Sirbiendo Yehova pa Kasi 70 Aña na Cuba

Ora mi kòrda bèk, nos tabatin un bida trankil kaminda nos tabata biba. Nos no tabata biba leu for di nos famianan part’i tata. Nos tabatin sufisiente di kome i nos tabata felis.

Ora mi tabatin mas o ménos sinku aña mi mayornan a kuminsá studia Beibel ku Walton Jones. E tabata prediká ku masha smak i e tabata kana kasi dies ora pa yega nos pueblito. Kada biaha ku e tabata bini, mayoria di mi famianan tabata bai kas di mi tawelanan pa nan papia tokante Beibel kuné. E kòmbersashonnan ei tabata dura oranan largu. Mi mayornan i e dos rumannan chikitu di mi tata, esta, Pedro i Ela, tabata gusta loke nan tabata siña for di Beibel. P’esei no a dura muchu ku nan a boutisá. Awe Ela tin kasi 100 aña i ainda e ta sirbiendo komo pionero na Cuba.

E tempunan ayá, ainda Testigunan di Yehova por a prediká i reuní libremente na Cuba. Nos tabata konosí pa nos predikashon di kas pa kas. Semper nos tabata kana ku tas yen di publikashon. Anto nos tabata kana hopi! Mi tin dushi rekuerdo di tempu ku mi tabata chikitu. E tempu ei nos tabata sirbi Yehova durante “tempu faborabel.” Pero “tempu difísil” tabata na kaminda.—2 Tim. 4:2.

TEMPU DIFÍSIL A YEGA

Ora mi tabatin mas o ménos sinku aña, mi tata i Tio Pedro a biaha bai un otro parti di e isla pa bai un asamblea. Lamentablemente, nan a bira hopi malu ora nan a bebe awa kontaminá durante nan biahe. Mi ta kòrda ku ora nan a bini bèk, Tio Pedro a bira bon bèk pero el a pèrdè tur su kabeinan. Pero, mi tata sí no a bira bon bèk i a fayesé. E tabatin 32 aña so.

Mama tabatin un ruman hòmber ku tabata biba den e pueblito Lombillo. Despues ku mi tata a fayesé, mi mama a disidí pa nos bai biba serka dje. Esaki a nifiká ku nos mester a laga nos famianan atras, inkluso nos tawelanan stimá. Apesar di tur e kosnan ei, ami, Mama i mi ruman muhénan a sigui sirbi Yehova.

Dia 26 di ougùstùs 1957, m’a boutisá na un lugá serka di Lombillo. Mi tabatin dies aña e tempu ei. Mi no por a imaginá ku den ménos ku dos aña tur kos lo a kambia pa Testigunan di Yehova na Cuba. Na 1959, un grupo a tumba e gobièrnu i un gobièrnu komunista a bini na poder.

E gobièrnu nobo akí su meta tabata pa forma un ehérsito fuerte. Esei a hasi bida pa nos rumannan difísil, pasobra rònt mundu Testigunan di Yehova ta keda neutral den asuntu polítiko i militar. Komo resultado, tiki tiki, nos a pèrdè e libertat di prediká i di bai reunion. Ku tempu, gobièrnu a prohibí tur nos aktividatnan spiritual. I nan a sera hopi ruman hòmber den prizòn. Algun di nan a wòrdu maltratá i nan no tabata haña sufisiente kuminda. I tin biaha nan tabata asta haña kuminda ku tin sanger aden, pero nan a keda fiel na loke Beibel ta bisa tokante sanger.

Aunke ku nos aktividatnan spiritual tabata prohibí, tòg nos a sigui reuní huntu pa adorá Yehova. (Heb. 10:25) Tin biaha nos tabata tene nos asambleanan na boerderij òf na lugánan un poko straño. Mi ta kòrda un biaha un ruman a laga nos usa su boerderij pa tene asamblea. Pero nos no a haña chèns di limpia e boerderij ni di saka e karnénan. Pero, e asamblea a tuma lugá tòg meimei di e karnénan!—Mik. 2:12.

Nos ta masha gradisidu pa e esfuerso ku e rumannan a hasi pa nos por a haña kuminda spiritual den e tempu ei. Por ehèmpel, nos tabata haña henter e programa di asamblea grabá riba kasèt. Tin biaha dos ruman so mester a prepará i graba tur e diskursonan. Despues nan tabata manda e grabashonnan rònt Cuba pa e rumannan skucha e programa. Komo ku tabata graba na lugánan skondí tin biaha por a skucha zonido straño, manera gai ta kanta. Si e lugá di asamblea no tabatin koriente, un ruman tabata kore un baiskel ku ta generá koriente pa asina nos por a skucha e grabashon. Aunke nos no tabatin e mesun sirkunstansia i kantidat di publikashon ku nos rumannan na otro pais, nunka nos tabata falta kuminda spiritual. Semper nos tabatin goso sirbiendo Yehova huntu.—Neh. 8:10.

