Bo Grupo di Sirbishi T’ei pa Yuda Bo!

1-2. Kiko algun ruman ta pensa di e echo ku nan ta den un grupo di sirbishi?

SIN duda bo tabata masha kontentu ora bo a bira un publikadó di e bon notisia. Dikon? Pasobra for di e momento ei bo a bira parti di un grupo grandi di persona ku ta alabá Yehova. (Sal. 148:​1, 2, 12, 13) Pero, riba e dia ei tambe, kisas bo a bira parti di un grupo mas chikitu, un grupo di sirbishi, ku ta konsistí di algun publikadó di bo kongregashon. Nos gruponan di sirbishi ta masha importante pasobra nan ta yuda nos kumpli ku e trabou di prediká e bon notisia “rònt mundu.”—Mat. 24:14.

² Kiko abo ta pensa di e echo ku bo ta den un grupo di sirbishi? Ban wak kiko algun ruman a bisa. Un ruman muhé ku yama Wendya a bisa: “Mi grupo di sirbishi a yuda mi masha hopi mes. M’a siña método nobo pa prediká i pa siña hende e bèrdat. E rumannan den mi grupo a animá mi pa hasi kosnan ku ta hasi mi amistat ku Yehova mas fuerte. Anto tambe mi a bira mihó amigu ku e rumannan den mi grupo.” Ruman Rich a bisa: “Ta bèrdat ku algun publikadó tin e goso di por yuda un persona yega na boutismo. Pero komo superintendente di grupo, mi tin e privilegio di sigui yuda e persona ei krese den su amistat ku Yehova pa años.” I un ruman ku yama Dinah a bisa: “Ta masha dushi pa ta parti di un grupo di sirbishi! Mi grupo ta manera mi famia.”

3. Kiko nos lo trata den e artíkulo akí?

³ Den e artíkulo akí, nos lo trata promé loke e superintendente di grupo i su asistente ta hasi i kon nan ta yuda e rumannan den nan grupo. Despues nos lo trata kon kada un di nos por yuda nos grupo di sirbishi. Anto na final nos lo trata kon e grupo di sirbishi ta yuda kada un di nos.

SUPERINTENDENTE DI GRUPO I SU ASISTENTE

4. (a) Kiko ta e trabou di un superintendente di grupo? (b) Ki ta algun tep ku superintendentenan di grupo por apliká pa kuida e rumannan den nan grupo? (Wak e kuadro “Tepnan pa Superintendentenan di Grupo.”)

⁴ Un superintendente di grupo ta un ansianob ku tin e responsabilidat pa yuda e rumannan den su grupo pa hasi nan amistat ku Yehova mas fuerte. Kon e ta hasi esei? Ban wak tres manera. Di promé, e ta duna atenshon na kada ruman den su grupo. (Pro. 27:23) Regularmente e ta yama pa wak kon ta bai ku nan. Ora e hasi esei e por duna nan yudansa spiritual, emoshonal i práktiko. (Pro. 12:25; Isa. 32:2; Sant. 2:​15-17) Di dos, e ta yuda kada ruman den su grupo pa keda aktivo den sirbishi. E superintendente di grupo ta hasi su máksimo esfuerso pa bai den sirbishi ku e rumannan di su grupo tur siman. Tambe e ta hasi sigur pa traha ku kada ruman den su grupo pa animá i entrená nan. Tin biaha, por sosodé ku e superintendente no ta logra sali den sirbishi. E ora ei e ta hasi sigur ku su asistente òf un otro ruman hòmber por sali ku e grupo. I di tres, e ta entrená ruman hòmber boutisá pa nan por hasi mas den kongregashon. (1 Tim. 3:1) E ta elogiá nan pa nan bon trabou, e ta usa Beibel pa konsehá nan i e ta entrená nan pa despues nan por bira sirbidó ministerial òf ansiano. Pues no tin duda ku e trabou di superintendente di grupo ta hopi importante. P’esei ora e kuerpo di ansiano mester skohe un ruman pa sirbi komo superintendente di grupo, nan ta buska un ansiano ku nan sa ku por kumpli ku e trabou akí.

