Nos Por Tin Goso Apesar Ku Hende Ta Odia Nos

1. Kiko Hesus a bisa den su Diskurso Riba Seru, i dikon esei por sorprendé nos?

DEN Hesus su Diskurso Riba Seru, el a bisa: “Ora hende ta odia boso, . . . boso lo ta felis.” (Lúk. 6:22) Ta klaru ku niun hende no ke pa hende odia nan. P’esei, Hesus su palabranan lo a sorprendé e hendenan ku tabata skuch’é. Dikon Hesus a bisa esei antó? Ta bon pa nos haña kontesta pa e pregunta ei, pasobra awe hopi hende ta odia Hesus su siguidónan. Den e artíkulo akí, nos lo ta trata dikon hende ta odia nos i kon nos por tin goso apesar di esei.

DIKON ALGUN HENDE TA ODIA NOS?

2-3. (a) Kiko ta un motibu dikon kristiannan berdadero ta ser persiguí? (Huan 16:​2, 3) (b) Kon esei por kambia nos manera di pensa tokante nos opositornan?

² Hende ta odia nos pasobra nos ta adorá Yehova. Hesus tabata sa ku hende lo a persiguí i asta mata algun di su siguidónan. El a bisa tokante e hendenan ei: “Nan no a siña konosé ni ami ni e Tata.” (Lesa Huan 16:​2, 3.) Pero ken ta esun ku ta influensiá hende pa oponé e pueblo di Dios? Esei ta Satanas, “e dios di e mundu akí.” (2 Kor. 4:​3, 4) Satanas ke stroba hende di siña e bèrdat tokante Yehova, i e ta influensiá nan pa oponé hende ku sí konosé i stima Dios. (Huan 8:​42-44) Kon esei mester afektá e manera ku nos ta mira hende ku ta oponé nos? Ora nos komprondé ku ta Satanas ta gaña nan, esei ta yuda nos pa no odia nan bèk.

³ Wak kiko a pasa ku Pavel,a un ruman ku ta biba na un pais kaminda nos trabou ta prohibí. Debí ku Pavel a sigui sirbi Yehova fielmente, el a ser arestá i maltratá severamente. Despues, nan a hink’é su so den un sèl, i el a keda ei den pa hopi tempu. Mas despues, Pavel a bisa: “Awor mi tin sigur ku ta Satanas i su demoñonan tabata tras di e persekushon; nan ke stroba nos di adorá Yehova. Mayoria di e trahadónan di prizòn no tin nada personal kontra nos. Nan ta djis hasiendo nan trabou.” Un ruman hòmber di Kroasia a haña hopi oposishon di su mayornan. Nan a trat’é masha malu. El a bisa: “Mi a bin realisá ku mi mayornan no ta mi enemigu, sino Satanas.”—Efe. 6:12.

4. Kiko nos por siña for di e ehèmpelnan di Hesus i di Esteban? (Wak e plachi.)

⁴ Manera nos a wak, nos no ta odia nos opositornan. En bes di esei, nos ta hasi orashon pa nan. (Mat. 5:44) E ehèmpel di Hesus i Esteban ta mustra ku ta bon pa hasi esei. Ora Hesus tabata klabá na staka, Hesus a hasi orashon. El a bisa: “Tata, pordoná nan.” (Lúk. 23:34) Hesus a pidi Yehova pa pordoná e sòldánan ku a haña òrdu pa mat’é. Tabatin tambe e multitut di hende ku a ser instigá pa e lidernan religioso pa nan pidi pa Hesus ser matá. Kisas Hesus a pidi pa Yehova pordoná nan tambe. Hesus tabata sa ku e hendenan ei no tabata konsiente di loke nan tabata hasi. Esteban a hasi algu similar. E tambe a pidi Dios pa pordoná esnan ku tabata bai mat’é. (Echo. 7:​58-60) Yehova a kontestá e orashonnan ei? Klaru ku sí. Hopi di e hendenan ku tabata ke pa Hesus ser matá a arepentí despues. Ademas, nan a pone fe den Hesus i boutisá. (Echo. 2:​36-41) Den kaso di Esteban, por lo ménos un di e personanan ku a aprobá e asesinato di Esteban, esta, Saulo di Tarso, tambe a bira kristian despues. El a sinti duele di tur e kosnan malu ku el a hasi.—1 Tim. 1:13.

