Respetá e Desishonnan di Nos Rumannan

1-2. Dikon nos desishonnan tin biaha ta diferente for di esnan di otro ruman?

UN RUMAN a yega di husga bo pa un desishon ku bo a tuma? Òf, abo a yega di husga un ruman pa un desishon ku el a tuma? Probablemente mayoria di nos lo kontestá “sí” riba tur dos pregunta.

² No mester sorprendé nos ku tin biaha e desishonnan ku nos ta tuma ta diferente for di esnan ku otro ruman ta tuma. Dikon? Pasobra nos kada un ta diferente. Nos tur tin nos mes manera di pensa. Nos manera di pensa ta ser influensiá dor di nos kultura, e manera ku nos a lanta i e kosnan ku nos a pasa aden. Pero apesar ku nos tur tin diferente opinion, nos no mester laga esei stroba e pas i union den kongregashon.—Efe. 4:3.

3. Kiko nos por haña gana di hasi si nos no ta di akuerdo ku un desishon ku un ruman a tuma?

³ Ora un ruman tuma un desishon ku nos no ta di akuerdo kuné, kisas nos ta sinti ku nos mester konvens’é pa kambia su desishon. Asta nos por yega na e punto ku nos ta bisa otro ruman ku loke e ruman ei a disidí no ta bon. Probablemente, bo ke djis yuda e ruman. Nos stima nos rumannan, i nos ke lo mihó pa nan. (Pro. 17:17) Pues, nos no ke pa nan tuma un desishon ku nan lo lamentá despues òf ku lo daña nan amistat ku Yehova.

4-5. Si un ruman tuma un desishon ku nos no ta di akuerdo kuné, kiko nos mester hasi?

⁴ Awor, nos mester papia ku un ruman si nos no ta di akuerdo ku e desishon ku el a tuma? Esei ta dependé di algun kos. Por ehèmpel, si nos haña sa ku e ke hasi algu ku ta bai kontra Yehova su leinan, nos mester purba di yud’é komprondé kon Yehova ta mira loke e ke hasi. Nos ta hasi esaki pasobra nos ta stima nos ruman. (Pro. 27:​5, 6) Awor, kiko si e desishon ku e ruman ke tuma no ta bai kontra Yehova su leinan, pero ta djis un desishon ku nos lo no a tuma? Nos ta haña e kontesta na Romanonan 14:1 ku ta bisa: “No kritiká otro hende riba asuntu ku ta opinion personal.”

⁵ Pero kisas tòg bo ta haña difísil pa aseptá un desishon ku un ruman a tuma. Den e artíkulo akí nos lo trata dikon nos mester respetá desishon di nos rumannan i kon nos por hasi esei. Pero promé ban wak algun situashon ku por pone un ruman haña gana di kritiká un otro ruman pa e desishon ku el a tuma.

KIKO POR PONE KU NOS TA KRITIKÁ NOS RUMANNAN?

6-7. Menshoná algun situashon ku por pone nos kere ku un ruman ta tumando mal desishon.

⁶ Manera nos a menshoná kaba, e manera ku nos a lanta òf e kosnan ku nos a pasa aden por pone ku nos tin un opinion fuerte riba sierto asuntu. Anto kisas nos ta pensa ku otro hende tambe ta pensa meskos ku nos. Pero, esei no semper bai ta e kaso. Ban wak algun ehèmpel. Situashon 1: Promé ku un ruman hòmber a siña e bèrdat, el a lanta ku un tata ku tabatin problema ku bebementu. Un biaha, na un aktividat di ruman, el a mira algun di nan ta bebe alkohòl. El a rabia i bisa nan ku loke nan ta hasiendo ta robes. Situashon 2: Un ruman muhé a gana e lucha kontra un malesa grave. El a haña sa ku un otro ruman muhé a haña e mesun malesa ei. E promé ruman muhé ke yuda e otro ruman i e ta keda insistí pa e ruman hasi e mesun kosnan ku el a hasi. Kisas e ta bis’é pa kome sierto kos òf pa tuma sierto tipo di medisina òf tratamentu. Situashon 3: Un ruman hòmber tabata forma parti di un religion falsu i e no ke tin nada di haber ku e religion ei mas. Pero ora e tende ku un ruman a bai un entiero den misa, e ta sintié desapuntá.a