5. Ki ta algun reto ku superintendentenan di grupo ta haña nan kuné?

⁵ Tin biaha no ta fásil pa un superintendente di grupo yuda e rumannan den su grupo. Jürgen di Alemania, meskos ku hopi otro ansiano, tin vários otro responsabilidat den kongregashon. Wak loke el a bisa: “Pa ta un superintendente di grupo, i na mes momento kumpli ku otro tareanan di kongregashon no ta fásil. P’esei, mi ta haña difísil pa kumpli ku mi meta di tuma kontakto ku kada ruman di mi grupo.” Abel, un ansiano ku tin 70 aña di Uganda, ta bisa: “Den nos kongregashon nos no tin hopi ansiano i sirbidó ministerial. Pues, nos gruponan di sirbishi ta basta grandi. P’esei, no ta semper mi ta logra traha ku e rumannan den mi grupo i animá nan mes tantu ku mi ke.” Anto Obed, un ansiano di Sürnam, a bisa: “Mi gusta entrená otro ruman. Pero esei ta rekerí hopi tempu i energia, i no ta mesora bo ta mira resultado. I dor ku mi ta asina drùk, entrenamentu tin biaha ta e promé kos ku ta kai afó.” Kiko por yuda otro ansianonan ku tambe ta pasa den situashon similar?

6. Dikon ta bon pa tene e gruponan di sirbishi chikitu?

⁶ Ora ku por, lo ta bon pa tene e gruponan di sirbishi chikitu. Asina ei e superintendente di grupo por siña konosé kada publikadó i yuda kada un di nan keda spiritualmente fuerte. Pero kiko por hasi si un kongregashon no tin sufisiente ansiano? Den e kaso ei lo evitá di traha grupo muchu grandi i pone ku e superintendente di grupo no por kumpli ku su tarea bon. I e kuerpo di ansiano lo wak si por usa sirbidónan ministerial pa dirigí e grupo. Asina e superintendente di grupo por kumpli ku su responsabilidat di kuida e rumannan den su grupo.

7. Ora un kongregashon no tin hopi ansiano, kiko un superintendente di grupo mester hasi pa tur ruman den su grupo ta bon kuidá? (1 Pedro 5:2) (Wak e plachi.)

⁷ Si bo ta un superintendente di grupo i no tin hopi ansiano den bo kongregashon, hasi esfuerso pa entrená bo asistente pa yuda bo kuida bo grupo. (Lesa 1 Pedro 5:2.) Duna bo asistente sierto tarea. Por ehèmpel, ratu ratu laga bo asistente saka e grupo pa sirbishi. Ta importante pa boso analisá e aktividat di kada publikadó pa wak kon ta bayendo ku nan i pa wak kon boso por yuda nan. Regularmente bishitá e rumannan den bo grupo ku bo asistente. Promé ku e bishita, papia tokante kon boso ta bai animá e ruman. I despues di e bishita, bisa bo asistente kiko bo a haña ku el a hasi bon. Anto si tin mester, bis’é kiko e por mehorá. Ku tempu, e tambe por bira un superintendente di grupo. (2 Tim. 2:2) Bo por puntra otro ruman den bo grupo tambe pa yuda entrená e publikadónan di bo grupo. Por ehèmpel, e pioneronan òf otro publikadó ku eksperensia por traha ku e publikadónan mas nobo. Nan por mustra e publikadónan nobo kon pa kuminsá un kòmbersashon, kon pa hasi rebishita i kon pa dirigí un estudio di Beibel. Awor laga nos trata tres manera ku kada un di nos por yuda nos grupo di sirbishi.