5. Kiko nos por siña for di e eksperensia di Sésar?

⁵ Awe tambe Yehova ta kontestá e orashonnan ku nos ta hasi pa nos opositornan. Laga nos wak e ehèmpel di Sésar, kende ta biba na Venezuela. Su tata tabata masha kontra e bèrdat. Sésar a bisa: “Mi mama tabata un tremendo kasá i un bon mama. Semper el a pone e Reino na promé lugá, i e tabata hasi tur loke e tabata por pa mi tata. El a siña ami ku mi rumannan pa nos respetá nos tata. Tambe el a siña nos pa semper obedesé nos tata a ménos ku e pidi nos hasi algu ku Yehova no gusta.” Despues di algun aña, Sésar su tata a kuminsá kambia. Sésar a bisa: “Riba un dia, despues ku mi a hasi un orashon ferviente, mi a puntra mi tata si e ke studia Beibel ku mi. Pa mi sorpresa, el a bisa ‘sí,’ i esei a hasi mi masha kontentu.” Ku tempu, Sésar su tata a boutisá. Ta bèrdat ku no ta tur hende ku ta oponé nos ta hasi e tipo di kambionan ei. Pero algun di nan por kambia nan manera di pensa i trata nos ora nan mira nos bon komportashon. Ora esei pasa, nos ta bira masha kontentu. Nos tin gana pa Yehova, ‘e Hues miserikòrdioso di henter tera,’ yuda e hendenan ei tambe siña tokante dje.—Gén. 18:25.

6. Segun Marko 13:​13, kiko ta un otro motibu ku hende ta odia nos?

⁶ Hende ta odia nos pasobra nos ta apoyá Hesus. Hesus a bisa ku tur hende lo odia e kristiannan berdadero “pa motibu di [su] nòmber.” (Lesa Marko 13:13.) Kiko Hesus tabata ke men aki ku su “nòmber”? Su nòmber ta referí na su reputashon i e outoridat ku e tin komo Rei di e Reino di Dios. Na lugá di pone nos konfiansa den gobernante humano, nos ta konfia Hesus, kende Yehova a skohe komo gobernante di universo. P’esei hende ta odia nos. For di 1914, Hesus ta gobernando komo Rei di e Reino di Dios. I pronto, lo e kaba ku tur otro gobièrnu.

7-8. Menshoná un otro motibu dikon hende ta odia nos. (Huan 15:​18-20) (Wak e plachinan.)

⁷ Hende ta odia nos pasobra nos no ke imitá e hendenan den e mundu di Satanas. Hesus a splika ku hende lo odia su siguidónan pasobra nan “no ta parti di mundu.” (Lesa Huan 15:​18-20.) Meskos ku e kristiannan di promé siglo, nos no ta pensa, ni aktua ni papia manera e hendenan di e mundu akí. P’esei, hopi hende ku nos ta topa na trabou òf skol ta hasi chèrchi di nos. (1 Ped. 4:​3, 4) Pero, despues di tempu, algun di e hendenan ei ku tabata oponé nos a kambia nan manera di pensa i a kuminsá respetá nos.

⁸ Laga nos wak e ehèmpel di Ignacio, kende ta biba na Sentroamérika. Tempu ku e tabata bai skol, tabatin un mener di skol ku hopi biaha tabata hasi chèrchi di dje pasobra e tabata biba di akuerdo ku e normanan haltu di Beibel. Pero promé ku Ignacio a gradua, e mener a puntr’é kon e por a logra sigui prinsipio di Beibel maske hopi hende tabata trat’é malu pa esei. Ignacio a splika e mener ku e ta mira e leinan di Dios komo un protekshon p’e. Despues, el a invitá e mener na un di nos reunionnan. Ignacio a keda masha kontentu ku e mener a bini Salòn. E amor di e rumannan a impreshoná e mener asina tantu ku el a sigui bai reunion. Despues, e mener a kuminsá studia Beibel, i e tambe a hañ’é ku oposishon. Pero e no a laga esei strob’é. El a sigui hasi progreso, i ku tempu, el a boutisá.

9-10. (a) Kiko mas ta hasi nos diferente for di hende den e mundu di Satanas? (b) Kiko nos por siña for di e ehèmpel di Apòstel Pablo?