⁷ Ban wak algun ehèmpel mas. Situashon 4: Tempu ku un ruman hòmber tabata hóben, mayoria di hende tabata pensa ku no ta bon pa hende hòmber laga nan barba krese ni pa hende muhé bisti karson na evento formal. E ruman sa di e informe ku ta bisa ku no tin nada malu pa ruman hòmber tin barba i pa ruman muhé bisti karson pa bai reunion òf sirbishi. Pero tòg e ta keda bisa e rumannan ku e kosnan ei no ta pas pa un kristian. Situashon 5: Un ansiano tabata konosé un ruman ku a skohe pa sigui un estudio avansá i ku despues a sali for di bèrdat. Awor e ansiano ta haña sa ku un hóben den su kongregashon tambe ke sigui studia. E ansiano ta masha preokupá pa esei, i e ta purba di konvensé tantu e hóben komo su mayornan pa kambia di idea.

8. (a) Kiko por pone un mayor pensa malu di un otro mayor? (b) Kiko por pasa si nos ta pensa malu di loke nos rumannan ta hasi?

⁸ Ban wak algu ku mayornan por haña nan kuné. Situashon 6: Komo mayor, bo ta traha duru pa lanta bo yunan “di akuerdo ku e instrukshonnan di Yehova.” (Efe. 6:4) P’esei, bo ta pone sierto regla òf límite pa nan. Pero kisas bo ta ripará ku otro ruman ta ménos strèn ku nan yunan. Por ehèmpel, e ora ku nan ta pone pa nan yunan yega kas ta mas lat ku e ora ku abo a pone pa bo yu. Òf kisas nan ta laga nan yunan bai sierto aktividat di skol ku abo lo no laga bo yunan bai. Òf nan ta laga nan yunan tin telefòn for di chikitu. Debí na esei, bo yu ta sinti ku bo ta muchu strèn kuné. E por puntra: “Dikon mama òf papa no por ta mas manera mayornan di mi amigunan?” Si algu asina pasa, bo por kuminsá pensa malu di e otro mayornan. E punto ta ku kualke desishon ku un ruman tuma ku ta diferente for di nos por laga nos kuminsá pensa malu di dje. Por ehèmpel, kisas bo ta pensa ku e no ta usa su sèn bon, ku e ta bai ku fakansi muchu òf ku e no ta skohe su rekreo bon. Pero nos no mester laga nos mes opinionnan bira asina importante pa nos ku nos ta kuminsá pensa malu di otro ruman i trese divishon den kongregashon.

9. Dikon nos no mester husga e desishonnan personal di nos rumannan? (Wak e plachi.)

⁹ Aunke ku un desishon di un ruman por ta diferente for di un otro ruman, esaki no ta nifiká ku un di nan ta bon i ku e otro ta malu. (Rom. 14:5) Ora Beibel ta konsehá nos pa “sigui ta uní den boso manera di pensa,” e ta nifiká ku nos kada un mester obedesé Yehova su leinan. Pero esei no ta nifiká ku nos ta pensa na mesun manera tokante tur kos. (2 Kor. 13:11) Nos por kompar’é ku e desishonnan ku nos ta tuma ora nos ta kore bai un lugá. Hopi biaha, tin diferente ruta ku nos por tuma pa yega nos destinashon, pero nos ta skohe e ruta ku nos ta preferá i ku ta mihó pa nos. Di mes manera, tin biaha rumannan ta tuma diferente desishon, pero na final di dia, nos tur ke yega e mesun kaminda: Nos ke hasi Yehova kontentu. Pues, nos no ke husga nos rumannan pa e desishonnan personal ku nan ta tuma.—Mat. 7:1; 1 Tes. 4:11.