M’A BIRA PIONERO, ESPOSO I TATA

Ora mi tabatin 18 aña m’a kuminsá traha pionero regular den un pueblo ku yama Florida. I mas o ménos un aña despues m’a ser asigná komo pionero spesial na e stat prinsipal di Cuba, esta, Camagüey. Ta einan m’a konosé un ruman bunita ku yama Emilia, kende ta di Santiago de Cuba. Nos a kuminsá namorá i denter di un aña nos a kasa.

M’a kuminsá traha fultaim na un fábrika di gobièrnu ku tabata produsí suku. Ami ku Emilia no por a sigui traha pionero mas. Pero tòg nos tabata kier a dediká mas tantu tempu na aktividatnan spiritual. Pues, mi tabata traha tur dia for di 3 or di mardugá te ku 11 or di mainta na e fábrika. Tabata duru pa mi lanta asina trempan, pero e orarionan di trabou ei a permití mi bai sirbishi i tur reunion ku Emilia.

Na 1969 nos promé yu a nase. Nos a yam’é Gustavo. Ta nèt durante e tempu ei, nan a pidi mi pa bira superintendente di sirkuito. E tempu ei tabata masha normal pa un ruman ta superintendente di sirkuito miéntras ku e tin yu chikitu. Apesar ku nos tabata hopi drùk nos a disfrutá hopi di e asignashon akí. Ami i Emilia a sinti ku di bèrdat tabata un bendishon di Yehova pa sirbi nos rumannan asin’akí. Durante nos asignashon komo sirkuito, nos yunan, Obed i Abner a nase. I despues di algun aña nos a haña nos yu muhé Mahely.

Ora mi pensa riba e dianan ku nos tabata sirbi komo sirkuito, mi ta sinti mi masha kontentu pa wak kon Yehova a yuda su sirbidónan na Cuba. Anto sin duda el a bendishoná tur e esfuersonan ku nos a hasi pa yuda nos yunan stim’é. Awor laga mi konta bo kon ami ku Emilia a eksperensiá e trabou di sirkuito.

E TRABOU DI SIRKUITO DURANTE PROHIBISHON

Den e añanan 60 i 70, situashon a bira mas fèrfelu. Nos no por a bai reunion mas ni prediká. Nan a sera tur Salòn di Reino. I nan a saka tur e misioneronan for di e pais. Hopi ruman hòmber yòn a ser arestá i enkarselá. I komo si fuera no ta basta nan a sera sukursal na Havana.

Debí ku e trabou tabata prohibí, nos por a bishitá e kongregashonnan solamente den wikènt. P’esei kada kongregashon tabata haña bishita dos wikènt tras di otro. Nos no tabata bai ku hopi kos, i hopi biaha nos tabata usa baiskel pa no hala muchu atenshon di polis òf di otro hende. Ademas, nos bishita no tabata ser anunsiá na reunion di kongregashon. Nos tabatin ku laga nos bishita parse ku ta famia nos a bin bishitá. Esei no tabata algu difísil pa hasi. Komo ku nos tabata sinti nos asina na kas, tin biaha nos tabata kasi lubidá ku ta bishita di sirkuito nos a bin hasi. (Mar. 10:​29, 30) Pero tòg, nos mester a keda alerta, pasobra hopi biaha polis tabata sigui nos i interogá nos. Si nan a haña sa kiko realmente nos a bin hasi, nan por a arestá e rumannan kaminda nos tabata keda.—Rom. 16:4.

Den e periodo akí aunke hopi ruman no tabatin hopi kos nan a mustra hospitalidat na nos. Den algun área tabatin hopi sangura, pero e rumannan tabata sakrifiká nan úniko muskitero ya asina nos por a drumi bon. Otro ruman tabata invitá nos pa keda serka nan aunke ku nan no tabatin hopi kuminda. P’esei, tin biaha nos mes tabata bini ku kuminda pa parti ku nan.

Nos no por a bai ku tur nos yunan ora nos tabata bishitá e kongregashonnan. Nos tabata bai ku un so i laga e otronan serka mi mama i mi ruman muhé. Pa ta franko, biaha ku un bebi tabatin su bentahanan. Nos tabata skonde e publikashonnan den un tas ku tin bruki sushi. Tin biaha, ora polis tabata listra nos nan tabata topa e brukinan i nan tabata legumai e listramentu mesora.