⁹ Un manera mas ku nos ta diferente for di e hendenan den Satanas su mundu ta ku nos ta keda neutral ora ta trata di polítika i guera. (Huan 18:36) Nos ta sigui e konseho ku tin na Romanonan 13:1 pa obedesé e leinan di gobièrnu. Pero komo kristian, nos no ta skohe un banda den asuntu polítiko. P’esei, nos no ta vota ni subi lista di partido. Dikon? Pasobra nos ke ta leal na Yehova i na su Reino ku Hesus na kabes. Hopi di nos rumannan a bai será pasobra nan ta Testigu di Yehova. Apesar di esei, nos rumannan ta sigui prediká den prizòn. Nan ta imitá e ehèmpel di Pablo, kende a sigui prediká tur e añanan ku e tabata será. (Echo. 24:27; 28:​16, 30) El a sigui prediká bon notisia na tur hende ku tabata dispuesto pa skuch’é. El a prediká na wardadónan di prezu, funshonarionan, gobernadornan, reinan i kisas asta na funshonarionan di Emperador Nero.—Echo. 9:15.

¹⁰ Nos rumannan den prizòn tambe ta prediká na tur hende ku ke skucha, entre otro, huesnan, funshonarionan di gobièrnu i wardadónan di prezu. Un ruman hòmber tabata será pa mas ku seis aña den prizòn pasobra e tabata neutral den asuntu polítiko. E no a mira e tempu ku el a pasa den prizòn komo un kastigu. Mas bien, el a mir’é komo un asignashon di Yehova pa prediká na hende ku ta interesá den e bèrdat. Anto si un dia nos haña nos den un situashon similar, lo ta un privilegio pa nos prediká na hende asina. (Kol. 4:3) Awor, ban wak algun motibu mas ku nos por tin goso sirbiendo Yehova apesar ku hende ta odia nos.

DIKON NOS POR TIN GOSO APESAR KU HENDE TA ODIA NOS?

11. Kon persekushon por hasi nos fe mas fuerte? Duna un ehèmpel.

¹¹ E echo ku mundu ta odia nos ta kumpli ku profesia di Beibel. Den e promé profesia den Beibel, Yehova a profetisá ku Satanas i esnan ku ta apoy’é lo odia e hendenan ku ta stima i sirbi Yehova. (Gén. 3:15) Na vários okashon, Hesus mes a konfirmá ku esei ta bèrdat. (Mat. 10:22; Mar. 13:​9-12; Lúk. 6:​22, 23; Huan 15:20) Otro eskritor di Beibel tambe a bisa ku hende lo odia nos. (2 Tim. 3:12; Sant. 1:2; 1 Ped. 4:​12-14; Húdas 3, 17-19) Pues, ora nos haña nos ku persekushon, esei no ta sorprendé nos. Mas bien, nos ta keda kontentu pa mira profesia di Beibel kumpli, pasobra esei ta konvensé nos mas ainda ku nos ta sirbi e Dios berdadero. Un ruman muhé ku ta biba na un pais kaminda nos trabou ta prohibí a bisa: “Ora mi a dediká mi mes na Yehova, mi tabata sa ku tardi òf trempan lo mi a haña mi ku persekushon. I ora prueba a bini, nan no a spanta mi ni kue mi fo’i base.” Su kasá tabata un di e hopi hendenan ku tabata opon’é. Su kasá a trat’é malu i a asta kima su Beibel i su publikashonnan. En bes di laga e kosnan ei spant’é i debilitá su fe, su fe a bira mas fuerte. (Heb. 10:39) El a bisa: “Beibel ta bisa ku nos lo haña nos ku persekushon. Pues, mi a ferwagt persekushon. I ora mi a pasa den dje, mi a bira mas konvensí ku esaki ta e religion berdadero.”

12. Kiko a yuda un ruman perseverá ora el a hañ’é ku persekushon?

¹² Aunke nos ta ferwagt persekushon, esei no ta nifiká ku semper bai ta fásil pa trata kuné. Wak kiko un ruman hòmber a skirbi tokante e tempu ku el a pasa den prizòn. El a bisa: “Tin biaha, mi tabata sinti mi asina deprimí i preokupá ku mi tabata yora.” Kiko a yuda e ruman trata ku e situashon? El a sigui bisa: “Semper mi tabata hasi orashon. Mi tabata kuminsá mi dia ku orashon, i durante dia mi tabata bolbe hasi orashon ora mi haña mi mes ku situashon difísil. Tin biaha hende tabata trata mi malu i esei tabata pone mi rabia. Na e momentonan ei, mi tabata sera mi mes den baño i hasi orashon.” Algu otro ku a yuda e ruman akí tabata di meditá riba ehèmpel di rumannan ku a keda fiel, tantu den pasado komo den nos tempu. Esei a yud’é perseverá i sinti e pas ku Hesus a primintí su siguidónan.—Huan 14:27; 16:33.