DIKON NOS MESTER RESPETÁ E DESISHONNAN PERSONAL DI NOS RUMANNAN?

10. Segun Santiago 4:​12, kiko nos no tin derecho di hasi, i dikon?

¹⁰ Beibel ta duna nos vários motibu dikon nos mester respetá e desishonnan di nos rumannan. Laga nos ban trata algun di nan. Un di nan ta ku nos no tin e derecho pa bisa nos rumannan kiko pa hasi ora ta trata di desishon personal, esta, algu ku Beibel no ta papia di dje. (Lesa Santiago 4:12.) Ta Yehova ta nos Legisladó, esta, Dunador di Lei, i Hues. Pues, ta e so tin e derecho di bisa nos kiko nos por hasi i kiko nos no por hasi. Esei ke men ku nos rumannan tin ku duna kuenta i rason na Yehova i no na nos. (Rom. 14:10) Pues, ora un ruman tuma un desishon ku nos lo no a tuma, nos no tin e derecho di husg’é ni kritik’é pa e desishon ei.b

11. Kon nos por yuda mantené union den kongregashon? (Wak e plachi.)

¹¹ Yehova ta ferwagt pa su sirbidónan ta uní i no meskos. Ora nos wak kreashon, nos ta mira ku Yehova ta gusta variedat! Por ehèmpel, un palu por tin masha hopi blachi, pero si bo wak nan bon, kada un di nan ta diferente. Anto pensa un ratu riba hende. Tin mas ku ocho mil mion hende, pero nunka lo bo topa dos hende ku ta presis meskos ku otro. Yehova a krea nos pa ta diferente. Yehova no ke pa nos ta un kopia eksakto di otro hende. Pero sí e ke pa nos ta uní. P’esei, ora un hende hasi algu ku nos lo no hasi, nos ta respetá su desishon i no ta husg’é pa esei. Pues, loke ta mas importante pa nos ta e pas i union den kongregashon, i no nos mes opinionnan.—Rom. 14:19.

KON PA RESPETÁ OPINION DI NOS RUMANNAN

12-13. Kiko nos mester kòrda ora nos ta sinti ku un ruman ta hasiendo algu ku ta bai kontra loke Beibel ta bisa? (Galationan 6:1; wak e kuadro “Ora Bo No Ta di Akuerdo.”)

¹² Ora otro ruman tin ku tuma desishon personal. Bo por puntra bo mes: ‘Loke e ruman ta hasiendo di bèrdat ta bai kontra Beibel òf e ta djis hasiendo algu ku ami lo no a hasi?’ Anto si e ta hasiendo algu ku ta bai kontra loke Beibel ta bisa, puntra bo mes: ‘Mi ta un ruman spiritualmente madurá ku por papia kuné òf ta mihó mi pidi un otro ruman pa papia kuné?’ Si bo ta spiritualmente madurá i bo disidí di papia kuné, hasi esaki na un manera suave. (Lesa Galationan 6:1.) Pero mayoria di biaha, e ruman no ta hasiendo nada robes; e ta djis hasiendo algu ku ta diferente for di loke abo lo a hasi. Si ta asina, no pensa malu di e ruman ni kritiká su desishon. Bo mester respetá e echo ku tur hende tin e derecho pa disidí loke nan ke hasi.—Rom. 14:​2-4.

¹³ Pensa riba e siguiente ehèmpel: Si abo i un amigu di bo bai kome na un restorant, lo bo insistí p’e pidi e mesun kuminda ku bo? Klaru ku nò. Bo ke pa e sintié liber pa skohe loke e ke kome. Asta si bo no gusta e kuminda ku el a pidi, bo no ta preokupá ku esei, pasobra no ta abo ta bai kom’é tòg. Anto di mes manera, abo tampoko lo no ke pa bo amigu pidi un kuminda pa bo ku bo no gusta. Asina tambe nos ta mustra rèspèt na nos rumannan ora nos ta laga nan tuma nan mes desishonnan en bes di bisa nan kiko pa hasi.

