Sigui Fortalesé Bo Amistat ku Bo Kasá

1. Dikon nos bon amigunan ta un regalo di Yehova?

KIKO bo ta pensa di bo bon amigunan? Bo no ta haña ku nan ta un regalo di Yehova? (Sant. 1:17) Nos bon amigunan ta stima nos i, mas importante ainda, nan ta stima Yehova. Nan ke pa nos ta felis, nan ta konsolá nos ora nos ta tristu, i nan ta duna nos bon konseho. Semper nan t’ei pa nos, i nos por konfia nan. Sin duda, amigunan asina “ta hasi [nos] kurason kontentu”!—Pro. 27:9.

2. Dikon ta importante pa parehanan kasá sigui fortalesé nan amistat ku otro? (Mateo 19:6)

² Si bo ta kasá, bo kasá mester ta bo mihó amigu. Bo mester hasi esfuerso pa hasi e amistat ku bo tin ku bo kasá mas fuerte. Si un pareha kasá no sigui fortalesé nan amistat ku otro, nan por kuminsá sinti nan mes nan so, frustrá i asta nan por kuminsá sinti rabia pa otro. Pero si nan sigui traha riba nan amistat ku otro, nan lo por disfrutá di e amistat di mas será ku por eksistí entre dos hende. (Lesa Mateo 19:6.) Den e artíkulo akí, nos lo wak kon pareha kasá por sigui fortalesé nan amistat ku otro. Pero promé ku bo kasa, bo mester pensa bon ken lo bira bo futuro kasá, esta, e persona ku lo ta bo mihó amigu pa semper. Ban wak kiko por yuda bo hasi esei.

SKOHE E PERSONA KU LO TA BO AMIGU PA SEMPER

3-4. Kiko por yuda un ruman haña un bon kasá? (Proverbionan 18:22)

³ Promé ku nos tuma kualke desishon importante, nos tin ku pensa bon riba e benefisionan i e konsekuensianan ku esaki por trese kuné. Pasobra desishonnan asina por tin efekto riba nos pa henter nos bida.

⁴ E desishon di skohe ken pa kasa kuné ta un di e desishonnan mas grandi ku nos lo tuma den nos bida. Pasobra e persona ei lo bira bo amigu pa restu di bo bida. Kiko por yuda nos tuma un bon desishon? Komo ku Yehova a bin ku e areglo di matrimonio ta lógiko ku ta serka dje nos mester bai pa haña guia, pasobra e konosé nos bon i e sa kiko ta bon pa nos. Yehova ke pa hende hòmber haña un bon esposa i pa hende muhé haña un bon esposo. (Lesa Proverbionan 18:22; Isa. 48:​17, 18) E prinsipionan di Beibel por yuda un ruman haña un bon kasá ku ta pas kuné.

5. Dikon ta importante pa kasa ku un persona ku ta den e bèrdat?

⁵ Ora nos boutisá, nos ta bira amigu di Dios. (Sal. 25:14) P’esei, si bo tin e deseo di kasa, lo ta bon pa bo skohe un persona ku tambe ta amigu di Yehova. (1 Kor. 7:39) Ora bo hasi esei, bo ta mustra ku bo ta respetá Yehova su punto di bista tokante matrimonio i lo bo mira bo kasá komo un regalo di Yehova. (Pro. 19:14) Esaki lo yuda bo evitá e problemanan ku bo por haña bo kuné si bo kasa ku un persona ku no ta sirbi Yehova. (2 Kor. 6:14) Si bo no ta logra haña un persona pa kasa kuné den e bèrdat, esei no ta èksküs pa nos kuminsá namorá un persona ku no ta Testigu. Tampoko nos no ke pensa ku nos por namorá un persona ku no ta den e bèrdat ku e pensamentu ku tòg nos por yud’é drenta e bèrdat despues.

6-7. Ki pregunta bo por hasi bo mes durante bo namorashon?

⁶ Ta klaru ku esei no ta nifiká ku tur persona boutisá lo ta un bon kasá pa bo. Si bo tin wowo riba un ruman, ta bon pa bo hasi bo mes e siguiente preguntanan: ‘Kon e ta trata su mayornan i su rumannan karnal? E ta tene kuenta ku sintimentu di otro hende i e ta un persona respetuoso? Ken ta su amigunan? Kon e ta trata ku desakuerdo? Semper e ke pa kosnan bai na su manera? Òf e ta dispuesto pa skucha opinion di otro hende tanten ku esei no ta bai kontra prinsipio di Beibel? Kiko e ta pensa tokante sèn i kon e ta anda kuné?’

