Yelemiya
1 Eji mbimbi jia Yelemiya mun’a Hilikiya, munu wakhalele nganga-nzambi gu Anatota mu mavu a Benjame. 2 Mbimbi ya Yehowa yajile gudi muene mu masugu a Yoziase mun’a Amona fumu wa gu Yuda, mu givo gia 13 gia uhinyinyi wenji. 3 Mbimbi yene yajile nji mu masugu a Yoyakime mun’a Yoziase fumu wa gu Yuda, uu nu gu gisugishilo gia ivo 11 ya uhinyinyi wa Sedesiase mun’a Yoziase fumu wa gu Yuda, uu nu tangua enya gu Yelusalema ayile mu uhiga mu mbeji ya thano.
4 Yehowa wanguwambelele egi:
5 “Ngadiangele gugujiya gutuama egi ngugulonde mu vumo,
ngagubuishile wa gijila gutuama egi uvualewe.
Ngagubuishile profete wa ifutshi.”
6 Uvi ame ngazuelele egi: Aa! Yehowa Fumu Wabalega Gukoma,
ngushigo mujiya guzuela, ngudi gami mona wazonda.
7 Yehowa wanguwambelele egi:
“Uzuedigo egi: ‘Ngudi gami mona wazonda.’
Handaga udi naye guya gudi athu agasue mbangugutuma,
udi naye nji guawambela ndaga jiagasue mbanguguwambela.
8 Waavuilago woma,
handaga ‘ngudi nu aye ha guguhuluisa,’ ame Yehowa nga zuela.”
9 Yehowa wasunuine koko dienji, wangukuatele gu kano. Gungima Yehowa wanguwambelele egi: “Ngamba mbimbi jiami mu kano diaye. 10 Tala, mangino ngaguhana ufumu holu dia ifutshi nu holu dia ma ufumu ako, ha guvuza nu gubuisa, ha gushiya nu gumuanga, ha gutunga nu gukuna.”
11 Yehowa wanguwambelele luko egi: “Yelemiya, itshi udi mumona?” Ngamuvutudile egi: “Ngudi mumona luthango lua mutshi wa amandiye.”*
12 Yehowa wanguwambelele egi: “Wamonyi muabonga, handaga ngudi mulandula gukhala gikole-kole ha gutagenesa mbimbi yami.”
13 Mbimbi ya Yehowa yajile gudi ame mu mbala ya mbadi, yazuelele egi: Itshi udi mumona? Ngavutudile egi: “Ngudi mumona nzungu ya guhengelela, kano dienji didi mutala gu khanda ya nord.” 14 Gungima Yehowa wanguwambelele egi:
“Malamba mbaakatuga gu khanda ya nord,
mbaabuila athu agasue a mu gifutshi.
15 Yehowa wazuela egi: ‘Ngudi mutamega fami jiagasue jia ma ufumu a gu nord,
mbajiza; fami yagasue mbayihaga nguasa yenji ya ufumu
ha mifulo ya Yelusalema,
ha guluisa ibayi gu khanda jiagasue
nu ha guluisa membo agasue a gu Yuda.
16 Mbanguafuisa milonga mukunda nu gubola guawo guagasue,
handaga ene angutunyile,
adi mukanduisa mishi ya milambu yawo gudi nzambi jiko,
adi mufugamela ima alondele nu mago awo.’
17 Uvi aye, udi naye gudilondega ha gutshita ndaga ngudi guguwambela,
udi naye gumagana ha guawambela ndaga jiagasue ngaguwambela.
Waavilago woma,
hagula ame nji nguguvuisago woma gutuama diawo.
18 Mangino ngagubuisa gifua dimbo didi nu ibayi yakola,
gifua kunji dia utadi, nu ibayi ya kuivre gutuama dia gifutshi giagasue,
gutuama dia mafumu a gu Yuda nu manene awo,
gutuama dia nganga-nzambi jiawo nu athu a mu gifutshi.
19 Ene mbaaguluisa diago,
uvi mbaashigo gugubinga,
handaga ‘ame ngudi nu aye ha guguhuluisa.’ Yehowa wazuela.”