13. Kiko por yuda nos perseverá durante persekushon?

¹³ E amor ku nos tin pa Yehova i nos rumannan ta yuda nos perseverá. Semper Hesus a stima su Tata, asta den situashon difísil. El a stima su amigunan tambe. (Huan 13:1; 15:13) Ora nos traha duru pa nos stima Yehova i nos rumannan, nos tambe por perseverá durante persekushon. Dikon nos ta bisa esei? Pa kontestá e pregunta ei, laga nos wak e ehèmpel di Apòstel Pablo.

14. Kiko a yuda Pablo pa keda fiel na Yehova apesar ku e tabata sa ku nan lo a bai mat’é?

¹⁴ Poko tempu promé ku Pablo a ser matá, el a skirbi un karta pa Timoteo. Den e karta el a skirbi: ‘E spiritu ku Dios a duna nos no ta hasi nos kobarde. Mas bien, e spiritu ei ta duna nos poder i amor.’ (2 Tim. 1:7) Kiko Pablo tabata ke men ku e palabranan ei? Pablo tabata ke men ku ora un kristian tin amor profundo pa Yehova esei por yud’é perseverá asta den situashon hopi difísil. (2 Tim. 1:8) Den kaso di Pablo, su amor pa Yehova a yud’é mustra kurashi i keda fiel na Yehova apesar ku e tabata sa ku nan lo a bai mat’é.—Echo. 20:​22-24.

15. Kon nos rumannan ta mustra amor pa otro awe? (Wak e plachi.)

¹⁵ Nos ta atmirá kon nos rumannan ta keda fiel apesar di persekushon. Den algun pais, nos rumannan ta stima otro asina tantu ku nan ta sigui apoyá otro aunke nan por haña nan ku problema pa motibu di esei. Di e manera ei, nan ta imitá e bunita ehèmpel di Akila ku Priskila, kendenan a riska nan bida pa Pablo. (Rom. 16:​3, 4) Por ehèmpel, na Rusia, hopi di nos rumannan a bai para na korte pa animá e rumannan ku a ser arestá. Ora un di nos ruman muhénan ku a ser arestá a mira un grupo grandi di ruman ku a bin apoy’é na korte, el a bira asina emoshoná ku el a keda sin palabra. E amor ku su rumannan a mustra na dje tabata nèt loke e tabatin mester pa yud’é keda fuerte. Sí, e amor ku nos tin pa Yehova i pa nos rumannan ta yuda nos perseverá.

16. Dikon Apòstel Pedro a bisa ku esnan ku lo pasa den persekushon tin motibu pa ta felis? (1 Pedro 4:14)

¹⁶ Nos sa ku Yehova lo keda kontentu ora nos perseverá durante persekushon. (Lesa 1 Pedro 4:14.) Apòstel Pedro a bisa ku esnan ku perseverá apesar di persekushon lo ta felis. Dikon? Pasobra ora nos logra hasi esei, nos sa ku nos tin Yehova su spiritu i ku e ta huntu ku nos. Pedro mes a yega di perseverá ora el a hañ’é ku persekushon i e tabata sa ku e tabatin aprobashon di Dios. Poko tempu despues di Pentekòste di aña 33 D.K., e ofisialnan di tèmpel a wòrdu mandá pa kohe Pedro i e otro apòstelnan pasobra nan tabata prediká. Na e okashon ei Pedro a defendé su fe ku kurashi. (Echo. 5:​24-29) Asta despues ku nan a haña un halá di sota nan no a stòp di prediká. Nan tabata masha kontentu pasobra “Dios a konsiderá nan digno di ser humiá pa kousa di Hesus su nòmber.” Nos tambe por keda kontentu ora nos pasa den persekushon pasobra nos sa ku nos tin Yehova su aprobashon.—Echo. 5:​40-42.

17. Kiko Hesus a bisa su disipelnan e anochi promé ku el a muri?

¹⁷ E anochi promé ku Hesus a muri, el a bisa su disipelnan: “Mi Tata ta stima tur hende ku ta stima mi. Ami tambe lo stima nan.” (Huan 14:21) Nos ta anhelá pa e dia yega ku niun hende lo no odia nos mas pasobra nos ta sirbi Yehova. En bes di esei, tur hende lo stima otro. (2 Tes. 1:​6-8) Tanten, laga nos sigui pensa riba e motibunan ku nos tin pa ta felis apesar ku hende ta odia nos.