Kon Bo Por Komprondé e Ilustrashonnan di Beibel

Beibel ta usa hopi ilustrashon. Pero hopi hende ku ta lesa Beibel ta haña difísil pa komprondé nan. (Mat. 13:13) Kiko por yuda bo komprondé e ilustrashonnan akí mas mihó? Purba e siguiente sugerensianan:

• Purba di saka afó kiko e idea prinsipal ta i ku kiko e ta ser kompará. Por ehèmpel, Revelashon 3:3 ta bisa ku Hesus ta bini manera un ladron. E idea ta ku Hesus ta bini, i e binida ei ta ser kompará ku ora un ladron ta bini.

• Purba di saka afó ki similaridat tin entre e idea i e ilustrashon. Purba di pensa algun motibu dikon e idea ta ser kompará ku e ilustrashon i kiko e dos kosnan ei tin en komun.

• Yega na e konklushon korekto. Tin biaha, bo ta haña algun similaridat entre e idea i e ilustrashon, i tòg bo por komprondé e ilustrashon robes. Por ehèmpel, den e ilustrashon tokante Hesus, Hesus no a bini pa hòrta nada. Mas bien, e ilustrashon ke siña nos ku meskos ku un ladron ta bini na un momento ku nos no ta spera, asina tambe Hesus ta bini na un momento ku hende no ta spera esei.