Skucha Bon ora Nan Ta Papia ku Bo

1-2. (a) Kiko Yehova ta hasi pa su pueblo awe? (Salmo 23:​1, 2, 5) (b) Kiko nos lo trata den e artíkulo akí?

AWE, Yehova ta duna nos kuminda spiritual na abundansia. P’esei nos ta sinti meskos ku David ora ku el a bisa: “Yehova ta mi Wardador. Mi no tin falta di nada.”—Lesa Salmo 23:​1, 2, 5.

² Un kaminda ku nos ta haña kuminda spiritual ta na nos reunionnan. Ei hopi biaha nos ta skucha kosnan ku nos a yega di tende kaba. Pero nos tur mester di e rekordatorionan ei asta si nos tin hopi tempu den e bèrdat. (2 Ped. 1:12) Pero bo ta haña ku ta difísil pa skucha i presta atenshon na un informashon ku bo a yega di tende vários biaha kaba? Si ta asina, e artíkulo akí lo yuda bo. E artíkulo akí lo mustra dikon ta importante pa bo presta atenshon na reunion. Tambe lo e yuda e rumannan riba plataforma pa sa kiko nan tin ku hasi pa keda ku atenshon di nan públiko. Ademas, nos lo wak kiko kada un di nos por hasi pa presta atenshon. Pero promé laga nos wak ken eigenlijk ta siñando nos.

KÒRDA KU TA YEHOVA TA PAPIANDO KU NOS

3. Kiko Yehova ta usa pa siña nos, i kon su sirbidónan ta usa esei pa siña hende?

³ Yehova ta usa Beibel pa siña nos. (2 Tim. 3:​16, 17) P’esei Hesus tabata usa Skritura ora e tabata siña hende. Loke el a hasi ei, a pone nan puntra: “Kon bini e hòmber akí konosé Skritura asina bon? E no a bai e skolnan religioso, tòg?” (Huan 7:15) Hende ku di kurason tabata ke siña tokante Yehova tabata kontentu pa tende Hesus splika e Palabra di Dios. Den promé siglo, kristiannan manera Pablo i Apolo tambe a usa e Palabra di Dios pa yuda otro hende sa kiko Yehova ke pa nan hasi. (Echo. 17:​2, 3; 18:​24, 28) Nos sa ku tur loke tin den nos artíkulonan, programanan di broadcasting, boskehonan di diskurso i vidionan ta basá riba Beibel. Hopi bishitante ta keda masha sorprendí ku nos ta usa Beibel asina tantu den nos reunionnan. E rumannan ku tin parti no ta djis lesa e tekstonan pero nan ke yuda tur hende presente komprondé e tekstonan i apliká nan.—Lúk. 24:32.

4. Dikon ta masha importante pa nos skucha bon na reunion?

⁴ Den tempu di Beibel, ora hende a tende e palabranan “skucha” i “tende,” nan sa ku e tabata nifiká obedesé. Meskos tambe, ora nos bai nos reunionnan i nos realisá ku ta Yehova ta papiando ku nos i ku e ke yuda nos komprondé kiko e ke pa nos hasi, lo ta mas fásil pa nos obedes’é. Nos por tin sigur ku ora nos skucha na reunion i apliká loke nos siña, Yehova lo ta masha kontentu ku nos.—Pro. 27:11.

DIKON NOS MESTER SKUCHA BON NA REUNION?

5. Ki nos amor pa Yehova ta duna nos gana di hasi? (Huan 4:​23, 24; 1 Huan 5:3)

⁵ Pasobra nos stima Yehova. (Mat. 22:37) Mas nos siña tokante Yehova, mas nos amor p’e ta krese. E amor ei ta duna nos gana di skucha loke e ta bisa den Beibel, di obedes’é i di ador’é na e manera ku e ke.—Lesa Huan 4:​23, 24; 1 Huan 5:3.

6. Kiko Yehova ta siña nos na nos reunionnan?

⁶ Pasobra nos stima hende. (Mat. 22:39) Na reunion, Yehova ta siña nos kon pa yuda nos rumannan i tambe hende ku no konos’é ainda. Por ehèmpel, e foyeto Stima Hende—Yuda Hende Bira Disipel ta siña nos kon pa stima e hendenan den sirbishi. Abo ta haña ku ta difísil pa kuminsá papia ku hende? Si ta asina, ta bon pa bo presta atenshon na e partinan durante e sekshon di “Sea Diligente den Sirbishi.”

7. Dikon ta masha importante awe pa nos sigui skucha loke Yehova ta bisa?

⁷ Pasobra nos stima bida. Den pasado ora sirbidónan di Yehova tabata obedesé Yehova, esei tabata nifiká bida pa nan, i meskos ta konta pa nos tambe awe. (Deu. 32:​44-47) Ora nos skucha bon na reunion, nos ta haña animashon ku ta yuda nos sigui perseverá ku pasenshi te ora ku e mundu nobo yega. (Rom. 8:25) Awor mas ku nunka nos mester skucha loke Yehova ta bisa pasobra nos ta bibando den e último dianan i nos mester keda alerta.—Mat. 24:​42-44; Rev. 1:3.