⁷ Bo por hasi bo mes e siguiente preguntanan tambe: ‘E persona ku mi ta interesá aden ta ègt stima Yehova? E ta trahando pa “bisti e personalidat nobo”? Lo e yuda mi bira un mihó amigu di Yehova? Nos tin e mesun metanan spiritual? E persona akí lo por bira no djis un amigu, pero mi mihó amigu?’ (Kol. 3:​9, 10) Si bo ta un ruman muhé, puntra bo mes: ‘E ruman ku mi ta namorá di dje lo ta un bon amigu pa mi i un bon kabes di famia?’ (1 Kor. 11:3) Si bo ta un ruman hòmber, puntra bo mes: ‘E ruman ku mi ta namorá di dje lo apoyá mi i respetá mi desishonnan asta si de bes en kuando mi ta hasi fout?’ Ta tuma tempu pa logra kontestá e preguntanan ei. P’esei, usa e temporada di namorashon pa siña konosé otro bon.

8-9. Kiko por yuda un persona ku ta namorá tuma un bon desishon? (Wak e plachi.)

⁸ Si bo ke sa si e persona ku bo ta namorá ta bon pa bo, bo mester hasi esfuerso pa haña sa ken e ta realmente. Buska pa sa kiko otro ruman ta pensa di dje. Puntra nan tokante e persona su kualidatnan i kon e rumannan den kongregashon ta mir’é. Por ehèmpel, hende ta mir’é komo un persona humilde, amabel i rasonabel? Un ruman ku yama Sarah i ku ta biba na Guyana Franses a kasa ku un ruman ku yama Daniel. Sarah a bisa lo siguiente tokante su temporada di namorashon: “Mi a puntra otro hende kiko nan ta pensa di Daniel. Mi a puntra un ruman hòmber ku tabata biba den mesun flèt kuné i ku tabata traha pionero huntu kuné. Mi a puntra tambe un ansiano den Daniel su kongregashon, nos amigunan, i algun ruman muhé den su kongregashon.” Ta importante tambe pa bo puntra e persona ku bo ke kasa kuné na un manera respetuoso si tin algu di su pasado òf algu ku ta pasando aworakí den su bida ku ta importante pa bo sa. E kosnan akí ta importante pa bo sa di antemano pasobra despues nan por trese problema serio den matrimonio.

⁹ Kiko si bo no tin sigur ku e persona lo ta un bon kasá pa bo? Òf kiko si un ruman madurá hala bo atenshon na algun mal kualidat ku e persona tin? Si ta asina, no purba di ignorá e kosnan ei. Si bo tuma e kosnan ei na serio, lo bo por determiná si bo tin ku sigui ku e namorashon òf si bo tin ku par’é.a Awor, laga nos wak kon parehanan kasá por fortalesé nan amistat ku otro.

PASA TEMPU HUNTU

10. Dikon ta bon pa un pareha kasá pasa tempu ku otro?

¹⁰ Pa un pareha kasá por tin un amistat fuerte ku otro, nan mester traha tempu pa otro asta si nan tin un bida hopi drùk. Ora nan pasa tempu ku otro, nan por kòmbersá ku otro tokante nan dia, loke nan ta sinti i loke ta preokupá nan. Nan ta haña chèns tambe pa mustra kariño na otro i hasi kos leuk huntu.

11. Kiko por daña e amistat entre un pareha kasá?

¹¹ Un pareha kasá ku ta bon amigu di otro ta preferá pa ta huntu i no separá. Klaru, tin biaha kos por pasa ku ta pone ku nan no por ta huntu pa un tempu. Pero si e tempu ei bira muchu largu, kos por bai robes. Por ehèmpel, algun ruman a bai traha na un otro pais, ku a pone ku pa un tempu largu nan no tabata huntu ku nan famia. Aunke ku kisas un persona por haña mas sèn hasiendo esei, e desishon ei por ta peligroso. Pasobra si un hende keda hopi tempu separá for di su kasá, esei por kaba ku su matrimonio.

12-13. (a) Kiko algun pareha kasá ta hasi pa pasa tempu ku otro? (Wak e plachi.) (b) Kon importante nos kasá mester ta den nos bida? (Wak e kuadro “Kon Importante Mi Kasá Ta den Mi Bida?”)

¹² Wak kiko algun pareha kasá ta hasi pa nan por pasa mas tantu tempu huntu. Lea, ku ta biba na Guam, a bisa: “Ami ku mi kasá ta gusta hasi vários kos huntu. Ora di sali òf ora nos haña un invitashon, masha poko biaha nos ta keda sin bai huntu.” Roxanne, ku ta biba na Merka, a bisa: “Último tempu nos a bira mas i mas drùk. P’esei nos a bin ripará ku, meskos ku nos ta plania pa hasi otro kos importante, nos mester plania tambe pa hasi kos huntu.” (Kompará ku Ámos 3:3.) Damien, un ruman di Fransia, a bisa: “Nos a ripará ku ta importante pa nos mustra interes i asta gusta e kosnan ku e otro persona ta haña leuk.” (Mat. 7:12) Anto Katie, un ruman di Merka, a bisa: “Tin biaha nos ta warda nos telefòn pa e no kita nos atenshon for di otro.”