SIGUI APOYÁ BO GRUPO DI SIRBISHI

8. Kon bo por apoyá bo grupo? (Romanonan 1:12)

⁸ Sali ku bo grupo. Ora bo hasi esei bo por animá e rumannan i nan tambe ta animá bo. (Lesa Romanonan 1:12.) Trahando huntu tambe lo laga bo sinti bo ménos nèrvioso pa papia ku hende i lo bo sinti bo safe den sierto área. Awor kiko si bo ta traha nèt riba e dia ku bo grupo ta sali den sirbishi? Kisas lo bo por pidi bo doño pa kambia bo orario di trabou. Su kontesta lo por sorprendé bo. (Neh. 2:​4-6) Si bo no por sali den sirbishi debí na malesa òf edat avansá, no keda sin papia ku bo superintendente di grupo. Lo e por regla pa bo por sigui e konsiderashon via Zoom i pa despues bo skirbi karta òf hasi yamada ku otro ruman di e grupo. Kisas bo ta un hóben ku bon salú pero tòg bo no ta dje regular ei den sirbishi. Algu ku bo por hasi kisas ta di traha afsprak tur siman ku un ruman den bo grupo. Lo ta bon tambe pa bo wak na kiko mayoria di bo tempu ta bai i wak kon bo por usa bo tempu mas mihó posibel. (Rom. 12:11; Kol. 4:5) Kada esfuerso ku bo hasi ta bale la pena. Bo por pidi Yehova pa duna bo “tantu e deseo komo e forsa” pa sali ku bo grupo.—Flp. 2:13.

9. Kiko nos por hasi pa nos grupo di sirbishi bira manera un famia? (Romanonan 12:13)

⁹ Mustra hospitalidat. Ora nos ta “buska manera pa mustra hospitalidat” nos ta laga e rumannan den nos grupo sinti ku nos stima nan. (Lesa Romanonan 12:13.) Por ehèmpel, nos por hasi nos kas disponibel pa e salida di sirbishi. Den algun kongregashon, tur siman un grupo ta haña bùrt pa mustra hospitalidat na e oradó bishitante. Ora un grupo ta na bùrt, nan por plania pa kome algu i pasa tempu huntu, asta si e oradó no por bini. Sarah, un pionero spesial, a bisa: “Komo ku mi ta strès ora mi tin ku mustra hospitalidat, mi ta purba di tene e kosnan mas simpel posibel. Na lugá di preokupá pa e komementu ta tur afó mi ta purba di siña konosé e rumannan mas mihó.” Ora nos ta hasi esfuerso pa nos grupo di sirbishi ta manera un famia, nos amistat ku Yehova i ku otro ta bira mas fuerte.—Neh. 8:10; Echo. 20:35.

10. Kiko nos por hasi si nos ke mehorá den algun aspekto di nos sirbishi? (Proverbionan 1:5; 27:17) (Wak e plachi.)

¹⁰ Tuma inisiativa. Mas ábil nos ta den prediká i siña hende e bèrdat, mas smak nos lo tin pa sali den sirbishi ku nos grupo. Tin un aspekto di bo sirbishi ku lo bo ke mehorá den dje? Bo por pidi un ruman den bo grupo pa yuda bo ku esei. (Lesa Proverbionan 1:5; 27:17.) Laga bo superintendente di grupo sa kiko lo bo ke mehorá den bo sirbishi. Lo e por yuda bo logra bo meta. Pero no ta e so bo por pidi yudansa. Wak kiko Heather, un ruman ku ta tímido, a hasi. El a bisa: “M’a pidi un pionero pa yuda mi ku hasimentu di rebishita. E tabata masha amabel i nos tabata traha hopi den sirbishi. El a asta yuda mi kuminsá un estudio di Beibel ku un di mi rebishitanan. Mi ta masha kontentu ku mi a pidi yudansa pasobra awor mi ta disfrutá di mi sirbishi atrobe.” Pues, manera nos a mira, tin vários kos ku kada un di nos por hasi pa yuda nos grupo di sirbishi.

KON BO GRUPO DI SIRBISHI TA YUDA BO

11-12. Kon nos grupo di sirbishi ta duna nos yudansa spiritual? Konta un eksperensia.

