago mukamba mala nu gutema guagasue hagula aguzumbe!
Walonguga luholo lua gutshita ndaga jiabola.
34 Songi jia mulele waye jidi nu mahatshi a phutu* jiakalegelego gubola,
ikhale ngaamonelego mubula inzo yaye ha gungina mukatshi;
songi jiagasue jia mulele waye jidi nu mahatshi.
35 Uvi aye, udi muzuela egi: ‘Ngatshitshilego nga gima.
Idi yadiago egi Nzambi gashigo luko gunguvuila khabu.’
Henyaha ngudi guguhana ndola
handaga wazuedi egi: ‘Ngatshitshilego gubola.’
36 Mukunda natshi udi mutangiza egi gusombegesa njila jiaye gushigo mulonga?
Mbawuvua nji musonyi mukunda nu Ejipitu,
gifua luholo wavuile musonyi mukunda nu Asiliya.
37 Gishina giene mbawuzoga mago ha muto,
handaga Yehowa watunyi athu wana shila mutshima;
ene mbaashigo gugukuatesa nga hazonda.”