¹³ E kos di mas importante ku un pareha kasá mester hasi huntu ta kosnan spiritual. Miriam, un ruman di Fransia, a bisa: “Tur mainta, nos kada un ta lesa nos Beibel, i despues nos ta kompartí ku otro loke nos a gusta i kon nos por apliká esei den nos bida. Mi ta ègt gusta e momentonan ei ku nos ta pasa huntu.” El a sigui bisa: “Algu otro ku mi gusta ta ora mi kasá ta hasi orashon pa nos i mi tende kuantu e stima Yehova.” Katie, ku a ser menshoná anteriormente, a bisa: “Loke nos gusta hasi mas tantu ta prediká huntu. Ta dushi pa tende otro papia tokante Yehova. I asina nos ta siña hopi kos for di otro ku ta yuda nos mehorá nos sirbishi.”—Pro. 27:17.

HASI ESFUERSO PA VENSE DIFIKULTATNAN HUNTU

14-15. Dikon un pareha kasá mester hasi esfuerso pa vense problema ku por presentá den nan matrimonio? Duna un ehèmpel.

¹⁴ Komo ku nos ta imperfekto, ta masha normal ku parehanan kasá ta haña nan ku difikultat den nan matrimonio. Beibel ta asta bisa ku parehanan kasá “lo haña nan ku hopi problema den bida.” (1 Kor. 7:28) Ora nan haña nan den situashon asina, dikon ta importante pa nan hasi esfuerso pa vense e difikultatnan ei i pa keda bon amigu di otro?

¹⁵ Laga nos wak un ilustrashon. Ora un monumento òf algu di hopi balor sufri daño, e doñonan lo hasi tur nan esfuerso pa drecha e daño. Probablemente nan lo hinka hopi sèn den e proyekto, i nan lo sigui ku e proyekto asta si esei tuma hopi aña. Dikon nan ta dispuesto pa hasi esei? Pasobra loke nan ta purba di drecha tin hopi balor pa nan. Meskos ku un monumento òf algu di balor por sufri daño, un pareha ku tin un amistat fuerte tambe por haña nan ku problema i desakuerdo. Pero meskos ku e monumento i e kos di balor por wòrdu drechá, e amistat entre un pareha kasá tambe por wòrdu drechá. Probablemente, esei lo tuma hopi tempu i esfuerso, pero komo ku matrimonio ta algu masha balioso esei lo ta bale la pena. Ademas, Yehova lo ta masha kontentu ora un pareha ta traha duru pa keda huntu i fortalesé nan amistat ku otro. (Mal. 2:16) Ora nan hasi esei, nan ta mustra amor i rèspèt pa otro i pa Yehova, e persona ku a bini ku e areglo di matrimonio.

16. Segun 1 Korintionan 13:​4-8a, kiko un pareha por hasi si nan tin problema serio den nan matrimonio? (Wak e plachi i e kuadro “Kosnan Ku Por Yuda Bo Fortalesé Boso Amistat ku Otro.”)

¹⁶ Si bo haña bo ku problema den boso matrimonio, no kore pensa riba separashon. (1 Kor. 7:​10, 11) Na lugá di esei, puntra bo mes: ‘Kiko ami por hasi pa drecha nos amistat?’ Meditá riba loke Beibel ta bisa tokante amor na 1 Korintionan 13:​4-8a. (Les’é.) Tin kos ku bo por hasi pa mustra asta mas amor den boso matrimonio? Na lugá di buska manera pa separá di bo kasá, buska manera pa hala mas serka di dje. En bes di enfoká riba loke bo kasá mester drecha, wak kiko abo por hasi pa drecha boso matrimonio. Kiko ta algun kos ku por yuda bo? Pa kuminsá, hasi orashon na Yehova pa yuda bo. Buska yudansa den nos publikashonnan i vidionan. Buska yudansa serka ansiano òf otro ruman ku tin eksperensia den apliká prinsipio di Beibel den nan matrimonio. Kòrda ku Beibel ta bisa ku matrimonio ta manera “tres kabuya di flèktu huntu,” i Yehova ta e kabuya di mas fuerte i mas importante den boso matrimonio. I si esei ta e kaso den boso matrimonio, lo e “no por ser kibrá fásilmente.”—Ekl. 4:12.

17. Kon parehanan kasá i esnan ku tin pensá di kasa por ta felis?

¹⁷ Yehova ke pa tur su sirbidónan ta kontentu, tantu esnan ku ta kasá komo esnan ku tin pensá di kasa. Pues, si bo ta soltero i bo tin gana di kasa, pensa bon ken lo bo skohe pa kompartí bo bida kuné. I si bo ta kasá kaba, sigui hasi esfuerso pa abo ku bo kasá ta bon amigu di otro. Anto si boso ta pasando den poko problema den boso matrimonio, pidi Yehova pa yuda boso drecha e problemanan ei. Si bo hasi e kosnan ei, di bèrdat boso lo disfrutá di bida huntu!—Ekl. 9:9.