Keda Spiritualmente Fuerte Segun Ku Bo Ta Sigui Studia

1-2. (a) Kiko bo mester sigui hasi si bo disidí di sigui studia? (b) Kiko ke men “sigui riba e mesun rumbo”? (Filipensenan 3:16)

ALGUN ruman a disidí di sigui studia despues ku nan a kaba e edukashon básiko ku gobièrnu ta rekerí. Kisas nan ta buska mas edukashon ku e meta pa haña un trabou ku por sostené nan den nan sirbishi na Yehova. Si bo a disidí di sigui studia, kon bo por hasi sigur ku bo ta keda ku un bon amistat ku Yehova? (Sant. 4:8a) Kasi sigur den pasado bo a yega di haña bo ku prueba na skol i bo a keda fiel na Yehova. Awor bo tin ku “sigui riba e mesun rumbo”—esta, sigui sirbi Yehova fielmente, manera bo ta hasiendo kaba.—Lesa Filipensenan 3:16.

² E verbo griego den e frase ku a ser tradusí komo “sigui riba e mesun rumbo” ta deskribí un grupo di sòldá ku ta marcha bai dilanti sin stòp i sin ser distraí. Pues, si bo disidí di sigui studia, bo tambe mester “sigui marcha padilanti” den Yehova su sirbishi, sin stòp. Sí, bo amistat ku Yehova mester sigui bira mas i mas fuerte i no mas suak. E artíkulo akí lo trata kuater prinsipio di Beibel ku lo yuda bo den esei. Bo sa di e prinsipionan akí kaba. Den pasado bo a apliká nan, i nan lo yuda bo durante bo estudio i asta ora bo kaba bo estudio.

SIGUI HASI KOS KU TA LAGA BO KEDA SERKA DI YEHOVA

3. Ora ku bo sigui studia, kiko bo tin ku tene kuenta kuné?

³ Loke bo tin ku tene kuenta kuné. Ora ku bo sigui studia, lo bo ta hopi bezig pasobra bo tin mas kos di hasi tur dia. Ta normal ku lo bo ke hasi bo bèst na skol, pero esei por pone ku bo skol ta bira mas importante ku bo sirbishi na Yehova. Bo por asta kuminsá falta reunion, bai ménos den sirbishi, hasi ménos estudio personal i orashon.—Rev. 2:4.

4. Dikon ta importante pa bo tin “hopi di hasi den e trabou di Señor”? (1 Korintionan 15:58)

⁴ Lesa 1 Korintionan 15:58. Nos sa ku un baiskel mester keda den moveshon pa e no kai. Asina tambe pa bo keda spiritualmente fuerte bo tin ku keda den moveshon, esta, bo mester tin “hopi di hasi den e trabou di Señor.” Esaki no ta enserá djis partisipá den algun faseta di sirbishi na Yehova. E tin di haber ku bo prioridatnan. Kòrda ku sirbi Yehova mester ta na promé lugá den bo bida, i no bo estudio eskolar. (Mat. 22:37) Un ruman yòn ku yama Samantha a bisa: “M’a primintí mi mes ku si un dia mi estudio adishonal kuminsá stroba mi di sirbi Yehova, mi ta stòp di studia.”

5. Kiko bo por hasi pa keda bezig den Yehova su sirbishi?

⁵ Loke ta bon pa bo hasi promé ku bo buska mas edukashon. Hasi sigur ku Yehova lo keda na promé lugá den bo bida. Pa bo hasi esei, puntra bo mes: ‘Kiko lo mi hasi pa regularmente mi por sigui asistí na mi reunionnan, bai den sirbishi i hasi estudio personal?’ (Hos. 1:8; Mat. 28:​19, 20; Heb. 10:25) Puntra bo mes tambe: ‘Kon mi a saka tempu pa mi rutina spiritual durante e añanan promé ku mi tabata na skol?’ Si bo ta sinti ku kos por a bai mihó, ki kambio bo por hasi awor? Sea determiná pa keda bezig den bo sirbishi na Yehova miéntras bo ta sigui studia. Ta bèrdat ku bo mester hasi bo bèst na skol, pero, esei no mester bai a kosto di bo adorashon na Yehova.a—Mat. 6:24.