¹¹ Yudansa spiritual. Ban wak algun manera ku nos tur ta benefisiá di nos grupo di sirbishi. Por ehèmpel, pensa riba e rumannan ku ta biuda, huérfano òf di edat avansá. Yehova ta stima nan mashá i p’esei e superintendente di grupo ta duna nan e atenshon i e animashon ku nan tin mester. (1 Tes. 2:8; Sant. 1:27) Tambe nos ta haña yudansa nesesario pa mehorá nos manera di prediká i siña hende e bèrdat. Ruman hòmbernan boutisá ta haña entrenamentu pa asina nan por haña mas responsabilidat den e kongregashon.—1 Tim. 3:10.

¹² Bo ta kòrda Wendy di paragraf 2? Wak kon su grupo di sirbishi a yud’é. El a bisa: “Mi tata tabata kontra e bèrdat. Anto debí na esei hopi biaha mi mama no por a sali den sirbishi wikènt huntu ku su grupo. Pero ami sí por a bai. Un ruman muhé pionero ku tabata mas grandi ku mi a bira mi amiga i a traha hopi ku mi den sirbishi. El a yuda mi mehorá mi manera di prediká i el a mustra mi kon pa hasi mas den kongregashon. Anto mi ta kòrda ku mi superintendente di grupo tabata duna mi konseho for di Beibel ku te dia djawe ta yuda mi.”

13. Kon nos grupo di sirbishi ta duna nos sosten emoshonal? (Wak e plachi.)

¹³ Sosten emoshonal. Nos ta bira mihó amigu ku e rumannan den nos grupo ora ku nos ta traha “lado a lado” ku nan den sirbishi. (Flp. 1:27) Debí ku e tamaño di e grupo ta chikitu, ta mas fásil pa asta rumannan tímido òf ku no gusta ta den hopi hende sera amistat. (2 Kor. 6:13) Nos grupo por yuda nos durante tempu difísil, por ehèmpel, ora nos ta malu, tristu, deprimí òf ora un hende ku nos stima muri. (1 Tes. 5:14) Anto mas serka nos yega di tribulashon grandi mas nos lo bai tin mester di e bon amigunan ei. (Mat. 24:21) E amor i yudansa ku nos ta haña di nos grupo ta duna nos e forsa pa dil ku nos problemanan.—Pro. 17:17.

14. Kon nos grupo di sirbishi ta yuda nos si tin un desaster òf emergensia?

¹⁴ Yudansa práktiko. Nos tur por haña nos den un emergensia médiko, desaster natural, brote di malesa òf persekushon. Ora kosnan asina pasa, nos superintendente di grupo ta kla pa yuda nos. Por ehèmpel, ora un desaster pasa e ta tuma kontakto ku kada famia den su grupo pa wak si nan tin mester di kuido médiko, kuminda, awa, un lugá di keda òf paña. Unabes e haña sa kiko nan tin mester, e ta regla pa nan haña e yudansa nesesario. Ademas, algu otro ku e superintendentenan di grupo ta hasi ta papia ku e Komité di Sirbishi di Kongregashon tokante ken den nan grupo mester di èkstra yudansa den situashonnan asina, i nan ta traha un plan pa yuda nan. Sí, di bèrdat nos grupo di sirbishi ta un gran yudansa pa nos durante un desaster òf emergensia.

15. Kiko tur sirbidó di Yehova ke?

¹⁵ Manera nos a menshoná kaba, Yehova tin hopi sirbidó. Den shelu tin míles di miónes di angel ku ta sirbi Yehova. Anto riba tera tin mas ku nuebe mion hende ta sirbié, i e sifra ei ta keda oumentá. (Zak. 8:23; Rev. 5:11) Tur Yehova su sirbidónan, tantu esnan den shelu komo esnan riba tera, ke pa mas tantu hende posibel skucha e bon notisia di e Reino di Dios. (Rev. 14:​6, 7) Band’i yuda nos den vários manera, nos grupo di sirbishi ta yuda nos sigui alabá Yehova. P’esei laga nos tur hasi nos esfuerso pa apoyá nos grupo di sirbishi.—Sal. 111:1.