14. Kon nos por mantené union den kongregashon ora di tuma desishon personal? (1 Korintionan 8:​12, 13)

¹⁴ Ora abo tin ku tuma desishon personal. Pa nos por mantené union den kongregashon, nos mester hasi esfuerso pa nos no ofendé nos rumannan. (Lesa 1 Korintionan 8:​12, 13.) Tin sierto desishon ku bo sa ku no ta bai kontra loke Beibel ta bisa. Pero si bo sa ku e desishon ei lo ofendé un ruman, lo ta sabí pa tòg tuma e desishon ei?c (1 Kor. 10:​23, 24) Na lugá di pensa: ‘Mi ta den mi derechi,’ lo ta bon pa bo tene kuenta kon otro hende ta sinti tokante bo desishon. (Rom. 15:1) Pero nos no a kaba di bisa ku otro hende mester respetá nos desishonnan personal? Sí, esei ta bèrdat. Nan mester respetá nos desishonnan meskos ku nos ta respetá esnan di nan. Pero nos tin ku kòrda tambe e konseho ku tin na Romanonan 12:18 ku ta bisa: “Te asina leu ku ta dependé di boso, keda na pas ku tur hende.” P’esei, nos ke hasi tur nos esfuerso pa mantené pas ku nos rumannan. Anto si nos sa ku algu ta ofendé un ruman, nos lo no hasi esei.

15. Kon ansianonan por yuda mantené union den kongregashon? (1 Korintionan 4:6)

¹⁵ Ansianonan, respetá e desishonnan di boso rumannan. Ansianonan ta yuda mantené e union den kongregashon ora nan no ta traha regla riba asuntunan personal ni nan no ta “bai mas leu di loke ta pará skirbí” den Beibel. (Lesa 1 Korintionan 4:6.) Esei ke men ku tampoko nan lo duna konseho ku no ta skirbí den nos publikashonnan. Ademas, ora un ruman bai serka e ansianonan pa yudansa, e ansianonan ta evitá di bisa e ruman kiko nan ta kere ku e mester hasi. Na lugá di esei, nan ta duna konseho usando Beibel.—Isa. 48:​17, 18.

16. Kon un ansiano por mustra ku e ta respetá e desishonnan ku e kuerpo di ansiano ta tuma?

¹⁶ Un ansiano mester respetá tambe e desishonnan ku e kuerpo di ansiano ta tuma. Despues ku e kuerpo a pidi Yehova pa spiritu santu, trata huntu loke Beibel ta bisa i tuma desishon a base di esei, kada ansiano mester apoyá e desishon ku e kuerpo a tuma, asta si un ansiano tabatin un otro opinion. (Efe. 5:17) Ademas, ansianonan ta hasi sigur di sigui e instrukshonnan ku tin den Beibel i den nos publikashonnan i nan no ta bai mas leu di loke tin skirbí. Pues, un ansiano lo no kue un frase for di nos publikashonnan i sak’é fo’i konteksto pa apoyá su propio punto di bista.

17. Kon nos kongregashon lo ta ora nos respetá e desishonnan di nos rumannan?

¹⁷ Manera nos a mira, kada un di nos ta úniko. Kada un di nos tin nos mes opinionnan i nos mes gustu. Anto esei ta algu bon! Debí ku nos tur tin diferente background i personalidat, esei ta trese un dushi ambiente den e kongregashon. Pues na lugá di laga e diferensianan ei trese desunion, nos ta respetá otro. Asina nos ta yuda mantené pas i union den kongregashon. Ora nos hasi esei, nos lo yuda ku nos kongregashon ta felis i uní.—Sal. 133:1; Mat. 5:9.