KON PA YUDA OTRONAN SKUCHA NA REUNION

8. Dikon ruman ku ta duna diskurso mester hasi esfuerso pa mehorá nan manera di siña hende?

⁸ Ruman hòmbernan ku tin parti na reunion, spesialmente esnan ku ta duna diskurso públiko, mester sigui traha pa mehorá e manera ku nan ta trese un informashon padilanti. Dikon? Pasobra ora un ruman prepará bon pa su diskurso i ta hasi sigur ku tur loke e bisa ta basá riba Beibel, e por duna hende ku no ta Testigu gana pa siña mas tokante e bèrdat. Ademas, e por yuda su rumannan pa sigui wanta duru na e bèrdat. Ta p’esei rumannan ku tin parti na reunion no mester balotá e impakto ku nan parti por tin. Pues pensa kon e siguiente puntonan por yuda bo mehorá bo manera di siña hende. Aunke ku e puntonan ku nos ta bai trata ta spesialmente pa e rumannan ku tin diskurso, ruman ku tin kualke otro parti na reunion tambe por apliká nan.—2 Tim. 4:2; Tito 1:9.

9. Kiko bo por hasi pa bo diskursonan ta fásil pa sigui?

⁹ Pone e puntonan den un forma ku ta fásil pa sigui. Asina ei bo oyentenan por komprondé e puntonan mihó. Si bo tin muchu punto tras di otro, bo oyentenan lo haña difísil pa sigui e diskurso i komprondé e puntonan. Pero kon bo ta logra hasi esei? (1) Na kuminsamentu di bo diskurso, menshoná e puntonan ku bo ta bai trata. (2) Despues trata e puntonan un pa un. Pousa un ratu promé ku bo sigui ku e siguiente punto. (3) Na final di bo diskurso resumí e puntonan ku bo a trata.

10. Dikon ta importante pa haña gana di papia tokante e tópiko?

¹⁰ Haña gana di papia tokante e tópiko. Bo oyentenan lo ripará mesora si bo ta gusta e tópiko ku bo ta papiando di dje. (Pro. 2:​4, 5; Echo. 4:20) P’esei, bo mester hasi esfuerso pa pensa tokante e tekstonan i puntonan ku bo ta bai trata. Un ruman hòmber di Merka ku ta den su 70 aña te ainda ta kòrda un diskurso ku el a skucha tempu e tabata yòn. El a bisa: “Ainda mi ta kòrda kon e diskursante a animá nos pa meditá riba e Palabra di Dios. El a papia ku asina un siguransa, i el a splika na un manera masha fásil kon pa meditá. E diskurso ei a kambia mi bida; el a yuda mi pa buska e lès den mi lesamentu di Beibel i pa hasi mi amistat ku Yehova mas fuerte.”

11. Dikon ta bon pa bo mustra bo oyentenan kon nan por apliká loke Beibel ta bisa den nan bida? (1 Timoteo 4:​13-16)

¹¹ Pensa kiko por yuda bo oyentenan i bisa nan kon nan por apliká esaki. Na lugá di djis duna bo oyentenan informashon, usa Beibel pa animá nan i yuda nan mira kon nan por apliká loke Beibel ta bisa den nan bida. Por ehèmpel, ora ku Timoteo tabata na Efeso, Apòstel Pablo a dun’é konseho spesífiko pa yud’é keda ku un amistat será ku Yehova durante su asignashon. (Lesa 1 Timoteo 4:​13-16.) Pues, pensa kiko bo oyentenan tin mester i laga nan sa kon nan por apliká e informashon ku bo a duna den bo diskurso den nan bida.

12. Dikon ta bon pa bo duna bo diskurso na un manera natural?

¹² Train bo diskurso na bos haltu pa asina papia na un manera natural. Na lugá di lesa presis loke bo tin skirbí riba papel, purba di papia na un manera natural. Ora bo hasi esei, lo ta mas fásil pa bo oyentenan skucha i keda kòrda loke bo ta bisa. E foyeto Dediká Bo Mes na Lesamentu i na Dunamentu di Siñansa ta bisa: “Papia na un manera natural i di kurason.” Ora bo papia di kurason, bo oyentenan lo haña bo diskurso mas interesante i animante.