6. Kon bo por analisá bo mes regularmente? (Wak e plachi.)

⁶ Segun ku bo ta hasi bo estudio, tuma tempu regularmente, un biaha pa luna asina, pa analisá bo mes. Puntra bo mes: ‘Ainda Yehova ta na promé lugá den mi bida?’ Paga tinu na sierto señalnan ku por indiká ku bo prioridat a kambia. Por ehèmpel, bo ta kuminsá falta reunion òf yega reunion lat, bo ta pensa riba skol ora bo ta na reunion òf bo ta asistí na reunion virtualmente so. Paga tinu tambe si bo ta hasi orashon i lesa Beibel ménos òf si bo sirbishi a bira djis un obligashon ku bo ke kumpli kuné lihé lihé. Si bo mira algun di e señalnan ei, hasi kambio lihé. No laga bo estudio stroba bo di pone Yehova na promé lugá den bo bida.

“PROTEHÁ BO MENTE”

7. Segun ku bo ta sigui studia, ki efekto esaki por tin riba bo manera di pensa?

⁷ Loke bo tin ku tene kuenta kuné. Dependiendo di e estudio ku bo sigui, lo bo por haña bo “ku filosofia i idea falsu ku no ta bal nada,” ku ta siña hende tokante evolushon i ku Dios no ta eksistí. (Kol. 2:8) Ademas, bo maestronan por siña bo ku pa bo por tin éksito den bida bo tin ku konfia den bo mes abilidatnan. Un ruman hòmber yòn a bisa: “Nan no tabata djis siña nos un profeshon; nan tabata siña nos tambe kon nos mester pensa. Hopi biaha e manera di pensa ei no tabata kuadra ku Yehova su manera di pensa. Por ehèmpel, nan tabata siña nos ku pa nos por tin éksito den bida nos mester konfia den nos mes. E tipo di pensamentu ei a laga mi kuminsá pensa ku mi no tabatin mester di Yehova su yudansa pa mi ta felis. Esei a hasié mas difísil pa mi dependé riba dje.”

8. Dikon ta importante pa bo “protehá bo mente”? (Proverbionan 3:21)

⁸ Lesa Proverbionan 3:21. Beibel ta animá bo pa “protehá bo mente,” pasobra semper Satanas i su mundu ta purba di kontaminá bo manera di pensa. (1 Ped. 5:8) Loke hende ta pensa tokante loke ta bon i malu, tokante kon bida a kuminsá i si Dios realmente ta eksistí, por pone bo duda ku loke Dios ta siña nos den Beibel ta bèrdat. Bo maestronan i otro hende por purba di laga bo kere ku nan ideanan ta mihó ku kualke otro manera di pensa. Pero en realidat, nan manera di pensa “ta bobedat pa Dios.”—1 Kor. 3:​18-20.

9. Kiko bo por hasi pa no laga otro hende pone bo duda den loke bo sa ku ta bèrdat?

⁹ Loke ta bon pa bo hasi promé ku bo buska mas edukashon. Hasi sigur ku bo ta konvensí di e bèrdatnan ku tin den Beibel promé ku bo kuminsá ku bo estudio. Hasi bo mes pregunta manera: ‘Dikon mi ta kere den Dios? Dikon mi ta kere ku Beibel ta e palabra di Dios? Kiko ta konvensé mi ku e normanan moral di Beibel ta mihó ku e normanan di hende ku no ta kere den Beibel?’ Pensa tambe riba e pruebanan ku bo a yega di haña bo kuné na skol den pasado. Puntra bo mes: ‘E konfiansa ku otro hende tabatin den e teoria di evolushon a suak mi fe? Mi tabatin gana di hasi e kosnan malu ku mi kompañeronan di klas tabata hasi?’ Si bo ta sinti ku kos por a bai mihó, pensa kiko bo por hasi awor pa hasi bo konvikshon mas fuerte. Anto asina ei bo ta hasi sigur pa no laga otro hende pone bo duda den loke bo sa ku ta bèrdat.—2 Tim. 2:​16-18.b

10. Kon bo por evitá ku otro hende ta influensiá bo manera di pensa?

¹⁰ Asta despues ku bo a kuminsá ku bo estudio, tuma tempu regularmente pa puntra bo mes: ‘Mi a kuminsá pensa ku loke otro hende ta hasi no ta dje malu ei, aunke ku loke nan ta hasi no ta korekto den bista di Yehova? Mi por distinguí sabiduria di hende for di e bèrdat? Mi ta ègt konvensí ku ta e Reino di Dios so por trese solushon pa e problemanan di humanidat?’ Pa hasi sigur ku ni bo kompañeronan di klas ni bo maestronan ta influensiá bo manera di pensa, sigui lesa Beibel, meditá òf pensa bon riba loke bo ta lesa i apliká loke bo ta siña. Ora bo hasi esei, lo bo ta mas konvensí ku tur loke Beibel ta bisa ta bèrdat.—1 Tim. 4:15.