Mi ta masha gradisidu pa tur loke Emilia a hasi pa mi i pa e muchanan durante e añanan ku nos dos a traha den sirbishi di tempu kompleto. Anto m’a logra kumpli ku mi debernan na mi trabou den e fábrika i ku esnan di sirkuito. Kon m’a logra esei? Tin biaha, mi tabata traha dòbel warda un òf dos biaha pa siman pa asina mi haña wikènt liber. Pero despues m’a haña e asignashon di supervisor. Debí na esei, mi mester a kuminsá traha di djaluna pa djaluna. M’a aseptá e kambio numa pasobra no tabatin otro opshon. Pero m’a bin deskubrí ku si m’a duna mi tim sufisiente trabou pa hasi den wikènt, nan lo a sigui traha sin problema miéntras ku ami tabata bishitá e kongregashonnan. Te kaminda mi sa, mi hefenan di trabou nunka no a haña sa mes ku mi no tabat’ei den wikènt.

KEDANDO POSITIVO APESAR DI KAMBIO

Na 1994, e rumannan ku tabata dirigí e obra na Cuba a manda yama tur superintendente di sirkuito, 80 na tur, pa un reunion spesial na Havana. E echo ku nos tur por a bini huntu despues di asina tantu aña tabata algu masha spesial. E promé kos ku nos a trata na e reunion tabata algun kambio den e organisashon. Djei nan a bisa algu ku a kai manera un bòm. Nan a bisa ku nan tin planiá pa duna nòmber di tur e sirkuitonan na outoridat.

Nan a splika ku nan ke hasi esei pasobra nan ke mehorá e relashon entre gobièrnu i Testigunan di Yehova. Anto ya kaba nan tabatin algun reunion ku hende den gobièrnu. Nan a bisa ku outoridat ke un lista ku nòmber di tur sirkuito. Nos tur a bai di akuerdo pa duna nos nòmber. Djei padilanti, e relashon entre nos ku gobièrnu a mehorá.

Ku tempu, nos por a reuní i prediká libremente atrobe, aunke ku gobièrnu no a rekonosé nos ofisialmente komo religion ainda. Despues nos a bin haña sa ku e outoridatnan ya tabatin nòmber di algun sirkuito kaba. Ta djis nan tabata ke konfirmá loke nan tin.

Na sèptèmber 1994, gobièrnu a permití nos habri un sukursal atrobe. Nan a asta laga nos usa e mesun edifisio ku nos tabata usa 20 aña promé.

Mas o ménos dos aña despues, un ruman di Bètel a yama ami ku Emilia pa puntra nos si nos ke bin sirbi na Bètel. Loke nan a pidi ei a kue nos fo’i base. Anto mi a kòrda nan ku te ainda mi tin dos yu ta biba na kas. Pero nan a bisa ku tòg nan ke pa nos bin. Nos a bisa nan ta bon i komo famia nos a kuminsá plania pa bai Havana.

Ora mi tabata na Bètel, mi tabata sinti falta di e trabou di sirkuito pasobra ta pa basta aña mi tabata den dje. Pa mi ta onesto, na kuminsamentu mi no tabata gusta Bètel mashá pasobra mi no tabata gusta trabou di ofisina. Pero e otro bètelitanan i foral mi kasá, Emilia, a yuda mi kambia mi manera di pensa. Ku tempu, mi a kuminsá gusta loke mi ta hasi na Bètel. I awor mi ta kontentu di ta einan.

Ami ku Emilia no ta dje yòn ei mas. Pero nos ta sinti goso ora nos pensa riba tur e rumannan ku nos a siña konosé i a sirbi kuné durante e añanan. Anto algu ku sigur ta alegrá nos kurason ta di mira ku nos yunan i nos ñetunan ta sirbi Yehova. Nos tin e mesun sintimentunan ku Apòstel Huan tabatin den su behes. El a bisa: “No tin nada ku ta hasi mi mas kontentu ku tende ku mi yunan ta sigui kana den e bèrdat.”—3 Huan 4.

Ami ku Emilia awor tin kasi 30 aña ta sirbi na Bètel. Nos ta hasi nos esfuerso pa sigui kumpli ku nos asignashon apesar di problema di salú i behes. Ta bèrdat ku durante e añanan ku nos a sirbi Yehova, nos tabatin algun difikultat. Pero nos ta sumamente kontentu ku nos por a sirbi “e Dios felis” pa kasi 70 aña aki na Cuba!—1 Tim. 1:11; Sal. 97:1.