13. Dikon ta bon pa bo pidi un ruman ku tin eksperensia den duna diskurso pa konseho? (Wak e plachi.)

¹³ Pidi un ruman ku tin eksperensia den duna diskurso pa konseho. Kon bo por hasi esei? Bo por puntra e ruman pa wak bo diskurso. Despues purba di apliká e tepnan ku el a duna bo. Tambe bo por pidié pa skucha bo train bo diskurso na bos haltu pa asina e por bisa bo kiko bo por mehorá. (Pro. 1:5) No ta tur ora nos sa si loke nos ke bisa ta komprendibel òf nò. Pues e ruman por bisa bo kon bo por trese e puntonan padilanti na un manera kla i komprendibel. Nos ke mehorá nos abilidat di siña hende ya asina nos por yuda hende komprondé i apliká e bèrdatnan bunita ku tin den Beibel.a

KON PA SKUCHA MIHÓ NA REUNION

14. Kon nos mester mira Yehova su rekordatorionan? (Salmo 119:​24, 111, 167)

¹⁴ Mas nos apresiá Yehova su rekordatorionan, mas gana nos ta haña pa skucha na reunion. Nos mester di e rekordatorionan di Dios pa asina nos por dil ku nos problemanan durante e último dianan akí. (2 Tim. 3:1) Si tin biaha nos ta haña ku kada bes nos ta keda skucha e mesun kosnan na reunion, ta bon pa nos imitá e manera ku e salmista di Salmo 119 tabata mira Yehova su rekordatorionan.—Lesa Salmo 119:​24, 111, 167.

15. Kon nos por keda mira e importansia di loke nos ta haña na reunion?

¹⁵ Nos por kompará e kuminda spiritual ku nos ta haña for di Yehova meskos ku e mana ku e israelitanan a haña den desierto. (Éks. 16:​15, 31) Na kuminsamentu e israelitanan tabata masha kontentu ku Yehova a duna nan mana. Pero segun ku añanan tabata pasa nan a pèrdè smak den e mana. (Num. 21:5) Meskos awe, nos no mester menospresiá e rekordatorionan ku Yehova ta duna nos. Kontrali na e israelitanan nos mester keda kòrda ku ta Yehova ta papiando ku nos. Nos tin ku kòrda ku esklabo fiel i prudente ta prepará kuminda spiritual pa nos por haña na e momento ku nos mester di dje. Tambe nos mester kòrda ku loke nos ta siña na nos reunionnan ta yuda nos tuma bon desishon i biba pa semper.—Pro. 3:​13, 16-18; Huan 17:3.

16. Kiko a yuda algun ruman ku tin basta tempu den e bèrdat pa skucha mihó na reunion? (Wak e kuadro “Algun Tep pa Yuda Bo Skucha Bon na Reunion.”)

¹⁶ Nos por skucha mihó na reunion si nos apliká e siguiente sugerensianan. Ban wak loke a yuda algun ruman ku tin basta tempu den e bèrdat pa skucha mihó na reunion. Ashley, kende ta sirbiendo Yehova pa mas ku 30 aña, ta bisa: “Un bon preparashon ta loke ta yuda mi presta atenshon na reunion. Si mi no prepará, mi ta haña difísil pa duna komentario i esei ta pone ku mi atenshon ta kita.” József, kende ta sirbiendo Yehova pa 52 aña, ta bisa: “Mi ta gusta skucha tópiko ku mi sa di dje kaba, pasobra e ta yuda mi mira kos for di diferente ángulo i esei ta yuda mi komprondé e tópiko asta mas mihó. Si un ruman no ta dje bon ei den duna diskurso, mi ta purba di enfoká riba e informashon ku e ta trese padilanti en bes di su manera di papia.”

17. Kiko mas bo por hasi pa yuda bo skucha bon na reunion? (Wak e plachi.)

¹⁷ Tin mas tep ku por yuda bo skucha bon na reunion? Sí, ata algun akí: (1) Evitá di kome algu muchu pisá promé ku reunion. (2) Yega trempan i buska un lugá di sinta promé ku reunion kuminsá. (3) Promé ku reunion kuminsá pone bo aparatonan elektróniko na silent i no laga nan distraí bo. (4) Purba di pensa ki puntonan e diskursante lo trata. (5) Purba di wak e diskursante i no loke ta pasando rònt di bo. (6) Hasi anotashonnan kòrtiku òf pinta algu chikitu tokante e puntonan importante. (7) Purba di pensa kon e tekstonan menshoná ta konektá ku otro i ku e puntonan prinsipal. (8) Puntra bo mes: ‘Kon mi por usa e puntonan akí pa yuda un ruman òf un hende den teritorio?’ (9) Promé ku e dia di kongreso òf asamblea, lesa e tema di e dianan, e título di e diskursonan i e tekstonan prinsipal di kada diskurso. (10) Tuma asiento i presta atenshon na e kantika- i vidionan ku tin na kuminsamentu di e programa.

SIGUI SKUCHA DI YEHOVA

18. Dikon nos lo ke sigui skucha bon na reunion?

¹⁸ Laga nos sigui skucha bon na reunion, pasobra asina nos ta laga Yehova guia nos riba “e kaminda korekto.” (Sal. 23:3; 31:3) Anto nos mester di Yehova su guia pa nos por sigui hasi loke ta korekto. P’esei, kada un di nos mester “skucha bon ora nan ta papia” ku nos na reunion i apliká loke nos ta siña den nos bida. (Lúk. 8:18) Nos tur ku ta sigui skucha di Yehova lo ta felis for di awor i lo biba pa semper den futuro.—Sal. 119:​2, 14.