USA BO TEMPU BON

11. Segun ku bo ta bezig ku bo estudio, dikon por ta difísil pa usa bo tempu bon?

¹¹ Loke bo tin ku tene kuenta kuné. Baimentu di skol i siñamentu por tuma hopi tempu, foral ora bo tin ku prepará pa eksámen òf ora bo tin un deadline pa kaba un proyekto. Si bo no usa bo tempu bon, bo por haña bo ku hopi strès i kisas asta haña burnout. P’esei ta masha importante pa bo kuida bo salú físiko i emoshonal.

12. Pa bo por ‘usa bo tempu mas mihó posibel,’ kiko ta algun kos ku bo tin ku saka tempu p’e? (Efesionan 5:​15, 16)

¹² Lesa Efesionan 5:​15, 16. No semper ta fásil pa ‘usa bo tempu mas mihó posibel.’ Debí ku bo tin hopi kos di hasi, bo mester ta balansá. Por ehèmpel, maske bo lèsnan ta tuma hopi tempu di bo, ta mas importante ainda pa bo pasa tempu ku bo rumannan i famianan. (Sal. 133:1; Pro. 18:1) Anto di mes, loke ta asta mas importante ainda ta hasi e kosnan ku ta laga bo keda serka di Yehova. (Mat. 6:33) Kisas bo tin ku pèrkurá pa bo famia i traha tambe. Ademas, bo tin ku sosegá sufisiente i hasi ehersisio pa kuida bo salú. (Ekl. 4:6; 1 Tim. 4:8) Pa bo por hasi tur e kosnan ei, bo tin ku usa bo tempu bon.

13. Kiko bo por hasi pa usa bo tempu mas mihó posibel?

¹³ Loke ta bon pa bo hasi promé ku bo buska mas edukashon. Beibel ta bisa ku bon plan ta duna bon resultado. (Pro. 21:5) Ku esei na mente, traha un bon skèdjel promé ku bo buska mas edukashon. Pa yuda bo hasi esei, puntra bo mes: ‘Mi a usa mi tempu bon durante e añanan promé ku mi tabata na skol?’ Si bo ta sinti ku kos por a bai mihó, kiko bo por kambia? Hasi sigur ku bo tin un bon skèdjel pa bo no ta yen di strès tur ora bai.c

14. Ki pregunta por yuda bo wak kon bo ta usando bo tempu?

¹⁴ Segun ku bo ta sigui studia, tuma tempu regularmente pa wak kon bo ta usando bo tempu. Hasi bo mes e preguntanan akí: ‘Mi skèdjel ta permití mi sosegá sufisiente i hasi ehersisio? Mi ta sobra tempu pa mi por ta huntu ku mi rumannan? Mi por kaba ku mi hùiswèrk na tempu? Si esei no ta e kaso, ta pasó mi tin hopi kos di hasi òf ta pasó mi gusta laga tur kos pa último momento? Mi famianan i amigunan ta haña ku mi mester hasi kambio?’ Sea ku bo mester ahustá bo skèdjel òf bo mester ta mas disipliná, aktua lihé. Bo por asta papia ku hende ku ta hasi bon uso di nan tempu.—Pro. 11:14.

SIGUI “ANDA KU HENDE SABÍ”

15. Segun ku bo ta sigui studia, kiko bo tin ku tene kuenta kuné?

¹⁵ Loke bo tin ku tene kuenta kuné. Segun ku bo ta sigui studia, bo kompañeronan di klas por invitá bo pa pasa tempu ku nan despues di skol. I bo por haña gana di djòin nan. Kon ku bai bini, bo tin hopi kos en komun ku nan i bo ta pasa hopi tempu ku nan den klas. Bo por asta pensa ku bo tin mas kos en komun ku bo kompañeronan di klas ku bo tin kos en komun ku algun di bo rumannan. Pero bo tin ku tene kuidou. Aunke den algun manera, bo ta meskos ku bo kompañeronan di klas, tòg bo ta diferente for di nan pasó abo ke hasi Yehova kontentu i nan nò. I mas tempu bo pasa ku nan, mas nan manera di pensa por influensiá bo. (1 Kor. 15:33) Esei ta loke a pasa ku un ruman ku yama Michael. El a haña entrenamentu pa bira elèktrishèn durante kuater aña. El a bisa: “Mi tabata pasa mas ku 40 ora pa siman huntu ku mi koleganan. Nan punto di bista tokante sekso opuesto, músika i palabra malu a kuminsá afektá mi manera di pensa.”

16. Kiko ta nifiká “anda ku hende sabí”? (Proverbionan 13:20)

¹⁶ Lesa Proverbionan 13:20. Beibel ta spièrta nos ku mal amigu por hinka nos den hopi problema. Di otro banda, e ta bisa ku “hende ku ta anda ku hende sabí ta bira sabí.” Esaki ta e punto: E hendenan ku nos skohe pa anda kuné, òf pasa tempu kuné, por tin bon influensia òf mal influensia riba nos. Pues, sera amistat ku hende ku ta sirbi Yehova di henter kurason meskos ku bo i ku ke lo mihó pa bo.—Sal. 101:​6, 7; 119:63.

17. Kiko bo por hasi pa evitá mal influensia di hende ku no ta stima Yehova?

¹⁷ Loke ta bon pa bo hasi promé ku bo buska mas edukashon. Pone límite na e kantidat di tempu ku lo bo pasa ku bo koleganan di klas. Un testigu ku yama Trenton a bisa: “Mi ta trata mi koleganan di klas bon, pero mi no ta pasa tempu ku nan despues di skol. Pa mi, nan ta mi koleganan di klas i no mi amigunan.” Ki límite abo lo pone? Pa kontestá e pregunta ei, puntra bo mes: ‘Ki límite mi a pone durante e añanan promé ku mi tabata na skol?’ Si bo ta sinti ku kos por a bai mihó, kiko bo por kambia? Keda determiná pa sigui “anda ku hende sabí” i pa evitá di pasa tempu innesesario ku hende ku no ta stima Yehova.d

18. Ki análisis ta bon pa bo hasi? (Wak e plachi.)

¹⁸ Tuma tempu regularmente pa analisá bo mes. Puntra bo mes: ‘Mi ta birando hopi será ku mi koleganan di klas? Mi a kuminsá papia, pensa i hasi manera nan? Yehova tambe ta di akuerdo ku mi kontestanan pa e preguntanan ei?’ (Sal. 1:1) Si bo realisá ku bo tin ku hasi kambio, hasi esei mesora. Hasi sigur ku bo bon amigunan ta hende ku ta stima Yehova meskos ku bo. Ademas, no duda pa papia tokante e bèrdat ku bo koleganan di klas. Bo tin un oportunidat úniko pa yuda nan siña e bèrdat.

PREPARÁ BO MES

19. Kon bo por prepará bo mes pa bo keda fuerte spiritualmente durante bo estudio? Ilustrá esei.

¹⁹ Pensa riba e ilustrashon akí: Un hende ku ta bai subi seru ta prepará su mes promé ku e kuminsá. Maske e no sa ki opstákulo por presentá, e ta hasi sigur ku e ta den bon kondishon, ku e tin paña i kèts adekuá i ku e sa ki ruta e tin ku sigui. Bo por hasi algu similar ora di buska mas edukashon. Hasi sigur ku bo fe ta fuerte, bisti “e armadura kompleto ku Dios ta duna” i wak pa bo tin e meta korekto. Bo meta no mester ta pa logra loke e mundu ta konsiderá “éksito,” sino pa duna gloria na Yehova den tur loke bo ta hasi.—Efe. 6:​11-13; 1 Kor. 9:​26, 27; 10:31.

20. Kon bo por ‘sigui saminá bo mes pa sa si bo ta biba di akuerdo ku bo fe den Dios’?

²⁰ Beibel ta bisa pa “sigui saminá boso mes pa sa si boso ta biba di akuerdo ku boso fe den Dios; sigui hasi sigur ki sorto di hende boso ta.” (2 Kor. 13:5) Bo por hasi esei segun ku bo ta sigui studia. Regularmente analisá bo mes pa wak kon ta bai ku bo. Por ehèmpel: Bo tin un bon rutina spiritual? Bo ta protehando bo manera di pensa for di e supuesto sabiduria di mundu? Bo ta usando bo tempu na un manera sabí? Bo tin amistat será ku bo rumannan den kongregashon i ta evitá mal amigu? Bo tin ku hasi bo mes e preguntanan ei sea ku bo ta bai skol, bo ta traha òf ta hasi algu otro. Sea determiná pa bo keda ku un fe fuerte den kualke sirkunstansia. Yehova lo yuda bo tin e mihó bida posibel, si bo hasi bo bèst pa keda serka di dje.—Pro. 3:​5, 6.